लुका 12
12
कपटिल्को बिरुद्दनाइ चेतावनि
(मति १०:२६-२७)
1जब हजारउ मान्छेल्को भिड जम्मा हक्ला, इछिसम्म कि एउटोन अर्कोलाइ पेलापेल गरइ लाग्ला, येसुन पइले आफ्ने चेलाल्काइ बल्-ल्याक, “तोरा फरिसिल्को खमिरदेखि होसियार बसो। ह्व खमिर होल्को कपटि बिचार हो।#मति १६:६; मर्क ८:१५ 2किनारइभने छोपिके धर्ल सेब्बे कुरो देखिनारआछ र नुकाइके धर्ल सेब्बे कुरो था पाइनारआछ।#मति ४:२२; लुक ८:१७ 3तोराल्किन आँधारिनाइ बाज्ल कुरो उज्यालोनाइ सुन्नारआछ। कोठाभित्र कानेखुसि गर्ल कुरो घरकर धुरिबान साराइनारआछ।”
कुनसिन डाराइ पर्छइ?
(मति १०:२८-३३;१२:३२)
4येसुन बाज्ले, “हे साथिलत, मुइ तोराल्काइ फेरि बल्छु, तोरा मान्छेल्कोसिन जुनडाराओ। होल्किन सरिरलाइ मात्र मारइ सक्छत तर आत्मालाइ चाइ केइ पुनि गरइ बइसकत। 5तर कुनसिन डाराइपर्छइ बाजिके मुइ तोराल्काइ बल्छु, परमेसोरसिन डाराओ। किनारइभने ह्वसिन सरिरलाइ मार्लपछि नरकनाइ फ्याङ्नार अधिकार आछि, होइसिन ने डाराओ।
6“केति पाँचुटाइ भँगेरालत दुइ सिक्कानाइ बइबिकत र? भँगेरा इन्खा सस्तो हक्तिन पुनि परमेसोरिन एउटोलाइ पुनि बइबिर्साक। 7तोराल्को ता कापालकर बार्समेत परमेसोरिन गन्लाछ। होइ हुदान जुनडाराओ, तोरा धेराइ भँगेरा भन्दा बढ्ता मोलकराइ आछो।
येसुकर बारेनाइ आनेल्काइ बलइ
(मति १०:३२-३३;१२:३२;१०:१९-२०)
8“मुइ तोराल्काइ बल्छु, जुनिन मुइलाइ मान्छेल्को अगाडि मोर पर्भु हो बाजिके सुइकार गर्छइ, होलाइ मानुसकर बेटाकिन पुनि परमेसोरकर स्वर्गदुतको अगाडि आफ्ने हो बाजिके सुइकार गर्नारआछ। 9तर जुनिन मुइलाइ मान्छेल्को अगाडि बइचिनु बाज्छइ, ‘मुइ पुनि होलाइ परमेसोरकर स्वर्गदुतको अगाडि बइचिनु बाज्नारआछु।’
10“‘जुनिन मानुसकर बेटाककर बिरुद्दनाइ बाज्छइ, होइनिन माफ पाइछइ, तर पबित्र आत्माकर निन्दा गर्नारिन चाइ कइले पुनि माफ बइपाक।’#मति १२:३२; मर्क ३:२९
11“‘जब मान्छेल्किन तोराल्काइ आठाइके सभाघर, हाकिम र न्यायधिसकोउछि लाकाइनार आछत। ह्व बेला केति बाज्नार हो बाजिके चिन्ता जुनगरो। 12किनारइभने होइ बेला तोराल्किन केति बाजइ पर्नार हो पबित्र आत्मान सिकाइनार आछ।’”#मति १०:१९-२०; मर्क १३:११; लुक २१:१४-१५
मुर्ख धनि मानुसकर उखान
13मान्छेल्को भिडबान एउटो मानुसिन येसुलाइ बलल्ते, “गुरु, भाएरकर अङ्सबन्डा गर्दिक बाजिके मोर दाजिलाइ बल्दिक न।”
14तर येसुन होलाइ बलल्ते, “हे साथि, कुनिन मुइलाइ तोराल्को न्याय गर्नार अथवा अङ्सबन्डा लाइनार बानाइले।” 15अनि फेरि येसुन होल्काइ बल्-ल्याक, “होसियार हको, सेब्बे लोब-लालचबान जोगिकइ बसो किनारइभने धन-सम्पति जत्ता धेरइ हक्तिन पुनि मानुसलाइ होइनिन साँच्चिकर जिबन चाइ बइदेक।”
16येसुन होल्काइ एउटो उखान बल्-ल्याक, “एउटो धनि मानुसकर खेतबारिनाइ धेरइ अन्न फलल्ते। 17होइनिन मनमने सोचइ लाग्ले, ‘ह्य सेब्बे अन्न धर्नार ठउँ ने बइने, अब मुइ केति गरइ?’ 18अनि होइनिन बाज्ले, ‘अब मुइ स्याउनो भाकारि भत्काइकइ बुङ्डो-बुङ्डो भाकारि बानाइछु, अनि मोर सेब्बे अन्न र चिजबिज उछि धर्छु। 19अनि मुइ आफिलाइ बल्नारआछु, तुइ किन्खा आसिसित आछस, तुइसिन धेरइ बर्सलाइ पुग्नार सम्पति आछि, सुखसिन खा, पि र मोज-मस्ति गर।’ 20तर परमेसोरिन होलाइ बलल्ते, ‘ए मुर्ख, आज राति ने तुइ मर्नार आछस र जे कुरो तुइनिन आफ्ने लागि साँचिकइ धर्ल अब ह्व कुनकर हक्नारआछि?’”
21अनि येसुन होलाइ बलल्ते, “आफ्ने लागि मात्र धन-सम्पति थुपार्नार तर परमेसोरकर नजरनाइ धनि बइहक्नारकर हालत इन्खाए ने हक्छि।”
चिन्ता जुनगर
(मति ६:२५-३४)
22येसुन आफ्ने चेलाल्काइ बल्-ल्याक, “होइ हुदान बाचइकर लागि केति खाइनार र सरिरकर लागि केति लाइनार बाजिके चिन्ता जुनगरो। 23किनारइभने जिबन खाइनार कुरो भन्दा बड्खो र सरिर लाइनार कुरो भन्दा बड्खो हो। 24कावाल्काइ हेरो होल्किन न छर्छत, न बटल्छत, न होल्किन भाकारिनाइ जम्मा गर्छत, तर पुनि परमेसोरिन होल्काइ ख्वाइस्याक। तोरा ता चरिलत भन्दा एकदम धेरइ मोलकराइ आछो। 25तोरा मद्दे कुनिन चिन्ता गरिके आफ्ने आयुलाइ एक छिन बाढाइ सक्छइ? 26इन्खा स्यान्खि काम पुनि गरइ बइसको भने तोरा किनारइ आने कुरोकर चिन्ता गर्छो? 27लिलि फुललाइ हेरो, होलत न काम गर्छत न लाइलाइ लुगा बुन्छत, तर मुइ तोराल्काइ बल्छु, सोलोमन राजासिन धेरइ धन-सम्पति हक्तिन पुनि लिलि फुल जिन्खाए सजिसजाउ बइरइल।#१रा १०:४-७; २इति ९:३-६ 28आज हक्नार र कालु आगिनाइ फ्याङ्नार घाँसलाइ परमेसोरिन इनिखे सिँगार्छइ भने झन परमेसोरिन तोराल्काइ लाइनार लुगा बइदेक र? खइ तोराल्को बिस्वास?
29“होइ हुदान केति खाइ, केति लाइ बाजिके चिन्ता जुनगरो। 30किनारइभने परमेसोरलाइ बिस्वास बइगर्नाल्किन ह्य कुरोकर चिन्ता गर्छत, तर तोराल्को स्वर्गकर ब्वान तोराल्काइ चाइनार सेब्बे कुरो जान्छइ। 31पइले परमेसोरकर राज्यलाइ हेरो अनि तोराल्काइ चाइनार सेब्बे कुरो दिनारआछ।”
स्वर्गकर धन-सम्पति
(मति ६:१९-२१)
32येसुन बल्-ल्याक, “ए स्यान्खि बाथान, जुनडाराओ! किनारइभने परमेसोरिन तोराल्काइ आफ्ने राज्य देइ खुसि हक्लाछ। 33तोराल्किन आफ्ने धन-सम्पति बेचिके आइल पइसा गरिबकाइ दिखन। आफ्ने लागि कइले थोत्रो बइहक्नार थइलिलत बानाओ। कइले नस्ट बइहक्नार धन-सम्पति स्वर्गनाइ जम्मा गरो। उछि चोर पुनि बइलाग र किरान पुनि बइखाक। 34किनारइकि जछि तोराल्को धन-सम्पति आछि, उछि ने तोराल्को मन पुनि हक्छि।
तयारि हकिके बसो
35“तोरा जुनसुकइ बेला पुनि तयारि हकिधरो र तोराल्को बत्ति जिगाइ धरो।#मति २५:१-१३ 36तोरा इन्खा नोकर हको, आफ्ने मालिक ब्याहाकर भोजबान आइके दइलो ढक्ढकाइलेसात नोकरिन दइलो खोल्दिछि। 37मालिक आइतिन जागे बसिधर्लाइ ह्व नोकरकिन स्याबासि पाइनारआछत र होलत खुसि हक्नारआछत। साँच्चि मुइ तोराल्काइ बल्छु, मालिकिन पाहुनालाइ जिन्खाए नोकरकाइ मेजमानि गरिके खाइ बसाइनारआछ र होल्को सेवा गर्नारआछ। 38यदि मालिक ढिलो गरिके आदारातनाइ वा ह्व भन्दा अजइ ढिलो आइतिन पुनि आफ्ने नोकरकाइ जागे बसिधर्लाइ भेट्टाइछइ भने, साँच्चि ने ह्व नोकरकिन अजइ धेरइ स्याबासि पाइनारआछत। 39तर ह्य जानो, कि यदि चोर आइनार समय मालिकलाइ था हक्लान ह्व जागे बस्नाल, र चोरलाइ घर फोरिकइ पसइ बइदिनाल्ति। 40तोरा पुनि तयारि हकिके बसो, किनारइभने मानुसकर बेटाक तोराल्किन बइसोच्ल बेलानाइ आइनारआछ।”
इमान्दार नोकर कुन हो?
(मति २४:४५-५१)
41अनि पत्रुसिन येसुलाइ सोदल्ते, “पर्भु, तुइनिन ह्य उखान हाइलाइ मात्र बल्ल हो कि आनेल्काइ पुनि बल्ल हो?”
42पर्भुन बाज्ले, “बिस्वासि र बुद्दिमानि नोकर कुन हो? होइ हो, जुन्लाइ मालिकिन घरकर सेब्बे कामकर जिम्मा दिलपछि होइनिन आने नोकरकाइ ठिक-ठिक समयनाइ खाइनार कुरोकर बन्दोबस्त गर्दिस्याक। 43मालिक फर्किके आइतिन ह्व नोकरलाइ उन्खाए काम गरिधर्ल भेट्टाइले भने होलाइ इनाम दिनारआछ। 44साँच्चि मुइ तोराल्काइ बल्छु, मालिकिन ह्व नोकरलाइ आफ्ने सेब्बे धन-सम्पतिकर जिम्मा दिनारआछ। 45तर ह्व नोकरिन आफ्ने मननाइ ‘मोर मालिक ढिलो फर्किछइ’ बाजिके जथाभाबि खाइके, पिकइ र मातिकइ आने नोकर चाकरकाइ हिर्काइ थाल्ले भने, 46होइनिन बइसोच्ल दिन र समयनाइ होक्र मालिक आइनारआछ, अनि होलाइ दन्ड दिनारआछ, र होक्र हालत परमेसोरलाइ बिस्वास बइगर्नाल्को जिन्खाए हक्नारआछि।
47“आफ्ने मालिककर इछ्या जानिकइ पुनि तयार बइहक र मालिककर इछ्या अन्सार काम बइगर भने होइनिन धेरइ कुटाइ खाइछइ। 48तर मालिककर इछ्या था नपाइके कुटाइ खाइनार काम गर्नार नोकरिन चाइ थोरइ कुटाइ खाइछइ। जुनलाइ धेरइ दिलाछ, ह्वबान धेरइ माग्नारआछ। उन्खाए गरिके जुनिन धेरइ जिम्मा पाइलाछ, होइनिन अजइ धेरइ देइपर्नारआछ।”
परिवारनाइ फाटो
(मति १०:३४-३६)
49येसुन बाज्ले, “मुइ धर्तिनाइ आगि लाइ आइल हो। ह्य आगि पइला ने सल्किनासिन मजार हक्नाल्ति। 50मुइनिन एउटो दुखकर बप्तिस्मा लेइपर्छइ र ह्व बप्तिस्मा नलिन्जेल सम्म मुइलाइ सान्ति ने बइहक।#मर्क १०:३८ 51केति तोरा मुइ धर्तिनाइ मेलमिलाप गराइ आइल हो बाजिके ठान्छो? बया, मुइ ता फाटो गराइ आइल हो। 52अबसिन पाँचुटाइको परिवारनाइ फाटो हक्नारआछि। तिन्टाको बिरुद्दनाइ दुइटाइ र दुइटाल्को बिरुद्दनाइ तिन्टाइ हक्नारआछत। 53ब्वाककर बिरुद्दनाइ बेटाक र बेटाककर बिरुद्दनाइ ब्वाक, आमेककर बिरुद्दनाइ बेटेक र बेटेककर बिरुद्दनाइ आमेक, सासेककर बिरुद्दनाइ बुहारेक र बुहारेककर बिरुद्दनाइ सासेक हक्नाराइआछत।”#मिका ७:६
समयकर चिन्न
(मति १६:२-३;५:२५-२६)
54येसुन मान्छेल्को भिडकाइ पुनि बल्-ल्याक, “तोरा पछिमदिसउँने बादल उठ्ल देखिके ‘अब पानि पर्छि’ बाज्छो र उन्खाए हक्छि। 55जब दछिनबान बातास चल्तिन तोरा ‘अब गर्मि हक्छि’ बाज्छो अनि उन्खाए ने हक्छि। 56ए कपटिलत, तोरा धर्ति र आकासलाइ हेरिकइ पानि पर्छि कि बइपरि बाजिके जान्छो, तर ह्य समयनाइ हकइ आइनार घटनाकर चिन्नचाइ तोरा किनारइ बइबुजो?
बिरोदिसिन मिलिहाल
(मति ५:२५-२६)
57“कुन्टो कुरो ठिक हो बाजिके तोरा आफि किनारइ छुट्टाइ बइसको? 58कुन्नुल्किन तुइलाइ दोस लाइके अदालतनाइ लाकाइले भने बाट्नाइ जाइतिन ने दोस लाइनारसिन मिलिहाल। नत्र होइनिन तुइलाइ न्यायधिसकर उछि लाकाइके सिपाइको जिम्मा लाइनारआछ र सिपाइकिन लाकाइके तुइलाइ झ्यालखन्डनाइ थुन्नारआछ। 59मुइ तुइलाइ बल्छु, तिरइ पर्नार सेब्बे पइसा नतिरुन्जेलसम्म तुइ उछ्यान छुट्टइ बइपास।”
Aktualisht i përzgjedhur:
लुका 12: MAJH
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.