लुका 6
6
नाजामे याकमि खा
(मत्ति १२:१-८; मरकुस २:२३-२८)
1नाजामे यिडे़ॽ सिचाम सोङ्रामि राम लिसाङ येसु खोसे़हा चोङ्साजिनुङ खेॽमे़ॽनिङ्सिडे़। खोसे़हा चोङ्साजि सिचाममि खाॽवा युप्नुङ हुगे़ॽ नुक्साङ चाबुगामि। 2इगो खाङ्नुङ फरिसिजिडे़ॽ येसुमि चोङ्साजि लुसुजि, “नाजामे याकपेॽ यहुदि धारमिक नियमडे़ॽ ए़ले़ःॽमे लुबॽआ योम्बोकसो हे़निङे़ॽ इन्ढोङ्डे ले़ःॽमे़ॽनिङ्सिन्डानुमे ?” 3येसुडे़ॽ माहाजि लुसुजि, “दाउद हाङ्बानुङ खोम लङ्गामजि सागे़ॽ सिमाबेॽ खोसे़ॽ इमाङ ले़ःॽपॽआ ले़टे़ ? इमा हे़निङे़ॽ मे़नेडानुमे ? 4खोसे़ॽको मन्दिर होङ्सिॽयु पे़ए़न्नुङ निवाहाङ्मि निङ्बेॽ चेॽटिबॽआ चरेपा लङ्गामजिनुङ हाःजोसु। कानिङ्मि यहुदि धारमिक नियमबेॽको याडाङ्बाजिबाङ हाइखा आसे़ॽसो माहा चरेपा चामा मे़म्फेने़। तर दाउदडे़ॽको खोसे़ॽरेॽ ने़ॽनि हाइखा याॽमिजिसो पिसुजि#१ समुएल २१:१-६।” 5मोबा येसुडे़ॽ खा येस्साङ लुसु, “का याॽमिमि पसागो नाजामे याकमिसो परभु ले़ङे।”
हुक हेघे़ॽपॽआ याॽमि नुबुक्पॽआ
(मत्ति १२:९-१४; मरकुस ३:१-६)
6फेरि हाइके नाजामे याकपेॽ येसुडे़ॽ यहुदिजि सुम्ढाम खिमबेॽ खे़ॽनुङ नुबा खा इःडुजि। मोबेॽ चुप्थिङ हुक हेघे़ॽपॽआ याॽमिसो टुसा। 7यहुदि धारमिक नियम इःॽखुबानुङ फरिसिजिडे़ॽ येसु आप्टिक टिमामि दाउ योक्मे़ॽनिङ्सिडुजे। मोडोगे़ॽ येसुडे़ॽ नाजामे यिडे़ॽसो मो हुक हेघे़ॽपॽआ याॽमिमि हुक नुबोक्इन्डुए ना लुनुङ माहाजिडे़ॽ खाङ्मे़ॽनिङ्सिडुजे। 8माहाजिमि निवाबेॽहा खा लेडोक्नुङ येसुडे़ॽ मो हुक हेघे़ॽपॽआ याॽमि के़डु, “हे़न येःपोक्नुङ इगोबेॽ आबे!” मोडोक्पेॽनोॽ मो याॽमि येःपोक्नुङ पोम्बेॽ आबा। 9मोबा येसुडे़ॽ माहा याॽमिजि लुसुजि, “हागो लुङानिङे, कानिङ्मि यहुदि धारमिक नियमडे़ॽ नाजामे याकपेॽ इमाङ्डे ले़ःॽमा नुये लुटे़ ? भलाइ ले़ःॽमेन्डे सुजामे ? हिङ्मे़ॽमे लुयेन्डे ? सेॽनेमे लुये ?” 10मोबा खोसे़ॽ माहा याॽमिजि वाःप्नुङ मो याॽमि लुसु, “हे़ने़ए़ हुक खिक्से!” मोसे़ॽ हुक खिङ्माबेॽको खोसे़ए़ हुक नुघे़ॽपेबॽआ ले़टा।
11इगो खाङ्नुङ यहुदि धारमिक नियम इःॽखुबानुङ फरिसिजि सुरिगे़ॽ पुम्डिॽखे़ॽनुङ येसु इमाङ ले़ःॽमे लुनुङ मोत्ता इःबोगामि।
येसुडे़ॽ बारो जना एप्पा चोङ्साजि से़न्बॽआ
(मत्ति १०:१-४; मरकुस ३:१३-१९)
12इकखेॽ येसु टोक्टोक्मे़ॽटु खे़ॽनुङ सेन्से निवाहाङ्नुङ पारथना ले़टा। 13माक्मि लिनुङ येसुडे़ॽ चोङ्साजि के़ःॽनुङ माहाजिबेॽ बारो जना चोङ्सा से़नुजि मोबा माहाजिनोॽ एप्पा चोङ्साजि लुमे निङ युङ्बेॽटुजि। 14इडोॽ येसुडे़ॽ से़न्बॽआ बारो जना चोङ्साजि इघाजिनोॽ ले़टामे- सिमोन, खोनोॽ येसुडे़ॽ पत्रुस निङ्सो युङ्बेॽपॽआ ले़टे़। सिमोनमि निसा अन्दरियास, याकुब, युहन्ना, फिलिप, बारथोलोमाइ, 15मत्ति, थोमा, अल्फायसमि पसा याकुब, देसभक्त लुमे सिमोननुङ 16याकुबमि पसा यहुदा मोबा यहुदा इस्करियोत, मोसे़ॽनोॽ ए़क्साङ येसु धोका पिसु।
येसुडे़ॽ बेॽलो याॽमिजि नुबोक्पॽआ
(मत्ति ४:२३-२५)
17येसु खोमि एप्पा चोङ्साजिनुङ टोक्टोक्माबाङ युरा उङ्माबेॽ खोजि इक्को डेम्माबेॽ लेस्सामि। मोबेॽ बेॽलो खो नेन्जाखुबाजिनुङ हाइक्खा याॽमिजिसो सुम्बॽआ ले़टामि। यहुदियाबेॽहा चोप ठाउँबाङ, यरुसलेम सहरबाङ मोबा टोम्लिॽवामि के़क्पेॽहा ठाउँ टुरोसनुङ सिदोन सहरबाङ्सो बेॽलोनोॽ याॽमिजि मोबेॽ लेम्बॽआ ले़टामे। 18मोबेॽ माहाजि येसुमि खा खेम्सिॽनुङ टुक्मा खेःबाङ नुबोक्मे़ॽसिॽ मोबेॽ लेम्बॽआ ले़टामे। मोबा मङे़ॽमा चाबे़ॽ सुजाबॽआजिसो नुघडामि। 19चोप याॽमिजिडे़ॽ येसु के़क्मा योगुजि इन्ढोङ्होङ खोबाङ्ए सक्तिडे़ॽ चोप याॽमिजि नुबोगामे।
येसुडे़ॽ पिबॽआ अरति
(मत्ति ५:१-१२)
20मोबा ए़क्साङ येसुडे़ॽ टाङ्बामि चोङ्साजि खाङ्नुङ लुसुजि,
“इमाङ्सो मे़ङ्काप्खुबाजि हे़निङे़ॽ निवाहाङ्बाङ आसिस चुप्मिन्डानुमे! इन्ढोङ्होङ निवाहाङ्मि राज्य हे़निङ्मिनोॽ ले़ये।
21 हे़निङ सगे़ॽ सिबॽआजि हे़निङे़ॽ निवाहाङ्बाङ आसिस चुप्मिन्डानुमे! इन्ढोङ्होङ हे़निङ उक्खान्डानिङे।
हे़निङ आयु हाःप्खुबाजि हे़निङे़ॽ निवाहाङ्बाङ आसिस चुप्मिन्डानुमे! इन्ढोङ्होङ हे़निङ साप्थाङ्डोक्इन्डानिङे।
22 “का याॽमिमि पसाबेॽ बिस्वास ले़ःॽपॽआसे़ॽ याॽमिजिडे़ॽ हे़निङ हेला ले़ःॽमिहोङ, खिम्डेमबाङ यिक्मिहोङ, सिःक्चामिहोङ, हे़निङ्मि बदनाम ले़ःॽमिहोङ हे़निङे़ॽ आसिस चुप्मिन्डानुमे। 23मोडोक्पेॽ साप्थाङ्मानुङ सिम्आसानिङे इन्ढोङ्होङ खाक्सानुमे, हे़निङ्मि लागि थाङ्सिरिॽटु बेॽए इनाम युङ्बॽआ ले़हा। याक्लोहा अगमबक्ताजिसो हे़निङ चुङ्जाघुबाजिमि टुबालाबाजिडे़ॽ इडोक्नोॽ चुङ्जासुजे।”
24 “तर हे़निङ मक्खाम्डेमबेॽ, आइ काप्चाघुबाजि! इन्ढोङ्होङ इगो जुनिबेॽनोॽ चोप सुख हे़निङे़ॽ चुप्पेटानुमे।
25 इनाःमा, आइ उक्खारो चाघुबाजि! इन्ढोङ्होङ हे़निङ साक्मेन्जा सिॽइन्डानिङे।
इनाःमा, आइ साप्थाङ्मानुङ यिचाघुबाजि इन्ढोङ्होङ हे़निङ खेः आङ्मानुङ हाःप्साङ पिन्डुन्डानिङे!
26 इनाःमा, आइ याॽमिजिबाङ ओहाङ चुप्खुबाजि इन्ढोङ्होङ मोडोक्हा ओहाङ्गो मो याॽमिजिमि टुबा लाबाजिडे़ॽसो मे़ॽनोक्हा अगमबक्ताजिसो इडोक्नोॽ ओहाङ पिसुजे।”
कानिङ सिॽचाघुबाजिसो नम्नम ले़ःॽमे खा
(मत्ति ५:३८-४८; ७:१२)
27 “तर के़हा खा खेम्खुबाजि हे़निङ के़ॽ लुनिम्ने़, हे़निङ सिॽचाघुबाजिसो नम्नम ले़टानुमे मोबा हे़निङ हेला ले़ःॽखुबाजि नुरोॽ ले़टानुमे। 28हे़निङ चापहिघुबाजि आसिस पिसानुमे। हे़निङ मङे़हा बेबहार ले़ःॽमिहोङ खोजि नुरोॽ लिमिरो लुनुङ निवाहाङ्नुङ पारथना ले़टानुमे। 29हे़निङ्मि इक्को याम्दाङ्बेॽ फे़ःक्मिहोङ हाइकेलामसो टाःप्पेॽटानुमे। हे़ने़ए़ ओप्ताङ लाघे़ॽमा योक्खुबाजि हे़निङ्मि लाॽलिङ्सो पिहाक्सानुमे। 30ङाःक्खुबाजि पिसानुमे, लाघे़ॽखुबाजिनुङ फेरि ए़ॽङाःगानुमे। 31हाइखाजिडे़ॽ हे़निङ इमाङ ले़ःॽपेॽपॽआ नेन्जान्डानुमे हे़निङे़ॽसो खोजि मोडोक्नोॽ ले़टानुमे।
32 “नम्नम ले़ःॽखुबाजिरेॽ हे़निङे़ॽसो नम्नम ले़न्डानुमहोङ्गो हे़निङे़ॽ ओहाक चुप्मे इमाङ योम्बोक ले़टानुमे ? पापिजिडे़ॽसो खोजि नम्नम ले़ःॽखुबाजिरेॽनोॽ नम्नम ले़न्डुजे। 33फेरि टाङ्बा नुरोॽ ले़ःॽखुबाजिरेॽ नुरोॽ ले़टानुमहोङ्गो हे़निङे़ॽ इमाङ भलाइमि योम्बोक ले़टानुमे ? मोडोॽको पापिजिडे़ॽसो आक्टोॽनोॽ ले़न्डुजे!
34 “हे़निङे़ॽ फोङ्हेगुबारेॽ सिङि पिन्डानुमहोङ्गो ओहाक चुप्टानुम्नि, इन्ढोङ्होङ पापि याॽमिजिडे़ॽसो फोङ्हेघुबा पापिजिरेॽ सिङि पिन्डुजे!
35 “तर आक्टोक ने़ॽनि हे़निङ सिःक्चाघुजि नम्नम ले़टानुमे, चोपनोॽ नुरोॽ ले़टानुमे, सिङि ङाःक्खुबाजिनुङ फिरता ए़ङाःक्मे निवाडे़ॽ पिसानुमे। मोडोॽ ले़टानुमहोङ हे़निङे़ॽ बेॽए इनाम चुप्मिन्डानुमेनुङ निवाहाङ्मि पसाजि लिन्डानिङे। निवाहाङ्डे़ॽको बैगुनिनुङ दुस्टा याॽमिजिसो नम्नम ले़न्डुजे। 36कानिङ्मि निवाहाङ पाबा नम्नावा ले़ःॽखुबा ले़ये, हे़निङे़ॽसो हाइखाजि नम्नावा ले़टानुमे।”
हाइखाजि आप्टिक ए़ॽटिसानुमे
(मत्ति ७:१-५)
37 “हाइखाजि आप्टिक ए़ॽटिसानुमे मोबा निवाहाङडे़ॽसो हे़निङ आप्टिक टिनिबा। हाइखाजिमि आप्टिक ए़ॽयोगानुमे मोबा हे़निङ्मि आप्टिकसो निवाहाङ्डे़ॽ योगुनिबा। हाइखाजि आम्लाङ पिसानुमे मोबा हे़निङ्सो निवाहाङडे़ॽ आम्लाङ पिये। 38हाइखाजि पिसानुमे मोबाङ निवाहाङ्डे़ॽसो हे़निङ पिये। खोसे़ॽको सोक्सि-सोक्सि उरिचोक्चोक पिये। हे़निङे़ॽ इन्डोक सिःक्नुङ हाइखाजि पिन्डानुमे मोडोक्नोॽ सिःक्नुङ निवाहाङ्डे़ॽ हे़निङ्सो पिये।”
39येसुडे़ॽ माहाजि खानवाबाङ लुसुजि, “मिक मे़न्ठाखुबे़ॽ हाइको मिक मे़न्ठाखुबा नुबा रामबेॽ चिॽखे़ॽहेन्डुए ? खोसे़ॽ चिॽखे़ॽटुहोङ्सो निप्पाङ्नोॽ खदोलोम्बाबेॽ सिॽइन्जे। 40चोङ्सा गुरुबाङ बेॽए लिनिबा तर चिन्सेडुहोङ्रेॽ खो गुरुडोक्मा लिये।
41 “हाइखाजिमि मिकपेॽहा से़क्चिबा खाङ्डोक्खुबे़ॽ इन्ढोङ टाङ्बामि मिकपेॽहा से़क्चिबा खाङ्डोक्टुनिहा ? 42टाङ्बामि मिकपेॽहा से़क्चिबा मे़ङ्खाङ्डोक्खुबे़ॽ ‘खोइ खोइ निसा, हे़ने़ए़ मिकपेॽहा से़क्चिबा चाङ्बेन्ने़ इन्डोक्टे लुहेन्डुए ?’ होउ कप्टिजि! याक्लो टाङ्बामि मिकपेॽहा से़क्चिबा चाङ्बेसानुमे। मोबाङ्रेॽ हाइखाजिमि मिकपेॽहा से़क्चिबा नुरोॽ खाङ्डोक्हेन्डानुमे।”
डाङ्नुङ मोमि चा
(मत्ति ७:१६-२०; १२:३३-३५)
43 “नुबा डाङ्बेॽ मङे़ॽमा चा किङ्निहा मङे़ॽमा डाङ्बेॽ नुबा चा किङ्निहा। 44चोप डाङ मोमि चा खाङ्नुङ्नोॽ लेहेये। चिजिङ्मि डाङ्बाङ वेॽलाभुमि चा इक्टोक्निबा मोडोक्नोॽ डुडुम्सिमि डाङ्बाङ अङ्गुरमि चा इक्टोक्हेनिबा। 45नुबा याॽमिडे़ॽ खोमि निवे़ॽयुरा नुबा खानोॽ यामुन्डुहा। मङे़ॽमा याॽमिडे़ॽ खोमि निवाबाङ मङे़ॽमा खानोॽ यामुन्डुहा इन्ढोङ्होङ निवे़ॽयु इमाङ काप्मिन्डुजे याॽमिजिडे़ॽ माहानोॽ खा इःन्डुजे।”
निच्चि खालहा खिममि जग
(मत्ति ७:२४-२७)
46 “के़ॽ लुबॽआ खा खसिसानिङ्नेहोङ इन्ढोङ्डे का परभु परभु लुन्डानिङे ? 47काबेॽ आप्नुङ के़हा खा खेम्खुबानुङ के़ॽ लुबॽआ खसिघुबा याॽमि इन्डोक्मा लिये के़ॽ हे़निङ लुनिम्ने़। 48खो इक्को खिम आङ्घुबाडोक्नोॽ ले़ये, खोसे़ॽ खिममि जग गहिरो टोनुङ आक्खामाहोङ्बेॽए रुङ्गोॽवासोक्पेॽ खिममि जग एन्डु। मोबा वाडुम लेस्सा तर मो नुरोॽ टोङ्बॽआसे़ॽ वारिनुङ वाडुमडे़ॽसो मो खिम मे़योहेसु। 49तर के़हा खा खेम्नुङ्सो मोडोॽ मे़ले़ःॽखुबा याॽमि चाहिँ गहिरो जग मे़न्टोरेॽ खिम टोङ्घुबा याॽमिडोॽ लिये। वाडुम लेम्माबेॽ मोमि खिम चोप योघे़ये।”
Aktualisht i përzgjedhur:
लुका 6: YAMP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023, Wycliffe Bible Translators, Inc. and Nepal Bible Society