लुका 14
14
येसुन बिस्राम-दिननाइ बिसेक पार्ल
1एक बिस्राम-दिननाइ येसु फरिसिल्को एउटो सासककर घरनाइ भात खाइ जाइले। उछि हक्लाइ फरिसिल्किन येसुलाइ किनिखे फसाइनार बाजिके बस्लाइ रइला। 2हात-गोड सुन्निनार रोग हक्ल एउटो मानुस येसुकर अगाडि बसिधर्ल रइल। 3येसुन धर्म-गुरु र फरिसिल्काइ सोद्ल्याक, “परमेसोरकर नियम अन्सार बिस्राम-दिननाइ बिरामिल्काइ बिसेक पारइ हक्छइ कि बइहक?”
4तर होल्किन किछु पुनि बइबाज्ला, अनि येसुन ह्व बिरामिलाइ छुइकइ बिसेक पार्ले र होलाइ पाठाइदिल्ते। 5अनि येसुन होल्काइ बल्-ल्याक, “बिस्राम-दिननाइ तोराल्को आफ्ने बेटार-बेटेर वा गाइ-बर्दइ इनारनाइ खस्ला भने होलाइ तुरुन्तइ बइनिकालो र?”#मति १२:११
6फेरि होल्किन केइ पुनि जबाफ देइ बइसक्ला।
पाउनाकर सत्कार
7अनि भोजनाइ आइलाइ पाउनाल्किन मान पाइनार ठउँ छान्ल देखिके येसुन होल्काइ एउटो उखान बल्-ल्याक, 8“तुइ ब्याहाकर भोजनाइ जाइतिन मान पाइनार ठउँनाइ जुनबस। किनारइभने तुइभन्दा बढ्ता मान पाइलाइ मान्छेकिन उछि निम्तो पाइलाइ हुदो। 9तुइ र होलाइ निम्तो दिनारिन आइके तुइलाइ बल्नारआछ, ‘ह्यलाइ बस्नार ठउँ छाड्दिक’ ह्व बेला तुइ लाजमर्दो हकिके सेब्बाइभन्दा हेठ्ठ बसइ पर्स्यास। 10जब तुइनिन निम्तो पाइछस जाइके हेठ्ठ बस र निम्तो दिनारिन आइके तुइलाइ ‘उप्र मान पाइनार ठउँनाइ जाइके बस’ बाजिके बल्नारआछ। ह्व बेला तोर सेब्बाल्को अगाडि इज्जत हक्नारआछि।#हितो २५:६-७ 11किनारइभने जुनिन आफिलाइ उच्च पार्छइ ह्व होच्याइछइ र जुनिन आफिलाइ होच्याइछइ ह्व उच्च हक्नारआछ।”#मति २३:१२; लुक १८:१४
12अनि येसुन निम्तो दिनार फरिसिलाइ बलल्ते, “तुइनिन भोज लाइतिन, आफ्ने साथिकाइ, दाजि-भाइकाइ, आफन्तल्काइ अनि धनि छिमेकिल्काइ निम्तो जुनगर, नत्र ता होल्किन पुनि तुइलाइ भोजनाइ निम्तो दिके तोर गुन फर्काइनारआछत। 13बुरु तुइनिन भोज लाइतिन गरिबकाइ, लङ्गडाल्काइ र अन्धाल्काइ बालाउ। 14तब तुइनिन आसिस पाइनारआछस, किनारइभने होल्किन तोर गुन फर्काइ बइसकत। तर धर्माति मान्छेलत मर्लबान जिउँते हक्तिन हेक्र इनाम तुइनिन पाइनारआछस।”
बड्खो भोजकर उखान
(मति २२:१-१४)
15येसुसिन खाइ बस्नार एउटोन ह्य कुरो सुनिके बाज्ले, “परमेसोरकर राज्यनाइ भोज खाइ पाइनाराइ ता आसिसित हो।”
16येसुन होलाइ बलल्ते, “एउटो मानुसिन बड्खो भोज तयार गरिके धेराल्काइ निम्तो दिल्याक। 17भोज तयार हक्लपछि होइनिन आफिन निम्तो दिलाल्काइ ‘आहो खाइनार बेला हकल्ते’ बाजिके नोकरलाइ बालाइ पाठाल्ते। 18तर होलत सेब्बाल्किन एउटो-एउटो बाहाना बानाइके आइ बइमान्ला। एउटोन बाज्ले, ‘मुइनिन खेत किन्लाछु, मुइ ह्व खेत हेरइ जाइ पर्लाछ। मुइलाइ माफ गर्देउ, मुइ आइ बइसकु।’ 19अनि अर्कोन बाज्ले, ‘मुइनिन पाँच हल बर्दइ किन्लाछु होल्काइ जोति हेरइ पर्छइ होइ हुदान मुइ आइ बइसकु, मुइलाइ माफ गर्देउ।’ 20अजइ अर्कोन बाज्ले, ‘मुइनिन ता भख्खर ब्याहा गर्लाछु। होइ हुदान मुइ आइ बइसकु।’ 21अनि नोकर आइके मालिकलाइ सेब्बे कुरो बल्दिल्ते। घरकर मालिकिन रिसाइतिन आफ्ने नोकरलाइ बलल्ते, ‘चान्चाने जाइके सहरकर बाटनाइ र गल्लिनाइ हक्लाइ गरिबकाइ, रोगिल्काइ, लङ्गडाल्काइ र अन्धाल्काइ बालाइके इछि आन्खन।’ 22ह्य काम गरिसक्ल पछि नोकरिन बाज्ले, ‘मालिक तुइनिन बल्ल जिन्खाए मुइनिन सेब्बाल्काइ बालाइके आन्नाइ, तर अजइ पुनि ठउँ खालि आछि।’ 23मालिकिन फेरि नोकरलाइ बलल्ते, ‘मुलबाट र गल्लिदिस जाइके मान्छेल्काइ कर लाइके आन्खन र मोर घर भर्दिक। 24किनारइभने मुइ तोराल्काइ बल्छु, निम्तो दिलाइ मद्दे कुन्नुल्किन पुनि मोर भोजकर स्वाद चाखइ पाइनाराइ बइनेत।’”
चेलाल्किन त्यागइ पर्नार कुरो
(मति १०:३७-३८)
25एक दिन मान्छेल्को बड्खो भिड येसुसिन जाइतिन रइला। येसुन होल्कोदिस फर्किके बल्-ल्याक, 26“यदि कोइ मोर पछि लागइ चाइछइ भने होइनिन आफ्ने आमेक-ब्वाक, बोहेक, बेटाक-बेटेक, दाजि-भाइ, दिदि-बइनि र आफिलाइ मुइलाइ भन्दा धेरइ मया गर्छइ भने ह्व मोर चेला हकइ बइसक।#मति १०:३७ 27जुनिन आफ्ने कुरुस आफि बोकिके मोर पछि बइलाग भने ह्व मोर चेला हकइ बइसक।#मति १०:३८;१६:२४; मर्क ८:३४; लुक ९:२३ 28यदि तोरा मद्दे कुन्नुल्किन धरहरा बानाइ चाइछो भने, कत्ता खर्च लाग्छइ, आफिसिन हक्ल खर्चन पुग्छइ कि बइपुग बाजिके केति होइनिन पइला ने हिसाब बइगरक र? 29यदि होइनिन धरहराकर जग धरिके पुरा गरइ बइसक्ले भने, देख्नारकिन होलाइ गिल्ला गर्तिन बाज्नारआछत, 30‘ह्य मानुसिन बानाइ ता सुरु गर्ले तर पुरा गरइ बइसक्ले।’ 31कुन्टो राजा हुदो आफिसिन हक्लाइ दस हजार सेना लिके अर्को बिस हजार सेना हक्ल राजाकर बिरुद्दनाइ लडाइ लड्इ सक्छु कि बइसकु बाजिके पइले ने बसिके सल्ला बइगरक र? 32यदि होइनिन बइसक्नार हो भने अर्को राजा बद्दुर हक्तिन ने मिलापकर सर्त सोदइ आफ्ने राजदुतलाइ पाठाइनारआछ। 33होइ हुदान तोरा मद्दे जुनिन आफिसिन हक्ल सेब्बे कुरो त्यागइ बइसक, ह्व मोर चेला हकइ बइसक।
काम बइलाग्नार नुन
(मति ५:१३; मर्कुस ९:५०)
34“नुन मजार चिज हो, तर नुनकर स्वाद जाल्ते भने फेरि ह्व केतिन नुनिलो पार्नार? 35ह्व ता न जमिनकर लागि न मलकर लागि काम लाग्छि होइ हुदान मान्छेल्किन फ्याङ्छत। जुनकर सुन्नार कान आछि, होइनिन सुन्दिक।”
Aktualisht i përzgjedhur:
लुका 14: MAJH
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2024 (Active), Mother Tongue Translators Society and Wycliffe Bible Translators, Inc. All rights reserved.