'Make 13
13
:Yusu' :za-' Nyorsoa-a' 'sla-a' 'kor-dih-dhih:
(Mt 24.1-2; Lu 21.5-6)
1:Yee' :yeh :Yusu'-a 'wluh-a 'de Nyorsoa-a' 'sla bo, :yee' or-a'a: bo :na-nyor :due' :wlu-' 'de or bo, or 'da, Nyor⧾ deh :torne-nyor:, :gbee'e:. Pobo: 'gbu⧾ :daa, on :po-dih:-a sobu'⧾ :klaba'⧾ :daa ya, :ka en no-a 'yi dih :nmor-eh.
2:Yeh or :za-a deh :dao', :yee' :Yusu' 'da, A 'ye 'gbu⧾ :klaba'⧾ :daa 'weh :e? Eh :se-' sobu' :korn i, :on 'ye-a' 'o on 'be ken :sie:. Sobu'⧾-a' klehkpeh, en mu ken dih zela-eh:, en 'ye 'zorn :po-eh:.
'Kle 'ye-eh:
(Mt 24.3-14; Lu 21.7-19)
3:Yee' :yeh :Yusu' :dhe-a dih 'do 'Orle-tluh ken, 'de or pobo-a Nyorsoa-a' 'sla ya, :yee' :Piteh'-: 'Jeen-: :Jororn'-: 'dekorn: Andlu'-: mo-: dhele-or dih 'de 'slan :pa ka 'di, on 'da, 4Zela: :a :gwluhuh', ti :yihih :eh, deh⧾ :daa, en mu :no-eh :eh? Deh :eh mu 'yi :to-dih-deh :no, 'de :a 'ye-eh' yubo: :ka ti-a nyni-a 'o, 'de deh⧾-a' klehkpeh :an :za-a-', en 'ye-a' dhih 'jeh-' 'kpa :eh?
5'De or :wlu 'de on bo, or 'dae:, A 'dhu a-a' 'jeh :dhororn'. A-a' 'worn-:-', nyor-a' :bo-dih:-' a dih. 6Nyor⧾ :dhulu', mo-: :an mu 'de 'an 'nyne ken :yi-dih:. Mo-: :an mu :ao', mo-: Nyorsoa-a' 'taan'-yu: 'o, 'de on 'ye nyor⧾ :dhulu' dih :bo-dih:. 7:Mor a 'worn tuh-a' 'nyne, 'de a 'ye tuh-a' kuna'⧾ 'worn :ke, :yee' a-a' :ple-' :fano. Deh no-eh, deh⧾ :daa en :korn en 'ye :no-eh:, jorwor: eh 'see ti-a' 'dlu-' :jla-ti no kele'a:. 8'Bluhba⧾-dlu⧾-: 'bluhba⧾-dlu⧾-: en mu :vorn. :Yee' 'keen-boi'-a mu on 'bei' 'keen-boi' bo :vorn. 'Bluhba-a mu :tleh deh⧾-' dih. 'Moeh-a mu 'de :yi, :eh 'kpa-a Ji Kou'-moeh. :Mor deh⧾ :daa en :taa 'dlu bo mu, :yee' 'do 'kle 'ye-eh-a' glu 'dhu 'da :oo', :eh gweh-a :ka 'kwli-a no-a 'nynor, :or 'bhorn-a :or 'ye-a' :gbano :za.
9Jorwor: a 'dhu a-a' 'jeh :dhororn'. An mu a 'kwla :za 'de 'koti-', 'de on 'ye a bla 'de an-a' 'di :gweh-dih-sla⧾ 'zorn dih. :Yee' a mu 'o 'gomla-nyor⧾-a' nyor⧾ :klaba'⧾-: 'dekorn: 'keen-boi'-: ybei' dih :nyna, 'do 'an dhih bo, 'de a 'ye Nyorsoa-a' tubo-wlu:⧾ 'jeh-a' dhih bo zela: 'de on bo. 10Jorwor: :mor ti 'ye 'dlu-' :jla, :yee' Nyorsoa-a' tubo-wlu:⧾ 'jeh :korn en 'ye :po-eh: 'de 'dawor'⧾-dlu⧾-a' klehkpeh ken dih. 11:Mor nyor⧾ kpon a-uh, 'de on 'ye a 'kwla :za 'de 'koti-', eh-a' 'beh-dih:-' a-a' :porluh⧾ 'worn dih 'do deh a mu-a-' :za, eh-a' dhih bo. :Mor eh-a' :zaa-ti :taa 'o nyni, deh a mu-a-' :za, Nyorsoa mu-eh a :torne:. Eh :se a-a' 'jeh :or :se-' :wlu i, jorwor: Gban 'i :ne :Zulu: 'o, :an mu :wlu. 12:Yee' 'de-di'-a mu or-a' 'de-di' nyor⧾ bo :plo-dih: on 'ye-or' 'dba. :Baa'-a mu deh :due' :dao' :no 'do or-a'a: 'yu bo :ke. 'Nynuu-a mu on 'de-: 'dekorn: on :baa'-: worn :bla-dih:, 'de on 'ye-uh' nyor⧾ ya po on 'ye-uh' 'dba. 13:Gwlor-nyor⧾-a' klehkpeh, an mu a-uh' 'nyeh-:, 'an dhih. Jorwor: nyor :or se-a sea 'de ti 'ye-a' 'dlu-' :jla, :yee' or mu 'puh-:.
'Kulu-deh: :eh za-a deh⧾ gban-'
(Mt 24.15-28; Lu 21.20-24)
14:Yee' :Yusu'-a kpa or-a' wlu 'dlu bo, or 'dae:, :Yee' :mor a 'ye 'kulu-deh: :eh za-a deh⧾ gban-', 'de eh 'ye dih :nyna :dha eh se-a :korn, ('Nyi nyor :or zlo-a deh :daa, or 'worn-eh' dih.) :yee' 'nyi nyor⧾ :on :ne-a 'de :Judi'a-bluhba ken, on ple, on 'ye 'de tluh⧾ ken mu. 15:Mor nyor :ne 'de 'gbu 'dlu,#13.15 'De 'bluhba-dlu: :dao' ken, an-a'a: 'gbu⧾ an po-a, 'de en 'dlu⧾ no :pabuh', 'de nyor⧾-a :dhe 'de dih. 'do ti :dao' 'i, :yee' 'nyi or ple, or mu. Or-a' :pa-' 'de 'gbu, or-a' 'duo:-' deh⧾ :en :ne-a 'de on 'di-'. 16:Mor nyor :ne 'de 'gle, 'nyi or ple, or mu. Or-a' :yi-' :gwlor-'. Or-a' 'duo:-' or-a'a: 'korlor-'. 17'Do ti :dao' bo, eh mu 'i :kma 'gabaa 'do 'nynor⧾ :on :ne-a 'kwli⧾-'-: 'dekorn: :yuh :an 'nya-dih-a 'nynuu-: bo. 18A bale: Nyorsoa, deh⧾ :daa en :ne 'de yi, 'do :chehbe'-a' ti 'di. 19Deh no-eh, :mor ti :dao', en nyni 'o, :yee' eh mu 'kle 'ye-eh: :klaba' :no. 'Kle 'ye-eh: :klaba' :daa, eh mu 'kle 'ye-eh-a' klehkpeh-' :zi, :eh 'wluh-a ti Nyorsoa :no-dih:-a 'bluhba, 'de :eh :yeh-dih:-a zorn :daa ken. :Mor eh no :ao', :yee' eh-a' 'kle 'ye-tu: :dao', eh :se-' de :yi i :neheh' :ka ti-a mu-a 'dlu-' :tehn. 20Jorwor: :mor :Gwlor :baa' se ti :dao' 'i 'koan'-dih:, :yee' :gwlor-nyor⧾-a' klehkpeh-a mu 'meh-:, on 'ye 'o dih :gweh. Jorwor: nyor⧾ or gan-a, mo-: :korn dhih or mu ti :dao' 'i 'koan'-dih:.
21:Yee' 'do ti :dao' 'di, :mor nyor zela: a :gwluhuh', or 'da, A :gbee'e:. Nyorsoa-a' 'taan'-yu :wor :dhe dih, 'de mor or 'ye :ao', A :gbee'e:, or-: :ne 'de 'naa: 'o, a-a' :po-ih' dhih 'jeh-'. 22Deh no-eh, sih 'tmo :wele-eh: :po-nyor⧾-: 'dekorn: :yuh :an 'da-dih-a an-a' 'jeh 'Klae-: an mu-' :sorn, on 'ye 'yi :to-dih-deh⧾-: 'dekorn: nyor⧾ 'di dih 'ma-dih-deh⧾-: no. An mu deh⧾ :daa :no, on 'ye nyor⧾ Nyorsoa gan-a :sloror' dih :bo-dih:, :mor on 'beh-dih: eh-a' no-a'. 23A 'dhu a-a' 'jeh :dhororn'. 'An sie ti de. 'An zela a deh⧾-a' klehkpeh :gwluhuh' 'weh :dueh'leh:.
:Yusu'-a' 'de :yi-eh:
(Mt 24.29-31; Lu 21.25-28)
24:Yee' :Yusu'-a wlu-' :chio'lo:, or 'da, 'Do ti :dao' 'di, :mor 'kle 'ye-eh: :dao', eh zi, 'yluh :se-' :fan i deh 'jeh, 'de mor 'chuh :se-' :fan i :ke. 25'Chuh :dhlaen: :en :ne-a 'de yai', en mu 'zorn 'kpa-:. :Yee' deh⧾-a' klehkpeh :en 'ble-a 'kpih 'do yao :gwlii', en-' 'kpih-a mu 'i gbua:. 26:Yee' nyor⧾-a mu 'yu an 'da-dih-a Nyor-kpalu-a' 'yu 'ye-:. Or mu 'de :yi, 'de 'ni-kpan⧾ 'nyne-', 'de 'kpih :klaba'⧾-: 'dekorn: dhih-a' 'i 'beh-a'-: 'di. 27:Yee' or mu or-a'a: 'enjor-nyor⧾ :dbo, on 'ye nyor⧾ or gan-a, :on :ne-a 'bluhba-a' 'for⧾ :ne-a :nyieh ken dih, yobo' po-a 'de :gle 'gbeheh 'di, :dha :due' po.
'Cheaan'-deh: 'wluh-a 'o 'fe-tu 'bhun
(Mt 24.32-35; Lu 21.29-33)
28:Yee' 'cheaan'-deh: a 'ye-a' 'chean' 'do 'fe-tu 'bhun, eh-: :dhe dih. :Mor an-a' 'gabuh⧾ :taa torbor, 'de on 'ye wlon⧾ :dele' 'dhu, :yee' a yubo-eh', :ka 'ni :dba 'i-ti-a nyni-a 'o. 29:Yee' 'ka-: 'o eh :ne :ke, :mor a 'ye deh⧾ :daa en :taa no-eh, :yee' a mu-eh yubo: :ka ti :dao', en 'koan'-a bo 'gabaa. 30Dhih 'jeh, 'an zela a :gwluhuh', deh⧾-a' klehkpeh :daa en mu :no-eh:, 'de jorwor: nyor⧾-a' klehkpeh :on :ne-a 'kmo-' dha ti :daa 'i, 'de an-a' ti 'ye 'o dih :gweh, on 'ye 'meh. 31'Bluhba-: 'dekorn: yao-: en mu 'dlu-' :jla, jorwor: 'an wlu :se-' dih :gweh i, :ka ti-a mu-a 'dlu-' :tehn.
Nyor se ti :dao' yubo:
(Mt 24.36-44)
32:Yee' 'we-eh: :dao'-: 'yluh-buh: :dao'-: ti en mu-a 'de :yi, nyor se-ih yubo:. 'Enjor-nyor:⧾ :on :ne-a 'de Nyorsoa 'bli yai'-a' 'jeh-: 'dekorn: Nyorsoa-a' 'Yu-: on se-eh yubo:. Nyorsoa :due', or-: yubo-eh. 33A 'bor 'mo-a', a 'dhu-eh 'yli-eh bo, deh no-eh, ti, ti :dao' en mu-a 'de :yi, a se-ih yubo:. 34Eh gweh :ka nyor :or mu-a 'duhba-', 'de :or sie-a or-a'a: 'gbu 'de or-a'a: 'bhoi-nynuu 'kwa, 'de :or :gble-dih-uh-a :koan 'i dih, 'de :or zela:-a 'yu :or 'dhu-a :kpaa' 'yli-eh bo :gwluhuh', or 'ye 'gbu 'yli-eh bo 'dhu. 35Eh-a' dhih, a 'dhu-eh 'yli-eh bo. Deh no-eh, a se ti nyor :klaba' :or :korn-a 'gbu, or mu-a 'de :ya yubo:, :eh beh 'gwie-yluh bo-: :eh beh dholo-' zuee-: :eh beh :zai' :zulu⧾-a' wlu 'da-: :eh beh zorn bo-mlai'-:. 36:Mor or 'dhobo:, or 'yle, or :ne-' a 'nyinor-' :yeh-dih:. 37Deh 'an za-a-' 'de a bo, eh-: 'o 'an za-' 'de nyor⧾-a' klehkpeh bo :ke. A 'dhu-eh 'yli-eh bo.
Currently Selected:
'Make 13: TCHKR
Označeno
Deli
Kopiraj
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.