'Make 12
12
Nyor⧾ gle :po-eh: 'de 'kwa, an-a' 'dlan
(Mt 21.33-46; Lu 20.9-19)
1:Yee' :Yusu' 'kpa 'o an-a' bo :wlu 'da 'weh 'de 'dlan⧾ 'di, or 'da, Nyor-kpalu :due' :oo', or-: no gle, 'de :or 'dhu 'glee-dubu'⧾ 'de eh 'di, 'de or za-ih gba-dih-gba 'de dih. :Yeh or no :ao', :yee' or 'blu 'bie', :dha on 'ye-ih'-a' :za-dih:, 'de or po gba :dhorno', :dha nyor⧾ 'ye-a' gle :dao' ken :fuo-dih:. :Yeh deh⧾-a' klehkpeh, en :gweh-a 'i, :yee' or po-eh 'de nyor⧾ 'kwa, on :ne or 'ye en-' 'bi-' gble. :Yee' :yeh or no :ao', :yee' or mu :gwele:. 2:Yeh eh no-a deh⧾ :dao', en-' 'bi-a' 'kpaan'-ti, :yee' or dbo or-a'a: 'bhoi-yu :due' 'de nyor⧾ or po-a gle 'de 'kwa bo, on 'ye or-a' ne, or bo dbo. 3:Yee' nyor⧾ :dao', on kpon-or', 'de on bla-or, on :se-or' deh 'nyi, on dbo-or de. 4:Yee' 'yu :or :korn-a gle, or dbo 'bhoi-yu: :noror' 'de on bo. :Yeh or mu-a, :yee' on tba-or deh 'dlu, 'de on :no-dih-or dhen. 5:Yee' 'yu :or :korn-a gle, or dbo 'yu :noror' :neheh'. :Yeh or mu-a, :yee' on 'dba-or'. 'Ka-: on no nyor⧾ :dhulu' :noo' or dbo-a, an-a' dhih, on bla an-a' nyor⧾ :noo', 'de on 'dba an-a' :noo'. 6:Yeh or dbo-a nyor⧾ :dboo:, :yee' or-a'a: dboo-nyor⧾-a' klehkpeh :gweh-'. Nyor :due' :or :sie:-a 'o, or-: 'dhu or-a'a: :dhih :kma-yu-'. :Yee' or-: 'bor-dih: 'o, or dbo, or 'da, An mu 'an-a: 'yu deh-' 'ye-:. 'De or dbo-or. 7Jorwor: :yeh nyor⧾ :an pobo-a 'o or :baa'-a'a: gle bo dih, on 'ye-or, :yee' an wlu-' 'de an-a' 'jeh 'nyne-', an no, 'Yu :or mu-a or :baa'-a'a: :kororn-deh⧾ :korn, or-: 'o, :or 'yle. A 'yle, :a 'ye-or' 'dba. :Yee' :a :mor mu or :baa'-a'a: :kororn-deh⧾ :korn. 8'De on kpon-or, on 'dba-or, on :za 'o or-a' 'ku gle, on po-uh 'kwla.
9:Yeh :Yusu' gweh-a 'dlan :dao', or-a' po-a' 'i, :yee' or dhele-uh-: dih, or 'da, :Yee' 'yu :or :korn-a gle, :kaa or mu :no :naa :eh? 'An zela a :gwluhuh', or mu :mu, or 'ye-uh' 'dba, 'de or 'ye 'de nyor⧾ :noo' po. 10Deh :daa :eh :ne-a 'de Nyorsoa-a' 'chlee-deh 'di, a 'see-eh zlo :e? :Eh no-a,
Tu-a' :yuh 'gbu :po-nyor⧾ po-a dih :dee',
tu-a' 'jeh :dao', mo-: no 'gbu-a' :zi-tu :naa.
11:Gwlor :baa' :oo', or-: no deh :daa.
'De mor deh or no-a, eh no deh :kolu' 'de :a 'yli-e.
12:Yeh :Yusu' jla-a, :yee' :Jueh'-nyor⧾-a' nyor⧾ :klaba'⧾ :on :ne-a 'o, an 'bhorn on 'ye-or' kpon, deh no-eh, on yubo-eh' :ka or :po-dih-uh-a 'dlan dih. Jorwor: an ple nyor⧾ :doru' :ne-a 'o, an-a' 'yli 'weh. Eh-: no-eh, 'de on 'tali-or dih, on mu.
On dhele: :Yusu' dih 'do 'taa-deh:⧾ :za-deh bo
(Mt 22.15-22; Lu 20.20-26)
13:Yeh on 'wluh-a 'o or bo, :yee' on dbo 'de :Falasi'i-nyor⧾-a' nyor⧾ :noo'-: 'dekorn: :Hehlo'-a'a: bo :na-nyor:⧾ :noo'-: on 'ye-or' wlu 'worn dih 'bhorn-dih:. 14:Yeh on mu-a 'de or bo, :yee' on :wlu-' 'de or bo, on 'dae:, Nyor⧾ deh :torne-nyor:, :a yubo-eh' :ka :an za-a 'yi 'sleh-dhih-', :an-a' ple-a nyor-a' 'yli-eh, 'de :on se-a 'de eh bo :korn, :ka nyor-a' :yeh 'beh. :An torne nyor⧾ Nyorsoa-a' :gwie: 'jeh, 'de 'yi 'sleh ka 'di. Zela: :a :gwluhuh', eh :ne 'o :a-a'a: 'tele'-a' :gwie 'i 'weh :e, nyor 'ye 'taa-deh⧾ :za, 'de 'Wloon-nyor⧾-a' 'keen bo :e? :Ae' :a-a' :no-eh' ke? :A za-ih :e? :Ae' :a-a' :za-ih' ke?
15:Yeh an dhele-or dih, :yee' or yubo-eh' :ka an 'bhorn-dih-or wlu 'worn dih. 'De or :wlu 'de on bo, or 'dae:, :Eh :korn dhih a yi 'on dih 'dhen 'da :eh? A :ya 'on 'sebla-wlii-eh :due', 'on 'ye-eh ya pobo:.
16'De on :ya 'de eh-a' :due'. :Yeh or 'ye-eh, :yee' or dhele-uh-: dih, or 'da, :Or :korn 'dlu-: 'dekorn: 'nyne-: :en :ne :daa eh ken :eh?
'De on 'da, 'Wloon-nyor⧾-a' 'keen :oo'.
17'De or 'dae:, A 'nyi 'Wloon-nyor⧾-a' 'keen deh :eh :korn-a 'de or bo, :yee' a 'nyi Nyorsoa deh :eh :korn-a 'de or bo.
:Yeh or 'da :ao' 'de on bo, :yee' or-a' deh 'ma-dih: an-a' :porluh⧾ 'weh.
On dhele: :Yusu' dih 'do nyor⧾-a' 'meh :sorn-' dhih bo
(Mt 22.23-33; Lu 20.27-40)
18:Yeh eh no :ao', :yee' :Jueh'-nyor⧾-a' kpor an 'da-dih-a :Sayusi'i-nyor⧾ :on no-a :mor nyor 'meh, :yee' or-a' :sorn-' :neheh', an-a' 'jeh :dao', mo-: mu 'de :Yusu' bo, 'de on dhele-or dih, on 'da, 19Nyor⧾ deh :torne-nyor:, :Mose' 'chle-eh' 'do :a bo, or 'da, :Mor nyor 'meh, 'de or 'ye 'nynor sie, :mor or-: 'nynor :dao'-: on se 'yu 'wluh, :yee' or-a' dei'-yu :korn or 'ye or-a'a: 'nynor-' 'duo:, or 'ye-or' :korn, 'de or 'ye 'nynuu 'wluh 'do or-a' 'de-di' :or 'meh-a 'gor bo. 20:Yee' 'de-di'-nyor⧾-kpalu⧾ :meheh' 'sorn :oo', 'de :klaba' nor :korn 'nynor. 'Nynor or :korn-a, or :ne or :se-' 'yu 'wluh, 'de or 'meh. 21:Yeh or 'meh-a, :yee' :yor :or tba-a 'o or 'de, or 'duo: 'nynor :dao'-' 'weh, 'de or korn-or. :Yeh ti :zi-dih:-a 'o ken dih, :yee' or 'meh-' :ke. Or-: 'nynor-: on :se-' 'yu 'wluh. 'Ka-: taan nor no :ke. 22'Ka-: an-a' klehkpeh :on :ne-a :meheh' 'sorn on no, on :tba-dih: ken. An-a' nyor :ne 'nynor :dao' :se-' 'yu 'wluh. :Yeh an-a' klehkpeh on 'meh-a, 'de on :gweh-a 'o dih, :yee' 'nynor :dao', or 'meh-' :ke. 23:Yee' :ka or 'ti-a nyor⧾ :meheh' 'sorn :dao' 'bli :dee', :yee' :mor ti nyni 'o, 'de nyor⧾-a' klehkpeh :on 'meh-a, 'de on 'ye-' :sorn, :yee' :or :korn 'nynor or mu-' 'dhu-eh: :eh?
24:Yeh on dhele:-a :Yusu' deh :daa dih, :yee' or :wlu-' 'de on bo, or 'dae:, Deh⧾ a na-dih-a :gwluhuh' dih, en se 'i 'sleh. Deh no-eh, a :se-' Nyorsoa-a' 'chlee-deh-' dih 'worn, 'de a se or-a' 'kpih yubo:. 25Nyor⧾ :on 'meh-a, :mor on :sorn-', on :se-' 'bli 'ti-dih: i :neheh'. :Ka 'enjor-nyor:⧾ :on :ne-a 'de Nyorsoa 'bli yai' on :ne-a, 'ka-: an mu :ne :ke. 26'Do 'meh :sorn-' deh bo, a 'see-eh zlo, 'de 'chlee-deh: :Mose' 'chle-a 'di :e, 'do eh-a' :dha eh :za-dih:-a 'kwla :yale'-gan: :or sin-a, or-a' dhih-', 'de Nyorsoa 'ye-a' :wlu 'de or bo, or 'ye :ao', 'Mor 'Eble'hehn-a' Nyorsoa. 'Mor Ase'-a' Nyorsoa. 'Mor 'Jekor-a' Nyorsoa, 'de or 'ye :ao' 'da, a 'see-eh zlo :e? 27Nyorsoa :se 'meheh'-nyor⧾-a' Nyorsoa. Jorwor: or no 'kmo :ne-nyor⧾-a' Nyorsoa. Eh-: :korn dhih :oo' 'on 'da deh⧾ a na-dih-a :gwluhuh' dih, en se 'i 'sleh. A zi-ih-: 'i klehkpeh.
'Tele'⧾-a' klehkpeh-a' 'dlu
(Mt 22.34-40; Lu 10.25-28)
28:Yee' :yeh :Yusu'-: 'dekorn: :Sayusi'i-nyor⧾-: an no :ao', :yee' nyor⧾ 'tele' :torne-nyor⧾-a' nyor :due' yi-: 'de. :Yeh or 'ye-eh, 'de :mor on dhele:-a :Yusu' deh dih, 'de or za-eh gbor deh 'jeh neh, :yee' eh-: no-eh, 'de or dhele-or dih :ke, or 'da, 'Tele' :yeheh :eh no 'tele'⧾-a' klehkpeh-a' 'dlu :eh?
29'De :Yusu' 'da, 'Tele'⧾-a' klehkpeh-a' 'dlu, :wor 'dhu, A :to :dou'⧾, a :mor 'Ezlea-nyor:⧾, :a-a' :Gwlor :baa' Nyorsoa, or :due', or-: 'dhu :Gwlor :baa'-'. 30:Yee' :ybeh :an-a' :Gwlor :baa' Nyorsoa-', 'do :an-a' :porluh⧾-a' klehkpeh-: :an-a' :febeh'-a' klehkpeh-: 'dekorn: :an-a' 'kpih-a' klehkpeh-: bo. 31'Tele'⧾-a' 'sororn' :neh :eh :kma-a 'gabaa :neheh', :eh tba-a 'o :tehn 'i neh 'de dih, eh-: :dhe dih. :Ybeh nyor⧾ :on :ne 'ti-a :dha :due'-', :ka :on no-a :an-a' 'jeh-a' :ybeh-a'. 'Tele' :neheh' se 'i 'beh, eh se 'o 'tele'⧾ 'sororn' :daa-' :zi.
32:Yeh or jla-a, :yee' nyor⧾ 'tele' :torne-yu: :dao', or 'dae:, Nyor⧾ deh :torne-nyor:, :on :se-' sih 'tmo. Dhih 'jeh :oo' :an za-a-'. Nyorsoa :due' 'klein', Nyorsoa :dele' se :dha :noror' :ne. 33:Yee' :gwlor-nyor :korn or 'ye Nyorsoa-' :ybeh 'do or-a' :porluh⧾-a' klehkpeh bo. :Yee' nyor⧾ :ne or 'ti-a :dha :due'-', or :korn or 'ye-uh'-' :ybeh, :ka or no-a or-a' 'jeh-a' :ybeh-a', eh-: :zi 'o Nyorsoa-a' 'slaa: :za-dih-deh⧾-a' klehkpeh nyor⧾-a po-a 'yli-: 'dekorn: or-a' gban 'i 'dhu-dih-deh⧾-a' klehkpeh-:.
34:Yeh :Yusu' 'ye-eh :ka deh⧾ or za-a gbor, en no-a 'de nyor⧾ 'di dih :florn-dih-eh, :yee' or 'dae: 'de or bo, :On se Nyorsoa-a' wlu 'ken :korn-eh bo dih :tehn-dih:.
:Eh 'wluh-a 'o, :yee' eh se nyor :korn, :or 'ye-a' :gwluhuh' :ku, :or 'ye-or' deh dih dhele: :neheh'.
Nyorsoa-a' 'taan'-yu:
(Mt 22.41-46; Lu 20.41-44)
35:Yee' ti :Yusu'-a torne-a nyor⧾ deh 'do Nyorsoa-a' 'sla ybei', :yee' or dhele-uh-: dih, or 'da, :Eh :korn dhih, 'de nyor⧾ 'tele' :torne-nyor⧾ 'da Nyorsoa-a' 'taan'-yu no :Debe' 'di-a' 'yu :eh? 36Gban 'i :ne :Zulu:, mo-: no-eh, 'de :Debe'-a' 'jeh 'yor-eh 'da,
:Gwlor :baa' :wlu-' 'de 'an :Gwlor :baa' bo, or 'da,
:Dhe 'o 'an :dila-son bo dih :chio'lo:,
'de 'on 'ye nyor⧾ :on 'nyeh-a :on-' ya :ya, 'de :on 'ye-uh' ken dih :na.
37:Debe'-a' 'yor-eh 'da-dih 'yu-a' 'jeh :daa, :Gwlor :baa'. :Yee' :kaa or 'ye or-a'a: 'yu-' 'dhu-eh no :eh?
:Yusu' 'dhu nyor⧾ 'slen nyor⧾ 'tele' :torne-nyor⧾-a' dhih
(Mt 23.1-36; Lu 20.45-47)
:Yee' :yeh :Yusu'-a wlu-a, :yee' nyor⧾ :doru' :on :ne-a 'o, an to-or :dou'⧾ bo, 'de :porluh⧾-a' dih 'pehn ka 'di. 38:Yeh or torne-uh-a deh, :yee' or :za-' deh 'de on bo, or 'dae:, A 'dhu a-a' 'jeh :dhororn', 'de nyor⧾ 'tele' :torne-nyor⧾ :ne-' a dih :bo-dih:, 'de an-a' noo-deh⧾ 'di. On :ybeh pa :gba 'vuu:⧾ :nmaa'e-', 'de :na dih :deh. 'De on :ybeh nyor⧾ 'ye-uh' wlu bo po, 'do 'doror', 'de deh-' 'ye ka 'di :deh. 39On :ybeh-' kpala'⧾ 'jeh :ne, :en :dhe-dih-eh 'for 'i, 'de 'di :gweh-dih-sla⧾ 'zorn dih-a' ken :dhe :deh. 'De on :ybeh-' :dha nyor⧾ :klaba'⧾-a dhe-a dih 'do gor-', dih :dhe :deh. 40An za :dhoba: 'nynor⧾ 'gbu⧾ 'kwa dih, 'de :mor on 'ye nyor⧾-a' 'yli, an gwle 'o Nyorsoa bo :wlu 'da. :Mor zabe: :zi-eh-a' ti nyni 'o, nyor⧾ :dao', mo-: Nyorsoa-a mu 'kle 'ye-eh: 'dlu :po 'gabaa, eh 'ye 'o :zi.
'Wlii-eh: :dhoba: 'nynor po-a 'de
(Lu 21.1-4)
41:Yee' :Yusu' 'koan'-dih: 'o :dha nyor⧾-a po-a 'wlii, 'do Nyorsoa-a' 'sla-a' dhih bo, 'de or :dhe dih 'do mor. 'De or 'ye nyor⧾ :doru', an po 'de 'wlii, 'de Nyorsoa-a' 'sla-a' 'wlii 'di :po :gbloron'-yu 'di. Bhaan-nyor:⧾ :dhulu' po 'de 'wlii: :dhulu'. 42:Yeh or pobo-a 'o, :yee' :dhoba: 'nynor :due' :or se-a deh-a' :za-da 'ble, or-: 'yle, 'de or po 'de deh 'di 'wlii-yor 'sororn' :en 'beh-dih: :en 'ye-a' 'kaba-yor-eh :due' no. 43:Yeh or 'ye-a 'nynor :dao', :yee' or 'da or-a'a: bo :na-nyor⧾ 'weh 'do or bo, or 'dae:, Dhih 'jeh, 'an zela a :gwluhuh', :dhoba: 'nynor :dao' :or se-a deh-a' :za-da 'ble, 'wlii: or po-a 'de, en :zi 'o 'wlii: nyor⧾-a' klehkpeh on po-a 'de 'weh. 44Deh no-eh, eh-: 'dhu, nyor⧾ :on po-a 'de 'wlii: :dhulu', en-' :yih on 'ble-a, :en :sie:-a ken, me-: 'o, on po 'de. Jorwor: 'nynor :dao' :or se-a deh-a' :za-da 'ble, deh-a' klehkpeh or 'ble-a, 'de deh-a' klehkpeh or dhe-a :gwlii', eh-: 'o, or po 'de.
Currently Selected:
'Make 12: TCHKR
Označeno
Deli
Kopiraj
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.