Genesis 49
49
Ja Jacobi, Jel tsamal sta'a ti' ja yuntikili
1Ja Jacobi, yal yab' ja yuntikil jumasa a stsom sb'aje, wa sk'ana oj yal yabye ja jas oj ek'uk yujile ja tsa'ani. Ti yala'a:
2—Kuntikil jumasa, jitsanik jani;
maklayik ja jas oj kala wabyexi.
3—Ja we'n Ruben, we'n ja kunin b'ankilala;
we'n b'ajtan kunina,
we'n sb'ajtanil kip kilawa;
we'n ja b'ajtan jel tsamal wax kilawa
sok we'n b'ajtan jel tsats oj ajyan.
4Kechan mi jun sb'ej ja jas a k'u'lan ki'
yuj ja lom a ta'a b'aj sok
june ja jche'um jumasa.
Ja'yuj mixa we'n b'ajtanuka,
ja lajana sok ja niwan paman ja'
ja jastal mix b'ob' ajyuk lamani.
5—Jaxa we'nlex Simeon, Levi, ja lajanex sok ja chante b'a k'uli
sok skalaxil wa syama ja swa'eli.
6Mix k'ana oj ajyukon sok ja ye'nle'i,
cho mix k'ana oj jmojta jb'aj soke
yuj ja k'ak'u jel tajkiye'i
smilawaniye xe'ntiyaman ya'we kan ja wakax jumasa.
7—Jel wokol oj ek' a wuj yuj wa stajkeli—
—Jel wokol oj ek' a wuj yuj ja sch'u'uyil wa k'ujoli—
Ke'n oj ch'ak ka a pil a b'ajex
b'a spetsanil ja slujmal ja israelenio.
8—Ja we'n Juda, oj ja wa' b'a yib' a k'ab' ja ma'tik mi lek wax yilawa;
jel oj stoy a wa moj alijel jumasa
oj cho snujts'uk sb'aje b'a sti' wa sati.
9Ja' oj ja laj jastal ja k'ak'al choj
ja yajni wax kumxi jan sok ja swa'eli
wa snujts'in sb'aj wax och petan,
¿Machunk'a oj b'ob' yixtala'uki?
10spetsanil k'ak'u ti oj ajyuk b'a wa k'ab'
ja wa najb'ante' it wa sje'a aya wa'teli,
man oj jakuk ja ma' oj och ya'tel smeranil
oj sk'el spetsanil ja swinkil ja lu'um k'inali.
11-12Ja sat jumasa
jel k'ik' jastal ya'lel ts'usub';
ja yej jumasa
jel sak jastal lech.
Oj b'ob' smoch ja sburro
b'a tsamal sk'ab' ja ts'usub'i,
mi oj sop ja sk'u'i
ti oj ajyuk la'an b'a ya'lel ts'usub'.
13—Ja we'n Zabulon
ti oj ajyan b'a sti' niwan paman ja';
ti oj jijluk ja barco jumasa b'a sti a naj
wa mojon jumasa oj k'ot man b'a Sidon.
14—Ja we'n Isacar,
jel tsats oj ajyan jastal jun burro
ti' oj wayan b'a sts'e'el chab' jijlub'.
15Yajni oj ja wil ja wa lu'um
jel lek sok jel tsamal jijleli,
jel tsamal oj ja wab'
b'a oj a'tijanan jastal ma' yib' k'ab'al ay.
16—Jaxa we'n Dan,
jel lek oj ja k'u'lyi wa moj jumasa,
Yuj ja ti' aya sok ja k'ole jumasa sb'a israelenio.
17Lajana sok ja b'its'il chan
ja ti wa'n majlanel b'a ti' b'eji:
yajni wa sk'uxu yi ja yech ja kawu,
jaxa ma' k'e'eli, b'a spatik wax mok'i.
18—Dyos kuj, tini wa'non smajlajel oj koltanana—
19—Ja we'n Gad, oj snol k'ab'uka
jun nole elk'anum,
jaxa we'n ti oj ja mak'e
b'a mi wa sna'awe'i.
20—Ja we'n Aser,
jel lek oj ja ta' ja jas oj ja wab'i
sok jel tsamal oj tojb'es ja wa'el jumasa
jel lek oj yab' jun mandaranum.
21—Ja we'n Neftali, jel lek waxa wab' ja lom aya.
Lajana sok jastal jun nan k'ujlal chej ja lom ay ek'i,
nanal b'a yal tsamalik k'ujlal chej jumasa.
22—Ja we'n Jose, lajana sok jun kawu
b'a ti wax k'i' b'a jun sat ja'.
—Wala ts'ijti sok wala k'e b'akan b'a ts'akab'i—
23Winike jel kistal wa modo'exi cho jel kalaxex
wala tujk'ajiyex sok sni' pulte',
24jaxa we'n kechan yaman lek a wuj wa pulte'i
mix kumts'iji wa k'ab'i.
—Sts'akatal ja Dyos it jel ja yip
ja ma wa stalna sok wa skolta ja israelenio—.
25—Ts'akatal ja Dyos yuj wa tati,
ye'nani wa skoltaya'a—.
—Sts'akatal ja Dyos it spetsanil wax b'ob' yuji
spetsanil k'ak'u lek wax yilawa—
—Sok slekil ja jas ay b'a satk'inali—
—Sok slekil b'a cha'anil satk'inal—
—Sok slekil ja cha'anil paman ja' jumasa—
Sok slekil ja nanal jumasa ma' ay yuntikil wax ya wa'uki—
26Jel niwan ja slekil
wax jak yuj wa tati,
yuj ja jitsan slekil
yi'oj ja wits sok ja yaxk'ul jumasa b'a mix ch'aki.
Spetsanil ja slekil jumasa iti
naka a b'aj we'na Jose
yuj ja b'a wa moj alijel jumasa
kechan we'n jel niwan oj iljan.
27—Ja we'n Benjamin lajana sok jastal jun k'ak'al ok'il;
sajto sakb'el waxa k'uxu wa wa'eli
b'a och k'ak'u waxa pila ja janek' wax kani—.
28Jach' spila yi jastal it ja slekil sk'ujol ja lajchawe yuntikil ja Jacobi. B'a jujune ja lajchawe k'ole yuj ja israelenio, ja slekil b'a ya'a tsa'ub'al lek.
Cham ja Jacobi
29-31Yajni ch'ak yal ja tsamal slo'ili, ja Jacobi, ti yala ja lo'il iti:
—Jelxa mojan ja k'ak'u oj chamkoni, a' wa paborexi, ti'xa mukuwonex b'a mukane ja ma ek paxta kuji. Ja' wa'non yaljel ja k'e'en sok ja lu'um it smana kan yi ja Efron itita ja Abrahami, ja'ni b'a smuku ja sche'um Sara. Ti mukane tiw ja Abrahami, ja Isaac sok ja sche'um Rebeca, ti cho jmuku tiw ja Lea. Ja k'e'en jawi tey b'a slujmal Canaan, b'a Macpela, mojan sok ja wits Mamre. 32Jachuk ja k'e'en sok ja lu'umi, ja jmanxi yi'e ja hitita jumasa—.
33Yajni ch'ak yal ja jastal it ja Jacobi, ti sxijpun sb'aj ja, ti chama.
Currently Selected:
Genesis 49: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021