मरकुस 5
5
ओपरी भरेड़ै आदमी नै ठीक करणो
(मत्ती 8:28-34; लूका 8:26-39)
1यीसू अर बिंगा चेला गलील झील नै पार कर'गे गरासेनिया नगर में पूग्या। 2जद बे किस्ती ऊं उतरया तो बां कनै एक आदमी मूसाणा मू निकळ गे आयो। बिमै ओपरी बडे़ड़ी। 3बो मूसाणा में ई रेंतो अर बो सांकला ऊं बांदेड़ो बी किंगैई ताबै कोनी आंतो। 4क्यूंकै बिनै केई बरीयां सांकला ऊं बांदयो पण बो सांकला नै तोड़ गे टोटा टोटा कर देंतो। अर बो किंगैई ताबै कोनी आंतो। 5बो रात दिन मूसाणा अर पहाड़ा पर कूकतो। चिलाणतो रेंतो अर अपणै आपनै दगड़ा ऊं घायल कर लेंतो।
6बण दूर ऊं ई यीसू नै देख्यो अर देखतांई भाज्यो अर आ'गे बानै निमस्कार करी। 7अर जोर ऊं चिलागे बोल्यो, “हे यीसू परम प्रधान परमेसर गा बेटा तेरो मेरो के मेळ है? मैं तनै परमेसर गी सोगन खुआंऊ कै तूं म्हानै दुख ना दे।” 8यीसू बिनै केयो, “ऐ बुरी आत्मा इमूं निकळज्या।”
9यीसू बिनै पूछयो, “तेरो के नाम है?” बण आदमी बानै केयो, “मेरो नाम पळटण है क्यूंकै मैं एक कोनी म्हे भोत सारी हां।”
10अर बो यीसू ऊं बिनती करण लागग्यो कै, “तूं म्हानै ईं देस ऊं बारै ना काड?”
11अर बिनती कर'गे केयो, “बठै पहाड़ पर सूरां गो एक मोटो झुण्ड चरण लागरयो है, म्हानै बामै भेज दे कै म्हे बामै बड़ ज्यावां।” सूर दो हजार गै सारै सारै हा। 12-13अर बण बांनै आग्या दी बे सारी ओपरी आत्मा कड गे सूरां में बड़गी अर सारा सूर एकदम ई झील में जा पड़या अर डूब गे मरग्या।
14सूरां गा गुआळिया ओ देख गाम कानी भाज्या अर जा'गे गाम गै लोगां नै सारी होयेड़ी बात बताई। जद लोग देखण आया झिको कीं बठै होयो हो। 15जद लोग बठै आया तो बां झिकै आदमी में ओपरी ही बिनै गाबा पेरेड़ो आराम ऊं यीसू कनै बेठयो देख्यो तो बे डरग्या। 16गुआळिया बिं आदमी अर सूरां गै बारै में सारो कीं लोगां नै बतायो।
17ओ सुण गे सारा लोग बांऊ बिनती करण लाग्या कै म्हारै इलाकै ऊं उड़ ज्याओ।
18जद यीसू किस्ती पर चढण लाग्या तो बो ओपरी बडे़ड़ो आदमी गिड़गिड़ा गे केण लागग्यो कै मैं थारै सागै चालूंगा।
19पण यीसू बिनै मना कर दिओ। अर बिनै केयो, “तूं तेरै घरे जा'गे बता कै परमेसर तेरो कितो भलो करयो है।”
20अर बो आदमी दिकापुलिस प्रांत गै गांवा में जा'गे बताण लागग्यो झिको कीं बिंगै सागै होयो अर सारा सुणन आळा सुणगे हेरान होया।
याईर गी मरेड़ी बेटी अर एक बीमार लुगाई
(मत्ती 9:18-26; लूका 8:40-56)
21जद यीसू झील गै दूसरै किनारै पूग्या तो बांगै चारूंमेर लोगां गी भीड़ भेळी होगी। 22जद बठै यहुदियां गै पराथना भवन गो सरदार आयो। बिंगो नाम याईर हो। बो यीसू नै देखतांई पगां पड़ग्यो। 23अर रो रो गे बिनती करण लागग्यो कै मेरी छोटी बेटी मरण आळी है थे थारो दया गो हात बिं पर रखो जिंऊं बा बच ज्यै।
24यीसू बिंगै सागै चाल पड़या। लोगां गी भीड़ बांगै उपर पड़ती जावै ही।
25बिं भीड़ में एक लुगाई ही झिकी गै बारा साला ऊं खून निकळण गो रोग हो। 26बा केई डाक्टरां ऊं ईलाज करा करा गे तंग आ'गी पण ठीक कोनी होई। बण आपगो सारो धन ईलाज में लगा दिओ पण बा ठीक होण'गी बजाय ओर जादा बीमार होंती रेई। 27-28जद बण यीसू गै बारै में सुणयो तो सोच्यो जे मैं यीसू गै पलै गै हात लगा दैयूं तो ठीक हो'ज्यूंगी जद बा भीड़ माखर आ'गे यीसू गै लारूं कपडै़ गै पलै गै हात लगायो।
29अर हात लगाणता ई खून निकळणो ठीक हो'ग्यो। अर बण मेहसूस करयो कै मैं ठीक होगी। 30यीसू नै जद ई ठा लागग्यो कै मेरै सरीर मू सामरथ निकळी है जद बा लारै मुड़ गे भीड़ ऊं पूछयो मेरै हात कण लगायो है।
31यीसू गै चेला केयो, “थे आप ई देखल्यो भीड़ किंया उपर पड़ै है अब किंगो नाम ल्यां कै हात कण लगायो है।”
32यीसू चारूंमेर देखण लागरया कै, “बांगै कण हात लगायो है।” 33फेर बा लुगाई यीसू गै कनै आ'गे पगां पड़गे निमस्कार करी। क्यूंकै बा जाण गी कै मैं ठीक होई हूं अर डरती डरती झिको कीं बण करयो सारो बता दिओ। 34यीसू बिनै केयो, “बेटी तेरै बिस्वास ई तनै ठीक करयो है आराम ऊं जा आ बीमारी तनै दूसर ना होवै।”
35जद यीसू बिंऊं बात करण लागरया तो याईर प्रधान गै घर ऊं केई लोग आया अर केण लाग्या, “तेरी बेटी गुजर गी। अब गुरूजी नै ना फोड़ा घाल।”
36यीसू बांगी बात नै अणदेखी कर दी अर याईर नै केयो, “डर ना, बिस्वास राख।” 37अर बो आपगा चेला पतरस, याकूब अर बिंगो भाई यूहना गै सिवा ओर किनैई आपगै सागै कोनी ल्याया। 38जद बे याईर गै घरे पूग्या तो बठै लोग रोण लागरया केई सोक करण लागरया। 39यीसू मा जा'गे बानै केयो, “इयां रोण क्यामी लागरया हो, छोरी मरी थोड़ी है? आ तो सोण लागरी है।”
40ओ सुणगे लोग बिं पर हांसण लागग्या। पण यीसू सारा नै बारै काड़ दिआ अर छोरी गै मां बाप नै अर तीन चेला नै ले'गे कमरै में गेया। 41यीसू बिंगो हात पकड़ गे केयो, “बेटी मैं तनै केऊं खड़ी हो।”
42अर केंता ई बा छोरी खड़ी होगे चालण फिरण लागगी। बा बारा साल गी ही। ओ देखगे सारा हेरान हो'ग्या। 43यीसू देखण आळा नै चेताया कै, “आ बात किनैई कोनी बताणी है फेर केयो ईं छोरी नै कीं खाण नै दैयो।”
Currently Selected:
मरकुस 5: BGQ
Označeno
Deli
Kopiraj
Want to have your highlights saved across all your devices? Sign up or sign in
© 2023 (Active), Wycliffe Bible Translators, Inc. All rights reserved. © WIn Publishing Trust