लुका 15
15
मे़ःखे़ॽपॽआ सामु
(मत्ति १८:१२-१४)
1इक्याक मे़क्चेन यिक्खुबाजिनुङ हाइखा पापिजि येसुमि सिक्छे खेम्सिॽ लेस्सामि। 2तर फरिसिनुङ यहुदि धारमिक नियम इःॽखुबाजि इडोॽ कुनुक कुनुक काबोगामि, “इगो याॽमिगो पापिजिनुङ सोरि पेन्नुङ चाये।” 3येसुडे़ॽ माहाजि इक्को खानवा लुबेॽटुजि, 4“मिॽखाक्सानुमे, हे़निङ्बेॽ इक्को याॽमिमि सये गोटा सामु टुसामि। माहा सये गोटाजिबेॽ इक्को सामु चाहिँ मे़ःखे़ॽहोङ खोनुङ टुहा उनान्सये सामुजि मोबेॽनोॽ याःॽयानुङ मो मे़ःखे़ॽपॽआ इक्को सामु मे़न्चुप्टुरो योगुनेन्डे ? 5मे़ःखे़ॽपॽआ मो सामु चुप्नुङ खो बेॽलोनोॽ साप्थाङ्मानुङ मो सामु खोम अक्टाङ्बेॽ चेॽटिनुङ खिम खिजेन्डुए। 6मोबा खोमि इगिॽयु मिॽयु टुहा लङ्गामजि के़ःॽनुङ लुन्डुजे, ‘के़ए़ मे़ःखे़ॽपॽआ सामु चुप्इटुङे! मोडोगे़ॽ कानिङ चोप साप्थाङ्मा’ 7के़ॽ हे़निङ लुनिम्ने़, इक्को पापि याॽमिडे़ॽ पाप ले़ःॽमा लेॽनुङ बिस्वासबेॽ आप्होङ मो याॽमिमि लागि हाइखा उनान्सये धारमिक याॽमिजिबाङ्सो बेॽलो हाङ्हाङ थाङ्सिरिॽटु ले़न्डुजे।”
मे़ःखे़ॽपॽआ मुन्डा
8फेरि येसुडे़ॽ हाइको खानवा लुसु, “इक्को मेॽनामिॽनुङ इक्पोङ सिसे़ङ्मि मुन्डा टुसा। खोमि इक्को मुन्डा मे़ःखडा, हागो खोसे़ॽ इमाङ ले़न्डु होला ? कुप्पि उःप्नुङ, कुच्चोडे़ॽ फिःक्नुङ मो मे़ःखे़ॽपॽआ मुन्डा मे़न्चुप्रो निवा टिनुङ नुरोॽ योगुनेन्डे ? 9मो मुन्डा चुप्टुयेम्बाङ खोमि चोप लङ्गामजि के़ःॽनुङ लुन्डुए, ‘के़ए़ मे़ःखे़ॽपॽआ मुन्डा चुप्मिटुङे! हागो आबानिङे, कानिङ साप्थाक्सि।’ 10के़ॽ हे़निङ लुनिम्ने़, इडोक्नोॽ इक्को पापि याॽमिडे़ॽ पाप ले़ःॽमा लेडुहोङ मो याॽमिमि लागि थाङ्सिरिदुतजि बेॽलो साप्थाङ्इम्मे।”
मे़ःखे़ॽपॽआ पसा
11येसुडे़ॽ फेरि लुसु, “इक्को याॽमिमि निप्पाङ वडाङ्पसाजि टुसाजि। 12से़पा पसाडे़ॽ पाबा लुसु, ‘पाबा, के़ए़ बन्डो अङ्सा पिबेमा।’ मोबा खोम्बाडे़ॽ खोम याङ्सरावा निप्पाङ पसाजि अङ्सा बन्डो हाःबेॽटुजि।
13 “इक्याक नियाक ए़क्साङ से़पा पसाडे़ॽ टाङ्बामि बान्डोबेॽ चुप्पॽआ चोप याङ्सरावा लाघे़ॽनुङ हाइके देसबेॽ खडा। मोबेॽ खोसे़ॽ खोमि चोप याङ्सरावा चामा, उङ्माबेॽ मोज ले़ःॽनुङ रुक्पेसु। 14मोडोक्पेॽनोॽ मो देसबेॽ बेॽए सकआङ्सा लिसा मोबा खोसे़ॽ इमाङ्सो मे़न्चाडोक्टु। 15मोबा खो मो देसबेॽए इक्को याॽमिमि खिमबेॽ योम्बोक ले़ःॽसिॽ खडा। मो याॽमिडे़ॽ खो आक्मा कुमे योम्बोक पिसु। 16खो बेॽलो सागे़ॽ सिबॽआ ले़टे़ मोडोगे़ॽ खोसे़ॽ आक्मामि चारानोॽ चानुङ्होङ्सो उक्खामा मिॽटु, तर मोबेॽ खो असे़ॽसो चामे खा मे़म्पिसुजि।
17 “मोडोक्पेॽरेॽ खोमि निवा लेस्सा मोबा मिॽटु, ‘के़ए़ पाबामि खिमबेॽ योम्बोक ले़ःॽखुबाजिडे़ॽ उक्खारो चानुङ्सो एङ्इहा, का चाहिँ इगोबेॽ सागे़ॽ सिघे़ॽसिॽ पोरोगिङ। 18हागो का पाबामि खिमबेॽ टेघे़ॽनुङ पाबा लुनुङे, के़ॽ निवाहाङ्नुङ पाबा हे़ने़ए़ निवा टुक्मेॽनुङ बेॽए पाप ले़ए़टुङे। 19हागोगो का हे़ने़ए़ पसा लुमारोमासो ले़ःॽङानिबा, तर का नम्नावा ले़ःॽनुङ इक्को योम्बोक ले़ःॽखुबाडोक्नोॽ मिॽनुङ युङ्मा’ लुनुङे मिॽटु, 20मोबा खो येपोक्नुङ पाबामि खिमबेॽ टेघडा। खोम्बाडे़ॽ खो आप्मे़ॽनिङ्सिबॽआ ओःबाङ्नोॽ खाङ्डोक्नुङ खोम्बामि निवा नम्नावे़ॽ टिबु, मोबा पसे़ॽयु पिङ्घे़ॽनुङ हेप्साङ नम्नम ले़टु।
21 “मोबा पसाडे़ॽ लुसु, ‘पाबा, के़ॽ निवाहाङ्मिनुङ हे़ने़ए़ निवा बेॽलो टुक्मेॽनुङ पाप ले़ए़टुङे। हागो का हे़ने़ए़ पसा लुमासो खे़न्जाङानि।’ 22तर पाबाडे़ॽ खोम सेउतेजि के़ःॽनुङ लुसुजि, ‘चान्डो ले़ःॽनुङ चोप्पाङ नुबा चेॽ, मुन्रिनुङ राङ्सुप लाप्नुङ इगो चाङ्डिबेॽटानुमे। 23मोबा भत्तेर टिमामि लागि चोप थोक पोरोगानुमे। चायुङ्बॽआ पिक पसा, चेनानुमेनुङ माहा चानुङ साप्थाक्सि। 24इगो के़ए़ पसा सिघे़ॽपॽआ ले़टे़ हिङ्जाटे़, खो मे़ःखे़ॽपॽआ ले़टे़ आयु चुप्मिटुङे’। मोबा साप्थाङ्मानुङ भत्तेर तरिगुजि।
25 “मोडोक्पेॽ टुम्मि पसा चाहिँ रोपाबेॽ टुसे़। रोपाबाङ खिम टेजामाबेॽ मेॽयोङ्बाङ्नोॽ खोसे़ॽ टेन्जिरा मुक्मानुङ सेम्लुबॽआ खेम्डोक्टु। 26मोबा खोसे़ॽ इक्को सेउते के़ःॽनुङ सिप्सु, ‘इन्ढोङ्डे इघा चोप टेन्जिरा टेम्मानुङ सिम्आमे़ॽनिङ्सिम्मे ?’ 27मो सेउतेडे़ॽ लुसु, ‘हे़ने़ए़ निसा टेजाटे़। खो नुरोक्नोॽ टेजाबॽआसे़ॽ हे़ने़ए़ पाबे़ॽ बेॽए भत्तेरनुङ साप्थाङ्मामि इघा चोप ले़ःॽपॽआ।’ 28इगो खा खेम्नुङ मो टुम्मि पसा चाहिँ सारोनोॽ सुरके़ॽनुङ खिमहोङ्सिॽयुनोॽ मे़ङ्खडा। मोबा खोम्बा लेन्नुङ खो नुरोॽ चोबु।
29 “तर खोसे़ॽ पाबा इडोॽ लुसु, ‘इन्डोक निङ्बाङ के़ॽ हे़ने़ए़ योम्बोक ले़ःॽखुबाडोॽ लिनुङ सेवा ले़ःॽमे़ॽनिङ्सिनुङे हे़ने़ॽ लुबॽआ चोप योम्बोक ले़टुङ। तर का चाहिँ इक्खेॽसो के़हा लङ्गामजिनुङ साप्थाक्साङ चेन्जामा इक्को पाठासो मे़म्पिसिङ।
30 “‘तर हे़ने़हा याङ्सरावा मङे़हा मेॽनामिॽचिनुङ फे़क्खुबा पसा लेम्माबेॽ चाहिँ पाबाडे़ॽ इढे़ॽलो बेॽएम्मा भत्तेर ले़न्डुए।’ 31पाबाडे़ॽ खोमि टुम्मि पसा लुसु, ‘होउ पसा, हे़न गो सानिङ्नोॽ कानुङ्नोॽ टुयेन्डि, के़हा टुहा चोप याङ्सरावा हे़ने़हानोॽ ले़हा! 32कानिङे़ॽ आयु इगो भत्तेर टिनुङ साप्थाङ्मानोॽ खे़ये। इन्ढोङ्होङ हे़ने़ए़ निसा सिघे़ॽपॽआ ले़टे़, हिङ्जाटे़, आक्को मे़ःखे़ॽपॽआ ले़टे, आयु चुप्मिटुङ्मे़’!”
Aktualisht i përzgjedhur:
लुका 15: YAMP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023, Wycliffe Bible Translators, Inc. and Nepal Bible Society