Ad’u Tinda 8
8
Noe mi nde woi kur batod’a
1Wani Alona mi djib’er yam Noe azi kazureina kambureina ki d’uwarâ pet suma a nga ki sed’em kur batod’ina, mi sir simetna yam andagad’a, mbina mi hulong ngara kä. 2Ir mbiyo ma lau ma kä na ki mbiyo ma se ma akulona a duga, alona mi ar bei sed’a mi. 3Mbina mi hulong ngara kä yam andagad’a, mi ngar kä ngola kur bur ma kis yam dok vahlâ. 4Batod’a ti mba kak kä yam ahuniyô suma Ararat-na kur bur ma dogo yam kid’iziyana hi til ma kid’iziyanina. 5Mbina nga mi ngar kä, nga mi ngar kä gak mba kur bur ma tuna hi til ma dogonina, ahuniyôna yazi d’i buzuk akulo.
6Kid’a bur ma dok fid’ina ndaka, Noe mi mal fenetre d’a mam minit ata batod’id’a woyo. 7Mi ge gagauna abua; mam nga mi iya, mi hulongîya, nga mi iya, mi hulongîya, gak mbina mi so woi yam andagad’a. 8Bugola, Noe mi ge gugud’a á we na ni mbina mi so wa woi yam andagad’a zu? 9Wani ndat ti fe nga yima ti tchuk aset kuana d’i, ti hulongî gevemu, kayam mbina mi nga kä yam andagad’a pet tua. Noe mi mat abomu, mi vad’ï mi kalat kur batod’a gevemu.
10Mi djup kua burâ kid’iziya, mi gat ge d’a dinga, ti iya. 11Ki fladeged’a ndat hulongî gevem ki hum agu olif ma d’ufa avunad’u. Ata yi máma Noe mi wala mbina mi so wa woi yam andagad’a da’. 12Mi djup burâ kid’iziya kua, mi hulong ge gugud’a, wani ndat ti hulongî nga gevem mbuo d’a.
13Kur bur ma avo’â hi til ma avo’â hi biza d’a kikis karagaya yam tud’a hi Noe-d’ina, mbina mi so woi yam andagad’a. Noe mi hle azi d’a yam batod’id’a woyo, mi gol yina; mbina mi so woi yam andagad’a pet. 14Kur bur ma dok mbà yam kid’iziyana hi til ma mbànina, andagad’a ti so woi pepet.
15Ata yi máma Alona mi de mi Noe ala: 16Ang nde woi kur batod’a kamanga ki grongâ kamiyôzina. 17Ang tchuk ahle suma ari suma a nga ki sed’engâ woi pet abua, nala, aluweina, azureina, ambureina, d’uwarâ kahle suma a dram kä na, kayam azi b’rau woi yam andagad’a, a zula.
18 Noe mi nde woi kur batod’a kamamba ki groma kamiyôzina. 19Azureina, ambureina, ahle suma dram kä na, aluweina kahlena pet suma a nga tit yam andagad’ina, ad’u andjavazi ad’u andjavazi a buzuk kei kur batod’a pet.
Noe mi min yima ngal ahle suma ngat buzuna
20 Noe mi min yima ngal ahle suma ngat buzuna#8.20 yima ngal ahle suma ngat buzuna: A minim ni kandagad’a d’oze kahuniyô suma bei tchetina d’igi tabulâ na. Gol Bzuk 20.22-26. mi Ma didina mi tinim iram vamu, mi yo aduk ahle suma djivina, aduk aluwei suma djivina pet, mi ngad’aziya, mi ngalazi woi pet yam yima ngal ahle suma ngat buzu máma.
21Ata yima ahle suma ngal ndazina his mazi ma afufuîna tchuk atchin Ma didinina, mi dala: An dok ni gandagad’a vuna yam sana d’uo d’a, kayam djib’er ra kur sanid’a ni tchod’a ki gogorom dei. An dok ni tchi ahle suma arina woi pet d’igi an tchazi avok na d’uo d’a. 22Ata yima andagad’a nga tua na, zara nga, duta nga mi, zumala nga, ab’lenga nga mi, vun simetna nga, amenda nga mi. Faleid’a kandjeged’a a mba kal lei d’i.
Выбрано:
Ad’u Tinda 8: BA
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Azumeina Bible © Alliance Biblique du Tchad, 1999.
