Genesis 50
50
1Jaxa Jose ti och ok'uka, sluts'u sok yujts'an ja stati. 2Tsa'an ti yal yab' ja ma'tik ja schol wax yajnaye ja cham winik jumasa, ab'i schap'e lek ja skwerpo ja stati sok a' b'i yajna ye lek. 3Ja k'ak'u yi'aj schapawe yi ja sb'ak'teli, chab' tajb'e (40) k'ak'u, yujni ja k'ak'u wax yi'aj b'a wax yajnaye jun b'ak'telala. Jel ok' ye ja egipsiano jumasa yuj ja cham ja Jacobi, ox tajb'e sok lajune (70) k'ak'u ok' ye.
4Yajni ek' ja k'ak'u jumasa b'a cham k'ujoli, jaxa Jose ti yal yab' ja ya'tijum jumasa ja niwan mandaranum b'a Egipto:
—Yuj k'a lek waxa wabyexi, oj k'an a wi'ex jun pabor b'a oj ja walwex yab' ja mandaranum yuj ja ke'n. Jach' oj ja wal'ex yab' jastal it 5ja k'ak'u mojan ojxa chamuk ja jtati, ya kale, ti b'i oj jmuk yi ja sb'ak'tel b'a sk'e'en ye'na, ja k'e'en jawi, tey b'a Canaan. Alawik yab' a sjek on b'a oj waj muk kan yi ja sb'ak'tel ja jtati, yajnix ch'ak mukxuki ti oj kumxukona.
6Ti yala ja mandaranumi:
—Ka'ax, kax muku, k'u'lan ja jastal yaloj a wab' oj ja k'u'luk yi'i.
7-9Jachuk waj smuk ja stat ja Jose. Waj mojtajuk yuj spetsanil ja smoj alijel jumasa, spetsanil sok ja ma'tik ay ya'tel sok ja mandaranumi, ja iti, ja spetsanil ja ma'tik niwak ya'tel b'a tuk chonab' jumasa, sok spetsanil ja b'a niwan chonab'i. Jitsan wajye sok karro sok kawu. B'a Goseni, kechan ja ti kan ja yal untiki, ja chej sok ja wakax jumasa.
10Yajni k'otye b'a wits Atad b'a it mojan ay sok ja niwan ja' Jordani, ja Jose juke k'ak'u jel ok' ja tiw yuj ja cham ja stati, spetsanil ja kristyano jumasa jel ok' ye yuj ja cham winik Jacobi. 11Yajni yilawe ja cananeo jumasa, jastal jex ok' ye ja egipsiano jumasa, ti yalawe'a: —Lajan sok yuj ay ma' niwan ya'tel cham yujile' ja egipsiano jumasa—. Ja'yuj ja wits Atad, ya'we sb'i'iluk, —Ja wits b'a jel spek'a ya'lel sat ja egipsiano jumasa—.
12-13Ja'yuj ja yuntikil jumasa ja Jacobi, yi'aje ja sb'ak'tel man slujmal Canaan, ti smukuwe b'a jun k'e'en sb'i'il Macpela, ja k'e'en jawi, ja sb'a ja Efron itita, ye'n smana ja Abraham b'a oj makunuk yuj sb'a sk'ejnal cham winik. Ja k'e'en sok ja slujmali, tey mojan sok ja yaxk'ul Mamre. Ja jastal sk'ana oj k'u'laxuk ja stat ja Jose, jach'ni ch'ak sk'u'luke yi'a.
14Tsa'an yajni ch'ak smuk e'i, jaxa Jose sok ja smoj alijel jumasa, sok spetsanil ja kristyano jumasa ma waj moj tajuke yuji, ti'xa ch'ak kumxuke b'a chonab' Egipto'a.
Ja Jose ya' kulan sk'ujol ja smoj alijel jumasa
15Yuj ja cham ja state'i, jaxa smoj alijel jumasa ja Jose, ti' wax yalawe'a: —¿Jas oj k'u'lutik ta yuj k'a tajkelto jmoktik ja Jose, jaxa ta lek ojto ya' jtuptik ja jas jk'u'lantik yi b'a?—
16-17Ja'yuj, sjekawe aluman yab'i: —K'elawil Jose, ja yora mitox cham ja jtatiki yala kani, oj b'i a ch'aya k'ujol spetsanil ja jastik mi sb'ejuk jk'u'lantikon a wi'i. Ja smeranili, yujni mi jun sb'ej ja jas jk'u'lantikon a wi'a, ja'yuj wax k'anatikon a wi pabor, ch'aya a k'ujol spetsanil ja jas jk'u'lantikon a wi'i—.
Jaxa Jose, yajni yab' ja lo'il iti, kechan jel och ok'uk. 18Ja'yuj ja waj iljuk yuj ja smoj alijel jumasa, ti ch'ak ko'uke mek'an b'a sti sata. Ti yalawe yab'a:
—Naka a wa'tijumotikon, —xchiye—.
19-21Jasa, ja Jose ya' kulan yi sk'ujole, sok syajal sk'ujol, ti yala yabye'a:
—Mi lom la xiwyex, ja ke'n mi Dyosukon. Ja we'nlexi mi jun sb'ej ja jas a k'u'lanex ki'i, jaxa Dyosi toj lek ja jas k'u'lan ki'i. We'n a wilawexta ja jas ch'akta ek'uki: Ja Dyosi ya' kan sak'an jitsan kristyano. Ja'yuj ja we'nlexi, mi lom la xiwyex. Ke'n oj talnayex ja we'nlex sok wa wuntikilexi, —xchi ja Jose.
Cham ja Jose
22Jaxa Jose sok ja smoj alijel jumasa ti'xa kanye b'a Egipto. Spetsanil ja k'ak'u janek' ajyi sak'anil ja Jose, jun syen sok lajune (110) jab'il, 23yilatoni ja yij jumasa b'a yuntikil ja Efraini, cho snikato sok ja sxijk'an ja yuntikil jumasa ja Maquir yij jumasa ja Manasesi.
24-25Tsa'an ti yal yab' ja smoj alijel jumasa ja Jose:
—Ja ke'n, jelxa mojan ja jk'ak'u oj chamkoni. Jaxa we'nlexi, ay lek sniwanil a k'ujolex b'a ye'n oj jak skoltayex ja Dyosi, b'a oj ya kumxanik b'a lu'um it yala oj ya'yi ja Abraham, ja Isaac sok ja Jacobi. Jaxa we'nlexi, oj kala wabyex ja yajni la chamyoni alawik ojni a wa'wex eluk ja jb'akel ja ila—.
26Ja Jose, ti cham b'a Egipto, ja k'ak'u jawi, ay yi'oj jun syen sok lajune jab'il (110). Ajnajiyi ja sb'ak'teli, ti a'ji och b'a skajonila.
Currently Selected:
Genesis 50: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021