JO:N 15
15
Jisubv Aroru:nc Angur Amv:dc
1“Ngo:na aro angur amv:dc, odokkc ngok Abubv:na angur arvg incdc. 2Ngok a:yc e:ma:nc rcngke: appv:dcm, Bv papagamdag, odokkc a:yc e:nc rcngke: appv:dcm Bv papu:lvgdag, odomvlojen cdc bojcrungko a:yc e:ycpc cmna. 3Nolum ngok lubinam agomkvdv:dokki narcngcimotobong. 4Ngok dungkolo du:mvnnangka, odokkc ngo nolukkolo du:mvnyc. Rcngke:dc avyc kapc a:yc e:sula:ma:nc, angur amv:lo cdc sanggabmvnna du:ma:sisscm, nolusin e:la:mang, ngokkolo nolu du:ma:mvlo. Ngo angur amv:dc, nolu rcngke:kvdv:dc. 5Sc:kobv ngokkolo du:mvnycnc, odokkc ngo bvkkolo du:mvnmvlo, bv:na cdc bojcrungkopc a:yc e:ncdc, kapila:nc ngo:ma:mvlo nolu okkomsin ila:mang.
6“Tani: akonc ngokkolo du:ma:mvlo, bvm rcngke:ko papaknammcmpc papakdag odokkc sanpakdag; odokkc rcngke:kvdv:dcm sokumsudag, vmvlo cra:lvgla rompakdag. 7Nolu ngok dungkolo du:mvnmvlo, odokkc ngok gomung kvdv:dc nolukkolo du:mvnmvlo, nolu okkomci madoji kotoka, odo cdcm noluk lcgangc ibiycpc. 8Odokki ngok Abubv amin gvdag, odomvlo nolu bojcrungko a:yc gcdopc cmna, odokkc ngok agom tadjvgla gvmvnnc tani:yc cmna lcngkancm ibiyc. 9Abudc ngom kapc aipc mc:ton, cdcmv:pc ngo:sin nolum aipc mc:to; ngok aipc mc:namdo du:langka. 10Nolu ngok lulvgnam agomkvdv:dcm mcnggabla tadmvlo, nolu ngok aipc mc:namdo du:tvyc, ngok Abukc lulvgnam agomkvdv:dcm mcnggabla tadkamardcmpc odokkc Bvk aipc mc:namdo du:do. 11Sc agomkvdv:scm ngo nolum lubitu:bong, odomvlo ngok mc:podc noluk lcdulo du:mvndopc cmna, odokkc odomvlo noluk mc:podc:jen pv:dandopc cmna.
12“Sc:na ngok lulvgnam agomcnc, jc nolu akoncm akonc aipc mc:mvnsulangka ngo nolum aipc mcngkamdcmpc. 13Tani:akonc bvk ajondok lcgangc turnamcmci tolvgbinamcmyam, bottcya:pc aipc mc:namc kamang. 14Nolu ngok ajonc ngok lulvgnam kvdv:dcmpc tadla nolu imvlo. 15Lckoda nolum ager gerya:nc cmna lukuma:bong, kapila:nc ager gerya:nc kvdv:dc okkom Buluk ru:tumdc ila du:ji kinmang. Cmpige:la ngo nolum ajonkvdvngc cmna gogtobong, kapila:nc ngo Abukolok tadnam appv:dcm ngo nolum kinabmotobong. 16Nolu ngom balenmangai, cmpige:la ngo nolum balento odokkc agercm gerdopc lugablvgto odomvlo gvla a:yc e:dopc cmna odokkc noluk a:yckvdv:dc du:mvnna du:dopc cmna; odomvloyam nolu ngok aminno Abudcm okodcmci koycnc, Bv cdcmci nolum biycpc cmna. 17Scm ngo, nolu akonc akoncm aipc mc:mvnsudopc cmna lulvgdung.
Rcngamsok Tayumnam
18“Rcngamsc nolum tayumycmvlo, kinna:bongka jc nolum tayumma:dapci cdc ngom tayumpo:to. 19Nolu rcngamsokka:mvlo, rcngamsc avkcdcm aipc mc:ya:pc; cmpige:la nolu rcngam sokkcma:la:yam, cmpige:la rcngamsokkcm ngo nolum balenna:yam, cdcmpila:yam rcngamsc nolum tayumdag. 20Ngok nolum lunam agomkvdv:dcm mcpa:lang, ‘Ager gerya:nc tani:konc bvk ru:tumdcm bottaya:mang.’ Bulu ngommci ipusire:ycm itomvlo, bulu nolum ipusire:ycm iyc; bulu ngok agomcm tadgabla lc:mvlo, nolukkcmsin tadgabyc. 21Ckvdaggom bulu cdc appv:dcm ngok lcgangong iyc, lcga:dc bulu sc:ko ngom mclvgtagji kinmang. 22Ngo gvmangamvlo odokkc bulum lubimangamvlo, bulu pa:bvm ima:ya:pc; cmpige:la su:pak bulukkc buluk pa:pkvdv:dok lcgangc mc:yinsunamc kama:ycbong. 23Sc:kobv ngom tayumdagnc ngok Abubv:sin tayumdag. 24Ngo sc:kosin ima:nam agerko buluk ara:lo gertomvlo, bulu pa:bcm ima:ya:pc; cmpige:la su:pak bulu ka:tobong odokkc ngomna: Abumc anyipagcm tayumto. 25Cdc buluk lujvglurodcm adla lcngkamdcmpc inamdok lcgang, ‘Bulu ngom atv lcgang kama:pc tayumto.’
26“Cmpige:la cdvlo Luyirncdc gviycnc, sc:kom ngo nolukkolo:pc Abukodokkc mclvgycnc, cdc arodok Yalodcmcina, sc:kobv Abudokkc gvlendagnc, Bv ngok agomcm lukanbiycpc; 27odokkc nolusin lukanbinckvdvngc, kapila:nc nolusin ngok lcdulo lena:dokkc du:mvndung.
Aktuálne označené:
JO:N 15: MISIBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
