लुका 7
7
रोमि तिरिङ्गाजिमि एप्पाडे़ॽ येसुबेॽ बिस्वास ले़ःॽपॽआ
(मत्ति ८:५-१३)
1मोबेॽ सुम्बॽआ बेॽलो याॽमिजि इघा चोप खा इःॽसेॽनुङ येसु कफनरहुमलाम खडा। 2मोबेॽ रोमि तिरिङ्गाजिमि एप्पाडे़ॽ बेॽलो नम्नम ले़ःॽपॽआ सेउते टुक्पॽआसे़ॽ सिघे़ॽसिॽ पोरोक्पॽआ ले़टे़। 3मो एप्पा तिरिङ्गाडे़ॽ येसुमि टुम्बेॽ खेम्नुङ कोहि यहुदि डायोङ्बाजि “येसु आप्नुङ के़ए़ सेउते नुबुक्पेॽमाये” लुनुङ बिन्ति ले़ःॽसिॽ पाक्सुजि। 4माहा अगुवाजि येसुबेॽ लेन्नुङ बिन्ति ले़ःॽसाङ लुसुजि, “एप्पा तिरिङ्गा चइबानोॽ हे़ने़ए़ नम्नावा चुप्मारोमा याॽमि ले़ये। 5खोसे़ॽ कानिङ्मि जातिजि नम्नम ले़ये, मोबाङ कानिङ्मि लागि इक्को यहुदिजि सुम्ढाम खिमसो आङ्बेटे़।” 6इडोक्मा बिन्ति खेम्नुङ येसु माहाजिनुङ सोरि खडा। एप्पा तिरिङ्गाडे़ॽ खिम के़क्पेॽ रुक्माबेॽ एप्पा तिरिङ्गाडे़ॽ खोमि लङ्गामजि इडोक्मा लम्बवाँ येसुबेॽ पाक्सु, “परभु, हे़ने़ॽ दुःख ए़ॽले़टे, हे़न काडोक्मा याॽमिमि खिमबेॽ चिक्खे़ॽमारोमा का लेःॽङानि। 7कासो हे़ने़ए़ के़क्पेॽ लेम्मारोमा ले़ःॽङानि। मोडोगे़ॽ हे़ने़ॽ आक्कोबाङ्नोॽ नुबोगे लुनुङ लुबेॽमा। मोबा के़ए़ सेउते नुबोक्पेये। 8इन्ढोङ्होङ कासो काङ्मि एप्पाजिमि अधिनबेॽ टुङे। के़ए़ अधिनबेॽसो तिरिङ्गाजि टुम्मे। इक्को ‘खडे’ लुनुङे मो खे़ॽए़ये, हाइको ‘आबे’ लुनुङे मो आप्मिये। काङ्मि योम्बोक ले़ःॽखुबा याॽमिसो के़ॽ ‘इगो ले़टे’ लुनुङे, मोसे़ॽ ले़न्डुए।”
9इघा खा खेम्नुङ येसु खरि मिना। मोबा खोमि इगिॽयु मिॽयु सुम्बॽआ याॽमिजिलाम हिङ्घे़ॽनुङ लुसुजि, “के़ॽ हे़निङ लुनिम्ने़, इडोॽ बेॽए बिस्वास ले़ःॽखुबा याॽमिगो के़ॽ इस्राएलिजिमि रुम्बेॽसो मे़न्चुप्टुङ।” 10माहा लम्बवाँ लाजे़ॽखुबा लङ्गामजि खिम टेघडामि, माहाजि खिम रुक्माबेॽ एप्पा तिरिङ्गामि सेउते नुघे़ॽपेबॽआ ले़टा।
येसुडे़ॽ राङ्मिॽमामि पसा हिङ्बोक्पॽआ
11इक्याक नियाक ए़क्साङ येसु नाइन लुमे सहरबेॽ खडा। खोमि चोङ्साजिनुङ हाइखा बेॽलो याॽमिजिसो खोनुङ सोरि खडामि। 12येसु सहरमि राम्डेमबेॽ रुक्माबेॽ इक्को सिगुयाक योङ्मानुङ याॽमिजि खे़ॽमे़ॽनिसिङ्डामि। मो सिगुयाक चाहिँ इक्को राङ्मिॽमामि इक्कोमा पसा ले़टे़। मो राङ्मिॽमानुङ खे़ॽखुबाजिबेॽ मो सहरबेॽहा बेॽलो याॽमिजिसो टुसामे। 13राङ्मिॽमामि बिपत खाङ्नुङ परभुमि निवा नम्नावे़ॽ टिबु, मोबा खो लुसु, “हे़न ए़हाःप्ने!” 14मोबा येसु के़क्पेॽ खे़ॽनुङ सिगुयाक सुःबु, सिगुयाक खिघुबाजि येबामि। मोबा येसुडे़ॽ मो सिगुयाक लुसु, “होउ वेन्जा, के़ॽ हे़न लुन्ने़, पुकाडे!” 15मोडोक्पेॽनोॽ सिघे़ॽपॽआ वेन्जा पुःके़ॽनुङ पेना मोबा यामुबोगा। येसुडे़ॽ मो वेन्जा खोमि मामा पिसु।
16निवाहाङ्मि इडोक्मा सक्तिनुङ्मा योम्बोक खाङ्नुङ चोप खरि मिङ्साङ खोनुङ किस्सिसामि। मोबा निवाहाङ्मि ओहाङ ले़ःॽसाङ लुसुजि, “इक्को बेॽए अगमबक्ता कानिङ्मि रुम्बेॽ खाङ्मुटे़। निवाहाङ टाङ्बामि याॽमिजि हिङ्मेॽसिॽ लेङ्इटे़।” 17येसुडे़ॽ मो वेन्जा हिङ्बोक्पॽआ खा यहुदियामि चोप ठाउँ, मो ठाउँमि किॽयु मिॽयु चोपराजि मुगा।
युहन्नाडे़ॽ येसुमि टुम्बेॽहा खा लेसिॽ खोमि चोङ्साजि पाङ्बॽआ
(मत्ति ११:२-१९)
18युहन्नामि चोङ्साजिडे़ॽ येसुडे़ॽ ले़ःॽपॽआ चोप खा खोजिमि गुरु युहन्ना खेम्मेॽटुजि, मोबा युहन्नाडे़ॽ खोमि निप्पाङ चोङ्साजि के़ःॽनुङ 19परभु येसुबेॽ इडोॽ सिम्सिॽ पाक्सुजि, “लेङ्इये लुबॽआ छुट्कारा पिघुबा हाङ्बा खिरिस्ट हे़ननोक्टे ? कि कानिङे़ॽ हाइकोमि राम हुङ्मे ?” 20मोबा माहाजिडे़ॽ येसुबेॽ लेन्नुङ सिप्सुजि, “कानिङे़ॽ आसा ले़ःॽपॽआ छुट्कारा पिघुबा हाङ्बा खिरिस्ट हे़ननोक्टे ? कि कानिङ हाइकोमि आसाबेॽ पेम्मे़ ? बप्तिस्मा पिघुबा युहन्नाडे़ॽ इगो खा सिम्सिॽ कानिङ हे़नबेॽ पाङ्इटे़।”
21मोडोक्पेॽनोॽ येसुडे़ॽ बेॽलो टुक्खुबा याॽमिजि नुबोगुजि, मोबा मङे़ॽमा चापटे़ॽ राःप्पॽआजि छुट्कारा पिसुजिनुङ मिक मे़ए़ॽखुबाजि मिक ए़ःॽमेॽटुजि। 22मोबा येसुडे़ॽ युहन्नामि चोङ्साजि लुसुजि, “हे़निङे़ॽ इमाङ खाक्सानुमे ? इमाङ खेप्सानुमे ? इघा चोप खा युहन्ना लुबेॽटानुमे मिक मे़ए़ॽखुबाजि मिक ए़ॽपोगामि, सोगुबाजि राम्बुगामि, सुक्टुबाङेॽ सुक्पॽआजि नुबुगामि, ने़ए़क मे़ङ्खेम्खुबाजि खेम्बुगामि, सिघे़ॽपॽआजि हिङ्बुगामि, इमाङ मे़ङ्काप्खुबाजिडे़ॽ सुसमाचार खेम्डोक्टुजि। 23मोबा खो इगो खासो लुबेॽटानुमे काबेॽ सङ्क मे़ले़ःॽखुबा याॽमिजिडे़ॽ आसिस चुप्मिन्डुजे!”
24युहन्नामि चोङ्साजि खे़ॽपेनुङ येसुडे़ॽ मोबेॽहा याॽमिजि, बप्तिस्मा पिघुबा युहन्नामि टुम्बेॽ लुबेॽटुजि, “हे़निङ रे़क्रे़क्मा ठाउँबेॽ इमाङ खाङ्सिॽ खडानिङे ? इमा हिॽवाबाडे़ॽ हिॽपॽआ इङ्भु खाङ्सिॽटे खडानिङे ? 25इमा हे़निङ काम्नुहा चेॽ चाङ्खुबा टाङायोङ्बा याॽमिजि खाङ्सिॽटे खडानिङे ? मोडोक्हा चेॽ चाङ्खुबा याॽमिजिगो हाङ्खिमबेॽरेॽ पेङ्इम्मे। 26चइबानोॽ का लुमाजे, हे़निङ इमाङ खाङ्सिॽटे पाखे़ॽयु खडानिङे ? इमा अगमबक्ता खाङ्सिॽटे ? चइबानोॽ के़ॽ लुनिम्ने़ हे़निङे़ॽ अगमबक्ताजिबाङ्सो बेॽएम्मा याॽमि खाङ्डोक्इटानुमे। 27बप्तिस्मा पिघुबा युहन्नामि टुम्बेॽ निवाहाङ्मि बचनबेॽ निवाहाङ्डे़ॽ इडोॽ लुबॽआ ले़ये, ‘के़ॽ के़ए़ याॽमि हे़ने़ए़ राम पोरोक्सिॽ पाङ्इनुङे मोबा खोसे़ॽ हे़ने़ए़ राम पोरोइन्डुए।’#मलाकि ३:१
28 “के़ॽ हे़निङ लुनिम्ने़, मेॽनामिॽबाङ टोक्पॽआजिबेॽ युहन्नाबाङ बेॽए असासो माॽआम्मे। तरसो निवाहाङ्मि राज्यबेॽ चोप्पा ए़डे़म्मा याॽमि, बप्तिस्मा पिघुबा युहन्नाबाङ्सो बेॽए लिये।” 29मोबा चोप याॽमिजिनुङ मे़क्चेन लाघुबाजिडे़ॽसो येसुडे़ॽ युहन्नामि टुम्बेॽ इःबॽआ खा खेप्सुजि, मोबा “निवाहाङ्मि खा चाइबमा ले़ये” लुसुजि, इन्ढोङ्होङ खोजिडे़ॽ युहन्नाबाङ बप्तिस्मा लाबॽआ ले़टे। 30तर फरिसिनुङ यहुदि धारमिक नियम इःॽघुबाजिडे़ॽ चाहिँ युहन्नाबाङ बप्तिस्मा मे़लाबॽआसे़ॽ निवाहाङ्डे़ॽ खोजिमि लागि ले़ःॽपॽआ योम्बोक इन्कार ले़टुजि। 31येसुडे़ॽ लुसुजि, “इगो पुस्ताबेॽहा याॽमिजि के़ॽ असाडोॽ ले़म्मे लुमे़ ? 32माहाजिगो हाटाबेॽ पेन्नुङ इडोॽ काघुबा पिच्छरे़ॽवाजिडोक्नोॽ ले़म्मे। खोजि इडोॽ लुघुसे़ॽ चुसाङ काम्मे हे़निङ्मि लागि बासुरि टेनुङ्मा, तर हे़निङ मे़सिम्आसानिङ, ‘कानिङे़ॽ सोकमि सेम्लुमा सेम्लुसुङ्मा तर हे़निङ मे़हाःबानिङ’।
33 “अङ्गुरमि मद्य मे़उङ्खुबा, मे़न्चारेॽ पेङ्घुबा, युहन्ना लेस्सा। खोसो हे़निङे़ॽ मङे़ॽमा चाबेॽ राःप्पॽआ याॽमि लुसानुम। 34चाघुबा, उङ्घुबा का याॽमिमि पसा लेङ्इटिङे, का चाहिँ हे़निङे़ॽ लुन्डानिङे ‘खाक्सानुमे, आक्को रोप्कि, इ होम्घुबा, मे़क्चेन लाघुबाजिनुङ पापिजिमि लङ्गाम!’ ले़ये 35निवाहाङ्बाङ निवा चुप्नुङ मो निवाडोॽ ले़ःॽखुबाजिडे़ॽरेॽ खोमि निवा नुबा ले़ये लुन्डुजे।”
पापि मेॽनामिॽडे़ॽ येसुमि सराङ मिॽवे़ॽ वासोक्पॽआ
36इक्को फरिसिडे़ॽ येसु चामा चासिॽ खोमि खिमबेॽ के़डु। येसु खे़ॽनुङ खिमहोङ्सिॽयु चामा चासिॽ पेन्युसा। 37मो सहरबेॽए इक्को पापि मेॽनामिॽडे़ॽ येसु फरिसिमि खिमबेॽ चामा चासिॽ लेङ्इटे़ लुनुङ खेप्सु। खो बेॽलो महगोमा रुङ्गोॽवामि इक्को नुबा उथ्रिॽमा बतल इॽठुप नाम्जानुये केवा याङ्मानुङ मो खिमबेॽनोॽ लेस्सा। 38मो मेॽनामिॽ येसुमि ए़ङ्गुवालामबाङ आप्नुङ सराङ के़क्पेॽ पेन्नुङ हाःप्साङ खोमि मिॽवे़ॽ येसुमि सराङ वाडबु। मोबा खोमि टाङ्डे़ॽ टुःक्नुङ, मोइँ चानुङ, नम्जानुये केवा सिःटिबेॽटु।
39इडोक्मा खा खाङ्नुङ येसु चामा चासिॽ के़ःॽखुबा फरिसिडे़ॽ खोमि निवाहोङ्सिॽयु लुसु, “इगो येसु चइबानोॽ अगमबक्ता ले़येहोङ्गो खो के़क्खुबा मेॽनामिॽ पापिनि ले़ए़ लुनुङ लेमा खडे़।” 40मोडोक्पेॽ येसुडे़ॽ मो फरिसि लुसु, “सिमोन, के़ॽ हे़न इक्को खा लुमा खे़ये।” सिमोनडे़ॽ लुसु, “लुमाना, गुरुज्यु!” 41खेप्से, “इक्को याॽमिबाङ सिङि लाघुबा निप्पाङ याॽमि टुसाजि। इक्कोसे़ॽ सिसे़ङ्मि ङाउम सयेनुङ हाइकोसे़ॽ सिसे़ङ्मि ङाक्पोङ मुन्डा#७:४१ मोडोक्पेॽ सिसे़ङ्मि इक्को मुन्डा चाहिँ इक्याकमि नमयाक ले़टे़ सिङि लाबॽआ ले़टे़। 42मोजि निप्पाङेॽनोॽ खोजिडे़ॽ लाबॽआ सिङि मे़म्फोङ्हेसाजु मोबा मो सिङि पिघुबा साहुडे़ॽ खोजि निप्पाङ्नोॽ सिङि फोङ्मा पाप्नि लुनुङ आम्लाङ पिसु। हागो लुघाक्से, मो सिङि पिघुबा साहु हाम्बेसे़ॽ बेॽलो नम्नम ले़न्डु होला ?”
43सिमोनडे़ॽ लुसु, “के़ॽ मिॽमाबेॽ बेॽलो सिङि लाघुबे़ॽ चाहिँ मो साहु बेॽलो नम्नम ले़न्डुए।” येसुडे़ॽ लुसु, “हे़ने़ॽ चाइबमा खा लुसु।” 44मो मेॽनामिॽलाम हिङ्घे़ॽनुङ येसुडे़ॽ सिमोन लुसु, “इगो मेॽनामिॽ खाक्से। का हे़ने़ए़ खिमबेॽ लेङ्इटिङे, हे़ने़ॽ काङ्मि सराङ वासोक्ठाम योङासो मे़म्पिसिङ। तर इगोसे़ॽको के़ए़ सराङ खोमि मिॽवाडे़ॽ वासोक्नुङ खोमि टाङ्डे़ॽ टुःक्पेॽटिङ। 45हे़ने़ॽ का मोइँ मे़न्चासिङ, सेवा मे़ले़टिङ, इगो मेॽनामिॽडे़ॽको का लेम्बॽआबाङ्नोॽ के़ए़ सराङ मोइँ चोमे़ॽनिङ्सिन्डुए। 46हे़ने़ॽको के़ए़ निन्डवाँबेॽ सिःॽठाम केवा मे़म्पिसिङ, तर इगोसे़ॽको के़ए़ सराङ्बेॽ नम्जानुहा केवा सिःॽटिबेटिङ। 47इगोसे़ॽ इन्ढोङ इडोॽ का ले़ए़टिङे, के़ॽ हे़न लुन्ने़, इगोमि बेॽलो पाप टुसा मोमि आम्लाङ लिटाहा, मोडोगे़ॽ इगोसे़ॽ का बेॽलो नम्नम ले़ए़टिङे। ए़डे़ॽवा पापबाङ आम्लाङ चुप्खुबे़ॽ ए़डे़ॽवानोॽ नम्नम ले़म्मे।” 48मोबा येसुडे़ॽ मो मेॽनामिॽ लुसु, “हे़ने़हा चोप पापमि आम्लाङ लिबेटहा।” 49मोबेॽ चासिॽ पेम्बॽआ याॽमिजि काबोगामि, “पापमि आम्लाङ पिघुबा इगो असाडे ?” 50तर येसुडे़ॽ मो मेॽनामिॽ लुसु, “हे़ने़ए़ बिस्वासडे़ॽ हे़न हिङ्इटे़। हागो सान्तिनुङ खडे।”
Aktualisht i përzgjedhur:
लुका 7: YAMP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023, Wycliffe Bible Translators, Inc. and Nepal Bible Society