लुका 13
13
पाप ले़ःॽमा लेॽपेमा अथबा नास लिमा
1कोहि याॽमिजिडे़ॽ येसु लुसुजि, “भोग पिमे़ॽनिङ्सिमाबेॽ रोम देसमि मायोङ्बा पिलातसडे़ॽ कोहि गालिलिजि सेॽनेसुजि, माहाजिमि हरिसो भोग पिबॽआ हरिनुङ ठुसा!” 2येसुडे़ॽ माहाजि लुसुजि, “इडोॽ सिघुबा गालिलिजि चाहिँ हाइखा गालिलिजिबाङ बेॽलो पापि ले़टामे मिॽइन्डानुमे ? 3आक्टोॽ ने़ॽनि, के़ॽ हे़निङ लुनिम्ने़, टाङ्बा टाङ्बे़ॽ पाप ले़ःॽमा मे़लेडानुमहोङ हे़निङ्सो मोडोक्नोॽ सिघे़न्डानिङे। 4फेरि सिलोआम ठाउँमि धरहरा टे़ःक्माबेॽ चिम्सिघे़ॽपॽआ अठारो जना याॽमिजि यरुसलेमबेॽहा हाइखा याॽमिजिबाङ बेॽलो पापि ले़टामे लुनुङ मिॽइन्डानुमे ? 5आक्टोॽ ने़ॽनि, तर के़ॽ हे़निङ लुनिम्ने़, हे़निङे़ॽ टाङ्बा टाङ्बे़ॽ पाप ले़ःॽमा मे़लेडानुमहोङ हे़निङ्सो मोडोक्नोॽ सिघे़न्डानिङे।”
चा किङ्निबा डाङ
6मोबा येसुडे़ॽ माहाजि इक्को खानवा लुबेॽटुजि, “इक्को याॽमिडे़ॽ अङ्गुरमि सोङ्राबेॽ वेॽलाभुमि डाङ रिःॽपॽआ ले़टे़। खोसे़ॽ बेला बेला खे़ॽनुङ मोबेॽ चा किक्से़न्डे लुनुङ मो वेॽलाभुमि डाङ्बेॽ खाक्सुए, तर इन्डोक्पेॽसो मो डाङ्बेॽ चा मे़ङ्किक्सा। 7मोबा ए़क्साङ खोसे़ॽ सोङ्राबेॽ योम्बोक ले़ःॽखुबा लुसु, ‘खेप्से, के़ॽ सुम निङ्एम्बाङ इगो वेॽलाभुमि डाङ्बेॽ चा किङ्इयेन्डे लुनुङ हुक्सुङ, तर किङ्नोॽ मे़ङ्किक्सा। हागो इगो डाङ टे़ःक्पेसे।’ 8तर योम्बोक ले़ःॽखुबे़ॽ लुसु, ‘मायोङ्बा, हागो फेरि इक्निङ योङ्मेॽमा के़ॽ इगोमि राडाङ्बेॽ खिरिरि ओःक्नुङ मोल ए़म्बेनुङे। 9कतै चा किङ्इयेन्डे ? चा किङ्होङ नुउ, तर मे़ङ्किङ्होङ टे़ःक्पेनुङे’।”
येसुडे़ॽ टुक्खुबा मेॽनामिॽ नुबोक्पॽआ
10इक्खेॽ नाजामे याकपेॽ येसुडे़ॽ यहुदिजि सुम्ढाम खिमबेॽ सिक्छे पिमे़ॽनिङ्सिडुए। 11मोबेॽ अठारो निङ्बाङ इक्को मेॽनामिॽ मङे़ॽमा चापटे़ॽ चुप्पॽआसे़ॽ खोक्टिखे़ॽपॽआ ले़टे़। मोडोगे़ॽ खो चे़ङ मे़येःप्हेसे़। 12येसुडे़ॽ मो मेॽनामिॽ खाक्सु, मोबा खोमि पोम्बेॽ के़ःॽनुङ लुसु, “होउ मेॽनामिॽ पिच्छा, हागो हे़न नुबुक्इये।” 13येसुडे़ॽ मो मेॽनामिॽसोक्पेॽ हुगे़ॽ के़क्मासोरोॽ मो चे़ङ येपोक्नुङ निवाहाङ्मि ओहाक ले़ःॽपोगु।
14नाजामे यिडे़ॽ मो मेॽनामिॽ येसुडे़ॽ नुबोक्पॽआ खाङ्नुङ यहुदिजि सुम्ढाम खिमबेॽहा एप्पा याॽमिजि सुरके़ॽमानुङ मोबेॽहा याॽमिजि लुसुजि, “योम्बोक ले़ःॽमामि लागि चुक्चि याक टुहाडि! नाजामे याकपेॽ नुबोक्सिॽ इन्ढोङ लेङ्इन्डानिङे ? इमा हाइखा याक माॽआये ?”
15परभुडे़ॽ खो इडोॽ लुसु, “होउ कप्टिजि, इमा नाजामे यिडे़ॽ हे़निङ्मि पिक्चि, गधाजि हेन्नुङ योङा हिङ्सिॽ लाघे़ॽटानुम्ने ? 16इगो अब्राहाम बङ्समि सम्समा पसा सैतानमि बन्धनबाङ नाजामे याकपेॽ छुट्कारा लिमा फे़न्निबा ?” 17येसुमि इडोक्मा खा खेम्नुङ बिरोध ले़ःॽखुबा याॽमिजि नेम्मा सिट्टामि। हाइखा याॽमिजि चाहिँ आक्टोक्मा खरिमा योम्बोक खाङ्नुङ साप्थाक्सामि।
पारसाइमि चरिनुङ खमिरमि खा
(मत्ति १३:३१-३३; मरकुस ४:३०-३२)
18हागोसो येसुडे़ॽ लुघे़ॽटु, “के़ॽ निवाहाङ्मि राज्य इमाङ्डोक्मा ले़ये लुमे़ ? 19निवाहाङ्मि राज्य लुबॽआ पारसाइमि चरिडोॽ ले़ये, इक्को याॽमिडे़ॽ सोङ्राबेॽ पारसाइमि चरि टुबु, मो कडा वाबोक्नुङ बेॽएम्मा डाङ लिसा, मोमि हक्काम्बाबेॽ सोङाजिडे़ॽ हाप टिसुजि।”
20येसुडे़ॽ फेरि लुसु, “निवाहाङ्मि राज्य के़ॽ इमाङ्डोक्मा ले़ये लुमे ? 21इगोगो खमिर ए़म्बॽआ चरेपाडोॽमा ले़ये। इक्को मेॽनामिॽडेॽ ए़डे़ॽवा खमिर सुम ओक्खेङ खाॽमिबेॽ ठुन्डुहा माहा चोप खाॽमिनोॽ खमिर लिनुङ होम्बोक्इये!”
सागुरोमा राम्डेम
(मत्ति ७:१३-१४; २२–२३; ८:११-१२)
22येसु यरुसलेम खे़ॽमे़ॽनिङ्सिमाबेॽ मोबेॽहा सहर सहरनुङ खिम्डेमराजि पे़खे़ॽनुङ याॽमिजि सिक्छे पिसुजि। 23मोडोक्पेॽ इक्को याॽमिडे़ॽ येसुनुङ सिप्सु, “गुरुज्यु, इमा ए़डे़ॽवा याॽमिजिडे़ॽरेॽनोॽ छुट्कारा चुप्मिन्डुजे ?” 24येसुडे़ॽ लुसु, “सागुरोमा राम्बडेमबाङ निवाहाङ्मि राज्यहोङ्सिॽयु पे़खे़ॽमामि बोल लिसानिङे। के़ॽ हे़निङ लुनिम्ने़, बेॽलो याॽमिजि निवाहाङ्मि राज्यहोङ्सिॽयु पे़खे़ॽमा योॽइम्मे तर पे़खे़ॽहेमिने। 25मोडोक्पेॽ खिमदाङ्बा येपोक्नुङ राम्डेम से़ॽइन्डुए मोबा हे़निङे़ॽ चाहिँ पाखे़ॽयुबाङ राम्डेम ढक्ढक रोःक्साङ लुन्डानुमे, ‘राम्डेम हेम्बेॽमाये।’ खोसे़ॽ लुये, ‘हे़निङ असाजिडे हाम्बाङ लेङ्इटानिङे ? के़ॽ हे़निङ लेनिम्नानि!’ 26हे़निङे़ॽ लुन्डानुमे, ‘कानिङ हे़न्नुङ सोरि पेन्नुङ चासिङ्मा, हे़ने़ॽ कानिङ्मिनोॽ खिम्डेमबेॽ सिक्छे पिसुए।’ 27तर खोसे़ॽ फेरि लुये, ‘हे़निङ असाजिडे ? के़ॽ लेनिम्नानि। होउ मङे़हा योम्बोक ले़ःॽखुबाजि, इगोबाङ खे़ॽपेसानिङे!’ 28मोबा अब्राहाम, इसहाक, याकुबनुङ अगमबक्ताजि चोप निवाहाङ्मि राज्यहोङ्सिॽयु खाङ्माबेॽनुङ टाङ्बा चाहिँ पाखे़ॽयु राप्खे़ॽमाबेॽ हे़निङे़ॽ के़ङ इःक्साङ हाःप्साङ खेः आङ्इन्डानुमे। 29याॽमिजि नमगेत, नमथा, थाङ्गेत, लाङ्गेतहा चोप देसबाङ लेन्नुङ निवाहाङ्मि राज्यबेॽ खोनुङ्नोॽ भत्तेर चासिॽ पेङ्इम्मे। 30खाक्सानुमे, आयु ए़क्साङ सिॽखुबाजि याक्लो लिम्मे, आयु याक्लो लिघुबाजि ए़क्साङ सिॽइम्मे।”
यरुसलेम मिॽनुङ येसु हाःबा
(मत्ति २३:३७-३९)
31मोडोक्पेॽनोॽ इक्को निप्पाङ फरिसिजिडे़ॽ येसुबेॽ लेन्नुङ लुसुजि, “हे़न इगोबाङ हाइखा ठाउँबेॽ खे़प्पेसे, इन्ढोङ्होङ हाङ्बा हेरोद एन्टिपासडे़ॽ हे़न सेॽमामि योक्मे़ॽनिङ्सिये।” 32येसुडे़ॽ माहाजि लुसुजि, “हे़निङ खे़ॽनुङ मो स्याला लुबेॽटानुमे, ‘आयुनुङ वागिया मङे़ॽमा चाप यिक्मानुङ नुबोक्मे योम्बोक ले़नुङे मोबा सिङ्आ चाहिँ योम्बोक येॽएनुङे।’ 33तर आयु, वागियानुङ सिङ्आगो के़ए़ योम्बोक ले़ःॽमानोॽ खे़ये, इन्ढोङ्होङ यरुसलेमबाङ हाइखा ठाउँबेॽ अगमबक्ताजि सेडुजिने!
34 “होउ यरुसलेमबेॽहा याॽमिजि, होउ यरुसलेमबेॽहा याॽमिजि! हे़निङे़ॽ अगमबक्ताजि सेॽनेन्डानुमेनुङ निवाहाङ्मि दुतजि रुङ्गोॽवाडे़ॽ फे़ङ्नेन्डानुमे। वाब्रुॽमाडे़ॽ वाःप्साजि कुप्पॽआडोक्नोॽ ले़ःॽनुङ के़ॽ इन्डोकखेॽ हे़निङ सुम्मा योगुङ, तर हे़निङ मे़ङ्खसिडानिङ। 35खाक्सानुमे, निवाहाङ्डे़ॽ हे़निङ्मि सहर याःॽयान्डुए मोबा चइबानोॽ के़ॽ हे़निङ लुनिम्ने़, इन्डोक्लो हे़निङे़ॽ ‘परभु निवाहाङ्मि निङ्बेॽ लेङ्घुबा आसिसनुङ्मा ले़ये’ लुसानुम्ने मोडोक्लो हे़निङे़ॽ का खाङ्डोक्टानुम्ने।”
Aktualisht i përzgjedhur:
लुका 13: YAMP
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2023, Wycliffe Bible Translators, Inc. and Nepal Bible Society