Mashora 24
24
Vayuda vafingya Paulo mwaandu
1Kwiikisia mikonu iraanu, Anania, we Nkohani nniini, kaoloka ando amwi na vamiku vave, na nreri umwi Tertulo, nawo vakavia mwitori wa uruka mbony ta Paulo. 2Nawe Tertulo kyeeri alevaangwa kapooka irera indi kyenkumba, “Kimmba lukeewonisa ufoo wiingyi kwa finya yafo, Feliki mmbee, neelyi kusalallye findo fyoose naambo fyeende nisha kunu vanduny veru, 3mmbo lukeewarya efyo fyoose na kyaanu wo kyeeri na wo ando. 4Kyaindi shakutereva kulasue, lyo kulwaaranyi marero maangu kwi isarya lyafo. 5Mashika mmbo lulollye nndu yeu ngata, alepooka uriingyi kwa Vayuda ulaniny koose, na lyingyi we ni nrwe wa siri ta Vanazorayo. 6Na kingi-se mmbo alekunda itefusa mmba ya Iruva lukantira. [Lukakunda imuutya uvingo kisumani na uvavaso lweru. 7Indi Lisia nshilyi nnini wa vasikari kasha, kamuuta maakony eru na finya, 8kavavasya valya valenkumba vashe kwafo.] Yewe kumuni kwammbesa-vesa nkuti kumanyi mbony yeto lwankumba nato yese.” 9Vayuda nawo vakankumba kya mbony yeto sheni.
Paulo akureeka mmbee ya Feliki
10Na llya witori wa uruka aletukya Paulo narere, karouwa indi, Kimmba shiishi shamanya yewe mmbo kukee mwirumbuya vandu va uruka yelu kwa myaaka miingyi, mmbo shikeerera kyakwa shimuni na nrima wa ifura nnu. 11Mashika kushidimaa imanya sheelyi nkwaleirau mwasi ya mikonu ikumi na ivii uka kyeeri shilerwaa na Yerusalemu indeendya Iruva. 12Vandu yeva mmbaleshilollya kulya mmba ya Iruva-fo, nta shireraa na nndu moose, ao sheende mwaandu ikwaanuny nta efo kiterevyo kya Vayuda nta efo muriny-fo. 13Nta wo mmbashidimaa iringisya mbony yeti vasheshikumba nato-fo. 14Kuuta lyo kwiifo kindo kimwi, kyo kuti shikyiirikye, Shia yei ya Nndumi wo vakeiivanga ni ngula, niindo shikeindya Iruva yeu wa vakuu veru, shivikye yefi, mmbo firiani na uvavaso na fikee fireiye efo fitabuny fya vakisuku. 15Shivikye nsia efo kwa Iruva, shaasa nawo vavikye nsia, sheelyi kushekaa-fo iruka lya vafu, kwa yewo va usumanu na valakee va usumanu. 16Neeny mmbo shikekwishivira yoo ufundony yelu naambo nrima wakwa ulawonise usakiro mmbee ya Iruva na mmbee ya vandu vengyi mikonu myoose. 17Numa ya myaaka miingyi mmbo shilesha naambo shuutye vandu vakwa firaso na fyeeningyoo. 18Lyo wo valeshilollya mmba ya Iruva shirundya findo yefyo, shamma iilyiswa, nta nsherye ironda lya vandu nta yaatara-fo; kyaindi lyo kweifo Vayuda maata valeuka Asia, 19kyikavaitikya wo veni vafike yaa mmbee yafo isheshikumba, kwakooya vatiri kirero kyoose neeny. 20Ao vandu yeva wo veni vakureeke, nkyoki valellollya shirengya llya shilesalala alya mwaanduny, 21kuuta tupu ni kimaruma kya unyanga elo lumwi, kyeeri shilefua shisalalyi nnang'ani yaawo, shaamba, “Kyeendwa ni ufundo lwa iruka lya vafu nkyo kyeengye shautyo uvingo yaa mmbee yaany inu.” 22Feliki kaveerikisa, mashika we eishi mbony ta Shia yei ya Nndumi nisha mmwasi kaamba, “Lisia nniini wa vasikari kyeeri ashesokaa na kunu llyo nshemurumbuyaa mbony yeti tany. 23Kavavasya nshilyi ulya sheelyi Paulo naringwa; naniingwa na uleke, nta kulave nndu aima umwi wa vambuya vakwe imfurukannya.”
Paulo akee mmbee ya Feliki na Drusila
24Kwikyisia mikonu mive, Feliki kasha ariani na nkaakwe Drusila akee Myuda, karuma Paulo nandevaangwa naambo nawe nashaaranya mbony ta kikusiryo yekyo kya Yesu Kristo. 25Na Paulo elyi ekeaamba mbony eto ta usumanu, na iva na mwiyanu, na mwaandu wefurumya, Feliki kairyaa, karouwa, “Ulaalu enda mbele neeny shallollya mwaanya shikuvangaa lyingyi.” 26Na kingi-se kavika nsia kulakooye Paulo anningaa fesa; kweekyo kammbaanga lyingyi-se eerera nawe. 27Myaaka ivii ikiira, Feliki kawarya Porkio Festo nashillye ando akwe. Na kimmba Feliki eekundye ikundya Vayuda kara Paulo nengere ikaa kifingyony.
Currently Selected:
Mashora 24: MASNT00
Označeno
Deli
Kopiraj
Want to have your highlights saved across all your devices? Sign up or sign in
New Testament in Kimashami © Bible Society of Tanzania, 2000.