JO:N 16
16
1“Ngo nolum imursiyarkolokkcm motumpc cmna sc appv:scm lubitobong. 2Bulu nolum kumko okumnokkcm mcnnenlvgyc; ncrkvgpc, ayirdc pvnga:du:bong cdvlo sc:kobv nolum mokeycnc bv Ru:ncpvncmc agerko gerbidung cmna mc:yc. 3Odokkc bulu cdcm iyc lcga:dc bulu Abudcm kintomang, cdcmanggom, ngomsin. 4Ckvdaggom ngo sc agomkvdv:scm nolum lubidung, jc cdvlo buluk ayirc pvnga:ycnc nolu mc:pa:ycpc jc ngo buluk agomcm nolum lubika.
Angunnc Yalodok Agerdc
“Ngo lua:dodokkcbong sc agomkvd:scm lubitomang, kapila:nc ngo noluk lcdulo dungai. 5Cmpige:la su:pak ngo Bvkkolo:pc gvdakku sc:kobv ngom mclvgkkaji; ckvdaggom nolukkolok akosinci ngom tawumang, ‘no okolopc gvdang cmna?’ 6Cmpige:la ngok scmbulum nolum lunamki, noluk asinkvdv:dc mc:dvrc bingkang. 7Cdcmpidaggom imanggom ngo nolum lubidung: Cdc nolukkcpc idag jc ngo gvdagku, kapila:nc ngo gvkumvlo, Luyirncdc nolukkolo:pc gvyc; cmpige:la ngo gvkumvlo, Bvm ngo nolukkolo:pc mclvgbiyc. 8Odokkc cdvlo Bv gvycnc, Bv rcngamscm pa:p agomcm mcjvgmoyc odokkc dormopc du:namcmcmnang kcba:ba:nam agomcm: 9Pa:p agomcm, lcga:dc bulu ngom mc:jvgmang; dormopc du:namcm, 10lcga:dc ngo Abukotopc gvdakku, odokkc nolu ngom lckoda ka:begma:ycbong; 11kcba: ba:nam agomcm, lcga:dc sc rcngamsok migom doncdcm kcbangcm ba:takbong.
12“Ngokkc ckvdaggom nolum bojcrungko lupcnammc dung, cmpige:la nolu cdcmbulum su:pak torvgsula:mang. 13Cdvlo arodok yalodc gvycnc, Bv nolum appvng arodo:pc gvyirboyc; kapila:nc Bv avkc ilang gvlangkokki agomcm luma:yc, cmpige:la oko okkomci tadycji Bv luyc, odokkc Bv nolum a:pcnc atv agomkvdv:dcm lukanna lubiyc. 14Bv ngom amincm gvmoyc, kapila:nc Bv okodc ngokkcnc la:yc odokkc cdcm nolum lukanna lubiyc. 15Abudokkc du:nc appv:dc ngokkc; cdcmpidag ngo luto jc Bv la:yc okodc ngokkcji odokkc nolum lukanna lubiyc.
Mc:dvrclang Mc:ponammc
16“Ayir adjio:kobo:mvlo, odokkc nolu ngom ka:begkuma:ycbong; lckoda adjio:koda, odokkc nolu ngom ka:begyc.” 17Bvk ake agom tadjvgla gvmvnnckvdv:dc akoncm akonc luka:mvnsuto, “Bv:jc ngolum lutonc, cdc okkon, ‘Ayirc adjio:ko, odokkci nolu ngom ka:begma:yc; odokkc lckoda ayir adjio:ko, odokkc odokkci nolu ngom ka:begyc;’ odokkc, kapila:nc ngo Abudo:pc gvdagkku?” 18Bulu luto, “Okkomna Bv ludang ‘adjioko cmnamdcm?’ Bv okkom ludu:song nolu kinmang.”
19Jisubv kindagai jc bulu Bvm tawupc cmna mc:dagai; cdcmpila Bv bulum lubito, “Ngo okkomna lutoji, cdcmyc nolu av avkvdv:dc tawuka:mvnsudu:n, ‘Ayir adjio:koda, odokkc nolu ngom ka:begma:yc, odokkc lckoda ayir adjio:koda, odokkc nolu ngom ka:begycku?’ 20Aroru:pc, aroru:pc, ngo nolum lubidung, nolu kabyc odokkc v:tombangki:la kabyc, cmpige:la rcngamsc mc:poyc; nolu mc:dvryc, ckvdaggom noluk mc:dvrc mc:popc iycku. 21Cdvlo nc:ng akonc kowcm pa:pc cmna idonc odo mc:dvrdag, lcga:dc bvk ayirdc pvnga:dag; cmpige:la bv cdvlo ko:dcm pa:dagnc, bv cdvlosin menna:ma:nam kinamdcm mc:pangkumang, kapila:nc rcngamso kowaoko pa:namdok mc:poki. 22Cdcmpila nolukkc su:pak mc:dvrc dung, cmpige:la ngo nolum lckoda ka:begycku odokkc noluk asinkvdv:dc mc:poyc, odokkc sc:kosin nolukkolokkcm mc:podcm la:pakma:yc.
23“Odo longckvdv:do nolu okkomsin ngokkolokkcm ma:ma:yc. Aroru:pc, aroru:pc ngo nolum lubidung, nolu atvko Abudokkcm mamvlo, Bv cdcm ngok aminno biyc nolum. 24Su:paklo:pc nolu okkomsin ngok aminno koma:da; kotoka, odokkc nolu pa:ycpc, odomvlo noluk mc:podc pv:ycpc.
Rcngamscm Mopvnam
25“Ngo scmbulum nolum kvyv:sula kvnam agomki lubitobong; cdvlo ngo lckoda nolum kvnam agomki nolum lukuma:ycbo:nc ayirdc pvnga:du:bong cmpige:la Abudok agomcm tadkindandopc luscgpc lubiyc nolum. 26Odo longcdo nolu ngok aminno koyc; odokkc ngo luma:yc jc ngo Abudcm noluk lcgangc kumyc; 27kapila:nc avdci nolum aipc mc:dag, lcga:dc nolu ngom aipc mc:to odokkc ngo Abukotokkc gvdung cmna mc:jvgto. 28Ngo Abukotokkc gvdung odokkc rcngamso:pc gvdung; lckoda, ngo rcngamscm mcpakdu:bong odokkc Abukoto:pc gvdagkkubong.”
29Bvk agom tadjvgla gvmvnnc tani:kvdv:dc luto, “Oh, su:pakna no tadkindandopc agomdcm ludu:nc, kvkanna kvma:pc! 30Su:pak ngolu kindagjc no appvngcm kindag, odokkc sc:kosin nom tawunam agomko tadpcnam kama:bong; odokki ngolu mc:jvgdagjc no Ru:ncpvnckotokkc gvka.” 31Jisubv bulum lubito, “su:pak nolu mc:jvgdagyc? 32Ayirdc pvnga:du:bong, aropakpc cdc pvnga:du:bong, cdvlo nolum mcnpitmcnyitycnc, appvng taniycm bvkkc okumno; odokkc ngom atcrongcm mcpakyc; ckvdaggom ngo atcro:ma:yc, kapila:nc Abudc ngok lcdulo dung. 33Ngo scm nolum lubitu:bong, ngokkolo mc:pomcnganc nolukkcjen du:ycpc. Rcngamso nolukkc kvnggv:pc mc:dvrc dung; ckvdaggom aipc mc:potoka, ngo rcngamscm mopvto.”
Aktuálne označené:
JO:N 16: MISIBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Mising New Testament - ANU LUGOD
Copyright © 2001 by The Bible Society of India
Used by permission. All rights reserved worldwide.
