Luka 1
1
Luka viyomulamusa Teofilo
1Kwa kilamso wanhu bwando walongola kwandika kwa ugaluga mbuli zija zitendeke kumwetu, 2vilema hizo zitwinghigwe na waja wakalile wazilola na meso gawo, kileka wagalamke wasanghani wa Longa didi; 3kileka na niye diningila mmoyo, gwe Teofilo wa nhogolwa, nikupetele goya zose zinghalile nizizahila zigambile kulawa ikilongozi, 4giladi gweye umanye magambo ga mbuli zino zuufundigwe.
Zakaria na Elisabeti walagusilwa mwana
5Aiho milongo ya Herode Mndewa wa Uyuda kukala na mtambika imonga, tagwa jake Zekaria, kakala yokwaliza ibiya ya Abiya, na sano jake kalawa lukolo lwa Aroni, tagwa jake Elisabeti. 6Hewo wose wabili wakala na nhogolwa kwa Mulungu, wokoleleza muna zindagizo zose za Mulungu na kuzitogola sikuwabezwe. 7Na hewo wakala bule mwana, kilumbo Elisabeti kakala fulwe, na hewo wose wabili wavyele nghani vuwakalile.
8Basi viyakalile yosanghana kwa ugaluga wa ibiya yake kukihanga cha Mulungu, 9dimgwila siku ja ukwingila heyo mdingʼanda da Mulungu na kuvukiza uvumba kwa luto lwa kutambika. 10Na didale da wanhu wakala wopula kunze kidami kija cha ukuvukiza. 11Kalawililwa na malaika wa Mulungu, kema lwenza lwa ukulume lwa hanhu ha ukuvukizila. 12Kagudema Zekaria viyamuwene, woga dimwingila. 13Malaika kamulongela, “Sikuudumbe, Zekaria, kilumbo kupula kwako kuhulikwa, sano jako Elisabeti kokulelela mwana, na tagwa komkema Yohana. 14Na gweye kodengha na samhuko kilumbo chake, na bwando wonda wadenghelele kwa kuleligwa kwake. 15Heyo kokuwa mkulu haulongozi wa Bwana, kabili honda yangʼwe ugimbi ao ngholwa, komu komemezwa Loho Yangalile yahali muiinda ya mamo wake. 16Na bwando mumo mwa Wana Israeli kowabweza kwa Mulungu wao. 17Kolongola kumwake, yali na loho na mhiko za Eliya, kwidohola imioyo ya tata kwa iwana, kuwengha walemile fiyuko za watogolwa na kumwikila Mndewa lukolo lutendigwe goya.”
18Zekaria kamulongela malaika, “Nozitangaze hizo, kilumbo niye mvyele, na sano jangu kivyele muna imilongo yake?” 19Kedika malaika kamulongela, “Nene Gaburieli, nimaga hamwake Mulungu, na niye nhumigwa kulonga nagwe na kukupetela mbuli zino zinogile. 20Na gweye tegeleza hudaha kulonga konyamala mbaka disiku jonda gawe gano, kilumbo hutogole malonga gangu, gago gonda gavikizwe kikomo chake.”
21Na didale dikala dimbeta Zekaria na kukanganya vyokawa mdihekalu. 22Aluja luyalawile kalemelwa kulonga mbuli, aho wamtambula kamba kalawililwa na nhuko mdihekalu. Yomana kuwahungila mkono kilumbo kagalamka bubuwi.
23Imala viyamalile mazuwa ga sanghana yake, kachola ukaye kumwake. 24Avo hazibitile siku bwando sano jake Elisabeti kasola inda, kefisa miyezi mitano yolonga, 25“Avo Bwana viyanhendele milongo iija viyandolese giladi yakisegeze kinyala changu kwa iwanhu.”
Malaika Gabrieli kandawilila Maria
26Mwezi wa inhandatu Malaika Gaburieli katumigwa na Mulungu yagende kukiwambo cha Galilea, tagwa jake Nazareti; 27kwa mwanamwali yakalile yasoligwe na mbigalo tagwa jake Yosefu, yali wa lukolo lwa Daudi, na mwali ija kakemigwa Maria. 28Ija malaika kengila mngʼanda yake kalonga, “Hongelaga Ugwelelwe imhome, Mulungu ka hamonga nagwe!”
29Na heyo kasinhuka nghani kwa malonga gake, kagelegeza, Lamuso gani dino? 30Malaika kamulongela, “Sikuu-dumbe Maria, gweye kumota hakihanga cha Mulungu. 31Lola kosola inda, kolela mwana mbigalo, komkema tagwa jake Yesu. 32Ino kokuwa mkulu, kokemigwa Mwanage Yali Uchana nghani, na Mndewa Mulungu komwingha kigoda cha undewa cha tata wake Daudi; 33yaidawale ngʼanda ya Yakobo digunge na digunge, na mdawalo wake honda uzige.”
34Maria kamulongela malaika, “Dokuwaze buli dino, na niye simtangile mbigalo?” 35Malaika kedika kamulongela, “Loho Yangʼalile kokwizila, na Mhiko zake Yali Uchana nghani zokugela kimvuli, kilumbo hicho yuja yonda yaleligwe nagwe kokemigwa Mwana wa Mulungu. 36Tegeleza avo Elisabeti mbwiga wako na heyo kana inda ya mwana mbigano muvyele wake, na mwezi uno wa inhandatu heyo yakemigwe fulwe. 37Chanduso haduhu mbuli ilekile kudahika kwa Mulungu.”
38Maria kalonga, “Lola niye hano, niye na mtumwa wa Bwana, gamhate higo kamba vuutangile.” Ilawa baho ija malaika kahalawa.
Maria kamkagula Elisabeti mvigongo vya Uyuda
39Baho mazuwa gaja Maria kagenda chambwisa kuvigongo kukiwambo kimonga cha Uyuda. 40Kengila mngʼanda ya Zakaria, kamulamusa Elisabeti. 41Avija viyahulike Elisabeti kilamuso cha Maria, kazumha imwana ikinghele munda mmwake, kamemezwa Loho Ingʼalile Elisabeti. 42Kalava dizi na mhiko yolonga, “Kunogelwa gweye mulukolo lwa iwatwanzi, nawo unogelwa uleligwa wa inda yako! 43Kabili dilawa kwahi nzonza dino dimhatile, mamo wa Mndewa wangu yanizile niye? 44Lola vidiningile mgutwi dizwi ja kundamusa kwako, kazumha mwana kinghele munda mmwangu kwa kudengha. 45Kumota gweye utogole kamba govikizwa higo gaulongelwe na Bwana!”
Lwila lwa denghelelo lwa Maria
46Maria katanga,
“moyo wangu womtogola bwana,
47Na loho yangu yomdenghelela Mulungu Muhonya wangu.
48Kilumbo kaulolesa goya udodo wa kitumwa chake;
lulawile dilelo ngholo zose wonhambula nimota.
49Kilumbo Heyo Yali imgaga kanhendela makulu, na tagwa jake dingʼala.
50Na bazi jake dikala mumo lukolo na lukolo kumwao womdumba.
51Katenda mihiko na mkono wake,
kawapwililisa wali na ichodo muna gamagelegeza ga mioyo yao.
52Kagedebula iwakulu muna ivigoda vyao,
kawatuniza iwadodo.
53Wali na inzala kawegusa vinhu vinogile;
wali na gamali kawasegeza mikono ili bule.
54Kamtaza Isiraeli mtumigwa wake, yakumbukile unogelwa.
55Kamba viyawalongele tatazetu,
Aburahamu na ulelwa wake milongo yose.”
56Maria kakala kumwake kamba miyezi midatu, kabwela kungʼanda yake.
Yohana mlaguzi viyaleligwe
57Elisabeti kavikiza milongo ya kulela, kalela mwana mbigano. 58Wahulika iwambwiga na wayage vuwakalaga, Miyenu kamemezelwa unozi wa Bwana; wadenghelela hamonga na heyo.
59Vidivikile siku denane, weza kumwingiza kumbi imwana, walonda kumkema tagwa ja tata wake Zakaria. 60Kedika mamo wake kalonga, “Si vivo, komu kokemigwa Yohana.” 61Wamulongela, “Kuduhu munhu mulukolo lwako yokemigwa tagwa hijo!” 62Wamgendela tataake kumuuza, Kolonda yakemigwe nani? 63Kalonda kibao kandika, “Yohana dijo tagwa jake.” Wakanganya wose. 64Mhunde kadoholelwa mulomo na lulimi lwake, yolonga na kumtogola Mulungu. 65Woga diwengila wose wakalile behibehi na hewo; gabwililika malonga gano bwilili mmigongo mose ya Uyuda. 66Wose wagahulike wageka mmioyo mmwao walonga, “Mwana ino kogamba mwana waki?” Kilumbo mkono wa Mulungu wahamonga na heyo.
Lwila lwa ndagu lwa Zakaria
67Imala baho tataake Zakaria kamemezwa Loho Ingʼalile, kalonga kindagu:
68“Yatunizwe Bwana, Mulungu wa Israeli,
kwa kilamso kawalolesa na kuwatendela kihonyezi lukolo lwake.
69Katusimikila mhembe ya honelo mngʼanda
ya Daudi mtumigwa wake.
70Kamba viyalongile aho ichanduso
kwa milomo ya Walaguzi wake wangʼalile:
71Giladi tudoholwe mmikono ya wandumu zetu
na muna wose watwihile.
72Vilema yawonele bazi tatazetu na kukumbukila lagano jake dingʼalile;
73kiduwilo kiyamduwilile Aburahamu tata wetu;
74Kamba kotwingha tweye tuhehulwa mmikono yawo watwihile,
75Tumsanghanile haduhu kingwaya,
muna ukungʼala na mwikweli hakihanga chake siku zetu zose.
76Na gweye gomwana kokemigwa Mlaguzi wake Yali Uchana nghani,
ulongole kulongozi wa Bwana kuzitenda nzila zake.
77Avo kowatambulila wanhu wake uhonelo kwa kusegezelwa matozo gawo.
78Kilumbo cha dibazi diyatwonele Mulungu wetu, uzelu ulawa uchana utuvikila.
79Vivo uwamulikila wokala mdiziza na muna kimvuli cha kudanganika,
na kuilongoza migulu yetu muna inzila iholile.”
80Ija imwana kakula, kongezeka mihiko mwiloho, kakala kuluwala mbaka aho honda yalawilile Waisraeli.
දැනට තෝරාගෙන ඇත:
Luka 1: ZAM75
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
New Testament in Zaramo © United Bible Societies, 1975.