Mashora 25
25
Paulo avika rufwaa kwa Kaisari
1Naasa kyeeri Festo alemaa yaanga mashoreny a witori lwa uruka, kukasia mikonu iraru nsi nawe kasaama Yerusalemu auka Kaisaria. 2Nkohani nniini na vaniini va Vayuda vakammbia mbony ta Paulo, vakantereva, 3naambo navairikye naute ivavaso Paulo neendwa Yerusalemu, naambo vammboye neemmbwaa efo shia. 4Kyaindi Festo kavarouwa sheelyi Paulo mmbo akeeringyo kulya Kaisaria, nawe muni nkufii neendefo. 5Kawuya kaamba, “Vasongoru vashe veende ando amwi neeny indenkumba kwakooya kwiifo kiteve uwe ya nndu yeu.”
6Ekimaa ikaa kwawo mikonu irindaru ao nyanya indo nsi, kasoka na Kaisaria, elyi lya ndesi kakaa rembo kitiminy kya mwaandu kavavasya Paulo neendwa. 7Kyeeri alesha, Vayuda valya valesoka vauka Yerusalemu vakasalala kufii nawe vakeende fikumbo fiingyi firoo uwe yakwe, valashiidimaa nta yaasumanisa. 8Paulo ekuringaa kaamba, “Yeny nshileimwa mavavaso a Vayuda-fo, nta mmba ya Iruva-fo, nta a Kaisari-fo.” 9Kyaindi Festo we ekundye ikushiisa kwa Vayuda karouwa paulo, kaamba, “A kukundye iwuya Yerusalemu kunderumbuyofo mwaandu yeu mmbee yakwa?” 10Paulo kaamba, “Yeny mmbo shisalalyi yaa mmbee ya kitima kya mwaandu kya Kaisari, ng'u ando kusumani ishaanduya, nshilelyamarya Vayuda kindo-fo, shaasa neewe kuveishi ninsha. 11Naasany kwakooya shilyamarye, ao kwakooya shitannyi kindo kishisumanyi ifwa, nshilemaa ntafo, lyo kwankooya nshi kya dede ikumbwa elyi, nkwiifo nndu ashidimaa ishivika maakony awo-fo. Mwaandu wakwa weende mmbee kwa Kaisari.” 12Festo ekimaa irera na vandu va ikwaanu lyilya, karouwa kaamba, “Mmbo kwakunda yeenda mmbee kwa Kaisari-sho! Ra kweendeny kwa Kaisari.”
Festo avia Agripa mbony ta Paulo
13Kwikyiira mikonu mive, mangyi Agripa na Bernike vakasha Kaisaria, vakaidikira Festo. 14Vekikaa-fo mikonu miingyi Festo koongoya mangyi Agripa mbony ta Paulo, kaamba, “Kwiiyo nndu umwi yaa alerewa ni Feliki kifingyony; 15nawe kyeeri shekee Yerusalemu vaniini va Makohani na vamiku va Kiyuda vakashivia mbony takwe, vakakunda shinrumbuye mwaandu. 16Shavavia sheelyi nshi mbuka ya Varome irummbwa mwaandu wa nndu kulore ankwaanya na valya venkumba-fo, naonise mwaanya wa ikureeka kyakwe muni. 17Naasa kyeeri valekwaananya yaa nshileirisha-fo, kyaindi elyi lya ndesi shakaya kiri kya yaanduya myaandu shavavasya nndu yeto neendwa. 18Na valya venkumba kyeeri valesalala mbaleende nta irero lyimwi ikasha, shaasa sheekusarye-fo. 19Kuuta tupu elyi valeende marero engyi akwaani na kikusiryo kyawo veni na mbony ta nndu umwi avaangwaa Yesu, nawe alemmaa ifwa, na Paulo karingisya sheelyi eefo na muu. 20Neeny shatirwa nnyinyira shaasa shiwonisa dede lwa mbony yei, shammbesa kwakooya akundye yeenda Yerusalemu nadeanduyo-fo mwaandu kya mbony yeti.” 21Paulo kakunda mbony yeti tisherumbuwa ni Kaisari, shavavasya naringwaa shitani shanrwaa kwa Kaisari. 22Agripa kavia Festo, “Naakwa ni yeny shilangye yaaranya nndu yeu.” Kammbia, “Ndesi kumwiitaa.”
Paulo akee mmbee ya Agripa na Bernike
23Elyi lya ngama Agripa na Bernike vakasha na utore wiingyi, vakaanga ando earanya mbony na vashilyi vaniini va vandu na vaniini va muri, Festo koota ivavaso Paulo nandeendwa. 24Festo kaamba, “Mangyi Agripa, na yeni moose mukee yaa ando amwi neese, mulolye nndu yeu, nawe ufyari loose lwa Vayuda na kulya Yerusalemu na va yaa valekunda shivaekye, vekapaa kyoorongye na yaamba nnyasumani ikaa na muu-fo. 25Kyaindi lyo yeny shilelollya nnyatanyi kindo kinkooye nawaawa-fo. Nawe muni kyeeri alekunda nandeanduyo ni Kaisari, shakunda inrwaa kwakwe.” 26Neeny efo mbony yeti takwe nshitiri nta irero lyimwi lyoorokye lyereiya-fo. Naasany llyo shamweende yaa mmbee yaany, na mwaasi mmbee yafo yewe Mangyi Agripa, naambo kammaa isumundwa shiwoniny irero lyeereiya. 27Mashika shilollye mmbo kivaa kindo kilatiri nrwe kwakooya sharwaa mfungwa na mmbee kulaore shoora na ikumbwa akee nkumbe nalyo.
Currently Selected:
Mashora 25: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.