Tererai murairo waŋgu, imi ʋanhu ʋaŋgu;
Rerekerai nzeʋe dzenyu munzwe mashoko omuromo waŋgu.
Ndicashamisa muromo waŋgu nditaure nomufananidzo;
Ndicaparidza mashoko akaʋanzika ekare,
Ɀatakanzwa neɀatakaziʋa,
Neɀatakaʋudzwa namadziɓaɓa eɗu.
Hatiŋgaɀiʋanziri ʋana ʋaʋo,
Asi ticaʋudza rudzi runoteʋera maɓasa aŋgarumbidzwa aJehova,
Nesimba rake, namaɓasa ake, anoshamisa, aakaita.
Nokuti wakamutsa cipupuriro pakati paJakobo,
Akatema murairo pakati paIsraeri,
Akaɀiraira madziɓaɓa eɗu,
Kuti ʋaɀiziʋise ʋana ʋaʋo;
Kuti rudzi runoteʋera ruɀiziʋe, iʋo ʋana ʋacazoɓerekwa;
Iʋo ʋasimuke ʋaɀiʋudze ʋana ʋaʋo;
Kuti tariro yaʋo iʋe kunaMŋari,
Ʋarege kukaŋganwa maɓasa aMŋari,
Asi ʋaceŋgete mirairo yake;
Ʋarege kufanana namadziɓaɓa aʋo,
Rwakaŋga ruri rudzi rusiŋgatereri, rwakamukira Mŋari.
Rudzi rwakaramba kururamisa mŋoyo yaʋo,
Ʋuye mŋeya yaʋo yakaŋga isinokutendeka kunaMŋari.
Ʋana ʋaEfraimi, kunyaŋge ʋakaŋga ʋakashoŋga nhumbi dzokurwa noʋuta,
Ʋakadzokera shure pazuʋa rokurwa.
Haʋana‐kuceŋgeta suŋgano yaMŋari,
Ʋakaramba kufamba nomurairo wake;
Ʋakakaŋganwa ɀaakaita,
Namaɓasa ake akashamisa, aakaʋaratidza.
Wakaita ɀinhu ɀinoshamisa pamberi pamadziɓaɓa aʋo,
Panyika yeEgipita, pasaŋgo reZoani.
Wakapamura guŋgwa, akaʋayambusa;
Akamisa mvura ikafanana nomurwi.
Masikati ʋo wakaʋafambisa negore,
Noʋusiku bgose neciedza comŋoto.
Wakapamura matombo murenje,
Akaʋanwisa ɀakanaka kwaɀo sapamvura inobva pakadzika.
Wakaɓuɗisa ʋo hoʋa dzemvura paɗombo,
Akayererisa mvura zhinji yakaita senzizi.
Kunyaŋge ɀakaɗaro ʋakaramba ʋacimutadzira,
Nokumukira Wokumsoro‐soro murenje.
Ʋakaidza Mŋari mumŋoyo maʋo
Ʋacikumbira ɀokudya ɀaʋakaŋga ʋaciɗa iʋo.
Ɀirokwaɀo, ʋakapopotera Mŋari;
Ʋakati: Mŋari uŋgatigadzirira tafura murenje here?
Tarirai, wakaroʋa ɗombo, mvura zhinji ikadzutuka,
Hoʋa dzakayerera;
Ko uŋgapa ciŋgwa ʋo here?
Uŋgaʋigira ʋanhu ʋake nyama here?
Saka Jehova wakanzwa, akatsamŋa;
Mŋoto ukaʋeserwa Jakobo,
Kutsamŋa kukamukira Israeri;
Nokuti haʋana‐kutenda Mŋari,
Haʋana‐kuʋimba nokuponesa kwake.
Kunyaŋge ɀakaɗaro wakaraira ɗeŋga rose kumsoro,
Akazarura mikoʋa yokuɗeŋga;
Akanisa mana pamsoro paʋo kuti ʋadye,
Akaʋapa ɀiyo ɀokuɗeŋga.
Ʋanhu ʋakadya ciŋgwa caʋatumŋa;
Wakaʋatumira ɀokudya kuȿikira ʋaguta.
Wakaɓuɗisa mhepo yakabva mabvazuʋa, ikarira kuɗeŋga;
Akafambisa mhepo yakabva nyasi nesimba rake.
Wakanisa ʋo nyama pamsoro paʋo ikaita seguruʋa,
Neshiri, dzinamapapiro, dzikaita sejeca reguŋgwa;
Wakaɀiwisira pakati pemisasa yaʋo,
Pose‐pose paʋakaŋga ʋagere.
Ipapo ʋakadya, ʋakaguta kwaɀo;
Akaʋapa ɀaʋakaŋga ʋacikarira.
Ʋakaŋga ʋasati ʋanyaradza kukara kwaʋo,
Ɀokudya ɀaʋo ɀakaŋga ɀiciri mumiromo yaʋo,
Kutsamŋa kwaMŋari kukaʋamukira,
Akaʋuraya ʋakakoresa pakati paʋo,
Akaparadza majaya aIsraeri.
Kunyaŋge ɀakaɗaro ʋakaramba ʋacitadza,
Ʋakasatenda maɓasa ake aishamisa.
Saka wakapedza mazuʋa aʋo paneɀisinamaturo,
Namakore aʋo paneɀinotyisa.
Ɀino wakati aciʋaʋuraya, ipapo ʋakamubvunza;
Ʋakadzoka, ʋakashiŋgaira kutȿaka Mŋari.
Ʋakaraŋgarira kuti Mŋari ndiye ɗombo raʋo,
NaMŋari Wokumsoro‐soro mudzikinuri waʋo.
Asi ʋakamuɓata kumeso nomuromo waʋo,
Ʋakamureʋera nhema nendimi dzaʋo.
Nokuti mŋoyo yaʋo yakaŋga isinakururama kwaari,
Ʋuye ʋakaŋga ʋasina‐kutendeka pasuŋgano yake.
Asi iye, ɀaakaŋga anenyasha huru, wakaʋakaŋganwira kuipa kwaʋo, akasaʋaparadza;
Ɀirokwaɀo, kazhinji wakadzora kutsamŋa kwake,
Akasamutsa hasha dzake dzose.
Akaraŋgarira kuti ʋakaŋga ʋari nyama ɓedzi;
Nemhepo, inopfuʋura, isiŋgadzoki ɀe.
Bible App
Bible App for Kids
