Genesis 35
35
Ja Jacobi, kumxi b'a Betel
1Ja Dyosi, yal yab' ja Jacobi: —Ja k'ak'u wa'na ajnel yuj wa b'ankil Esauji, ja ke'n ti je'a jb'aj a wi' b'a Betel. Ja'yuj kumxan b'a Betel ti' la ajyi tiwi, tojb'es ki jun kaltar.
2Jaxa Jacobi, yal yab' ja smoj alijel jumasa, sok spetsanil ja ma' tey soki:
—Ch'akan jomowik spetsanil ja tuktukil k'u'lub'al dyos waxa k'u'anexi. Ti' la atniyex leka, lapawik pilan wa jastik a b'ajexi, 3oj ch'ak wajtikik b'a Betel b'a oj waj je' jb'ajtik yi ja Dyosi. Tiwi oj tojb'es jun altar b'a oj ka'tik yi ts'akatal, yuj ja k'ak'u jumasa jel ja ab'al k'umal jb'aji ye'n skoltayon. Chikan b'a b'ejyiyon ja Dyosi spetsanil k'ak'u ti' ajyi jmoka.
4Jaxa ye'nle'i, ch'ak ya'we b'a sk'ab' ja Jacob spetsanil ja sdyos jumasa jawi, jach'ni ja likchikinal jumasa. Ja'yuj ja Jacobi, ti ch'ak smuk b'a yib'el ja niwan te' b'a Siquemi. 5Yajni och b'ejyuke'i, ja Dyosi, jel ya' och sxiwel ja swinkil ja chonab' jumasa b'a mojan yi'oj sb'aje'i, jachuk mi ma' nochjiye yuj.
6Ja Jacob sok spetsanil ja swiniki, ti ch'ak k'otuke b'a Betel ja it tey b'a slujmal Canaani. 7Ti sje'a sb'ajyi tiw ja Dyos ja Jacob ja k'ak'u wa'n spakjel yuj ja sb'ankil Esauji, ja'yuj ja Jacobi stojb'es jun altar ja tiwi, ja lu'um jawi, ya sb'i'iluk —Dyos b'a Betel—.
8Ja' k'ak'u jumasa jaw ja cham ja Debora, ja' ixuk jaw ja stalna man sch'inil ja Rebeca, ti smukuwe b'a yib'el jun ib'e te' mojan b'a Betel. Ja'yuj ja tiwi, wax na'xi sb'aj —Ja te' b'a jel ajyi ok'eli—.
9Tsa'an ja Dyosi, cho sje'a sb'aj yi ja Jacobi, sok jelxa lek ja jas k'u'lajita yi ja yajni kumxi jan b'a Padan-arami. 10Ja k'ak'u jawi, ti alji yab' yuj ja Dyosi: —Mixa Jacobuk oj ja b'i'iluk, ja wa b'i'ili Israel—. Ja'xani sok ja b'i'ilal jaw ja wax na'xi sb'aj man ya'na. 11Ti cho alji yab' tiw yuj ja Dyosi:
—Ke'n ja Dyos it jel ja kipi. Wax k'ana oj pojxuk lek wa wintil jumasa, b'a ye'nle'i, oj el mandaranum jumasa, oj pojxuk jitsan niwak chonab' jumasa. 12Ja lu'um ka'yi ja Abraham sok ja Isaaki, jach' oj ka'wi ja we'n sok wa wintil jumasa—.
13-14Yajni waj ja Dyosi, ti ya' k'e' tek'an jun niwan oy latsub'al sok ton ja Jacobi, ja b'a sati, spek'a yi aceite sok ya'lel ts'usub' b'a kechan ja oj makunuk yuj ja Dyosi. 15Yuj ja ti sk'uman sb'aj sok tiw ja Dyos ja Jacobi, ja'yuj ya sb'i'iluk ja tiwi Betel, wa sk'ana yale —Snaj Dyos—.
Cham ja Raqueli
16Ja Jacob sok ja swinik jumasa, elye ja tiwi, ojxa k'otuke b'a Efrata ja yajni k'ot ja k'ak'u oj sman ja yalats ja Raqueli. 17Yuj ja jel wokol wax yila sat untikaneli, ja'yuj ti alji yab' yuj ja ixuk ma' wax koltaji yuji: —Mok xiwan ja alats iti, cho yal keremni oj manxuka—.
18Ja alatsi jel lek manxi, jaxa Raqueli ojxa ni chamuka. Ja janek' sak'anto ajyi yalato ja sb'i'il oj yi' ja alatsi Ben-oni, ja b'i'ilal iti, wa sk'ana yale —Kal b'a syajal jb'ak'tel— Jasa, ja Jacobi stukb'es yi ja sb'i'ili, ya sb'i'iluk Benjamin wa sk'ana yale —Kunin jex k'ana—
19Cham ja Raqueli, ti smukuwe b'a sb'ejlal Efrata, Belen sb'i'il ja ya'ni. 20Ja b'a sk'ejnali, sk'u'lan jun niwan latsan ton ja Jacobi, ja jastal ts'ijb'aji ja latsan ton jawi, man ya'n ti wax na'xi ja b'a mukan ja Raqueli.
21Ja Jacobi cha och b'ejyuk, ja b'a k'ot jijluki ek'el och yuj ja cha'anil ts'akab' ton b'a Ederi. 22Yajni ti'xa ay tiw ja Jacobi, jaxa Rubeni slo'la sb'aj sok ja Bilha june ja sche'um ja Jacobi. Jaxa iti, sna'a ja Jacobi.
Ja yuntikil ja Jacobi
Ja Jacobi ajyi lajchawe yuntikil:
23Ja yuntikil sok ja Lea, Ruben sb'i'il ja b'ankilali, ti nab'an ja Simeoni, ja Levi, ja Juda, ja Isacar sok ja Zabuloni.
24Ja yuntikil sok ja Raqueli, Jose sok Benjamin.
25Jaxa sok ja Bilha ya'tijum ixuk ja Raqueli, Dan, sok Neftali.
26Sok ja Zilpa ya'tijum ixuk ja Lea, Gad sok Aser.
Ja yuntikil jumasa ja Jacob manxi ja k'ak'u ti' aye b'a Padan-arami.
Cham ja Isaaki
27Ja Jacobi, kumxi b'a snaj ja stat Isaac it ti ajyi b'a Hebroni, cho ti'ni ajyi tiw ja Abrahami. 28Ja Isaaki ay yi'oj jun syen sok chan tajb'e jab'il (180). 29Tsa'an yajni alb'ita lek sak'ani, ti'xa chama, jaxa yuntikil Esau sok ja Jacobi, ti smukuwe b'a mukan ja tuk smoj alijel jumasa.
Currently Selected:
Genesis 35: YABD
Označeno
Deli
Kopiraj
Want to have your highlights saved across all your devices? Sign up or sign in
© Sociedad Bíblica de México 2021