लुका 13
13
पस्चताप वा नस्ट
1उछि जम्मा हक्लाइ केइ मान्छेल्किन येसुलाइ बल्ला, “गालिलिल्किन बलि गरिधर्ल बेलानाइ पिलातसिन केइ गालिलिल्काइ मारइ लाइके होल्को रकत बलि हकिधर्ल पसुको रकतनाइ मिसाइदिल रइल।” 2येसुन होल्काइ बल्-ल्याक, “इत्तिके मार्लाइ ह्व गालिलिलत केति आनेलत भन्दा बढ्ता पापि रइला बाजिके तोरा सम्जिछो? 3उन्खा बया, मुइ तोराल्काइ बल्छु, आ-आफ्ने पाप बइछाड्लो भने तोरा पुनि उन्खाए ने नस्ट हक्नारआछो। 4अनि सिलोआमकर धरहरा ढल्किकइ अठार जन मान्छेलत मर्लाइ रइला, केति होलत यरुसलेमकराइ मान्छेलत भन्दा बढ्ता पापि रइला बाजिके सम्जिछो? 5उन्खा बया, तर मुइ तोराल्काइ बल्छु, तोराल्किन आ-आफ्ने पाप बइछाड्लो भने तोरा पुनि उन्खाए ने नस्ट हक्नारआछो।”
फल बइफल्नार गाछ
6अनि येसुन होल्काइ एउटो उखान बल्-ल्याक, “एउटो मानुसिन आफ्ने अङ्गुर बारिनाइ एउटो नेभाराकर गाछ रोप्ल रइल। होइनिन बेला-बेलानाइ फल फलल्ते कि बाजिके हेरइ आइले तर फल बइपाइले, 7होइनिन बारिनाइ काम गर्नार नोकरलाइ बलल्ते, ‘हेर, ह्य गाछनाइ मुइनिन फल फल्छि कि बाजिके तिन बर्ससम्म अस्याइनाइ, तर फल ने बइफलल्ते। बिनाकाम्नाइ ठउँ मात्र ओगट्छि, अब ह्य गाछलाइ ढल्काइदिक।’ 8तर नोकरिन बाज्ले, ‘मालिक, अजइ एक बर्स अस्याउ। मुइ हेक्र वरिपोरि खनिके मल हाल्दिछिन, 9ह्व पछि फल फलल्ते भने मजारे हकल्ते, बइफलल्ते भने ढल्काइ दिछिन।’”
येसुन बिस्राम-दिननाइ बिसेक पार्ल
10एउटो बिस्राम-दिननाइ येसु सभाघरनाइ मान्छेल्काइ सिछ्या दिधर्ल रइल। 11उछिका एउटि अठार बर्स देखि दुस्ट आत्मा लागिकइ ढाड कुप्रि हक्लि रोगि बेटि रइलि र आफि सिदा हकइ बइसक्नारि हक्लि रइलि। 12येसुन होलाइ देखल्ते र अगाडि बालाइके बलल्ते, “ए बेटि, तुइ आफ्ने रोगबान छुट्कारा पाइलइ।” 13येसुन ह्व उप्रान आफ्ने हात धर्ले र ह्व तुरुन्तइ सिदा हकिके परमेसोरकर पर्सन्सा गरइ लाग्लि।
14ह्व बेटिलाइ येसुन बिस्राम-दिननाइ बिसेक पार्ल देखिके सभाघरकर सासक रिसाइले। होइनिन मान्छेल्काइ बल्-ल्याक, “काम गर्नार हप्तानाइ छ दिन आछि! बिस्राम-दिननाइ किनारइ बिसेक हकइ आइछो? केति बिस्राम-दिन बाएक आने दिन बइने र?”#पर २०:९-१०; बेब ५:१३-१४
15पर्भुन बाज्ले, “ए कपटिलत हो, केति बिस्राम-दिननाइ तोराल्किन आफ्ने गाइ-बर्दइ अथवा गधालाइ गोठबान फुकाइके पानि ख्वाइ बइलाकाओ र? 16ह्य अब्राहामकरि बेटेक अठार बर्स देखि दियाबलसकर बन्धननाइ पर्लि रइलि, बिस्राम-दिननाइ ह्य बन्धनबान छुट्कारा पाइ मजार हो कि बया?” 17येसुकर इन्खा जबाफ सुनिके बिरोदिलत चुपचाप हक्ला तर मान्छेल्को भिड भने येसुन गर्ल अचम्मकर काम देखिके रामाइला।
पासाइकर बिउ
(मति १३:३१-३३; मर्कुस ४:३०-३२)
18येसुन अजइ बाज्तिन जाइले, “परमेसोरकर राज्य इन्खा आछि बाजिके मुइ केतिसिन तुलना गरुँ? 19ह्व पासाइ सागकर एक गेडा बिउ जिन्खाए आछि, ह्यलाइ एउटो मानुसिन आफ्ने बारिनाइ लाकाइके छर्ले, र ह्व उम्रिल पछि बाढिके गाछ हकल्ते र होक्र हङ्गानाइ चरिल्किन खोँदा बानाइछत।”
खमिरकर उखान
(मति १३:३३)
20फेरि येसुन बाज्ले, “परमेसोरकर राज्यलाइ मुइ केतिसिन तुलना गरुँ? 21ह्य ता पिठो फुलाइकर लागि हाल्ल खमिर जिन्खाए हो, एउटि बेटिन तिन डालो सातुनाइ खमिर हाल्लि अनि ह्व सेब्बे सातु खमिर हकिहालल्ते।”
साँगुरो दइलो
(मति ७:१३-१४,२१-२३)
22येसु सहर-सहर र गाउँ-गाउँनाइ पस्तिन सिछ्या दितिन यरुसलेम जाइले। 23एउटो मानुसिन येसुलाइ सोदल्ते, “पर्भु, केति थोराइ मान्छेकिन मात्र मुक्ति पाइछत?”
तर येसुन होल्काइ बल्-ल्याक, 24“साँगुरो दइलोबान भित्र पस्नार कोसिस गरो, किनारइभने मुइ तोराल्काइ बल्छु, धेराइ मान्छेलत साँगुरो दइलोबान भित्र पस्नार कोसिस गर्नाराइआछत तर पसइ सक्नाराइ बइनेत। 25जब घरकर मालिकिन उठिके दइलो थुन्नारआछ अनि तोरा बाइर ठडाइके दइलो ढक्ढक्याइतिन बाज्नारआछो, ‘पर्भु, हाम्रो लागि दइलो उघार्देउ’ अनि होइनिन तोराल्काइ बाज्नारआछ, ‘तोरा कछ्यान आइलाइ हो? मुइ तोराल्काइ बइचिनु।’ 26तोरा फेरि बाज्नारआछो, ‘हाइ तुइसिन बसिके खाइतेले पितेले अनि हाम्रो गाउँ-घरनाइ तुइनिन सिछ्या दितेलइ।’ 27तर होइनिन बाज्नारआछ, ‘मुइ तोराकाइ बल्छु, तोरा कछ्यान आइलाइ हो मुइ बइजानु। ए दुस्ट काम गर्नाराइ हो, इछ्यान जाइहालो।’#भजन ६:८ 28अनि ह्व बेला तोराल्किन आफ्ने पुर्खा अब्राहाम, इसहाक, याकुब र सेब्बाइ अगमबक्ताल्काइ परमेसोरकर राज्यभित्र देख्नारआछो तर तोरा आफि चाइ बाइर फ्याकिलाइ हक्नारआछो अनि तोरा कोहोलो गरिके कान्तिन दारा किट्नारआछो।#मति २२:१३;२५:३० 29मान्छेलत पुर्ब, पछिम, उत्तर, दछिन, चारेदिसाबान आइके परमेसोरकर राज्यनाइ भोज खाइ बस्नारआछत।#मति ८:११-१२ 30हेरो, अखन पइला हक्नाराइ पछाडि हक्नारआछत र अखन पछाडि हक्नाराइ चाइ पइला हक्नारआछत।”#मति १९:३०;२०:१६; मर्क १०:३१
येसु यरुसलेमकर लागि दुखित हक्ल
(मति २३:३७-३९)
31होइ बेला ने केइ फरिसिल्किन आइके येसुलाइ बल्ला, “तुइ इछ्यान निस्किके जाइहाल, किनारइभने हेरोद राजान तुइलाइ मारइ चाइछइ।”
32येसुन होल्काइ बल्-ल्याक, “जाइके ह्व स्याललाइ बल्दिक, ‘आज र कालु मुइ भुत निकाल्नार र बिरामिल्काइ बिसेक पार्नार काम गर्छु अनि तिन दिननाइ मोर काम सिद्याइनार आछु।’ 33तर आज, कालु र पर्सु पुनि मुइ हिनि धरइ पर्छइ किनारइभने यरुसलेम बाएक आने ठउँनाइ अगमबक्ताल्काइ बइमार्याक।
34“यरुसलेम, ए यरुसलेमकराइ मान्छे हो! तोराल्किन अगमबक्ताल्काइ मार्छो र परमेसोरिन तोरा हक्लनाइ पाठाइलाइ दुतकाइ चाइ पाथरिन हिर्काइछो। जिनिखे पोथिन आफ्ने चिउनाल्काइ पखेटान छोपिके धर्छइ, उनिखे ने मुइ तोर सन्तानकाइ जम्मा गर्नार कत्ता कोसिस गर्नाइ तर तोरा बइमान्लो। 35हेर, परमेसोरिन तोर घर त्याग्लाछ। मुइ तुइलाइ बल्छु, जखनसम्म तुइनिन ‘परमपर्भुकर नाउँनाइ आइनार धन्यकर हो’ नबाजुन्जेल सम्म तुइनिन मुइलाइ बइदेखस।”#भजन ११८:२६; यर २२:५
Aktualisht i përzgjedhur:
लुका 13: MAJH
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.