Kuuɗe Nelaaɓe 14

Nelaaɓe ngaazi nder wuro Ikoniya

1Ɓaawo maajum Pol e Barnabas njehi Ikoniya, ɓe nasti suudu dewal Yahuudu'en, ɓe ngaazi. Yahuudu'en e yimɓe ummaatooje goɗɗe ɗuuɗɓe nuɗɗini. 2Ammaa Yahuudu'en saliiɓe nuɗɗingo, ummini ɓerɗe yimɓe ummaatooje goɗɗe, haa ɓe nganya nuɗɗinɓe. 3Nelaaɓe ɓe'e paɓɓi ton. Ɓe mbolwi haala Jawmiraawo bee dartaare. Jawmiraawo boo gooŋgɗini waazu mo'ere muuɗum bee hokkugo ɓe baawɗe waɗugo alaamaaji e kaayeefiiji. 4Yimɓe wuro cenndi geɓe ɗiɗi dow haala ka'a, woɗɓe tokki Yahuudu'en, woɗɓe boo tokki nelaaɓe.

5Yimɓe ummaatooje goɗɗe bee Yahuudu'en e mawɓe muuɗum'en fuu mbaɗi anniya torrugo nelaaɓe bee fiɗugo ɓe bee kaa'e. 6Nde nelaaɓe nani ɗum, ɓe ndoggi ɓe ndilli haa Listira e Derbe, gure haa lesdi Likoniya e haa gure taariiɗe Ikoniya. 7Ton boo ɓe ngaazi Linjiila.

Nelaaɓe ngaazi nder Listira e Derbe

8Haa Listira woodi goɗɗo mo kosɗe mum jiijiiɗe. O boosɗo diga danyeeki maako, o meeɗaay yahugo. 9O nani waazu Pol. Nde Pol suti mo, o faami goɗɗo man woodi nuɗɗinki ngam haa o yamɗitine, 10o towni sawtu, o wi'i: “Umma, dara dow kosɗe ma!” Goɗɗo man hafti, o fuɗɗi yahugo. 11Nde mooɓe ngi'i ko Pol waɗi, ɓe puɗɗi hoolugo bee wolde likoniire, ɓe mbi'i: “Ɗowanteeɓe nannduɓe bee yimɓe njippake haa meeɗen!” 12Barnabas, ɓe ewni ɗum Zes, Pol boo, ɓe ewni ɗum Hermes#14:12 Zes e Hermes ngoni inɗe ɗowanteeɓe Yunaniŋke'en malla Girek'en. ngam kaŋko woni hunndukoojo maɓɓe. 13Limanjo Zes mo suudu diina mum ɗonno yaasi wuro, waddi ga'i jaagnaaɗi bee pinndi bamaaɗi haa dammuɗe wuro. Kaŋko bee mooɓe fuu ngiɗi lii'anaago nelaaɓe kirseteeŋga. 14Nde Barnabas e Pol nani ɗum, ɓe ceeki limce maɓɓe, ɓe njawɗi, ɓe njehi caka mooɓre, ɓe towni sawtu, ɓe mbi'i: 15“Onon worɓe, koni mbaɗoton ɗum? Minin boo min yimɓe bana mon! Min ngari haa ɗo ngam min ngaazina on Linjiila, haa on acca kuuje meereeje ɗe'e, on nuɗɗina Allah geeto, tagɗo asama e lesdi e mbeela e ko woni nder maajum fuu. 16Naane o accino ummaatooje fuu tokko laabi muuɗum'en. 17Koo non fuu o ɗon waŋginira hoore maako bee kuuɗe booɗɗe. O ɗon toɓnana on iyeende diga asama, o ɗon waɗana on ƴaamnde, o ɗon ɗuuɗɗina nyaamdu mon e hayru mon.” 18Ammaa koo nde ɓe mbolwi bolle ɗe'e boo, bee daker ɓe kaɗiri mooɓre lii'anango ɓe kirseteeŋga.

19Yahuudu'en woɗɓe ngari diga wuro Antakiya nder lesdi Pisidiya e wuro Ikoniya. Ɓe ummini mooɓe, haa ɓe piɗi Pol bee kaa'e, ɓe ndasi mo yaasi wuro, ɓe tammi o maayi. 20Ammaa nde pukara'en njehi, taari mo, o ummi, o lori wuro. Jaŋngo man o dillidi bee Barnabas haa Derbe.

Pol e Barnabas lori Antakiya nder Siriya

21Pol e Barnabas ngaazi Linjiila haa Derbe haa ɗuuɗɓe njaɓi tokkaago Yeesu. Nden ɓe lorti haa Listira e Ikoniya e Antakiya nder Pisidiya. 22Ɓe tiɗɗini nuɗɗinɓe, ɓe cemmbiɗini ɓe haa ɓe tabita nder nuɗɗinki. Nden ɓe mbi'i: “Sey bee boneeji ɗuuɗɗi en nastirta laamu Allah.” 23Haa jama'aaje nuɗɗinɓe fuu ɓe cuɓani ɓe ndotti'en. Ɓe mbaɗi do'a, ɓe cuumi, ɓe kalfini ɓe haa Jawmiraawo mo ɓe nuɗɗini.

24Nde ɓe caali Pisidiya, ɓe njotti Pamfiliya. 25Ɓe ngaazini wolde Allah haa Perge, nden ɓe njehi Attaliya. 26Diga ton ɓe nasti koommbowal#14:26 Koommbowal malla laanawal., ɓe lorti haa Antakiya. Haa wuro ngo ɓe kalfinano mo'ere Allah ngam huuwugo kuugal ngal ɓe kuuwi.

27Nde ɓe njotti Antakiya, ɓe mooɓti jama'aare nuɗɗinɓe, ɓe ngecci ɓe ko Allah waɗi bee juuɗe maɓɓe, no Allah maɓɓitiri laawol ngam haa ummaatooje goɗɗe nuɗɗina Yeesu. 28Ɓe paɓɓi haa ton bee nuɗɗinɓe balɗe ɗuuɗɗe.

Выбрано:

Kuuɗe Nelaaɓe 14: FB

Выделить

Копировать