Luka 8
8
OLUGANI LW’OMUBIBI. — EKIHULE. — AMASITANI MU NGURUBE.
1Mbe kandi wenene naraba mu byaro na mu nsozi, nayolekerera namanyisya ebigambo by’obukama bwa Mungu. N’ekumi na babili bali nage, 2n’abakazi bandi abaliga bakizibwe emyoyo mibi na mu ndwara: Maria, akwetwa Madalena, ayarugirwemo amasitani musanzu, 3na Yohana, muka Chusa, omunampara wa Herode, na Susana, n’abandi bengi abaliga nibamuhwera n’ebintu byabo.
4Mbe ebipipi bingi by’abantu ka byasumbire, nibiruga mu byaro kumwizaho, nachwa olugani ati: 5Omubibi akagenda kubiba embibo ye. Nawe aho yaliga nabiba, embibo endi negwa mu muhanda nelibatirwa, enoni z’oluguru nizigilya. 6Endi negwa h’ebale; ka yamezire, neyoma ha kuburw’ amenzi. 7Endi negwa mu mahwa, amahwa nigakulira hamo na yonene, nigagizibira. 8Endi negwa mw’itaka izima, nemera netunga enzuma igana igana. Ka yamazire amagambo ago, nahamuka n’ilaka ihango nagira ati: Ali n’amatwi go kuhulira, ahulire. 9Mbe abahemba be nibamubuza ech’olugani olwo lukusombora. 10Nabasubiramo ati: Imwe muherwe kumanya ebiserekire by’obukama bwa Mungu, nawe abandi bahulirira mu ngani zonka, niho balora batakubona, nibahulira batakumanya. 11Mbe olugani lunu ni luti: Embibo ni kigambo cha Mungu. 12Eya ha muhanda nibo abakuhuliriza, kumara isitani niliza niliha ekigambo mu mutima gwabo, batachunguka bekirize. 13Kandi eya h’ebale nibo abakuhuliriza nibekiriza ekigambo no kusemererwa; nawe emizi zikubura: bakwikiriza naku nke zonka, mu naku zo kurozibwa bakusub’ enuma. 14Kandi eyagwire mu mahwa, nibo abakuhulira, nawe ka bakutaha, nibazibirwa ebitekateko bingi n’obutunga n’amasemererwa go mu nsi, nibabura kuraba. 15Nawe eyagwire mw’itaka izima, nibo abakuhulira ekigambo mu mutima guhikire koto, nibakibika, nibeguminsiriza, nibaraba.
16Tihaliho akwacha olumuli akalufundikira n’ekitwaro, hamo akaluta mu bitalahansi by’ekitabo; nawe akuluta ha mutereko, niho abakutahamo babona omwanga. 17Kuba tihaliho ekiserekire ekitalisokoka; n’ekitamize ekitalimanywa, kai kikasuruka. 18Mbe nimulore okwo mwahulira. Kuba ali n’ekintu, niwe alihabwa; kai atali nacho, ogwo alyakwa n’echo akuba natekateka kuba nacho.
19Mbe nina n’abatabani babo nibamwizaho, nibazibirwa embaga kumuhika hehi. 20Nibamugambira bati: Noko n’abatabani banu bali hanza, bakwenda kukubona. 21Wenene nasubamo nabagambira ati: Mawe n’abatabani betu ni banu, abakuhulira ekigambo cha Mungu nibakihicha#8, 21 Lora Matayo 12, 50..
22Mbe lunaku lumo nahanama mu bwato, wenene n’abahemba be; nabagambira ati: Twambuke, tuze ha lubazu lundi lw’enanza. Nibasyabara. 23Bonene bakibuga, wenene nanagira; ekihure ch’omuyaga nikigwa mu nanza, obwato nibwizur’amenzi, nibayingira. 24Nibamwiriraho, nibamusisimula nibagira bati: Mwolekerezi, twafwa. Wenene ka yemukire, nachahalira omuyaga n’amakonzo, niliba itore, omuyaga nigufwa. 25Mbe nabagambira ati: Kwikiriza kwanu kuli hai? Bonene nibatina, nibakuma nibagambirana bati: Mukuchwa muti: onu ni ga, kuba omuyaga n’enanza akubilagira nibimuhulira?
26Nibabuga kuza mu nsi y’Abagerazi, ekulorera Galilaya. 27Ka basyokire ha charo, omuntu ogwo namwirukirira, ayaliga ali na sitani kuruga naku ningi, atakizwar’empu, atakikara mu ka, nawe ali eyo banagaga abafu. 28Wenene ka yabwene Yezu, namugwa obusyo, nahamuka n’ilaka ihango, nagira ati: Ndi na ki n’ewe, Yezu Mwana wa Mungu asingire? Nkukulembereza otannaranaza. 29Kuba yalagiraga omwoyo gw’obulofu guruge mu muntu ogwo. Kuba kuruga naku ningi lyaliga limwikalirize, baliga bamubohize eminyororo n’amasegi, nawe yachwagulaga ebyaliga bimubohize, nasagarwa isitani mw’iswa. 30Yezu namubuza nagira ati: Izina lyawe niwe ga? Wenene ati: Mbaga; obw’amasitani mengi galiga gamutahiremo. 31Gonene nigamusaba atagasindika kuza mu lina. 32Okwo haliga haliho ekihyo ch’engurube ningi nizilya mw’ibanga; nigamusaba agasindike kutaha muli zonene. Nagasindika. 33Mbe amasitani nigaruga mu muntu ogwo nigataha mu ngurube; ekihyo nikisyetuka kuza mu nanza, nichefuma. 34Abalisyaga ka babwene ebyagwire, niberuka kuza kugamba mu byaro na mu nsozi. 35Nibemuka kuza kulora ebyagwire, nibahika hali Yezu; nibasanga omuntu, owe amasitani garugiremo, aikere mu maguru ge, azwere, agizire obwenge, nibatina. 36Ababwene nibabatengera okwo yakizibwa mu mbaga y’amasitani. 37Embaga yona yo mu charo ch’Abagerazi nemusaba aruge muli bonene, kuba obutini bwingi bukabakwata. Nawe wenene nahanama mu bwato, nasuba. 38Omuntu ogwo ayarugirwemo amasitani namusaba kwikara nage. Nawe Yezu namusindika kutaha, nagira ati: 39Suba mu ka yanu, otenge ebihango ebyo Mungu yakugirira. Nagenda mu charo hona hona, nagamba amagambo mahango ago Yezu yamugirire.
OMUKAZI W’OMUZWO GW’ENSAGAMA. — OMUHARA WA YAIRI.
40Mbe Yezu ka yasubire, embaga nemwanankura; kuba bona baliga bamulindirire. 41Mbe nihezaho omuntu ogwo, izina lye Yairi, wenene ogwo si yaliga ali mukuru w’isomero, nagwa mu maguru ga Yezu, namulembereza atahe mu nzu ye, 42kuba yaliga ali n’omwana w’obuhara nagumo, yahikize myaka ikumi n’ebili, wenene ogwo yaliga ali mu gafwa. Mbe akigenda, embaga nemuhiganisya. 43Omukazi ogwo yaliga ali n’omuzwo gw’ensagama kuruga myaka ikumi n’ebili, ayaliga amazire ebintu bye byona mu bafumu, kai kukizibwa n’omo nangu: 44nairira hehi ha numa, nakwat’ obumalirizo bw’omwenda gwe; aho honka kuzwa kw’ensagama ye nikukoma. 45Yezu nagira ati: Ayankwataho ni ga? Bona ka bayangire, Petro n’abaliga bali nage nibagira bati: Embaga ekukwesyakaho nekuhiganisya, kai iwe oti: Ayankwataho ni ga? 46Yezu nagira ati: Omuntu yankwataho, kuba namanyire ha mani agandugamo. 47Omukazi ogwo ka yabwene okwo atesereka, naiza nachundw’olumazi, nagwa mu maguru ge, narobya mu meso g’abantu bona echo yamukwatire n’okwo yakizibwe aho n’aho. 48Wenene namugira ati: Mwana wetu, kwikiriza kwawe kwakukiza; roko, ochulere.
49Wenene yaliga akifumora, omuntu naiza ha mukuru w’isomero, namugambira ati: Omuhara wawe yafwire; noleke kumunaza. 50Nawe Yezu ka yahulire ekigambo echo, nasubiramo ise omuharakazi ati: Leka kutina; ikiriza chonka, akukira. 51Ka yahikire mu nzu, tiyakunzire omuntu atahemo nage, raba si Petro na Yakobo na Yohana n’ese na nina omuharakazi. 52Bona baliga nibamulirira nibater’empamo. Wenene nagira ati: Nimuleke kulira; omuharakazi tiyafwire, nawe anagire. 53Obwo bamanyaga okw’afwire, nibamusekerera. 54Wenene nakwat’omukono gwe, nahamuka nagira ati: Muharakazi, imuka. 55Omwoyo nigusubamo, aho honka naimuka. Nalagira kumuha echo kulya. 56Abazere be nibakuma, nabazibira kugambira muntu ebyagwire.
Aktuálne označené:
Luka 8: KED1946
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
First published in 1946 by the White Fathers. Published online with the permission of the White Fathers.
