Matthieu 7

I gangi tà dè dooge’t lé

(An-in Luc 6.37-38,41-42 tɔ)

1I gangi tà dè dooge’t lé tede kade Nube gang’n tà dè si’t lé tɔ. 2Kerɔte kuwe, kum tà ke sei gangi dè dooge’t nè kuwe á Nube à gang dè si’t tɔ. Nyan kɔje nyan ke sei ɔjii nyan adi dooge nè nga kuwe á Nube à ɔje’n nyan kade sei tɔ. 3Ké tede ri á oré kumi dè bum walè ke tò kum ngokoin’t anje kan maman kage ke tò kumi’t nga wa? 4Loo ke maman kage tò kumi’t ɓaa, ké a kede ngokoin kede nè: «Inye’m ade m’ɔr bum walè ke tò kumi’t» nga titeke bain wa? 5I njèkede gos, ɔr maman kage ke tò kumi’t kuwe kété ɓita a an loo njai le kɔr’n bum walè ke tò kum ngokoin’t ɓai. 6Nyan ke tò se ninn’n gai nga adi bisege lé a, i tilei mede-ngarge le si nang non kɔsnyonge’t lé a tɔ, nè bainléa à tubei nja de’t nang le teli ton-in sei dè’t ɓai.

I kɔi Nube nyan ke awi ndoo’n

(An-in Luc 11.9-13 tɔ)

7I kɔi Nube nyan ke awi ndoo’n ɓaa à ade sei a, i sangi nyan ke awi ndoo’n ɓaa a ingei. Undei tàbit kei ɓaa, d’a d’ɔr kade sei ɓai a tɔ. 8Nanan ke kɔ nyan ke aw ndoo’n ɓaa, d’a d’ade’n. Nanan ke sang nyan ke aw ndoo’n ɓaa, d’a d’ade’n. Nanan ke unde tàbit kei ɓaa, d’a d’ɔr kade’n a tɔ. 9Ké nan dann si’t loo ke ngonn’n kɔ’n mapa ɓaa, à kunn kuberi her tá kade’n taa’n gute mapa wa? 10E ké nan dann si’t á ke nè á ngonn’n kɔ’n kanje ɓaa, à kunn li jênênn kade’n taa’n gute kanje wa? 11Sei ke njékêmyêrge gé ɓai á i geri loo kade ngann sige nyan ke maje nè a, ké Bɔ si ke ndi danrán asekum kade nyange ke maje njé ke kɔi nin nyan lé wa? 12Nyan malang ke sei i ndigi kade dooge ke rang rai tede le si nga, sei géa i rai titeke bè tede le de tɔ. E ke nè á è tà ke ndɔ ke Moise se njéribe-dè-tàge ke tà Nube’t ndooi dooge.

Jésu ndeje dooge le kade awi se tà rebe ke kêl-kêl tá

(An-in Luc 13.24 tɔ)

13Awi se tà rebe ke kêl-kêl tá. Kerɔte kuwe, tà rebe ke but-but è rebe aw ke loo tuju’t. Rebe ke but-but nga dooge ngain awi tutu dik-dik. 14Nè tàbit kei ke aw loo ndikumgajer se non nga, è kêl-kêl a, è rebe ke njon a tɔ. Dooge ke ingei tàbit kei se rebe ke njon nè nga, ei ndêin bere bè.

Tà ndó ke ɔje dè kage se kann’n

(An-in Luc 6.43-44 tɔ)

15Undei kumkunju dè ra si’t ɔje dè njé tête tà kunde tà Nube’t. Ei rai ra de tite batege bè reei ra si’t. Nè kêm de ke kei ɓaa, ei heng-ge ke njé tɔ ko dooge. 16A i geri de se go nyanra de. Ké doo à kuje kann nduu dè kage konn’t wa? Ké doo à kuje kann koté dè kage ngarr kalè’t wa? 17Titeke bè kage ke maje ke rara nga ann maje, nè kage ke majelé ɓaa ann majelé tɔ. 18Kage ke maje asekum kann majelé lé, éké kage ke majelé asekum kann maje ndan lé a tɔ. 19Kage ke rara ke ann majelé ɓaa, dé tuge’n dé gang’n d’ile’n poro. 20Titeke bè á sei a geri njé tête tà kunde tà Nube’t maje se go nyan ra de.

Njékuwe-gir-Jésuge ke get

21Nanan ke ɓar’m ede nè: «Ngar, Ngar» karè à ile nja’n kêm konɓee ke danrán lé. Nè nanan ke ra nyan ke kêm Bɔ’m ke danrán ndige ɓita à ile nja’n kêm Konɓee’t le Bɔ’m nga ɓai. 22Ndɔ gangtà’t ɓaa, dooge bule à deji man kedi nè: «Ngar, Ngar, ké ndɔ ke j’ile mber se rii lé wa? Ké ndɔ ke jè rɔ ndilge ke majelé kɔke se rii lé wa? Ké ndɔ ke j’unn rii jè ra’n nyankɔbege lé wa?» 23Kêm ndɔn’t nè nga, m’a kede de ndàt kede nè: «Ma m’ger sei ndan lé. Ɔti tam’t ke rang, sei njékaltàge se ndɔ si-ndɔ si.»

Tà ke ɔje dè kunde gir kei

(An-in Luc 6.47-49 tɔ)

24Nanan ke ree ram’t ur mbi’n oo’n tàge le’m ra nyan’n ɓaa, tò asenan se doo karé ke njè kêm tɔ kuju tà ke unde gir kei le’n dè kuberi herge’t bè. 25Ndi ede ndài-ndài a, mann ule gangang-gangang gir kei’t nè a, nel bò ule mbin-mbin ɔje dè kei nè nga a tɔ. Nè kei nè nga oso lé tede d’unde gir’n dè kuberi herge’t. 26Nè doo ke rara ke ree ram’t oo tàge le’m á ra nyan’n lé ɓaa, tò asenan se doo ke njè kêm tɔ kuju tà lé ke unde gir kei le’n dè nyeenger’t bè. 27Loo ke ndi ede ndài-ndài ade mann ule gir kei nè nga gangang-gangang a, nel bò ule mbin-mbin ɔje dè kei nè nga a tɔ ɓaa, kei nè nga oso gudu ɗêk-ɗêk.

Tɔgmong le Jésu

28Loo ke Jésu ndó dooge tà nè nga gir gang ɓá ɓaa, tà ige kosdoo-bulege sêl dè nyan ke è ndó de’t. 29E ndó de nyange se tɔgmong ke Nube ade’n m è ndó de nyan tite le njékɔrgir gute-nduge le de karè lé.

Выбрано:

Matthieu 7: GUL04

Выделить

Копировать