GENESIS 35
35
Yakob dengan baris ayue haguet akan Betel
1 #
Gen. 28:11-17
Sinde andau, Hatalla hamauh dengan Yakob, “Aku toh Hatalla je mamparahan arep-Ku akam metoh ikau hadari bara kakam Esau. Lius jeleng akan Betel. Keleh melai intu hete tuntang mampendeng ije mesbeh akang-Ku.”
2-3Palus Yakob hamauh dengan jalahae tuntang kakare oloh je aton dengae, “Itah handak haguet bara hetoh akan Betel. Hete aku mampendeng mesbeh akan Hatalla je jari mandohop aku hong kajakengku, tuntang jari mangalindong aku akan kueh bewei aku haguet. Te keleh manganan hampatong kare dewa ayun oloh je aton intu keton. Lalus gawi mamparasih arep tuntang kepan pakaian je barasih.” 4Palus ewen manyarah akan Yakob uras hampatong dewa ayun oloh je aton intu ewen. Uras ramo te ingalian Yakob intu penda upon kayu hai tokep lewu Sikhem.
5Metoh Yakob dengan hapus keluargae haguet, Hatalla manyangkolep kare oloh lewu je tokep hete hapan angat kikeh je paham, sampai dia manggoang Yakob tuntang sahapus keluarga. 6Palus ewen sampai tanah Kanaan intu lewu Betel je bihin arae Lus. 7Intu hete Yakob mampendeng mesbeh tuntang manampa aran eka te “El-Betel”, awi hete Hatalla mamparahan arep akae metoh ie hadari bara kakae. 8Hete kea Debora, indu angkat Rebeka, matei palus ingubur intu penda upon kayu hai hila salatan lewu te. Tagal te batang kayu te inggare “Batang Kayu Tangis”.
Hatalla mamberkat Yakob intu Betel
9Limbah Yakob haluli bara Mesopotamia, Hatalla mamparahan Arep tinai akae tuntang mamberkat ie. 10#Gen. 32:28 Koan Hatalla dengae, “Ikau dia tinai inggare Yakob, tapi Israel.” 11#Gen. 17:4-8 Palus koan Hatalla tinai, “Aku toh Hatalla Je Jaton Tikas Kuasae. Keleh ikau manak meso je are! Ikau kareh manjadi tato hiang kare bangsa tuntang jadi tato hiang kare raja. 12Lewu je jari inenga-Ku akan Abraham tuntang Isaak, handak inengaku akam tuntang turonam.” 13Limbah te Hatalla malihi Yakob te. 14#Gen. 28:18-19 Intu eka Hatalla hakotak dengan Yakob, ie mampendeng ije batu pampingat. Palus batu te iluput kilau parapah akan Hatalla, tuntang ie manusoh anggor tuntang undus intu hunjue. 15Eka te inyewute “Betel”.
Rahel matei
16Limbah te Yakob tuntang keluarga ayue malihi Betel. Metoh ewen kanjerae kejau isut bara Eprata, te sampai katikae akan Rahel luas. Tapi anake bahali balua. 17Metoh kapehee luas te paham toto, bidan hamauh dengae, “Nyalawah ateim, Rahel, anakm hatue tinai.” 18Tapi Rahel jari tokep matei, tuntang katika te ie handak manggeto tahasenge. Ie manenga aran anak te Ben-Oni #35:18: Ben-Oni: Riman aran toh huang basa Ibrani iete: “anak kapehengku”. tapi bapae manenga arae Benyamin.#35:18: Benyamin: Riman aran toh huang basa Ibrani iete: anak je mimbit kaontong.
19Limbah te Rahel matei, ie ingubur intu saran jalan je manintu Eprata, je wayah toh arae Betlehem. 20Yakob mampendeng ije batu pampingat hete. Sampai toh kea kubur Rahel magon inanda awi batu te. 21Limbah te Yakob marajur jalanae, balalu mampendeng kemahe intu ije eka mahalau candi Eder. 22#Gen. 49:4 Metoh ewen kanjerae melai intu hete, Ruben batiroh dengan Bilha, gundik bapae. Taloh te hining Yakob, palus ie sangit toto.#35:22: Ije salinan je bara jaman horan manyewut: sangit toto. Huang basa Ibrani kare bawak kotak te jaton inyondau.
Kare anak Yakob
Yakob bara anak due walas anak hatue. 23Kare anak Lea iete Ruben (anak Yakob je tambakase), Simeon, Lewi, Yuda, Isaskar tuntang Sebulon. 24Kare anak Rahel iete Yosep tuntang Benyamin. 25Kare anak Bilha, rewar Rahel iete Dan tuntang Naptali. 26Kare anak Silpa, rewar Lea, iete Gad tuntang Aser. Kare anak te inakan intu Mesopotamia.
Isaak matei
27 #
Gen. 13:18
Balalu Yakob sampai eka Isaak bapae, intu ekae melai hong Mamre tokep Hebron. (Bihin Abraham buee, melai hete kea). 28-29Metoh umure bakas toto, iete saratus hanya puluh jalatien nyelo Isaak matei palus ingubur awi anake Esau tuntang Yakob.
Currently Selected:
GENESIS 35: NIJ
Označeno
Deli
Kopiraj
Want to have your highlights saved across all your devices? Sign up or sign in