Marko 16
16
Yesu viyazukile Pasaka
1Siku ya ukuhumula viimalile, baho Maria Magdalena na Maria mamo wa Yakobo, na Salome wagula mavuta ganogile, giladi waubake mtufi wa Yesu. 2Siku ilongole ya juma imitondo nghani waidamuka, wachola kuna dikabuli, zuwa hadinasomoza. 3Walonga wawo kwa wawo, “Yalihi yonda yadibimbilise dija idibwe kulawa hali umulango wa idikabuli?” 4Vuwalolile wajona dibwe dimala kubimbiliswa; najo dikala kulu nghani. 5Vuwengile muna dikabuli, wamona mmhale yakalile haukulume, yavalile nguwo nzelu; wengilwa na kidumbo. 6Na heyo kawalongela, “Sukumdumbe; momzahila Yesu wa Nazareti yawambigwe mdibiki; kazuswa, kamduhu muno; haloleni ihanhu hayatambalikwe! 7Komu gendeni mkawalongele wanahina wake na Petro, kamba kowalongolela mweye kuchola Galilea; ako kuko konda mmone, kamba viyawalongele.” 8Wahalawa hali dikabuli wakimbila, kilumbo wagogigwa na kingwaya na mkanganyo; kileka hawamulongele munhu mbuli, kilumbo wadumba.
Yesu kawalawilila wanahina
9Yesu viyamalile kuzuka imitondo nghani, siku ilongole ya ijuma, kasonga kumulawila Maria Magdalena yuja iya-mulavile mizuka saba. 10Heyo kachola kawasimulila waja wayagwe wakalile hamonga na heyo, na hewo waiyalala nghani walila. 11Komu vuwahulike kamba Yesu mpile na kamba Maria kamona, hawatogole.
12Imalabaho kawalawilila wayawo wabili wotembela kuchola kumgunda, kuno yagaluke lukuli. 13Na hewo wachola kuwasimulila wayawo wayagwe, komu na hewo hawawatogole.
14Ikimambukizo kawalawila waja umulongo umwe na imwe, vuwakalile mngʼanda woja, kawakomhokela kilumbo walemelwa kumtamanila, na kwa mzoko wa ugaga wa miyoyo yawo, vuwalekile kuwatogola waja wamonile kamba heyo kazuka. 15Kawalagiza yolonga, “Gendeni muisi zose za ulumwengu, muwabwililisile wose waumbigwe Usenga Unogile! 16Mwene kumtamanila Mulungu yahabatizwa, kohona; komu yolema kumtamanila kwiza kotaguswa. 17Na hewo womtamanila, vilolomboto vonda viwawinze ivo vino, Mditwaga jangu woiwinga mizuka, wolonga ulonzi wa isambi. 18Wahagoga nyoka hebu kungʼwa uhawi, honda uwakome ngʼo; wahawagelekela watamu makono, baho wohona.”
Yesu kakwela kuulanga
19Mndewa Yesu viyamalile kulonga nawo, kasoligwa uchana, kawela kuulanga, kakala ukulume kwa Mulungu. 20Imala waja walawa, wapeta Usenga Unogile hanhu hose, na heyo Mndewa kasanghana hamonga na hewo, kadigela Longa jake mhiko za vilolomboto ziiduganye na dija Dilonga.
දැනට තෝරාගෙන ඇත:
Marko 16: ZAM75
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
New Testament in Zaramo © United Bible Societies, 1975.