Ta je huliwa 13
13
1E HU ke je perofeta me hnyat ûne hnyi ekalesia Anetioka, wale Banaba, me Simeona ke ien minya Nigeru, me Lukio at Kurene, me Manaen a tha hat me Heroda than, me Saulo. 2Ke ödrin e huliwa ka Than, ke ânyâ ca han, me ame ha Hanu Kap, ka habe, Ovesei Saulo thö me Banaba könya hobi kâu huliwa oge me hawʼ ödru kâu. 3Ke adre hia but ânyâ ca han me hic, me ip je hnyamödrin hudru, me ödrin e kunʼ ödru but.
4A hia but kunʼ ödru hnen Hanu Kap, me ödru me he Selukia ai; me tabâ hu ûhedru e Kupero ai. 5Ke ödru but hnyi Salamis, me ödru me omanenâ hofuc hwan Khong hnyi ta je sunago umen at Juda: ke haba Ioane ame bi atödru. 6Ke ödrin e hia but vheno bomene hia ke ne o but Pafo, me ödrin e wâ ke at bihihwakecin, a perofeta thoi, Bar-Iesu ien, at Juda; 7kʼ ame tha e me konesula a Segio Paulo at ae metâ. Ke e ame hawo Banaba me Saulo, ame weny he ka long hofuc hwan Khong. 8Ke haba Eluma (adre me wia ien helâe) at bihihwakecin ame ivinö mödru, kʼ ame heleû deny he ka wia konesula ûnyi hnyi labageju. 9Ke haba Saulo (wale Paulo) a unöngötö ge Hanu Kap, e ame wâ hmâ e, 10me ha, ka habe, At ae unöngötö ge je thoi hia, me monu, u nokon diabolo, ke iwahnaihmiony me hwakecin hia ae wisa, hawa, u me ca menâ he ka ohwalö je hwakecin hia ae wisa anyin Than? 11Ke wâ bi, walang ang e but hom hnyamen Than, me u me he ka wadröu, kʼ u me ca he hmetu ka wâ seûno ke ne o but hnyi ke ûen. Me ame ie o but kâu hadedak helâ me lit; me e ame he monumonu kʼ ame khaûtetâ at he ka lelo e. 12Ke a wâ but konesula hna mâdrâ, me e ame labageju, ame lâiâ hna ûne ûnyi ge Than.
13Ke haba Paulo me anyin bunyen ödrin e tabâ hu ûhedrin Pafo, me ödrin e khop dö Perega hnyi Pamafulia: ke haba Ioane ame hnʼ ödru but me hmetu Jerusalema ai. 14Ke ödre hia but he ûhedru Peraga, me ödru me o but hnyi Pisidia; me ödru me didro ka hnyi sunago hnyi bong sabath, me laba ju. 15Ke adre hia but aû hnanyibu me je perofeta haba je taben sunago ödrin e ûkhûnöng ködru he ka ha, ka habe, Liamekeiny many lö, a ne hu hofuc hnân sihwege gabu hobi kâu tavat, ha thʼ öbu. 16Haba Paulo ame todrö me hinôbeny, me ha, ka habe,
At Isaraela lö, me öbun tavat öbun e outen Khong, long ju. 17Haba Khongon hnyei ang Isaraela, ame ûca lakamöta, me ogöranyâ tavat waleji kʼ adre me tiga laba kanyua hnyi hnyei Aigupito, ke e ame hum ödra ûheny e ge hnyamen ae hwege. 18Ke helâ me fâte je huna e ame hokhnyokâ hwakecidra hnyi hnyebuba. 19Ke a hia but ohia je hnyei a seven hnyi hnyei Kanana, e ame khene idra mʼ adre me labâ helâke foa haded me fifte je huna: 20ke hwaban e, e ame ham tavat owisa kodra ke ne o but hnyi ûö Samuela perofeta. 21Ke hwaban e, adre me sumâtâ than: me baba Khong ame ham kodra Saulo a nöku Kiso, aten tribu Beniamina hnyi je huna a fâte. 22Ke a hia but hom e, e ame otilö Davita me me tuhödra; ke e ame ohnathoâ e, ka habe, Oge ō Davita nöku Jese, at a helâ me hnyekuk, at ame he ka ânyâ hia wek. 23Ke haba Khong ame hia but oâ ka at Isaraela ûnyi hnyi je mâtrâniny at eling At ûhomeli, a Iseu, helâ me hna ha bânâ gan; 24ke a bân Ioane ka khetâ bapataisoiny ietra ka at Isaraela hia, ke e tiga ca o bi. 25Ke ame tiga ohwâdâ hanymen hnö Ioane, me e ame ha, ka habe, leû ûnykûmenöbun gak? Ca inya bi. Ke wâ bi, ame he jem ke at hotuk, e ca ûcû bi nya he ka thang ut taben li hnyeûcan. 26Hnyat me lakeiny lö, je lakon je mâtrâni Aberahama, me tavat adre me outen Khong unyibun, adre kunâ köta hofucin ûhomeli ang. 27Anyin a tavat adre me laba hnyi Jerusalema, me ta je taben, adre me ca wâhmakhmeto e me hofuc hwan je perofeta adre me labö aû hnyi je sabath, me adre me ohwâdâ bi hofuc e hnyi hnödra hna ohnaûhangoâ e. 28Eja ke ne ba can mok adre me wâ gan, adre me sumatö Pilato he ka hlingâ e. 29Ke adre hia but ohwâdâ hia hna sihnalimen gan, me adre me hom but e unyi hnyi ûö, me ip hnyi erkemok. 30Ke haba Khong ame omelö hmetu thö e ûheny hnyi hna mok: 31ke haba hnyat waleji ödrin e tha he mē ûhedrin Galilaia Jerusalema ai ödrin e wâ e hnyi je bong ae se, wale hnyat ödrin e ohnathoâ e walang ang ka tavat. 32Ke ohmu me khetâ köbun uthumetu ae so, a haba hna ha bânâ ka lakamöta, 33me a hia but ohwâdâ hnen. Khong ka lakuta hnyi hnen hna omeli Iesu hmetu thö; helâ me hna sihnalimen hnyi salamo a loiny, ka habe, U thibi Nokuk, oge me hnöku u hnyi bong ang. 34Ke e ame omelö hmetu thö e ûheny hnyi hna mok, kʼ ame ca he hmetu bi ka wâ hna bobot, me walang hnen hna ha ehac, ka habe, Oge me he ka ham köbun ta je ûnyi ae kap ke ûnyi hnathu anyi Davita. 35Anyin a e ame ha hmetu hnyi ke salamo, ka habe, U me ca he ka hna Atâm ae Kap he ka wâ hna bobot. 36Haba Davita ame ânyâ weny Khong hnyi anyin dö, me ame mokut bi, kʼ adre me ip e unyin lakamen, ke ame wâ hna bobot: 37ke ame ca hnyi wâ hna bobot hnen at wale Khong ame omelö. 38Anyin a wale, hnyat me lakeiny lö, e so öbun e wâ ûnykûme a gʼ adre me khetâ köbun degecâ hulo deny at ang: 39ke kaba hnyat adre me labageju, me adre hai wisʼ ödra hnyi ta je ûnyi hia, wale ae ca khana hnanyibu anyi Mose he ka hai wisʼ öbun hnyin. 40Anyin a wale, o ʼbun âu, wâ e nye o but köbun hna ha hnen ta je perofeta, ka habe,
41Öbun tavat öbun e hmiâ, wâ ju, me lâiâ, me laba iyong bi;
Anyin a oge me ânyâ huliwa hnyi bongubun je bong,
Wale huliwa, ame ne he ke at ka omanenâ e köbun, me öbun e ca he ka kap.
42Ke ödrin e didrut, me ödrin e sumâtâ e he ka khetâ hofuc hmetu kodra hnyi sabath ame he ka o. 43Ke ame vese but ûkhacaköu, me ame he hotu Paulo me Banaba tavat Juda ae se hia, me hnyat outen Khong adre me kap ka hnyi hmi Juda: me ödru me ha me ûne kodra he ka tethmâ hnyi betenge baû anyin Khong.
44Ke ame o sabath me ame ok minya but helâke taun hia he ka long hofuc hwan Khong. 45Haba at Juda adre me wâ tavat ae se hia, me adre me gan hmâ hmonyin, me ivinoâ ta je ûnyi ame ha Paulo, kʼ adre me fuc bi gan. 46Me ame hwege thö Paulo me Banaba he ka ha, ka habe, E ûcû he ka bân ka omanenâ köbun hofuc hwan Khong. Ke can bi anyin a öbun e hna degecâ me oûnyibâûâ hobi köbun bi möt ame ca ba balua; waleling me ohmu me hwio ka Aten ta je hnyei. 47Anyin a haba Than ame hûna kohmun, ka habe,
Oge me otilö u, me hnân melaminy Aten ta je hnyei,
Me u me he ka tot hnân ûhomeli ke ne o but hnyi can hmeledrany.
48Ame long e hnen Aten ta je hnyei, me adre me senyin me ogânâ hofuc hwan Khong: me ame labageju hnen tavat hia adre me hawâ ka hnyi möt ame ca ba balua. 49Ke ame khulelau hofuc hwan Than hnyi hnyei hia. 50Ke haba at Juda adre me cubec omomo ae nua a hnyat outen Khong, ke hnyat ae hnathu hnyi taun he ka oveci Paulo me Banaba, me obʼ ödru ûnyi hnyi je hnyigöulödra. 51Me Ödru me jijingâ kodra kânâiny li hnyeûcadra, me he but Ikonio ai. 52Ke a unöngötö laten ge senyin me Hanu Kap.
දැනට තෝරාගෙන ඇත:
Ta je huliwa 13: IAAI
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
maintained by the British and Foreign Bible Society