Luke 18
18
Atuvefa'ila ve'o'ola againe fa'ina Yesu gigahetalahobuhobu.
1 #
Kl 4:2
Tu Yesu ana tomuliya agaidiya gigahetalahobuhobu be ginavehawaledi higa tova moya'aina hinave'ove'o'ola, be yadi atuvefa'ila againe keke-mo'a hina'ilova. 2Gigayo, “Melala sa'eyana againe tovedewayauga sa'eyana gimiyami, ada Yaubada keke gidamatauseni kadu kaliva keke gidanuwenuwedi. 3Kadu mena melalai-nadi againe sikwa sa'eyadi himiyami, ada tova moya'aina tovedewayauga againe hi'ela'elayewayewa higahegahe higayo, Kaliva sa'eyana agaimeya gidewa koyona ada kotu againe o udavehimeya be agaimeya gidalaufata.
4-5 #
Lu 11:5-9
Tova moya'aina yadi ve'o'ola gidibudibutoyogena ginunauwena tu muliya tauna nuwahinagene gigahe gigayo, Yaubada keke gadamatauseni kadu kaliva keke gadanuwenuwedi tu hida sikwa tova moya'aina dibuku hivevetoyogina fa'ina ganavelugadi. Ka'i keke ganavehimeya be nibaidi agaidiya ginalaufata, au yadi elayewayewa againe wowoku ginalogilogi.” Au hidedemi Yesu gigahetalahobuhobu.
6Kadu Kaiwabu gigayo, “Tovedewayauga koyona yana gahe wananuwenuwena. 7-8#Ha 6:9-11Bana tovedewayauga koyona nonogana kwamayoku givelugadi. Bana Yaubada kaliva hagihagi-mo'ena ma ka'i yana kaliva luluwafadiyao bogi uyadayada Bana againe hitagitagi-fa'ila ma ka'i ginavelugadi o ka'i keke? Ka'i yana veluga againe ginavekwalu? Keke-mo'a, au gagahemi adi veluga fa'ina ginavehimeya, e ginamaduvehimeya. Atu Iya Tohobu'ela babiya ganayewa'ela ana toveya, ka'i kaliva yadi wavetumagana hive'ove'o'ola-ma gananuhagadi o ka'i keke?” Au hidemi Yesu gigahe.
Falisi be takesi ana toyaudi yadi ve'o'ola
ana gahetalahobuhobu.
9 #
Lu 16:15
Tu kaliva tufoidi taudiyao hivetumaganedi vaita badi yegayegadiyao tu mali kaliva moya'aidiyao hi'itatagodi. Hidedemi hinuwanuwa fa'ina Yesu badi agaidiya gigahetalahobuhobu. 10Gigayo, “Kaliva adi'iselu manuwa-tafalolo againe hiluku be hinave'o'ola. Sa'eyana tonagona tafatafalolodiyao adi egana Falisi yadi yo'o kalivana tu sa'eyana takesi ana toyaudi. 11#Md 23:23,28Falisi gimidi tauna fa'ine give'o'ola gigayo, Yaubada yo, againiya gavesiule fa'ina yaku dewa keke mali kaliva moya'aidi yadi dewa amine. Badi to'alasebaseba, vehimeya ana todibutoyoga, to'udo. Kadu gavesiule fa'ina iya keke wada takesi ana toyaudi kiki'afuna amine. 12Wiki sa'eyana sa'eyana hinagene aiyeta luhei galabelabewaviyo be higa ganave'o'ola fa'ina. Gava lokoloko o ka'i mani gavaivaina-ma gadakadi adi yo'o teni tu sa'eyana O Yaubada gavelevele. Au hidedemi Falisi gigahe.
13Tu takesi ana toyaudi yuwa ma'i lauveya gimidi, yana wawowomumu fa'ina keke lobameya gida'itavedadaga au odona gi'aweweni tu gigahe gigayo, Ho Yaubada, iya tokoyona tu udahinekalikaliyeku. Hidedemi gigahe.
14Gagahemi hida kalivai-nadi Yaubada matane gisena yegayegana tu gina yana manuweya, tu bana Falisi ma keke. Fa'ina hai kaliva tauna ana egana ginakilakahina, Yaubada mena kaliva ginakivewowomumuna. Atu hai kaliva tauna ginanuwahobu, medema ana egana Yaubada ginakilakahina.” Au hidedemi Yesu gigahedi.
Yesu we'owe'o gi'itanuwakabubuyedi.
Madiu 19:13-15; Maki 10:13-16
15Himiyami tu fwefweya nonogana Yesu againe hi'ali'aliyedi be ginakibwa'edi higa ginagahenuwakabubuyedi, atu ana tomuliya hi'itadi-yo to'aliya hidakeyedi. 16Tu Yesu we'owe'o gikovadi be Bana againe hina'ela ada ana tomuliya gigahedi gigayo, “We'owe'o keke wanahawatadi au Iya agaikuya hina'ela fa'ina gaveyao vaita we'owe'o keke yadi wakikaiwabu amine, medema Yaubada yana itave'avina againe hinamiyami be ase'asediya ginavehivehimeya. 17Gagahe velemo'ena gava kaliva Yaubada matane keke ginanuwahobu be kwamana kabi'ona amine ginanuwanuwa, medema keke Yaubada yana yo'ogaga agaidiya ginaluku be yana itave'avina againe ginamiyami, keke-mo'a.”
Kwanatubulakahina yana walokoloko Yesu gikilowena.
Madiu 19:16-26; Maki 10:17-27; Madiu 19:27-30; Maki 10:28-31
18Ada tonagona sa'eyana Yesu gitoliluveluvena gigayo, “Tovehawala yamumu, gavaimi ganadewa-yo yawai-vagahiku gananuhagani?”
19Ada Yesu gigahena gigayo, “Gavana fa'ina Iya uhawaveyamumuyeku? Keke tamo hakwadi yamumuna, au Yaubada anakaibe'u-mo'a yamumuna. 20#Yem 20:12-16Yaubada yana vehimeya ahe uhalamanena higa keke unakelele keke unaluve'alika keke unakai'afu, tobohiya yana dewa fa'ina keke unagahe-kawowo. Kadu sa'eyana tama be hina unave'amohimohinedi.”
21Bana kaliva gigayo, “Mena vehimeyai-dina aimo kabi'okuya gavebutu ga'ita'itave'avina be ganunauwena tova adamoya.”
22 #
Lu 12:33
Ada Yesu yana gahe ginogalini-yo gigahena gigayo, “Dewa sa'eyanaga againe aimo ukali'uho. Unana ya lokoloko matatabuna udakimonevedamanena be fatana koyokoyo agaidiya udafolakena, ada au aimo laufata hagihagina lobameya unanuhagana. Unafolakeni-yo una'ela be Iya agaikuya unavetomuliya.”
23Bana kaliva Yesu yana gahe ginogalini-yo nuwana givita-mo'a, fa'ina bana yana walokoloko. 24Yesu yana nuwavita gi'ita-yo gigahe gigayo, “Badi wakalivadiyao yadi luku Yaubada yana yo'ogaga agaidiya au vita-mo'ena. 25Ka'i yomuyomu lakahina ana egana kameli gaima matane ginaluku, medema vitana. Atu ka'i wakalivana Yaubada yana yo'o agaidiya ginaluku be yana itave'avina againe ginamiyami, medema vita-mo'ena.”
26Badi gahe-nadi hinogalini-yo higahena higayo, “Ha! Keke tamo hakwadi anafaiweya kibababala ginanuhagani.”
27Tu Yesu gigayo, “Kaliva adi kibababala keke taudiyao adifaiweya, atu medema Yaubada ana tagalowalowa.”
28Au Fita gigayo, “U'ita, ime yama melala ahegedi be O againiya avetomuliya.”
29-30Yesu gigahedi gigayo, “Gagahe velemo'ena gava kaliva yana melala gihegena o vavinena o tobohiyaneyao o tamaneyao o hinaneyao o natuneyao ginuyabuyabudi be higa Yaubada yana yo'ogaga ana luku fa'ina kaliva ginavenuwa'atadi, medema tova adamoya ana laufata lakahina, lakahi-mo'ena gavadi gavadi yamumuna ginavaina, ada kadu tova mulina yawai-vagahina ginanuhagana.”
Tova anaveto Yesu yana alika fa'ina gilukahihi.
Madiu 20:17-19; Maki 10:32-34
31Tu Yesu vetomuliya ana laufata fa'ina hidedemi gigahe-yo yana yo'o tuwelo gisi'aliyedi be gigahedi gigayo, “Wa'ita, Yelusalema againe kananauna ada gavadi gavadi Yaubada bonana ana to'awatalatalaina Iya Tohobu'ela fa'ikuya hi'etoladina, medema matatabuna ginalakayemu. 32-33Au yo'o tulidiyao kalivai-dina agaidiya hinahegenauweku be hinahawavelaigeku ada hina'ihawadamaneku hinakiwaliku hinamunukoyokoyoku tu hinaluve'alikaku. Atu tova anaveto againe ganamididi-havagi.”
34Au hidedemi Yesu givenuwa'atadi tu tomuliya yana gahe matatabuna hifaniyena. E, bonai-nadi ana nuwanuwa sevasevauyana badi agaidiya, ada gavaimi Yesu gigaheyena-ma keke hidahalamaneni.
Yesu tomatakoyo Yeliko againe gikiveyamumuna.
Madiu 20:29-34; Maki 10:46-52
35Tu Yesu Yeliko liline giyemuyemu tu tomatakoyo edeya gihiyoto leme fa'ina give'ove'o'ola. 36Au yo'o hinauna-ma butudi ginogalini-yo gitoliluvaluva gigayo, “Omi gaveyao?” 37#Md 2:23Kaliva higahena higayo, “Yesu kwanaNasaledi ginanauna.”
38 #
Md 1:1
Bana gikova gigayo, “Yesu, O Devida bwanenena gavaimi uda'itanuwakabubuyeku.”
39Kaliva wai hinagona-ma hidakeyena be higa ginave'amata, tu bana kadu agona gilakata-mo'a gikovadona gigayo, “O Devida bwanenena gavaimi uda'itanuwakabubuyeku.”
40-41Au Yesu ginumidi givehimeya be tomatakoyo Bana againe hinavega'aulena. Ada ahe Yesu liline gi'ela-yo gitoliyena gigayo, “Gavadi nuwanuwa o fa'iniya ganagani?” Bana gigayo, “Kauveya, nuwanuwaku gada'italele.”
42Au Yesu gigahena gigayo, “Mata gina'italele. Uvetumaganeku fa'ina ubwaina.” 43Auhe'ama matana gi'ita'italele ada Yesu gimulimuliyena tu Yaubada ana egana gikikilakahina. Ada kaliva moya'aidi hi'ita-yo kadu badi Yaubada hihawadavadavana.
Trenutno izabrano:
Luke 18: viv
Istaknuto
Podijeli
Kopiraj
Želiš li da tvoje istaknuto bude sačuvano na svim tvojim uređajima? Kreiraj nalog ili se prijavi
© 2003, Wycliffe Bible Translators, Inc. All rights reserved.
