Ta je huliwa 14
14
1KE ödru e Ikonio, me ödru me tha didro ka hnyi sunago anyin at Juda, me ha hofuc, me se hia at Juda me Heleni adre me labageju. 2Ke haba hnyat Juda a tavat adre me ca ûling, adre me cubec me ohmönyinâ hnyekon aten ta je hnyei ka je liamekeiny. 3Anyin a wale e beû hmâ hnödru hna laba eling me ha hwegiâ ge Than, ke e ame ohnathoâ hofucin anyin ibetengiö, kʼ ame hna kodra he ka ânyâ je haten me ûöman ge je hnyamödru. 4Ke ame khekhe lo but tavat ae se hia hnyi taun; ame tha hien keihen me at Juda, kʼ ame tha hien me je aposetolo keihen. 5Ke ame utut Aten je hneyi me at Juda, tha ödra me anyidra je taben, he ka okongu ödru, me lûʼ ödru ge veto, 6me e khanʼ ödru but, me kec ut ka hnyi li taun Lukaonia, wale Lusetera, me Derebe, me je ke keihen igigilo: 7ke ödru me khetâ eling ûthumetu ae so. 8Wale ke at ame laba hnyi Lusetera ae mat li can, ae hwali ûnyi hnyi hnyekon hinyen, ke ame ca munyi he bala. 9E ame ling Paulo ame fuc: me e ame wâ hmâ e, me wâhmakhmeto ae unyin labageju hnân osoâ, 10me ame ha hwegiâ, ka habe, Tot wisa thö ge li cam. Me e ame ututut me he. 11Ke a wâ but tavat ae se hia hna ânyâ hnö Paulo, me adre me ogöranyâ ifucidra hnyi hwen Lukaonia, ka habe, Ame utut köta je khong helâ me je at. 12Ke adre me hwenyi iö Banaba, me Zeus, ke haba Paulo, me Heremes, anyin a e at ame hnyimen ûhnenamö. 13Ke haba at bihut kö Zeus, a cicö taun, e ame hom but ka hnyi homagouleny je bolok, me je vongon ûö adre hwâwâ, ame tha weny me tavat he ka hudo. 14A long ut li aposetolo wale Banaba me Paulo, me ödru me kia but anyidru li ûkhaû, me wadring ka hnyi wanben tavat ae se hia, me fuc hwege, 15ka habe, je than lö, ieû gabun öbun e ânyâ je ûnyi e? Ohmu li at ang helâ me öbun, öhme hom köbun ûthumetu ae so, mʼ öbun e he ka hna degecâ ta je ûnyi e ae ûuyi baû, me hwio ka Khong ae möt, at a op drany me hmeledrany me köiö, me ta je ûnyi hia hnyin: 16at ame hna ta je hnyei hia ehac he ka vheno dedra ta je gethen. 17Ke e bala bi anyin hna ohnatho, anyin a e ame mâdrâ so, wale ame ham köbun we ûnyi hnyi drany, me je ûen ae widrany, me osekunâ je hnyekubun ge jeû me senyin. 18Ke ödru me ha hofuc e, ke gan hmâ anyidru huliwa he ka thawâ tavat mʼ adre me ca bihut ködru.
19Ke ame o but kâe, at Juda ûhedra Anetioka me Ikonio, me hinö fuc ka tavat, me adre me luö Paulo ge veto, me adre me lelo thö e ka hnyi hoton taun, adre me ûnykûme ma mokcu. 20Ke haba laten ödrin e tiga tot igigilo e, me e ame todrö, me he ka hnyi taun: ke nyi e ame tha he me Banaba Derebe ai. 21Ke ödre hia but khetâ ûthumetu ae so ka taun eling me ohmehmela tavat ae se hia he ka long, me ödru me hmetu but Lusetera ai, me Ikonio, me Anetioka, 22ödru me ohmâ je hnyekon laten, me sihwegi ödra he ka tethmâ hnyi labageju, me ha, ka habe, hamöta he ka dit ka hnyi dokhu dokhon Khong deny ta je vec ae se hia. 23Ke ödre hia but otilâ wahingat hobi kodra hnyi ta je ekalesia, ke ödre hic me ânyâ ca han, me ödru me hnʼ ödra but ka Than, at adre me labageju kâu. 24Ke ödre vheno Pisidia me o but hnyi Pamafulia. 25Ke ödre hia but ha hofuc hnyi Perega, me ödru me o but Atalia ai; 26me ödru me tabâ hu ûhedru e Anetioka ai, dok adre me hnʼ ödru hnyin ehac hnyi ibetengiö bâû anyin Khong hobi kâu huliwa ödru me ohwâdâ. 27Ke ödru me o but, me ödru me ûkhacaköuâ ekalesia, me omanenâ ta je ûnyi hia thithö ame tha ânyâ mödru Khong, waleji a gʼ ame khöng hwanumen labageju ka Aten ta je hnyei. Ke e beû bi hnödru hna tha laba me laten.
දැනට තෝරාගෙන ඇත:
Ta je huliwa 14: IAAI
සළකුණු කරන්න
බෙදාගන්න
පිටපත් කරන්න
ඔබගේ සියලු උපාංග හරහා ඔබගේ සළකුණු කල පද වෙත ප්රවේශ වීමට අවශ්යද? ලියාපදිංචි වී නව ගිණුමක් සාදන්න හෝ ඔබගේ ගිණුමට ඔබගේ ගිණුමට පිවිසෙන්න
maintained by the British and Foreign Bible Society