GENESIS 34
34
Dina imerkosa awi Sikhem
1Sinde andau, Dina anak bawi ain Yakob dengan Lea, maja pire-pire bawin oloh Kanaan. 2Metoh Sikhem, anak Hemor oloh Hewi je jadi raja intu eka te mite Dina, ie manamput oloh bawi te, balalu marayape. 3Tapi ie handak toto dengan Dina, sampai lembut sintae dengan Dina tuntang manggau jalan kilen ampie uka oloh bawi te sinta ie kea.#34:3: manggau jalan kilen ampie uka oloh bawi te sinta ie kea atawa mampong ie. 4Koan Sikhem dengan bapae, “Aku balaku bapa manggau jalan kilen ampie uka tau mandino oloh bawi te akangku. Aku handak kawin dengae.”
5Yakob mahining tahiu anake je jari irusak kabujange. Tapi awi kare anake kanjerae manjaga metoe intu janah, ie dia olih mawi taloh en-en helo bara ewen buli.
6Hemor, bapa Sikhem, dumah manalih Yakob handak barunding dengae. 7Metoh te kea kare anak Yakob buli bara janah. Mahining taloh te, ewen tarewen tuntang basingi toto. Awi ie jari marayap anak Yakob te, Sikhem jari manawah kea uras oloh Israel. 8Koan Hemor dengan Yakob, “Anakku lembut sintae dengan anakm; aku balaku uka ikau manyoho anakku kawin dengae. 9Keleh itah mawi pakat je bangsa ayum dengan bangsa ikei kawin sampur. 10Te kare pahari tau melai dengan ikei hong lewu toh; hong kueh keton rajin. Kare pahari tau badagang tuntang mingkes panatau.”
11Limbah te Sikhem hamauh dengan bapa Dina dengan kare kakae, “Tarima palakungku toh, te kareh aku manenga en bewei je ilaku keton. 12Suman panenga en je ilaku keton, tuntang nukas palaku akan pangawie. Aku kareh manenga narai bewei je ilaku keton, asal keton manyoho aku kawin dengan oloh bawi te.”
13Tagal Sikhem jari marusak kabujang andi ewen Dina, kare anak Yakob mananjaro Sikhem tuntang Hemor bapae. 14Koan ewen dengan ewen due te, “Ikei mahamen manyoho andi ikei kawin dengan oloh je dia basunat. 15Ikei baya olih manarima palakum te dengan ije janji, iete: keton musti manjadi sama kilau ikei, iete uras oloh hatue ain keton inyunat. 16Limbah te ikei kareh manarima palakum tahiu kawin sampur te. Ikei kareh manetep intu marak keton tuntang manjadi ije dengan bangsa ain keton. 17Tapi amon ikau dia maku manarima palakun ikei te, tuntang dia maku inyunat, ikei kareh manduan haluli oloh bawi ain ikei te palus haguet.”
18Hemor tuntang Sikhem mangkeme kare palaku te patut, 19tuntang Sikhem maku bajeleng malalus palaku te awi sintae dengan Dina. Bara marak kare jalahae, Sikhem ih je paham ihormat.
20Limbah te Hemor tuntang Sikhem haguet akan eka hapumpong intu lawang lewu. Ewen hamauh dengan oloh lewu kalotoh, 21“Kare oloh Israel te sobat itah. Jadi nauhe ewen melai intu tanah itah hinje itah. Tinai ewen tau haguet akan kueh bewei ewen rajin. Lewu toh sukop kalombahe akan ewen kea. Itah tau kawin dengan bawin ewen, ewen kea tau kawin dengan bawin itah. 22Tapi kare oloh te baya maku melai dengan itah tuntang jadi ije bangsa dengan itah hapan ije palaku, iete: uras oloh hatue ain itah inyunat kilau ewen. 23Kareh uras kawan meto ain ewen tuntang hapus panatau ewen jadi ayun itah. Te keleh itah manarima palakun ewen mangat ewen melai hinje dengan itah.” 24Hapus oloh lewu je hapumpong te manarima palakun Hemor tuntang Sikhem, balalu uras oloh hatue hong lewu te inyunat.
25Telo andau limbah te, metoh kare oloh hatue te kanjerae pehe toto awi inyunat, due kaka Dina je arae Simeon tuntang Lewi, manduan padang ewen, balalu suni-suni tame akan huang lewu te. Limbah te ewen mampatei kakare oloh hatue intu hete, 26tamput kea Hemor tuntang Sikhem. Balalu ewen manduan Dina bara human Sikhem palus haguet. 27Limbah ewen mampatei te, kare anak Yakob je beken marampok lewu te kilau baleh gawin ewen je marusak kabujang andie. 28Ewen manduan kawan tabiri, sapi, kalidai, tuntang kare taloh je aton hong lewu tuntang hong janah. 29Ewen manduan uras ramo je barega, manawan uras oloh bawi tuntang kare anake, tuntang marampas kare taloh je huang huma hong lewu te.
30Yakob hamauh dengan Simeon tuntang Lewi, “Keton manyusah aku. Toh oloh Kanaan tuntang oloh Peris tuntang hapus oloh lewu toh kareh manyingi aku. Jumlah bitin itah dia are. Amon kare oloh te bulat malawan tuntang mantakan aku, uras jalahan itah kareh impatei.”
31Tapi ewen tombah, “Ikei dia olih manalua andi ikei iawi kilau ije biti lontei.”
Currently Selected:
GENESIS 34: NIJ
Označeno
Deli
Kopiraj
Want to have your highlights saved across all your devices? Sign up or sign in