लुका 14
14
येसुडे़ॽ नाजामे याकपेॽ टुक्खुबा नुबुक्पॽआ
1इक्को नाजामे याक्पेॽ येसुडे़ॽ फरिसिजिमि एप्पामि खिमबेॽ चामा चामे लम्बवाँ चुप्नुङ खडा। मोबेॽ सुम्बॽआ याॽमिजिडे़ॽ येसुडे़ॽ इमाङ इमाङ ले़न्डुए, लुनुङ नुरोॽ वाःप्मे़ॽनिङ्सिडुजे। 2मोबेॽ हुक सराङ होम्बॽआ इक्को याॽमि येसुमि पोम्बेॽ पेम्बॽआ ले़टे़। 3येसुडे़ॽ धारमिक खा इःक्खुबाजिनुङ फरिसिजि सिप्सुजि, “मोसामि नेॽचिराबेॽ नाजामे याकपेॽ टुक्खुबाजि नुबोक्मा नुयेन्डे, फे़न्निबा इमा साप्पॽआ ले़ये ?” 4तर माहाजिडे़ॽ इमाङ्सो मे़लुसुजि। येसुडे़ॽ मो टुक्खुबा के़क्नुङ नुबोगु। 5मोबा येसुडे़ॽ माहाजि लुसुजि, “हे़निङ्मि पिच्छा अथबा सुःक्माजि#१४:५ कोहि गिरिक बाइबलबेॽ सुःक्मानुङ गधा लुबॽआ ले़ये नाजामे याकपेॽ बेॽए खाडोलोम्बाबेॽ हेॽयुमिहोङ हे़निङे़ॽ चान्डो चान्डो ले़ःॽनुङ चाक्सानुम्ने ?” 6फेरिसो माहाजिडे़ॽ इमाङ्सो मे़लुहेसुजि।
एप्पाजि पेन्ढाम ठाउँ ए़ॽयोगानुमे
7मोबेॽ लेम्बॽआ चाबाङ्जिडे़ॽ एप्पा याॽमिजि पेन्ढाम ठाउँ से़म्बॽआ खाङ्नुङ येसुडे़ॽ इक्को खानवा इःसु, 8“हे़निङ याॽमिमि फुङ्सयाबेॽ खे़ॽमाबेॽ एप्पा याॽमिजि पेन्ढामबेॽ ए़प्पेनानिङे। इन्ढोङ्होङ हे़निङ्बाङ एप्पा याॽमिजिसो मोबेॽ के़ःॽपॽआ ले़म्मि होला। 9मो एप्पा लेम्माबेॽ याॽमिजि ला लेॽखुबे़ॽ ‘इगो पेन्ढाम ठाउँ पिसानुमे’ लुनुङ हे़न पेम्बॽआ ठाउँबाङ पुकाडे लुहोङ मोडोक्पेॽ हे़न नेम्मा सिॽनुङ चोप्पाङ मेॽमोङ पेम्मा सिॽइये। 10मोडोगे़ॽ हे़न फुङ्सयाबेॽ खे़ॽमाबेॽ ए़ङ्गुवाराम खे़ॽनुङ पेने ला लेॽखुबा लेन्नुङ ‘पोम्बेॽ आबे’ लुनुङ एप्पा पेन्ढाम ठाउँबेॽ पेम्मेये। मोडोक्पेॽ चोपमि पोम्बेॽ हे़ने़ए़ बेॽए इजेत लिये। 11इन्ढोङ्होङ टाङ्बानोॽ बेॽए लिमा योक्खुबाजि चोप ए़डे़म्मा लिम्मेनुङ, टाङ्बा ए़डे़म्मा लिघुबाजि चाहिँ बेॽए लिम्मे।”
12येसुडे़ॽ खो चामा चासिॽ के़ःॽखुबा एप्पा लुसु, “हे़ने़ॽ भत्तेरबेॽ चासिॽ के़ःॽमाबेॽ हे़ने़हा टाङ्बाङ्जि, वावानिसा, पेन्लागामजि, टाङायोङ्बा लङ्गामजिरेॽनोॽ ए़ॽके़डाजे। माहाजिडे़ॽको हे़ने़ॽडोक्नोॽ चामा चासिॽ के़ःॽनुङ हे़ने़ॽ चामा हिङ्बॽआ साटो टेबेन्डुजे। 13मोडोगे़ॽ भत्तेरबेॽ याॽमिजि के़ःॽमाबेॽ, इमाङ मे़ङ्काप्खुबा गरिबजि, सोॽलोङ्ग्याजिनुङ मिक मे़ए़ॽखुबाजि चासिॽ के़डाजे। 14मोबा हे़ने़ॽ आसिस चुप्इन्डुए इन्ढोङ्होङ माहाजिनुङ हे़ने़हा साटो टेमामि इमाङ्सो काप्टुजिने। तर निवाहाङ्मि खा खसिघुबाजि सिघे़ॽपॽआबाङ हिङ्बोक्माबेॽ निवाहाङ्डे़ॽनोॽ हे़न इनाम पिये।”
बेॽए भत्तेरमि खानवा
(मत्ति २२:१-१०)
15येसुमि खा खेम्नुङ खोनुङ्नोॽ चासिॽ पेङ्घुबा इक्कोसे़ॽ लुसु, “निवाहाङ्मि राज्यबेॽ भत्तेर चाडोक्खुबाजि सारोनोॽ आसिसित ले़म्मे।” 16येसुडे़ॽ खो इडोॽ लुसाङ इक्को खानवा इःबेॽटु, “इक्को याॽमिडे़ॽ बेॽए भत्तेर ले़ःॽमामि बेॽलो याॽमिजि चासिॽ के़डुजि। 17मोबा चोप थोक उघे़ॽयेम्बाङ, भत्तेर चामे बेला लिसा लुनुङ याॽमिजि के़ःॽसिॽ खोम सेउते पाक्सु। 18तर भत्तेरबेॽ के़ःॽपॽआ याॽमिजि इक्को इक्को निहु ले़ःॽनुङ मे़लेस्सामि। माहाजिबेॽ इक्कोसे़ॽ लुसु, ‘के़ॽ रोपा इङ्इटुङे, मो खाङ्सिॽ खे़ॽमा खे़ङे। का आम्लाङ पिमायो, का मे़आप्हेसिङा।’ 19हाइकोसे़ॽसो लुसु, ‘के़ॽ ङाउम हल गोरु इङ्इटुङे आयुनोॽ माहाजि चेॽखाङ्सिॽ खे़ॽमा सिॽपॽआसे़ॽ मे़आप्हेसिङा, का आम्लाङ पिमायो।’ 20हाइकेसे़ॽ लुसु, ‘काङ्मि भरखर फुङ्सया लिटे़ मोडोगे़ॽ का आप्हेङानि।’ 21मोबा सेउतेडे़ॽ टेघे़ॽनुङ चोप खा खोम मायोङ्बा खेम्मेॽटु। मायोङ्बाडे़ॽ सुरके़ॽसाङ लुसु, ‘चान्डो सहरराजिनुङ रामराजि खडे, मोबेॽहा इमा मे़ङ्काप्खुबा गरिबजि, सोगुबाजिनुङ मिक मे़एे़ॽखुबाजि के़ःआप्टाजे।’
22 “इडोॽ मायोङ्बाडे़ॽ लुडिडोॽ ले़ःॽनुङ सेउतेडे़ॽ लुसु, ‘हे़ने़ॽ लुबॽआजि चोप के़ःआप्टुङ्जिङ, तर हागोसो पेन्ढाम ठाउँगो टुउ।’
23 “फेरि मायोङ्बाडे़ॽ लुसु, ‘सहरबेॽहा रामराजि खे़ॽनुङ याॽमिजि चोप्नुङ्होङ्सो चिॽआप्टाजे। मोबा के़ए़ खिम इॽठुप याॽमि लिमिरो! 24याक्लोएखेॽ ला लेॽपॽआजिबेॽ असे़ॽसो के़ए़ भत्तेरबेॽ चोडोक्टुजिने’।”
चोङ्साडे़ॽ ले़ःॽमे योम्बोक
(मत्ति १०:३७-३८)
25इक्याक बेॽलो याॽमिजि येसुनुङ खे़ॽमे़ॽनिङ्सिडामि। येसु माहाजिलाम हिङ्घे़ॽनुङ लुसुजि, 26“के़ए़ चोङ्सा लिमा मिॽखुबाजिडे़ॽ टाङ्बामि पाबा मामा, बनिमा, पसाजि, वावानिसा, नानुसानुङ खोमटाङ्बाबाङ्सो बेॽलो का नम्नम ले़ःॽमा खे़ये, मोबारेॽ खो के़ए़ चोङ्सा लिहेये। 27टाङ्बामि काप्सिङ खिसाङ कानुङ सोरि राम्खुबारेॽ के़ए़ चोङ्सा लिहेये।
28 “याॽमिजि असे़ॽसो बेॽलो अग्लोमा धरहरा आङ्मा याक्लो मो आङ्सेॽमामि याङ्डे़ॽ के़ॽएन्डुहा ना के़ॽटुनिहा लुनुङ याङ खाङ्मा खे़ये ने़ॽनेन्डे ? 29ने़ॽनिहोङ्गो मो धरहरा आङ्मा तरिक्नुङ मे़आङ्सेडुहोङ याॽमिजिडे़ॽ खो सिःक्चासाङ लुन्डुजे, 30‘इगो याॽमिडे़ॽ धरहरा आङ्बोगु तर मे़आङ्सेडु!’ 31फेरि इक्पोङ हजार जना तिरिङ्गा काप्खुबा हाङ्बे़ॽ इक्पोङ हजार जना तिरिङ्गा काप्खुबा हाइको हाङ्बानुङ ङेः ले़ःॽमा सिॽहोङ माहाजिनुङ काक्हेङेन्डे काक्हेङानि लुनुङ याक्लो नुरोॽ मिॽइन्डुए! 32मोबा ङेःबेॽ काक्हेङानि लुनुङ लेडोक्नुङ हाइको हाङ्बानुङ खा टोङ्सिॽ याॽमिजि पाङ्इन्डुजे। 33मोडोक्नोॽ के़ए़ चोङ्सा लिमा याक्लो इघा चोप खा नुरोॽ मिॽनुङ चोप थोक याःॽयानुङ आप्खुबारेॽ के़ए़ चोङ्सा लिहेये।”
युमबाङ सिक्छे
(मत्ति ५:१३; मरकुस ९:५०)
34येसुडे़ॽ माहाजि फेरिसो लुसुजि, “युम नुबा थोक ले़ये, तर युममि युम लुयेनोॽ मे़खे़ॽहोङ मो युम इमाङे़ॽटे युम लुये टोङ्मे़ ? 35युममि युम लुयेनोॽ मे़खे़ॽहोङ आक्कोमि इमाङ्सो योम्बोक माॽआये। मोडोॽ लिहोङ याॽमिजिडे़ॽ युम राप्पेन्डुजे। ने़ए़क काप्खुबाजिडे़ॽ इगो खा नुरोॽ खेप्सुजिरो।”
Aktualisht i përzgjedhur:
लुका 14: YAMP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023, Wycliffe Bible Translators, Inc. and Nepal Bible Society