मरकुस 6
6
नासरत में यीसू गो आदर समान
(मत्ती 13:53-58; लूका 4:16-30)
1फेर बठूं निकळ गे यीसू आपगै गाम आग्या। 2सबत गै दिन बे आराधना भवन में लोगां नै बचन सिखाण लागग्या। बठै सुणन आळा लोग हेरान होवा कै ईं कनै इतो ग्यान कठूं आयो कै अर कठूं ईं कनै चमत्कार करण गी ताकत आई है। 3ओ तो बढई है। मरियम गो बेटो तो है अर याकूब, योसे, यहूदा अर सीमोन गो भाई तो है। इंगी भेना नै तो आपां जाणा हां। ईंखातर बानै भोत बुरो लागग्यो अर बां यीसू पर बिस्वास कोनी करयो।
4यीसू बानै केयो, “परमेसर गी बात बताण आळै पर बिंगो गाम, रिस्तेदार अर बिंगै घर आळा कदी बिस्वास कोनी करै।”
5बठै बां कोई सामरथ गा काम कोनी करया क्यूंकै लोगां बां पर बिस्वास कोनी करयो। थोड़ै सै बीमार लोगां नै ठीक करया। 6यीसू हेरान हो'ग्या कै बांगै गाम आळा बां पर बिस्वास कोनी करयो। फेर यीसू परमेसर गो बचन सिखाणता होया गाम गाम में फिरता रेया।
बारै खास चेला गो भेजणो
(मत्ती 10:5-15; लूका 9:1-6)
7बां आपगै बारा चेला नै बुला'गे बानै ओपरियां काडण गो अधिकार देगे अर दो दो कर'गे गामां में भेज्या। 8यीसू बानै केयो, “थे थारै सागै एक लाठी गै सिवा कीं ना लेईयो, ना तो झोळो, ना'ई रोटी अर ना'ई बटुओ। 9जूती पेर गे ई जाईयो अर एक ई फालतू कुड़तो सागै ना लेईयो। 10जद थे किसैई गाम में जाओ तो एक ई घर में रेईयो जद तांई बठू पाछा ना चालो। 11जद थानै कोई किस्यै गाम गा रेण गी जिग्यां ना देवै अर परमेसर गो बचन कोई ना सुणै तो थे थारै पगां गी धूल बांगै सामै झाड़ गे चाल पड़ियो। ओ करणो ईं बात गी निसानी हो'सी कै परमेसर गी सजा गा जिमेदार बे आप लोग हो'सी।”
12फेर चेला जा'गे परचार करयो कै आपगो मन बदळ गे परमेसर गै रा पर चालणो सीखो। 13इंगै अलावा बां लोगां मू ओपरियां काडी अर कीं बीमार लोगां गै सिर पर तेल लगागे बानै ठीक करया।
यूहना बतिस्मो देण आळै नै मारयो जाणो
(मत्ती 14:1-12; लूका 9:7-9)
14यीसू गी चरचा फेलण गै कारण राजा हेरोदेस बिंगी चरचा सुणी। केई लोग तो केवा कै, “यीसू बतिस्मो देण आळो यूहना है अर दुसर जीवंतो हो'ग्यो। ईंखातर ई यीसू चमत्कार करै है।
15केई केवा यीसू एलियाह परमेसर गी बात बताण आळो है अर केई केवा ओ तो एलियाह बरगो ई हो झिको भोत पेलां रेंतो हो।”
16ओ सुण गे राजा हेरोदेस केयो कै, “झिकै यूहना गो सिर कलम करवायो बो पाछो जीग्यो के?” 17हेरोदेस राजा यूहना नै जेळ में बंद कर दियो हेरोदेस ओ आदेस हेरोदियास गै केण पर दिओ हेरोदेस आपगै भाई फिलिप्पुस गी पत्नी हेरोदियास सागै ब्या करेड़ो हो। 18क्यूंकै यूहना हेरोदेस नै केणतो कै इयां आपगै भाई गी पत्नी सागै ब्या करणो परमेसर गै नेम गै बिरोध में है।
19ईंखातर हेरोदियास बिंऊं बेर राखती अर बा चावै ई कै इनै मरवा दैयूं। 20पण हेरोदेस यूहना नै धरमी आदमी अर पवितर आदमी मानतो अर बिंगी संभाळ करतो। बो बिंगी बाता सुण गे भोत डरतो पण बाता बड़ै आनंद ऊं सुणतो।
21यूहना ऊं बदलो लेण गो मोको हेरोदियास नै जद मिल्यो जद हेरोदेस आपगै जन्म दिन पर आपगै मोटै अफसरां, सेनापतियां अर जनता में मोटै-मोटै लोगां नै भोज दियो। 22ईं भोज में हेरोदियास गी बेटी नाच गे हेरोदेस अर भोज में बुलाएड़ा लोगां नै खुस करया ईंखातर राजा लड़की नै केयो झिको कीं तूं आज मांगैगी मैं तनै दैयूंगा। 23क्यूंकै राजा सोगन खाई कै जे तूं मेरो आदो राज पाट ई मांगै गी तो मैं तनै आज दैयूंगा।
24जद बण बारै आ'गे आपगी मां हेरोदियास नै पूछयो कै, “मैं के मागूं?” बिंगी मां केयो, “तूं यूहना बतिस्मो देण आळै गो सिर मांग ले।”
25जद बा दबादब राजा कनै जा'गे केयो, “मनै अबी यूहना गो सिर एक थाळी में ल्यागे दैयो।”
26ओ सुण गे राजा हेरोदेस नै बड़ो दुख होयो पण भोज में आण आळै मेहमाना गै सामै झिकी सोगन खाई बिंगै कारण बो मना कोनी कर सक्यो। 27ईंखातर राजा एक सैनिक नै यूहना गो सिर काट गे ल्याण खातर केयो। बो जेळ में जा'गे यूहना गो सिर बाड गे लियायो। 28बण सिर बिं छोरी नै दियो अर बण छोरी आपगी मां नै दियो। 29जद यूहना गै चेला नै ठा लागग्यो तो बे आ'गे बिंगै सरीर नै ले जा'गे एक कबर में रख दिओ।
खास चेला गो पाछो आणो अर एकला रेणो
(मत्ती 14:13,14; लूका 9:10)
30यीसू गै खास चेला पाछा आ'गे यीसू कनै बेठगे झिको कीं बां गामां में करयो अर लोगां नै सिखायो बिंगै बारै में बतायो। 31बठै भोत लोग आंता-जांता रेवा ईंखातर बां चेला नै रोटी खाण नै ईं सांस कोनी मिलतो ईंखातर यीसू बानै केयो थे मेरै सागै न्यारी जिग्यां में जा'गे थोड़ो आराम कर ल्यो। 32जद बे एक किस्ती पर चढगे सुनसान जिग्यां कानी चाल पड़या।
33पण केई लोगां बानै किस्ती पर चढता टेम पिछाण लिआ। फेर केई नगर ऊं भेळा होगे भाज्या अर यीसू अर बांगै चेला ऊं पेली किनारै पर जा पूग्या। 34जिंया यीसू किनारै पर पूग गे किस्ती ऊं उतरया तो बां लोगां गी एक मोटी भीड़ देखी। यीसू नै बिं भीड़ पर बड़ी दया आई क्यूंकै बे बिना गुआळियै गी भेड़ा बरगा लागै हा। ईंखातर बानै बे परमेसर गी बाता बताण लागग्या। 35जद देर होण लागी तो यीसू गै चेला बानै आ'गे केयो, “आ सुनसान जिग्यां है अर भोत मोड़ो हो'ग्यो है। 36लोगां नै अब जाण दैयो जिंऊं नेडै़ गाम में जा'गे आपगै खाण-पीण गो बदोबस्त कर सकै।”
37पण यीसू बानै केयो, “थे ई आनै कीं खाण नै दैयो?” चेला केयो, “आनै खूआण खातर इतै पीसा गी जरूरत पडै़गी जितो एक मजदूर आठ म्हिना काम कर'गे कमा सकै ओ किंया होवैगो?”
38यीसू बानै केयो, “जा'गे पतो करो थारै कनै किती रोटियां है।” बां जा'गे पतो करयो कै म्हारै कनै पांच रोटी अर दो मछलियां है।
39यीसू बानै केयो, “सारै लोगां नै घास पर झुण्ड बणा गे बिठा दैयो।” 40जद लोग सो सो अर पचास गा झुण्ड बणा गे बेठ ग्या। 41यीसू पांच रोटी अर दो मछलियां लेगे अर आकास कानी कर'गे परमेसर गो धन्यावाद करयो अर रोटियां नै तोड़ गे लोगां नै परोसण खातर चेला नै देण लागग्या। अर बां लोगां नै बांट दी। 42-43जद सारा धापग्या तो चेला बचेड़ी रोटियां गी बारा टोकरियां भरली। 44बिं दिन लुगाईयां अर टाबरा गै अलावा बठै पांच हजार आदमिया भोजन करयो।
यीसू गो पाणी पर चालणो
(मत्ती 14:22-33; यूहना 6:15-21)
45इंगै तुरंत बाद में यीसू आपगै चेला नै किस्ती पर बिठागे आगै गलील झील गै पार बेतसैदा गाम में भेज दिआ। अर फेर भीड़ पाछी आप आपगै गाम में भेज दी। 46भीड़ ऊं विदा लेगे यीसू आप पराथना करण खातर एक प्हाड़ी पर उड़ग्या। 47जद आथण होण लागगी जद तांई किस्ती झील गै बिचाळै पूग गी। अर यीसू पहाड़ी पर एकला ई हा। 48बां चेला नै बड़ी मेनत ऊं किस्ती चलाणता देख्या। क्यूंकै पून बांगै सामली चालै ही। अर दिन गै पेली यीसू पाणी पर चाल गे बांगै कनै गेया। बे चेला ऊं आ'गै निकळण आळा ही हा। 49पण चेला यीसू नै पाणी पर चालतां देखगे सोच्यो कै ओ भूत है अर बे चिलाण लागग्या। 50क्यूंकै जद बां सारा बानै देख्यो तो बे घबरा ग्या। पण यीसू बानै तुरंत केयो, “हिम्मत राखो। मैं ई हूं डरो ना।”
51फेर यीसू बांगी किस्ती पर चढग्यो अर हवा रुकगी। ओ देखगे चेला हेरान हो'ग्या। 52पांच रोटियां गै चमत्कार नै देखण गै बाद में ई चेला समझ कोनी पाया कै यीसू कनै किती ताकत है क्यूंकै बे कठोर दिल गा हा।
गनेसरत में बीमारा नै ठीक करणो
(मत्ती 14:34-36)
53फेर झील पार कर'गे गनेसरत प्रांत कनै पूग्या अर किस्ती नै किनारै पर लगाई 54जिंयाई यीसू अर बिंगा चेला किस्ती पर ऊं उतरया तो बठै गै लोगां बानै पिछाण लिया। 55अर लोग भाज भाज गे गामां मू बीमार लोगां नै मांची पर घाल घाल गे ल्याण लागग्या जठै बां सुण्यो कै यीसू बठै है। 56जठै कठैई यीसू गेया, चायै बो गाम हो, चायै बो सैहर हो बठै लोग बीमार लोगां नै ले जा'गे बजारा में सुणा दिया जठू यीसू नै जाणो हो बठै लोग गिडगिड़ागे केण लागग्या कै थे म्हानै थारै कपडै़ गै पलै गै ई हात लगा लेण दैयो। अर जिताई लोग बांगै हात लगावा सारा ठीक होये आवा।
Currently Selected:
मरकुस 6: BGQ
Označeno
Deli
Kopiraj
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust