Genesis 34
34
Ja Siquemi, slo'la ja Dina
1Ja Dina, ja snan stat ja Lea sok ja Jacobi, jun k'ak'u waj yulata ja ixuke jumasa b'a chonab'i. 2Ja Jamor m'a heveo ajyi ye'n mandaranum b'a chonab' jawi, jaxa yunin Siquemi, yajni yila ja Dina, je sk'ana syama t'ilan st'ena sta'a sb'aj sok. 3Jasa, ochni sta' lo'ila sle'a jastal smono lek, b'ob'ni yuj ja, 4ja'yuj, ti yal yab' ja stat a waj k'anjuk yi b'a oj nupanuk sok.
5Ja Jacobi, k'ot schikin yuj ja lo'laji ja Dina, jaxa yuntikili wajele stalnajel wakax, yala oj smajla oj kumxuke. 6Jaxa Jamori, wajxa sta' lo'il ja Jacobi.
7Jel juts'in k'ot schikine ja yuntikil ja Jacob ja jas ek'i, yajni kumxiye jan b'a witsi, tajkele'xa lek. Wax yala ja ye'nle'i, b'a oj yixtala'uk ja yak'ix ja Jacobi, jun mulal mi sb'ejuk b'a yojol ja smoj alijel jumasa. —Minike jach' oj sk'u'l ajyi ja Siquemi—. 8Jachuk ti alji yab' yuj ja Jamori:
—Ja kunin Siquemi, yujni jel wa sk'ana ja ak'ixa. Wax k'ana wi' jun pabor a nupanuk sok. 9Laj jmoj alijeluk jb'ajtik. B'a jach' oj b'ob' nupanukotikon sok wa wixukil we'nlexi, cho jach'ni ja we'nlexi oj b'ob' cho nupananik sok ja kixukil ke'tikoni, 10cho jaman lek oj b'ob' ajyanik jmoktikon. Tey b'a a k'ab'ex ja niwan chonab'i: —Ti la Ajyiyex tiwi, ka'axik b'a waxa k'ana oj wajaniki, mana a lu'umex—.
11Jaxa Siquemi, ti yala yab' ja Jacob sok ja yuntikil jumasa:
—Yuj k'a waxa wilawex slekil ja oj nupanukon sok ja Dina, ojni ka'wi'ex ja jas oj ja k'an'exa. 12We'n oj ja wal'ex janek' oj ja k'an'ex ki yuj ja ye'n, ja ke'n ojni jtup a wi'ex ja janek' oj ja k'an'exi, —kechan jun pabor oj k'a a wi'ex a'wik nupanukon sok.
13Jaxa yuntikil ja Jacobi, mi k'umaniye stojol sok ye'n cho jach'ni sok ja Jamori, 14Sle'awe yi ab'al, jach' yalawe jastal iti:
—Ja ke'ntikoni, mi oj b'ob' ka'tikon nupanuk ja jmoj alijeltikon ta yuj k'a mi kupub'al luk yi xet'an ja sk'unil ja winiki. Ja jastal jaw ja ke'ntikoni, jelni k'ixwela sb'aja. 15Kechan ay jas oj b'ob' jk'u'ltik ja b'a oj kaltikon oj nupanuki, kechani ta lekxa wabyex ja we'nlex sok ja tuk winik jumasa, oj kupxuk xet'an wa k'unilexi.#34:15 Ja iti sb'i'il: sirkunsision. 16Ja jachuki, oj b'ob' nupananik sok ja kixukil ke'ntikoni, cho ojni ja ke'ntikon sok wa wixukil we'nlexi, b'a jach' oj b'ob' kankotikon ja ili, jpetsaniltik junxtani kab'altika. 17Kechan ta yuj k'a mi lekxa wabyexi, oj ki'tikon ja Dina oj cho elkotikon ja ili.
18Ja Jamor sok ja Siquemi, lek yabye ja jas alji yabye'i. 19-20Ja Siquemi, jex kisji yuj ja smoj alijel jumasa, cho je sk'ana ja Dina, ja'yuj ja Siquem sok ja stati, waj sk'umuke ja ma'tik ay ya'tel b'a chonab'i, 21Ti yalawe'a:
—Ja yuntikil ja Jacobi jel lekil winike. La ka'tik ochuke b'a jchonab'iltiki, a b'olmalanuke ja ili. Jelto jitsan libre ay ja lu'um b'a oj ayuk ja ye'nle'i. B'a jach' oj b'ob' nupanukotik sok ja yixukile'i, cho ojni ja ye'nle sok ja kixukil ke'ntiki. 22Yuxta kechan wa sk'ana oj kanuke jmoktik, ta yuj k'a oj kupxuk xet'an ja sk'unil ja winik jumasa sb'a ili. 23—Lek ay, a kanuke. —Yuxta spetsanil ja jastik sb'aje'i, sok spetsanil ja swakaxe'i, naka jb'aj ke'ntik, —xchiye ja Siquem sok ja stati—.
24Jaxa ma'tik ay ya'teli, lek yabye ja jas yalawe ja Jamor sok ja Siquemi, sok spetsanil ja winik jumasa, oj kupxuk xet'an ja sk'unili. 25Jaxa Simeon sok ja Levi smoj alijel ja Dina, yajni ek'ta oxe k'ak'u ti wajye b'a chonab'i, naka ay stujk'anub'e jun ch'ay k'ujol ochye ja b'ay ja ma'tik kupub'al ja sk'unile'i, mi b'ob' skolta sb'aje yuj ja syajal b'a kupub'ali, ja'yuj ch'akni miljuke'a. 26Yajni smilawe'ta ja Jamor sok ja Siquemi, ti och ya'we eluk ja Dina b'a na'itsi, ja yajni mitox wajye'i, 27-29ch'ak ek' sb'atala'uke ja cham winik jumasa, ch'ak yi'e spetsanil ja jas ta'awe b'a chonab'i. Yi'aje ja chej, wakax, burro jumasa, ch'ak yi'e spetsanil ja jas sta'awe b'a b'ej sok b'a chonab'i. Cho ochye b'a na'itsaltik jumasa, yi'aje spetsanil ja jas sta'awe'i, yi'aje yal untik ixuke jumasa sok ja yuntikile'i. Jach' ya'we tupuk ja jastal lo'laji ja Dina smoj alijele'i.
30Ja Jacobi yal yab' ja Simeon sok ja Levi:
—Yuj ja jas ch'ak a k'u'lukexi, kechan ita a ch'ikawonex b'a jun niwan ab'al k'umal. Ja ya'n, mi oj sk'an oj yil'one ja cananeo sok ja ferezeo jumasa. Ja ke'ntiki, jel t'usanotik waj k'a stsom sb'aje ja swinkil ja lu'um b'ay tik b'a oj tiro'anuke jmoktik oj ch'ak smil'otike jpetsaniltik.
31Jaxa ye'nle'i, ti yalawe'a:
—Ja Siquemi, mi oj b'ob' yil jastal jun ixuk ma' wax ya'a sb'aj sok tuktukil winik ja jwatstiki—.
Currently Selected:
Genesis 34: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021