मति 10
10
येसुजि बारह जन प्रेरितसभके पठोलसि
(मरकुस ३:१३-१९; ६:७-१३; १३:९-१३; लुका ६:१२-१६; ९:१-६; १२:२-९; २१:१२-१७)
1येसुजि यापन बारह जन चेलवानिके यापन लघिना बलोलसि। हुने हुनुकाके दुस्ट-आत्मासभके निकडावेके हसे जम्मे खलिक रोग हसे मनियइलि मन्सावानिके डउल बनावेके अधिकार देलसि।
2उअ बारह जन प्रेरितसभक नाउँ इअ हखइ: पहिला पतरुस कहल सिमोन हसे वकर भयवा अन्द्रियास, जब्दियाक बेटवा याकुब हसे वकर भयवा युहन्ना, 3फिलिप, बारथोलोमाइ, थोमा, कर उठोलहर मति, अल्फायसक बेटा याकुब, थेदियस, 4देसभक्त सिमोन, यहुदा इस्कोरियोत जुने पाछेसे येसुजिके धोखा देलिय।
5येसुजि उअ बारह जन प्रेरितवानिके यसके कहके पठोलसि, “तोहरा अयहुदि मन्सावानि लघिना कि सामरियानिक गउँवाहमा झिन जइह। 6बरु इस्राएलक मन्सावानिक लघिना जइह, जुने भुलाइल भेडा नहिँया बडइ। 7तोहरा जाके, ‘स्वरगक राज लजिके यासकल बडइ’ कहके हुनुकाके परचार करिह। 8मनियइलि मन्सावानिके डउल बनोइह, मरलि मन्सावानिके जिउतोइह, बडकि दुःखवा लगलि मन्सावानिके डउल बनोइह हसे भुतवानिके निकडोइह। तोहरा उअ वसहिँ पउलह, याको जनके फेनि वसहिँ दिह। 9तोहरा यापनसाङे सोन, चाँनि हसे तामाक पइसा झिन बोकिह। 10तोहरा यातरामा जाइखुनि यापनसाङे झोला झिन बोकिह, फेरहा झोलिया, चप्पल हसे लाठि फेनि झिन लिह। केहकेकि काम करलहरा हुनुकर चाहि लगना चिजु पवहिँ परतइ।#१ कोरिन्थि ९:१४; १ तिमोथि ५:१८
11 “जब तोहरा कुनहुँ सहरवा कि गउँवामा पेसबह, वहवाँ कुने लाइक बडिय कहके खोजिह हसे वहवाँसे बाहरा नाहिँ जाइलइ वकरे घरवामा रहिह। 12जब तोहरा उअ घरवामा पेसबह, ‘तोहराके सान्ति हखइ’ कहके कहिय। 13यगर उअ घरवाक मन्सावाह सान्ति पावेके लाइक बडइ जउँ, सान्ति वहवाँ रहइ। बाकि हुनुका यकर लाइक हइने बडइ जउँ, तोहार देलि सान्ति तोहारमा फिरके यवइ। 14यगर कुनहुँ मन्से तोहराके स्वागत नाहिँ करतइ हसे तोहार बतवा नाहिँ सुनतइ जउँ, उअ घरवा कि गउँवासे जाइखुनि यापन टङवाक धुरिया झहरा दिह।#प्रेरित १३:५१ 15मुइ तोहराके सदियो कहबहिँ, न्यायक दिनवामा उअ गउँवाक दासा, सदोम हसे गमोराक दासासे फेनि बढि हतइ।#उत्पति १९:२४-२८; मति ११:२४
यावे लगइकि सतावटक बारेमा
(मरकुस १३:९-१३; लुका २१:१२-१७)
16 “हेरह, मुइ तोहराके बनकुतवानिक बिचा भेडा नहिँया पठोइ बडहिँ। उहेसे तोहरा साँप नहिँया चलाख हसे कबतुर नहिँया सोझ हखिह। #
लुका १०:३ 17बाकि तोहरा मन्सावानिसे चेतले रहिह, केहकेकि हुनुका तोहराके पकडके यडडा-अदालतमा लिगतइ हसे हुनुकर सभाघरवाहमा कोडा लगोतइ। 18मोर पाछा लगलेसे तोहराके बडकि हकिमवानि हसे रजवानिक यागा लिगतइ। इअ तोहार तहिँया अयहुदियानिक यागा मोर बारेमा गवाहि देवेके अवसर हतइ। 19जब तोहराके पकडके लिगतइ, तब कथि कहे परतइ हसे कस्के कहे परतइ कहके चिन्ता झिन करिह। तखनहिँ कथि कहे परतइ कहके तोहराके दियतइ। 20केहकेकि तखनहिँ तोहरा नाहिँ फदकबह, बाकि परमेस्वर पिताक आत्मा तोहारसे फदकबसि।
21 “भयवा यापन भयवाके हसे बपवा यापन बचवाके मारेके तहिँया सपदेतइ। बेटवा-बेटियाह यापन दाओ-बाबाक विरोधमा उठके हुनुकाके मारे लगोतइ। 22मोर कारनसे तोहराके जम्मे मन्सावाह घिना करतइ, बाकि जुने वराटिलइ डटके रहतइ उअ उद्धार पउतइ।#मति २४:९-१३ 23जब मन्सावाह तोहराके एगुडा गाउँमा सतोतइ, तोहरा भागके दोसरि गउँवामा जइह। मुइ तोहराके सदियो कहइ बडहिँ, मुइ मन्सेक पुतर यइलिसे यागा तोहरा इस्राएलक जम्मे गउँवा-सहरवामा काम नाहिँ वरोले रहबह।
24 “कुनहुँ चेला यापन गुरुसे जबड नाहिँ हतइ, नत बहरिया यापन मलिकावासे जबड हखबिय। #
लुका ६:४०; युहन्ना १३:१६; १५:२० 25उहेसे चेलवा यापन गुरु नहिँया हसे बहरियावा यापन मालिक नहिँया भेले बहुत हतइ। यगर घरवाक मालिकके हुनुका बालजिबुल कहतइ जउँ, वकर परिवारके झन कथि कहतइ त?#मति ९:३४; १२:२४; मरकुस ३:२२; लुका ११:१५
काकरसे डेराए परतइ
(लुका १२:२-७)
26 “उहेसे तोहरा मन्सावानिसाङे झिन डेरइह, केहकेकि झपाइल बात परकट हतइ हसे जम्मे गुप्त बतवा थाह हतइ। #
मरकुस ४:२२; लुका ८:१७ 27जथि बात मुइ तोहराके यन्हारिमा कहइ बडहिँ, उअ इजोरवामा कहदिह हसे जथि बात मुइ तोहार कनवामा सुनसानमा कहइ बडहिँ, उअ घरवाक छनियासे परचार करिह। 28यसनुक मन्सेसभसे झिन डेरइह, जुने देहियाके मतरे मारे सकसइ, बाकि आत्माके मारे हइने सकसइ। बरु आत्मा हसे देहिया दुन्हुँके नरकमा नास करे सकलाहर परमेस्वरसे डेरइह। 29कथि दु गो गेहुरि इचिके पइसामा हइने बिकेसइ त? बाकि तोहार पिताक इछा बिना एगुडा गेहुरि फेनि भुयवामा नाहिँ खस्तइ। 30बाकि तोहार मुडियाक केसवाह फेनि एकहक करके गनाइल बडइ। 31उहेसे तोहरा झिन डेराह, तोहरा बहुत गेहुरिसभसे फेनि बढि मोलक बडह।
32 “जुने मोरके मन्सावानिक यागा स्विकार करबिय, मुइ फेनि वकरेके स्वरगमा रहलाहर मोर पिताक यागा स्विकार करबहिँ। 33बाकि जुने मोरके मन्सावानिक यागा इन्कार करतइ, मुइ फेनि वकरेके स्वरगमा रहलाहर मोर पिताक यागा इन्कार करबहिँ।#२ तिमोथि २:१२
चेलवानि तिरे परना मोल
(लुका १२:५१-५३; १४:२६-२७)
34 “मुइ धरतियामा सान्ति यानेके तहिँया याइल बडहिँ कहके झिन सोचिह। मुइ सान्ति यानेके हइने, बाकि तरवार चलावे याइल हखहि। 35मुइ त बेटवाके यापन बाबाक विरोधमा, बेटियाके यापन दाओक विरोधमा हसे पुतहियाके यापन ससुइयाक विरोध करावे याइल हखहि। 36मन्सेक सतरुसभ त वकर यपने परिवरवाक मन्सावाह रहसइ।#मिका ७:६ 37जुने यापन दाओ-बाबाके मोरसे बहुत माया करबिय उअ मोर चेला बनेके लाइक नाहिँ हखबिय, वसनेकरते जुने यापन बेटवा-बेटियानिके मोरसे बहुत माया करबिय उअ फेनि मोर चेला बनेके लाइक नाहिँ हखबिय। 38जुने यापन क्रुस बोकके मोर पाछा नाहिँ लगबिय उअ मोर चेला बनेके लाइक नाहिँ हखबिय।#मति १६:२४; मरकुस ८:३४; लुका ९:२३ 39जुने यापन जिन्गि बचावे खोजबिय उअ जिवन गुमोबिय। बाकि जुने मोर तहिँया यापन जिन्गि गुमोबिय, उअ जिवन पउबिय।#मति १६:२५; मरकुस ८:३५; लुका ९:२४; १७:३३; युहन्ना १२:२५
चेलवानि पउना इनाम
(मरकुस ९:४१; लुका १०:१६)
40 “तोहराके स्वागत करलहरा मोरके स्वागत करबिय हसे मोरके स्वागत करलहरा मोरके पठोलाहराके स्वागत करबिय। #
मरकुस ९:३७; लुका ९:४८; १०:१६; युहन्ना १३:२० 41जुन अगमवक्तावाके ‘अगमवक्ता हखिय’ कहके स्वागत करलहरा अगमवक्ताक इनाम पउबिय। यसने धरमि मन्सेके इअ ‘धरमि मन्से हखिय’ कहके स्वागत करलहरा फेनि धरमि मन्सेक इनाम पउबिय। 42जुने इअ छोटेमधेसे एक जनके मोर चेला कहके एक गिलास जुड पानि पिएके देले फेनि, मुइ सदियो कहबहिँ, उअ यापन इनाम नाहिँ गुमोबिय।”
Aktuálne označené:
मति 10: CTHR
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 2023, Wycliffe Bible Translators, Inc. and Nepal Bible Society
