मति 11
11
बप्तिस्मा देलाहर युहन्नाक प्रस्न
(लुका ७:१८-३५)
1येसुजि यापन बारह जन चेलवानिके इअ जम्मे बतवा कहेसकलेपर, वहवाँसे जाके गालिलक यासपासक गउँवाहमा सिछा देलसि हसे परचार करलसि।
2जब झ्यालखनवामा हखइकि बप्तिस्मा देलाहर युहन्ना ख्रिस्टक करलि कमवा सुनलिय, उअ यापन चेलवानिके हुनेक लघिना पठोलिय। 3हुनुका वहवाँ पुगलेपर हुनेके पुछलइ, “कथि हमरा यसरा करलि ख्रिस्ट यपनहुँ हखहुँ कि, हमरा याको ककरहुँके इसियाइ रहेके?” 4येसुजि हुनुकाके कहलसि, “तोहरा जथि सुनले हसे देखले बडह, उअ जम्मे बतवा युहन्नाक लघिना जाके कहदिह, 5यन्हराह देखइ बडइ, लङडाह बुले सकइ बडइ, बडकि दुःखवा लगलि मन्सावाह डउल हखइ बडइ, बहिरि मन्सावाह सुनइ बडइ, मरलि मन्सावाह जियइ बडइ हसे गरिबवाह खुसिक समाद सुनइ बडइ।#यसइया ३५:५-६; ६१:१ 6मोर बारेमा संका हइने करलाहर मन्से आसिस पाउल मन्से हखिय।”
7युहन्नाक चेलवाह वहवाँसे जाइ रहलइ येसुजि युहन्नाक बारेमा भिडवाक मन्सावानिके यसके कहलसि, “तोहरा उराठ-ठउरियामा कथि हेरे गेल रहलह? कथि बइरावासे डिङइकि लरकटवाके? 8यगर हइने हखइ जउँ कथि हेरे गेल रहलह त? कथि डउल-डउल लुगा पेहरल एगुडा मन्सेके हेरे गेल रहलह? डउल-डउल लुगा पेहरल मन्से त राजदरबरवामा रहसइ। 9तोहरा कथि हेरे गेल रहलह त? कुनहुँ अगमवक्ताके हेरे गेलह? मुइ तोहराके कहबहिँ, हँ, उअ अगमवक्तासे फेनि महान बडिय। 10केहकेकि परमेस्वरक वचनमा युहन्नाक बारेमा यसके लिखाइल बडइ,
‘हेरहि, मुइ तोरसे यागा-यागा मोर दुतवाके पठोइ बडहिँ,
हसे उअ यगाहेसे तोर तहिँया पइडा तयार करबिय।’ #
मलाकि ३:१
11 “मुइ तोहराके सदियो कहबहिँ, यखनिलइ जनियानि मन्सेसे जरमलिमधे बप्तिस्मा देलाहर युहन्नासे महान मन्से कुनहुँ फेनि हइने बडइ, ताफेनि स्वरगक राजमा सबसे झिनिक फेनि युहन्नासे महान हखिय। 12बप्तिस्मा देलाहर युहन्ना परचार करलिसे यखनिलइ स्वरगक राज खाँ हइने डउलसे आकरमन हखइ बडइ हसे विरोध करलहराह वकरेके जबरजस्ति जितेके जोड करइ बडइ।#लुका १६:१६ 13केहकेकि जम्मे अगमवक्तावाह हसे मोसाक व्यवस्था युहन्नाक पलहालइ परमेस्वरक राजक बारेमा अगमवाडि करलइ। 14यगर मोर कहलि बतवा तोहरा गरहन करबह जउँ, यावे परना एलिया त इहे हखिय।#मलाकि ४:५; मति १७:१०-१३; मरकुस ९:११-१३ 15जाकर सुनेके कान बडइ, उअ सुनिय।
16 “याबे इअ पुस्ताक मन्सावानिके मुइ काकरसाङे दाजेके त? हुनुका त बजरवामा बेठलाहर छोकनिसभ नहिँया बडइ, जुने यापन सङहतियवानिके यसके कहसइ,
17 ‘हमरा तोहार तहिँया बसुरि बजोलहुँ, बाकि तोहरा हइने नचलह।
हमरा सोकक गित गवइकि, बाकि तोहरा हइने कनलह।’
18 “केहकेकि युहन्ना यलिय हसे नत दोसरि जन नहिँया खेलिय, न पियलिय, ताफेनि ‘उअ भुत लागल मन्से हखिय’ कहके तोहरा कहसह। 19बाकि मुइ मन्सेक पुतर याके दोसरि जन नहिँया खेलहिँ हसे पियलहिँ तके हुनुका ‘हेरह, उअ खउदार, मोदहरिया, कर उठोलहर हसे पपियानिक सङहतिया हखिय’ कहके कहलइ। बुद्धिया यसल कहके वकर कमवासे परमानित हसइ।”
विस्वास हइने करलाहर गाउँक मन्सेसभ
(लुका १०:१३-१५)
20जुन गउँवामा येसुजि बहुत यचम्मक काम करले रहलसि हसे उअ गउँवाक मन्सावाह यापन-यापन मनवा पापसे हइने फिरोलइ, उहेसे येसुजि हुनुकाके धिकारे लगलसि।
21 “अरे खोराजिन हसे बेथसेदाक मन्सावाह, तोहराके धिकार बडइ! यगर तोहार बिचा करलि कमवाह टुरोस हसे सिदोन सहरवामा कराइल रहतिय जउँ, हुनुका बहुत यागा बोराक लुगा पेहरके छाउर लगाके यापन-यापन मनवा पापसे फिरोले रहतिय। #
यसइया २३:१-१८; इजकिएल २६:१–२८:२६; योएल ३:४-८; आमोस १:९-१० 22बाकि मुइ तोहराके कहइ बडहिँ, न्यायक दिनवामा तोहार दुःखवा टुरोस हसे सिदोनक मन्सावानिक दुःखवासे बहुत हतइ।
23 “अरे कफरनहुमक मन्सावाह, कथि तोहरा स्वरगमा पुगके यादर पउबहुँ कहके सोचसह? बरु तोहरा त नरकमा पुगबह, केहकेकि यगर तोहारमा करलि यचम्मक कामसभ सदोम सहरवामा कराइल रहतिय त, उअ याजुक दिनलइ रहतिय। #
यसइया १४:१३-१५; उत्पति १९:२४-२८ 24बाकि मुइ तोहराके कहबहिँ, न्यायक दिनवामा तोहार दुःखवा सदोम सहरवाक मन्सावानिक दुःखवासे बहुत हतइ।”
हरियइलि मन्सेसभके विसराम
(लुका १०:२१-२२)
25तखनहिँ येसुजि कहलसि, “हे पिता, स्वरग हसे धरतियाक प्रभु, मुइ यपनहुँके धन्यवाद देइ बडहिँ, केहकेकि यपनहुँ बुद्धियार हसे हुसियारिनसे लोकाके साधारन मन्सावानिके इअ जम्मे बतवा देखोलहुँ। 26हँ, पिता, केहकेकि यपनहुँके इहे यसल लगलइ।
27 “मोर पिता मोरके जम्मे चिजुवाक जिम्मा देले बडसि। पिता बाहेक मुइ पुतरके कुनहुँ फेनि डउलसे हइने चिनसइ हसे मुइ पुतर बाहेक परमेस्वर पिताके कुनहुँ फेनि डउलसे हइने चिनसइ हसे पुतर जकरेके पिताके चिना देले बडिय हुनुका मतरे पिताके डउलसे चिनतइ। #
युहन्ना १:१८; ३:३५; १०:१५
28 “जम्मे हरियइलि हसे बोझवासे दबइलि मन्सावाह, मोर लघिना यउह, मुइ तोहराके विसराम देबहिँ। 29मोर पलवा बोकह हसे मोरसे सिखह, केहकेकि मुइ मइगर हसे नम्र हृदयक बडहिँ तके तोहरा यापन आत्मामा विसराम पउबह।#यरमिया ६:१६ 30केहकेकि मोर पलवा उसार हसे बोझवा हलुक बडइ।”
Aktuálne označené:
मति 11: CTHR
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2023, Wycliffe Bible Translators, Inc. and Nepal Bible Society
