Matthew Lefi 19
19
DOSBARTH X.
Ceiseb y Goludog.
1-2Pan orphenasai Iesu yr ymadrawdd hwn, efe á adawodd Alilea, ac á ddaeth i gyffiniau Iuwdea, àr yr Iorddonen, a thyrfëydd mawrion á’i dylynasant ef yno, ac efe á iachâodd eu cleifion hwynt.
3-12Yna rhyw Phariseaid á ddaethant ato, a chán ei brofi, á ofynasant, A all dyn yn gyfreithlawn, am bob ffugesgus, ysgaru ei wraig? Yntau á atebodd, Oni ddarllenasoch, ddarfod, yn y dechreuad, pan wnaeth y Crëawdwr ddyn, iddo lunio gwryw a benyw, a dywedyd, “O herwydd hyn y gedy dyn dad a mam, ac y glŷn wrth ei wraig, a hwy fyddant ill dau yn un cnawd.” Oblegid hyny, nid ydynt mwy yn ddau ond yn un cnawd. Yr hyn, gàn hyny, á gyssylltodd Duw, na wahaned dyn. Hwythau á atebasant, Paham ynte y gorchymynodd Moses roddi llythyr ysgar iddi, a’i gollwng ymaith? Yntau á atebodd, Moses, yn wir, oblegid eich tuedd anhydrin, á oddefodd i chwi ysgaru eich gwragedd; ond, o’r dechreuad, nid felly yr oedd. Am hyny, yr wyf yn dywedyd i chwi, bod pwybynag á ysgaro ei wraig, ond o achos puteindra, ac á briodo un arall, yn gwneuthur godineb; a phwybynag á briodo yr ysgaredig, y mae efe yn godinebu. Ei ddysgyblion á ddywedasant wrtho, Os dyna yw sefyllfa y gwr, gwell yw byw heb briodi. Yntau á atebodd, Hwynthwy yn unig á allant fyw fel hyn, i’r rhai y rhoddwyd y gallu. Oblegid y mae rhai yn ddysbeiddiaid o’u genedigaeth; ereill á wnaethwyd gàn ddynion yn ddysbeiddiaid; ac ereill, èr mwyn teyrnas y nefoedd, á wnaethant eu hunain yn ddysbeiddiaid. Y sawl à allo wneuthur hyn, gwnaed.
13-15Yna y cyflwynwyd plant iddo, fel y gosodai ei ddwylaw arnynt, a gweddio; ond y dysgyblion á’u ceryddasant hwynt. Iesu á ddywedodd, Gadewch i’r plant, a na rwystrwch iddynt ddyfod ataf fi; canys eiddo y cyfryw rai yw teyrnas y nefoedd. A gwedi dodi ei ddwylaw arnynt, efe á ymadawodd oddyno.
16-22Gwedi hyny, un gàn ddynesu, á ddywedodd wrtho, Athraw da, pa dda sy raid i mi wneuthur i gael bywyd tragwyddol? Yntau á atebodd, Paham y gelwi fi yn dda? Duw yn unig sy dda. Os mỳni fyned i fewn i’r bywyd hwnw, cadw y gorchymynion. Dywedodd yntau wrtho, Pa rai? Iesu á atebodd, “Na lofruddia. Na odineba. Na ladrata. Na chamdystiolaetha. Anrhydedda dad a mam; a char dy gymydog fel ti dy hun.” Y gwr ieuanc á atebodd, Mi á gedwais y rhai hyn oll o’m hieuenctid. Yn mha beth yr wyf eto yn ddiffygiol? Iesu á atebodd, Os mỳni fod yn berffaith, dos gwerth dy feddiannau, a dyro y gwerth i’r tylodion, a thi á gai drysor yn y nef; yna dyred a chanlyn fi. Y gwr ieuanc, wedi clywed hyn, á aeth ymaith yn athrist, oblegid yr oedd ganddo feddiannau lawer.
23-25Yna Iesu á ddywedodd wrth ei ddysgyblion, Yn wir, meddaf i chwi, peth anhawdd yw i oludog fyned i fewn i deyrnas y nefoedd: dywedaf, yn mhellach, haws yw i gammarch fyned drwy grai nydwydd, nag i oludog fyned i fewn i deyrnas Duw. Y dysgyblion, y rhai á glywsent hyn gyda syndod, á ddywedasant, Pwy, gàn hyny, a ddichon fod yn gadwedig? Iesu, gwedi edrych arnynt, á atebodd, Gyda dynion annichon yw hyn, ond gyda Duw pob peth sy ddichonadwy.
26-30Yna Pedr gàn ateb, á ddywedodd, Am danom ni, nyni á adawsom bob peth, ac á’th ganlynasom di; beth gàn hyny fydd ein gobr? Iesu a atebodd, Yn wir, meddaf i chwi, yn yr Adnewyddiad, pàn seddir Mab y Dyn àr ei orsedd ogoneddfawr, cewch chwi, fy nghanlynwyr, eistedd àr ddeg a dwy orsedd, yn barnu deg a dau lwyth Israel. A phwybynag á adawo dai, neu frodyr, neu chwiorydd, neu dad, neu fam, neu wraig, neu blant, neu diroedd, o’m hachos, i, á dderbyn gànn cymaint, a bywyd tragwyddol á etifedda efe. Ond llawer o’r rhai olaf fyddant yn flaenaf, ac o’r rhai blaenaf yn olaf.
දැනට තෝරාගෙන ඇත:
Matthew Lefi 19: CJW
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
Yr Oraclau Bywiol gan John Williams 1842. Cafodd y testun ei ddigideiddio gan Gymdeithas y Beibl yn 2021.