मति 12
12
विसराम दिनक प्रभु
(मरकुस २:२३-२८; ३:१-६; लुका ६:१-११)
1एक विसरामक दिनवामा येसुजि हसे हुनेक चेलवाह गोहुँवाक खेतवा भके जाइ रहलइ। तखनहिँ हुनेक चेलवानिक भुख लगलेसे हुनुका गोहुँवाक बलिया टुरके खाए लगलइ।#व्यवस्था २३:२५ 2बाकि फरिसियाह इअ देखके येसुजिके कहलइ, “हेरहुँ, यपनहुँक चेलवाह विसरामक दिनवामा व्यवस्था यनुसार जथि हइने करे बनसइ हुनुका उहे करइ बडइ।”
3तब येसुजि हुनुकाके जवाफ देते कहलसि, “कथि तोहरा धरमसास्तरवामा हइने पढले बडह, जब दाउद रजवा हसे वकर सङहतियवानिक भुख लगइकि, तब उअ कथि करले रहलिय।#१ समुएल २१:१-६ 4दाउद रजवा परमेस्वरक घरवा भितरा पेसके परमेस्वरके चढोलि रोटिया यापन सङहतियवानिसाङे मिलके खेलिय। जबकि व्यवस्था यनुसार उअ रोटिया पुजेरियानिके मतरे खाए बनइ याको कुनहुँ फेनि उअ रोटिया खाए हइने बनइ।#लेवि २४:९ 5कथि तोहरा व्यवस्थामा हइने पढल बडह? मन्दिरवामा पुजेरियाह विसराम दिनवामा फेनि काम करसइ। यसनेकरके हुनुका विसराम दिनक नियम भङ करसइ, ताफेनि हुनुका दोसि हइने हसइ।#गन्ति २८:९-१० 6बाकि मुइ तोहराके कहबहिँ, उअ मन्दिरवासे फेनि महान कुनहुँ यहवाँ बडइ। 7यगर तोहरा परमेस्वरक कहलि बतवा बुझले रहतह त ‘मुइ भोग हइने, बाकि दाया चाहसहिँ’ निरदोस मन्सावानिके दोस नाहिँ लगोतह।#मति ९:१३; होसे ६:६ 8केहकेकि मुइ मन्सेक पुतर विसराम दिनक फेनि प्रभु हखहि।”
9तब येसुजि वहवाँसे निकडके हुनुकर सभाघरवामा गेलसि। 10वहवाँ हथवा सुखाइल एक जन मन्से रहलिय। फरिसियाह दोस लगावेके तहिँया येसुजिके यसके पुछलइ, “कथि विसराम दिनवामा मनियइलि मन्सावाके डउल बनावेके व्यवस्था यनुसार यसल हखइ?” 11येसुजि हुनुकाके जवाफ देते कहलसि, “यगर तोहारमधे ककरो भेडवा विसरामक दिन गडहवामा खस्तइ जउँ, कथि तोहरा वकरेके बाहरा नाहिँ निकडोबह त?#लुका १४:५ 12एगुडा भेडासे त मन्सेक मोल बहुत बडइ। उहेसे विसराम दिनमा यसल काम करेके ठिक हखइ।” 13वकरपाछा येसुजि उअ हथवा सुखइलि मन्सावाके कहलसि, “तोर हथवा पसरोहि।” उअ यापन हथवा पसरोलिय हसे वकर हथवा दोसरि हथवा नहिँया डउल भेलइ। 14बाकि फरिसियाह सभाघरवासे निकडके कस्के येसुजिके मारेके कहके छलफल करे लगलइ।
परमेस्वरक चुनल सेवक
(मरकुस ३:७-१२)
15येसुजि यापन विरोधमा सल्लाह करइ बडइ कहके थाह पउलेपर हुने वहवाँसे जइबे करलसि। बहुत जन हुनेक पाछा लगलइ हसे हुने जम्मे जनके डउल बनोलसि। 16बाकि येसुजि यापन बारेमा ककरहुँके फेनि झिन कहिह कहके हुनुकाके चेतवनि देलसि। 17यसके यसइया अगमवक्तावाक कहलि बतवा पुरा हखे याइल बडइ:
18“मोर चुनल हसे सोगावल सेवक इहे हखिय।
यकरसे मुइ खाँ खुसि बडहिँ,
मुइ यकरमा मोर आत्मा राखदेबहि,
हसे उअ जम्मे जतियाक मन्सावानिके न्यायक परचार करबिय।
19उअ न झगडा करबिय, नत चिल्लाके हाला करबिय। कुनहुँ फेनि वकरेके गलियावाहमा चिल्लाइकि नाहिँ सुनतइ।
20उअ एगुडा लरकट फेनि नाहिँ टुरबिय,
हसे धिप-धिप बरइकि दिवाके फेनि नाहिँ बुतोबिय।
याखिरमा उअ न्यायके जितमा पुगोबिय।
21जम्मे जतियाक मन्सावाह वकर नाउँमा यसरा रखतइ।”#यसइया ४२:१-४
येसुजिक करलि कमवामा संका
(मरकुस ३:२०-३०; लुका ११:१४-२३)
22तखनहिँ मन्सावाह भुत लागके यान्हर हसे लटाह भेल एक जन मनियाइल मन्सेके येसुजि लघिना यनलइ। हुने वकरेके डउल बनोलेपर उअ देखाह हसे फदकाह भेलिय। 23इअ देखके जम्मे मन्सावाह छक परते यसके कहलइ, “कथि इअ दाउद रजवाक बेटा हखिय त?” 24बाकि इअ बतवा सुनके फरिसियाह कहलइ, “इअ त भुतवाक सिरदरवा बालजिबुलसे भुतवानिके निकडोसिय।”#मति ९:३४; १०:२५
25येसुजि हुनुकर मनवाक विचार बुझके यसके कहलसि, “जुन राजमा फुट हसइ उअ राज नास हतइ। वसने करके कुनहुँ सहर कि परिवारमा फुट बडइ जउँ उअ फेनि नास हतइ। 26यगर सइतनवा सइतनवाके निकडोबिय, उअ यपनहिँमा फुट यनबिय, वकर राज फेनि कस्के टिकतइ त? 27यगर मुइ भुतवाक सिरदरवा बालजिबुलसे भुतवानिके निकडोसहि जउँ, तोहार मन्सावाह काकर सक्तिसे भुतवानिके निकडोसइ त? उहेसे हुनुका तोहराके न्याय करतइ। 28बाकि यगर मुइ परमेस्वरक आत्मासे भुतवानिके निसकोसहि जउँ, परमेस्वरक राज तोहार बिचा यासकल बडइ कहके जनिह। 29पहिला बरियारि मन्सावाके नाहिँ बान्हके, कुनहुँ फेनि वकर घरवामा जाके धनमाल लुटे नाहिँ सकतइ? वकरेके बान्हले मतरे वकर घरवाक धनमाल लुटे सकेतइ।
30 “जुने मोरसाङे हइने बडिय, उअ मोर विरोधि हखिय। जुन मन्सावा मोरसाङे नाहिँ बटियोबिय उअ छाहरछिता पारबिय। #
मरकुस ९:४०
31उहेसे मुइ तोहराके कहबहिँ, मन्सावानिक करलि जम्मे पाप हसे निना छमा हतइ, बाकि पवितर-आत्माक विरोधक निना छमा नाहिँ हतइ। 32जुने मुइ मन्सेक पुतरक विरोधमा फदकबिय, उअ छमा पउबिय, बाकि जुने पवितर-आत्माक विरोधमा फदकबिय, वकरेके इअ जुगवामा हसे यावेवाला जुगवामा फेनि छमा नाहिँ हतइ।#लुका १२:१०
गाछ हसे वकर फर
(लुका ६:४३-४५)
33 “डउल गाछमा डउल फर फरसइ हसे खराब गाछमा खराब फर फरसइ। केहकेकि एगुडा गाछ वकर फरवासे चिनेसइ। #
मति ७:२० 34अरे बिखियारि सपवाक बचवाह! तोहरा यपनहिँ दुस्ट बडह, उहेसे कस्के डउल बात फदके सकबह त? केहकेकि जथि चिजु हृदयमा रहसइ उहे मुहवासे निकडसइ।#मति ३:७; २३:३३; १५:१८; लुका ३:७ 35डउल मन्से यापन डउल हृदय भितरासे डउल बात निकडोसइ। बाकि दुस्ट मन्से यापन दुस्ट हृदय भितरासे खराब बात निकडोसइ। 36मुइ तोहराके कहबहिँ, जुने काम हइने लगना बात फदकतइ, न्यायक दिनवामा हुनुका वकर लेखा देवे परतइ। 37केहकेकि तोर फदकलि बतवासे तुइ निरदोसि हसे तोर फदकलि बतवासे तुइ दोसि ठहरबहि।”
योनाक चिन्हा
(मरकुस ८:११-१२; लुका ११:२९-३२)
38एक दिन कतेक जन व्यवस्थाक-गुरुसभ हसे फरिसियाह याके येसुजिके कहलइ, “गुरुजि, हमरा यपनहुँसे एगुडा यचम्मक चिन्हा हेरे खोजइ बडहुँ।”#मति १६:१; मरकुस ८:११ 39येसुजि हुनुकाके जवाफ देते कहलसि, “इअ दुस्ट हसे धुचुड पुस्ता चिन्हा खोजसइ। बाकि इअ पुस्ताक मन्सावानिके योनाक चिन्हा मतरे दियतइ याको कुनहुँ चिन्हा नाहिँ दियतइ।#मति १६:४; मरकुस ८:१२ 40केहकेकि अगमवक्ता योना जसने जबडि मछरियाक पेटवा भितरा तिन दिन हसे तिन रात रहलिय, वसने मन्सेक पुतर फेनि धरतिया भितरा तिन दिन तके तिन रात रहबिय।#योना १:१७ 41न्यायक दिनवामा निनवे सहरवाक मन्सावाह इअ पुस्ताक मन्सावानिसाङे उठके हिनिकाके दोस लगोतइ, केहकेकि योना परमेस्वरक वचन परचार करइकि हुनुका यापन-यापन पपवा मानके छडलइ। बाकि हेरह, योनासे फेनि महान एक जन कुनहुँ यहवाँ बडिय।#योना ३:५ 42न्यायक दिनवामा दखिने देसवाक सिबाक रनिया इअ पुस्ताक मन्सावानिसाङे उठके हुनुकाके दोस लगोबिय, केहकेकि उअ सोलोमन रजवाक ग्यान सुनेके तहिँया धरतियाक वाहि तिरवासे याइल रहलिय। बाकि हेरह, सोलोमनसे फेनि महान एक जन कुनहुँ यहवाँ बडिय।#१ राजा १०:१-१०; २ इतिहास ९:१-१२
भुत-आत्मा फेरि फिरसइ
(लुका ११:२४-२६)
43 “जब एगुडा दुस्ट-आत्मा कुनहुँ मन्सेसे निकडसइ, उअ उराठ-ठउरियामा जाके बिसाएके तहिँया ठउरि खोजते बुलसिय, बाकि उअ कहवहुँ फेनि बिसाएके ठउरि हइने पउसिय। 44तब उअ यसके कहसिय, ‘पहिने जुन घरवासे याइल बडहिँ, उहे घरवामा जेबहिँ।’ उअ फिरके यवइकि पहिनेक घरवा खालि, बहारके साफा हसे डउलसे सजावल पउसिय। 45तब उअ जाके यापनसे याको झन खराब सात गो दुस्ट-आत्मावानिके लेले याके वकर भितरा पेससइ हसे वहवाँ रहसइ। उहेसे उअ मन्सावाक पाछक दासा पहिलाक दासासे झन खराब हसइ। इअ दुस्ट पुस्ताके फेनि वसने हतइ।”
येसुजिक दाओ हसे भाइसभ
(मरकुस ३:३१-३५; लुका ८:१९-२१)
46जब येसुजि मन्सावानिसे फदकते रहलसि, हुनेक दाओ हसे भयवा याके हुनेसाङे फदकेके तहिँया बाहरा इसियाइ रहलइ। 47तब वहवाँ भेलि कुनहुँ एक जन येसुजि लघिना याके कहलइ, “हेरहुँ, यपनहुँक दाओ हसे भयवाह यपनहुँसाङे फदकेके तहिँया बाहरा ठडियाइल बडइ।” 48तब येसुजि वकरेके जवाफ देते कहलसि, “मोर दाओ हसे भाइसभ कुने हखइ?” 49हुने यापन चेलवानिवरि देखाके कहलसि, “हेरह, मोर दाओ हसे भाइसभ हिनिकहिँ हखइ। 50केहकेकि जुने स्वरगमा रहलाहर मोर पिताक इछा पालन करसइ, हुनुकहिँ मोर दाओ हसे भाइ-बहिनसभ हखइ।”
Aktuálne označené:
मति 12: CTHR
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2023, Wycliffe Bible Translators, Inc. and Nepal Bible Society
