Hechos 4
4
Pedro, Juan sho cäcöbö
lä juwäleno wejei tä a̦
1Ö̦jö bä nija Pedro, Juan sho cäcöbö a̦ faö showao däjä, bada bänö cäcöbö nabä waloaliyomaje. Nofi bäyäalewä blowäjäwä bä ma cui, Yai Bada etä yafi nowamabeje bä ca̦i lä cuono wei a ma cui, saduseo bä ca̦i bada ma cui, ö̦jö bä bluca icuquema. 2Jesús a wa̦fa wäyäböma yalo bä jushuoma. ¿Ö̦jö tawä? Jesús a demi jocädou lä culayono weinaja, yanowamö täbä nia demi ca̦i jocädou co̦o, cäcöbö nofi cuu jushuama cudeenö, bä bada jushuoma.
3Ö̦jö däjä cäcöbö juwäa showalemaje. Tä mö weyaa jaödalayoma cudeenö, cäcöbö fe lao fe jalubä, cäcöbö didiquemaje. 4Ö̦jö ma cui, Pedro, Juan sho cäcöbö nija tä a̦ lä ji̦lileno wejei ai bä bluca mö feduwä lä cuinö tä a̦ bejedi bufiblaö fa showadalojenö, Jesucristo ebä bluca cublaliyoma. Ö̦jö däjä, Jesucristo ebä lä cui, jai 5.000 bä wa̦lo cublou majölayoma.
5Ö̦jö tä fena ja, judio bä bada lä nosiemou wei bä ma cui, ai bä ca̦i bada ma cui, Moisesi tä a̦ ja täbä lä damaö wejei bä ma cui, Jelusale jamö ö̦jö bä bada co̦cablaliyoma. 6Anasi lija bä yododoblaliyoma, nofi bäyäalewä a bada lä cui lija. Ö̦jö bä lä co̦cablaliyono wei jamö, Anasi ai ebä cuo mö feduoma, Caifasi a ma cui, Juan a ma cui, Alejado a ma cui, ö̦jö ebä bluca cuo mö feduoma. 7Pedro, Juan sho cäcöbö fa mötalömabalöjenö, cäcöbö wa̦limaje. Abinaja cäcöbö nowa tamaje.
—¿Wedi tä lojodenö, ö̦jö wafä a li wa̦lo jalomalema? ¿Wedi a wa̦nö, wafäcö inaja li cuaaö bashio? —cäcöbö nowa tamaje.
8Ö̦jö däjä, Yai Bada tä Bufinö Pedro a fa jödödöblalönö, a wa̦ juo shalilioma.
—Bada wamacö lä läo wei wamacö. Wamacö bufi lä walalai wamacö ca̦i bada. 9Ei a wa̦lo juu lä mlaono wei a lä cui, wama a bayeliblaö wa̦lii ja, a lä jalolayono wei wama tä ca̦i wa̦lii ja, 10bä yömöca da daicu, ö̦jö lä. Cafä wamacö ma cui nija, Isaeli bluca ebä ma cui nija, ya wa̦ wawädou showadaobä. Nasaleteli Jesucristo a lä cui, fii balitama defi ja wama a lä shämaleno wei a lä cui, Yai Bada tänö a demi jocädamaö co̦layoma. Ö̦jö a wa̦ lojode showawänö, ei wama a wa̦lo demi ublaa dablaö lä cule. 11Jai maa mabä ja, wama a yafi nia lä i̦tamaö wei wamacö bada lä culenö, maa wama ma lä waileno wei, ö̦jö Jesucristo a li waiquiwä. Ö̦jö wama ma lä waileno wei, fei däjä a yafi colo lojodoobä, ma yai li cublou nomöjölayoma. 12Ai a nija bämacö nia lä jucäamou wei a cuami. Jödödöwä täbä lä bälöblai täbä ma cui nija, ai a wa̦fa wäyämamou malä mlai, bämacö jucäamobä —Pedronö bä nowa tama.
13Pedro, Juan sho cäcöbö a̦ waiteli lä juono wei tä fa dalalöjenö, bada bä bufi wedinajamoma. Oni sibä ja, cäcöbö damamou fe balojoono malä mlaono wei. Showadi ai bä cua lä bädalenaja cäcöbö cuo mö malä feduono wei. Bä bufi fa möblalunö, “Jesús nija showadi cäcöbö lä nocaablalodino wei cäcöbö nofi yaiwä”, cäcöbö nofi tadalemaje. 14Ö̦jö ma cui, cäcöbö nofi ma wa̦libono wejei ma cui, a lä jalomaböleno wei a ca̦i ublaoböma yalo, bä a̦ läobä tä cuonomi.
15Ö̦jö däjä, sibo jamö cäcöbö ca̦i famaö fa bufijenö, bä lä yododoono wei jamö, bada bä a̦ bluca wayou juoma. 16Abinaja bä nowa tayoma.
—¿Wedinaja bei bäma cäcöbö li taamabä tawä? Ei cäcöbö a̦ lä fafe cäcöbönö, tä nö lä quilijii tä malä wawämaböno wei. Bäma cäcöbö a̦fa jolemou tabä tä cuami waiquiwä. Jelusaleteli bä blucanö, ö̦jö tä daö malä waiquilajei. 17Ö̦jö ma cui, ei tä a̦ lä wäyäfe, tä a̦ ji̦limou blaucublou mlaobä bäma cäcöbö a̦ shino da wasö, moli a bädawä ma cui nija Jesús a wa̦fa wäyäböö co̦daaö mlaobä —bä nowa tayoma.
18Ö̦jö cudeenö, cäcöbö nacaa fa co̦malöjenö, cäcöbö wasöö dodijiomaje.
—Jesús wafä a̦fa nia wäyäö co̦daaimi. Ö̦jö etä a̦ ma cui ja, wafä bä nia yömölaö co̦daaimi —bä cuu fe blacäjoma.
19Cäcöbö ma wasöno wejei ma cui, Pedro, Juan sho cäcöbö a̦ juo ja, abinaja cäcöbö cuma.
—¿Wedi jamö tä lä cui tä yai dodijidawä, ö̦jö lä? Yai Bada etä a̦ yai ji̦limamou mlai ja, cafä wamacö lä cuu wei, ¿ö̦jö tä a̦ shino yai juamamobä daanö? ¿Wedinaja cafä wamacö bufi li cuu? Ma, cafä wamacö a̦ nia yai juamamoimi. 20Yafä tä lä möno wei tä ma cui, yafä tä a̦ lä ji̦lileno wei tä a̦ ma cui, yafä tä a̦ wäyäö mladobä tä cua malä mlai —cäcöbö cuu mö feduoma.
21Cäcöbö wasööje ja, bada bä a̦ nö quiliama. Ö̦jö däjä, cäcöbö jujeblalemaje. Cäcöbö nö ninili bleaamaö bufi ma doblaono wejei ma cui, yanowamö täbä nija bä quilima. Täbä shi doo malä waiquiono wei. A lä jalomaböleno wei tä nowa ja, bluca bänö Yai Bada a nofi doablaamaje. 22Ö̦jö a lä cui, Yai Bada tä lojode dablabeje, a lä jalomaböleno wei a wa̦lo lä cui, a badao malä waiquiono wei. A wa̦lidio showao däjä, lasha 40 a malä jayublamaleno wei.
Bä quilii mlaobä bä nö
bayeli lä nacano wejei tä a̦
23Cäcöbö fa jujeblalöjenö, cama ebä nija cäcöbö co̦blou lä co̦ono wei jamö, cäcöbö a̦ nö wäoma. Nofi bäyäalewä blowäjäwä bä ma cui, bä bufi lä walalai bä bada mö feduwä ma cui, ö̦jö bä wa̦no wäyäböö showadaojoloma. 24Ö̦jö cäcöbö a̦ fa ji̦liläjenö, Yai Bada nija cama bä a̦ bluca faö showadaoma.
—Bada tä. Yai Bada wa tä. Judu wa mösö lä tablaleno wei wa. Ulifi a bada ma cui, modu ubä lä cublai ubä ma cui, wa ubä tablalema. Fedu jamö bä bluca lä culadi bä ma cui, bita jamö bä bluca lä cule bä ma cui, mau jamö bä bluca lä cublai bä ma cui, wa bä bluca lä tablaleno wei, ö̦jö cafä wa dodijiwä. 25Wa wa̦ juamobä, camiyä yamacö nö badabö David a lä cuono wei, bei wa Bufinö wa wa̦ macocamama. Abinaja wa cuma.
¿Wedi tä tabeje, judio bä lä mlai bä jushudou fe balojolayoma? Ö̦jö bä shomi lä cuinö, ¿wedi tä tabeje, Yai Bada a nofi jole jole li washublalamaje? 26Bä bälöo lä dodijio wei bä bluca lä cublai, bä wayu itoblaliyoma. Bä bada lä läo wei bä lä cui, bä co̦cablaliyoma. Bada tä lä bufiblamou wei tä ma cui, cama e lä yaileno wei a ma cui, cäcöbö nabä queobeje bä toujublaliyoma.
’Einaja wa cuma —Yai Bada nija bä cuma—. 27Eja, Jelusale jamö bä mada toujablei. Elode a ma cui, Bo̦sio Bilado a ma cui, judio bä lä mlai bä sho, Isaeli nodiwä ebä ca̦i bluca sho, ö̦jö bä bluca co̦cablaliyoma. Afä wa lä yaileno wei a lä cui, ö̦jö Jesús a nabä co̦camoamaje. 28A nia lä taamano wejei, yedu jamö ma cui, cafänö wa tä taamaö bufi doblao waiquioma. Wa tä taamaö bufi fa doblaonö, cafä wa lojodenö wa tä wawäblamalema.
29’Fei däjä ma cui, ei wa bä a̦ ji̦liaö, Bada tä —bä cuma—. Bä jo̦wa waitelimou bufi doblao. ¿Ö̦jö tawä? Cafä wa wa̦ juamobä yamacö lä cui, yamacö bufi da lojodomabo, quilii mlai ja, afä yama tä a̦ wäyäö fe yadiobä. 30Yama tä a̦ wäyäbä jamö, bä lä jalili wei bä ca̦i da jaloma, cafä wa mayo dablamobä. Wa wa̦ juamobä, afä wa lä yaileno wei a Jesús lä cui, ö̦jo a wa̦ lojodenö, tä nö lä quilijii yama tä bluca wawämaö showadaobä —bä cuma.
31Yai Bada nija bä a̦ faö waicou däjä, bä lä co̦cablono wei a yafi lä cui, a yafi qui̦da qui̦damou nö quiliama. Ö̦jö bä bluca lä cui, Yai Bada tä Bufinö bä fa jödödöblalunö, bä quilii mlai ja etä a̦ wäyäö waiteliblou showadalayomaje.
Bä bayeliblayou bufi
lä doblaono wei tä a̦
32Jesucristo bufilewä bä lä cui, bä bufi shedecou mlai ja, moli tä ja bä bufi bluca yaimoma. Bä bluca lä tabono wejei bä ma cui ja, “Ei iba moli tä li cuobä”, bä cunomi. Bä bufi läablalou mlai ja, bä madofibö nofi bluca ibamayoma. 33Jesucristonö bä lä shömöleno wei bä lä cuinö, Bada tä Jesús a wa̦fa demi jocädou wäyäöje däjä, Yai Bada a lojode damoa dodijia showadalaliyoma. Yai Bada tänö wawädowä bä bayeliblaö cuaama. 34Cama bä nija, moli a ma cui a jo̦limobä a cuonomi.
Abinaja bä showadi cuaama. Ulifi bä nofi lä tabono wejei bä lä cuinö, blada bä ja bä ulifibö jöböamaje. Yafi bä lä tabono wejei bä ma cuinö, inaja showawä, bä yafibö jöböamou cuoma, blada bä ja. Ö̦jö bä ja, bä blada lä doano wejei, bä blada ca̦i fa waloojenö, 35Jesucristonö bä lä shömöleno wei bä nija, bä blada jöbömaje. Ö̦jö bä lä cuinö, bä lä jo̦li wei bä dobäö fe dolemou nomöjöomaje.
36¿Ö̦jö tawä? Inaja showawä, Shibleteli ai a ca̦i cuaaö mö feduoma, José a wa̦fa lä cuono wei. Lewi nodiwä ö̦jö e li cuoma. Showadi täbä bufi lojodoaamaö cuaaö cudeenö, Jesucristonö bä lä shömöleno wei bä lä cuinö a wa̦fa Benabei jilaa nömöjöquemaje. 37Ö̦jö Benabei a lä cuinö, cama etä ulifi fa jöböcönö, blada bä dälema. Ö̦jö bä blada ca̦i fa waloicunö, Jesucristonö bä lä shömöleno wei bä nija bä jöböquema, bä lä jo̦li wei bä dobäö mö feduobeje.
Zvasarudzwa nguva ino
Hechos 4: GUU
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
©2012, All Rights Reserved