Luka 9
9
KUTUMWA KW’ENTUMWA. — HERODE NAYEGONGA KUBONA YEZU.
1Mbe nasumbya Entumwa ikumi n’ebili, nabaha amani n’obuhicha ha masitani gona, kai bakize n’abarwere. 2Nabatuma kwolekerera obukama bwa Mungu no kukiz’abarwere. 3Nabagambira ati: Mutatwaraga kintu mu muhanda, nkoni pai, n’ensaho nangu, naho guli mukate n’empilya hona pai, kai mutagiraga enkanzu ibili. 4Buli mu nzu omwo mwatahaga, mwikaremo, mwaleka kurugamo. 5Buli muntu alibura kubayanankura, mu charo omwo murugemo, kai mwekubure n’enkungu yo mu bigere byanu ha kubamanyisya. 6Ka bahurukire, nibagenda mu nsozi zona, nibayolekerera Evanjeli nibakiza abantu honahona.
7Nawe omukama Herode ka yahulire byona ebyagwire hali wenene, natimatimya, obwo chagambirwe 8abandi bati: Yahona yazokire mu bafu; kai abandi bati: Eliya yabwenwe; kandi abandi bati: Omulagi omo n’omo wo mu ba kara niwe azokire. 9Herode nagira ati: Yohana nkamuchwagul’omutwe#9, 9 Lora Matayo 14, 1–12 na Marko 6, 14–29.; mbe kai ogwo n’oha, owe nkuhulira bityo? Nahiga kumubona.
KUKANISY’EMIKATE KWO KUTANDIKA. — KWIKIRIZA KWA PETRO. — KUTEGULA OMUSALABA
10Entumwa ka zasubire, nizimurobeza byona ebyo zakozire; nabatwara nagenda wenka aho abantu bataliho, hehi na Betsaida. 11Ebipipi ka byamanyire, nibimuruba; nabayanankura, nabafumorera eby’obukama bwa Mungu, kai abayendaga kukizibwa, nabakiza. 12Izoba ka lyalagere, ikumi na babili niberira hehi nibamugambira bati: Nosindike ebipipi, bigende mu maka na mu byaro bya hehi, balalire, babone ebilyo; kuba hanu tuli mw’iswa. 13Wenene nabagambira ati: Imwe nimubahe ebyo kulya. Bonene nibagira bati: Tituli na bingi bikizire ha mikate itanu n’enfwi ibili; raba tugende, tugulire embaga enu yona ebilyo. 14Baliga baliho kuti baseza bihumbi bitanu. Mbe nagambira abahemba be ati: Mubekaze bataganisibwe makumi atanu makumi atanu. 15Nibagira batyo nibabekaza bona. 16Mbe ka yakwasire emikate itanu n’enfwi ibili, nalalamira oluguru, nazibarika, nazihinzura, naha abahemba be basagare obusyo y’ebipipi. 17Nibalya bona nibeguta; nibehayo ebitukuru ikumi na bibili by’ebihinzu ebyasagire.
18Mbe ka yasigere wenka nalembereza, n’abahemba be baliga bali nage, nababuza nagira ati: Embaga ekundenganisya oha? 19Bonene nibasubamo nibagira bati: Yohana Batista; abandi bati: Eliya; kai abandi bati: Ni mulagi omo ayazoka mu ba kara. 20Kai nabagambira ati: Kai imwe mukundenga oha? Simoni Petro, ka yasubiremo, nagira ati: Kristu wa Mungu. 21Wenene nabazibira mani batakigambira muntu#9, 21 Lora Matayo 16, 13–20., 22natenga okw’Omwana w’omuntu ali no kusaswa bingi no kwangwa abagurusi n’abakuru b’abasaserdoti n’abandiki, no kwitwa, no kuzoka ha lunaku lwa kasatu.
23Mbe nagambira bona ati: Omuntu akwenda kunduga ha numa, ayeyange omwene, ategure omusalaba gwe naku zona, andube. 24Kuba akwenda kukiz’omwoyo gwe, niwe akugunaga; nawe akunagira ine omwoyo gwe, akuguchungula. 25Hatyo omuntu akatwar’ensi yona, ekumuletera ki, wenene akenaga hamo akesingaricha?#9, 25 Lora Matayo 16, 26. 26Kuba si alinkolerw’ensoni ine n’ebigambo byange, ogwo Omwana w’omuntu alimukolerw’ensoni k’aliza mw’ikuzo lye n’ely’Ese n’elya bamalaika batakatifu. 27Nkubagambira ebikomereze nti: Haliho abandi abali hanu abataliroz’olufu, batakabwene obukama bwa Mungu#9, 27 Lora Matayo 16, 28.
KUHINDUKA KUNDI KWA YEZU. — OWA SITANI NAKIZIBWA. — EMPAKA Z’ENTUMWA.
28Mbe ebigambo ebyo ka byahwereho kuti naku munana, natwara Petro na Yakobo na Yohana, nanegera mw’ibanga kulembereza. 29Mbe aho yaliga ali mw’ilembereza, olususo lw’obusyo bwe niluba lundi, n’omwenda gwe nigwera nigwengerera. 30Nibo n’abantu babili nibafumora nage: baliga bali Musa na Eliya, 31nibabonwa mw’ikuzo; baliga nibatenga ebyo kurugaho kwe ebilihikibwa Yeruzalemu#9, 31 Nikwo kulaga kufwa kwe, kuzoka no kuhanama mw’igulu.. 32Nawe Petro n’abaliga bali nage nibatekerezibwa ntiro; ka basisimukire, nibabona ikuzo lye n’abantu babili abaliga bali nage. 33Mbe ka bamurugireho, Petro nagambira Yezu ati: Mwolekerezi, ni kuzima tube hanu; twombekeho ebihuna bisatu: kimo chawe, kimo cha Musa, n’ekindi cha Eliya; tiyamanyaga echo yagambaga. 34Yaliga akifumora ebyo, nihabaho elire, nilibasweka; nibatina ka batahire mu lire. 35Ilaka niliruga mu lire liti: Onu niwe Mwana wange mwendwa; mumuhulire. 36Mbe ilaka ka lyahulirwe, nihasagaho Yezu wenka. Bonene nibabuza, tibagambire muntu mu naku ezo ekigambo muli ebyo babwene.
37Mbe bwire kucha ka bahanantukire h’ebanga, embaga ningi nebesungana. 38Niwe n’omuntu wo mu mbaga nahamuka nagira ati: Mwolekerezi, nkukulembereza, olore mutabani wange, kuba ni mwana nagumo hal’ine. 39Omwoyo gumukwasire, aho honka akwana, likumutiriga nilimugaranzura, yabirireho n’ifiro, kandi likumuleka manimani nilimukotora. 40Mbe ndembereze abahemba bawe baliruche, babura kuhicha. 41Yezu ka yasubiremo, nagira ati: Luzaro olutali na kwikiriza lunu n’oluzunzire, kuhika lihi ndi n’emwe nimbeguminsiriza? Leta hanu mutabani wawe. 42Ka yerire hehi, isitani nilimupama nilimutirigatiriga. 43Yezu nachahalira omwoyo gw’obulofu, nakiz’omwana ogwo, namusubiza ise. 44Bona nibakumisibwa obuhicha bwa Mungu; kai bona nibatangazibwa ebyo yakoraga byona, nagambira abahemba be ati: Imwe, mubike ebigambo ebyo mu mitima zanu; kuba Omwana w’omuntu mu naku z’obusyo aliherezibwa mu ngaro z’abantu. 45Nawe bonene ekigambo echo tibakisombokerwe, chaliga cheserekire mu meso gabo, tibakimanyire n’akati; nibatina kumubuza ekigambo echo.
46Nibezirwa ebitekateko by’aliba mukuru muli bonene. 47Yezu, ka yabwene ebitekateko by’emitima zabo, natwara omwana, namwimereza hehi nage. 48Nabagambira ati: Akwanankura omwana onu mw’izina lyange, akwanankura ine; kai akwanankura ine, akwanankura ayantumire. Kuba ali muke muno mul’imwe mwena, ogwo niwe mukuru muno. 49Aho Yohana nasubamo nagira ati: Mwolekerezi, tubwene omuntu ogwo nairuch’amasitani mw’izina lyawe, itwe twamuzibira, obw’atakukuruba hamo n’etwe. 50Yezu namugambira ati: Muleke kumuzibira; kuba atakubarwana, ni w’olubazu lwanu.
YEZU NARABA SAMARIYA. — OMUHEMBA WA KIMO WA YEZU KRISTU ABE ATA?
51Mbe enaku zo kusagarwa kwe ka zahikire, wenene nagumya obusyo bwe kuza Yeruzalemu. 52Natuma entumwa kumwebembera; ka zagenzire, nizitaha mu charo ch’Abanasamariya, zihiche kumuchumira aho kutura. 53Tibamwanankwire, kuba obusyo bwe bwaliga nibulora Yeruzalemu#9, 53 Abanasamariya bahataga Abayahudi, munomuno abazaga kusoma Yeruzalemu.. 54Mbe abahemba be Yakobo na Yohana ka babwene, nibagira bati: Mukama wetu, okwenda tugambire omuliro guruge mw’igulu, gubasingariche? 55Ka yabahindukire, nabachahalira, nagira ati: Timukumanya omwoyo ogwo muli nagwo. 56Omwana w’omuntu tiyezire kunag’emyoyo, nawe kuzichungula. Nibarugayo kuza mu lusozi lundi.
57Mbe olwo baliga nibalibata mu muhanda, omuntu ogwo namugambira ati: Nkukuruba buli ah’olagenda. 58Yezu namugambira ati: Emisege zili n’amena, n’enoni z’oluguru zili n’obwali, nawe Omwana w’omuntu tali n’aho kusagura omutwe gwe. 59Nagambira ondi ati: Nondube. Ogwo nagira ati: Mukama wange, nonfuhe kutandika kugenda kunaga tata. 60Kai Yezu namugira ati: Leka abafu banage abafu babo; nawe iwe, genda kwolekerera obukama bwa Mungu. 61Ondi nagira ati: Mukama wange, nkukuruba; nawe nonfuhe kutandika kuchuma ebyo ndi nabyo mu ka. 62Yezu namugambira ati: Tihaliho akuta omukono gwe ha mukwami gw’igembe mw’ilima, akasuba kwekebuka, asusene obukama bwa Mungu#9, 62 Lora Matayo 8, 22..
Aktuálne označené:
Luka 9: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
