Lukase 24
24
Kristûsib makininganik. Sakᴋertininganik Emauseliartungnut, Jerusalemelo. ᴋilaliarninganik.
1Vogib uvlungita sivorlerpângane iluvermut pivut, mingoarutiksallo âᴋiksulauktatik neksarpait, assitiglo ilagivait.
2Ujaraksoarle aksakârtitavineᴋ iluvermit naipipât.
3Iterpullo, Nâlekablo Jêsusib timinga neningilât.
4Taimâk pivlugo siarklilermatta, ahâk angutik maggûk sanianut pivuk, ᴋeblertangnik ânnorâlîk.
5Erksilerput tagva, kênangillo katalungavut. Tâpkoa oᴋautivait: Sôk ômartok ᴋenerpisiûk toᴋungajunê?
6Tamânêngilak, makisimavok, Erᴋarsiuk, oᴋautilaungmase sulle Galilêamêdlune,
7Oᴋarlunelo: Inûb Erninga inuit idluitulijut agganginut pititaujariaᴋarpok kikiaktortaulune, uvluglo pinajuangne makitsomârpok.
8Oᴋausingillo tagva erᴋarpait.
9Iluvermillo aularput, tamakkoninga tamainik 11 it assingillo oᴋautijartorlugit.
10Mariale Magdalêna, Johannalo, Marialo Jâkobusib anânanga assingillo, tagva arnat tamattominga oᴋartut Apostelinut.
11Tâpkoale oᴋausingit unipkausetuinaunasugivait okperinagillo.
12Pêtrusele nikovidlune iluvermut aᴋpangerpok, iluanullo itsuarame, uvineruksajat kissêta takovait, aulardlunelo; tataminiarporlo, ᴋanok iliortoᴋalaungmat.
13Ahâglo, ilâgik maggûk uvlorme tamattomane iglugasangnut aivuk, Emausemik atilingnut, Jerusalemit stundinik pingasunik (pisuklune)ᴋaningitigijunut.
14Oᴋaᴋatigêkpuglo pijoᴋalauktut tamakkoa tamaita pitjutigilugit.
15Taimâk oᴋartilugik, ingmingnut aperiᴋatautivlutik, Jêsusib anguvak ingergaᴋatigivlugiglo.
16Ijîgigle tautungititauvuk, ilitarserᴋonagik tâpsominga.
17Oᴋautivagle: ᴋanok oᴋâlavitîk iliptingnut ingergavlutik kiksalaptiglô?
18Tagva aipangata kiova, Kleofasemik atiliub, oᴋaudlugolo: Tujormitjanit ilûnainit Jerusalemêtunit uvlune tamakkonane pijokalauktunikᴋaujimangitotôvêt?
19Aperivaglo: Sumîk? Kiovâk: Jêsuse Nazaremiok pivlugo, nalautaijôlauktoᴋ pitsartudlarlune, piniarnernut oᴋautsinullo, Gûdemelo inungnelo tamaine.
20Tâmna ajoᴋertuijoksoapta angajoᴋâptalo unnertujutiginerpât toᴋotauᴋovlugo, kikiaktortauᴋovlugolo (saningajolingmut).
21Uvagulle Israêlitit piulijauniarasugivavut tâpsomunga. Uvlomelo uvlut pingatserput, taimangat taimailiormatsuk.
22Arnat ilapta ilangita iluvermut uvlârulauktut ᴋoaksârtilaukpâtiguttauk,
23Timinga neninginamitsugôk, oᴋariartorpullo Engelîngnik takolauramigôk, ômartomik oᴋartûngnik.
24Ilaptalo iluvek nalipsarpât, taimaglo naipipât, sorlo arnanut oᴋautaungmat, (Jêsusele) nagvângilât.
25Oᴋautivaglo: Ilisimaitotik, ômatiptikut erᴋeasuktotik tamakkoninga tamainik okperlutik, nelautaijut oᴋauserilauktanginik.
26Kristûse taimâk âniatitaksaulaungilâk ânanaunerminullo iterlunê?
27Môseselo nalautaijullo tamaita oᴋautigilerpait tâpkungnunga, aglangniglo tamainik aglaksimajunik tâpsominga tukkisititsiarlugik nalojungnaitipak.
28Iglugasaille aivigijatik ᴋaglileramigit, ᴋângiutiniarᴋôlaulerpok.
29Nokᴋarsarpâglo oᴋarlutik: Uvaptingnêlaurit, uvluklilermat unnulermallo. Iteᴋatigivaglo tâpkunangnênialerdlune.
30Iksivaᴋatigileramigik nerrivlutik, ᴋakᴋôjak tiguvâ, ᴋujalivlunelo avgorpâ tapkungnungalo tunivâ.
31Ijîgik tagva uititaulerpuk illitarivâglo. Sâmingnelo nipaivâk.
32Ingmingnullo tâpkoa oᴋalerpuk: Omativuk iluptingne ônarsilaungilâk, oᴋautingmatiguk apᴋome, aglangnik nalojungnaitingmatigûk?
33Stundemelo tamattomane nikovipuk, utermilutiglo Jerusalemut, 11 illo katimajut naipipait, najortingillo.
34Tapkoa oᴋarput: Nâlegak ilâ makisimavok, Simonemullo sakᴋilauktok.
35Tâpkoalo (maggûk) unipkârvigivait apᴋome iluserilauktamingnik, ᴋanorlo ilitarsijutigigamikko, ᴋakᴋôjak avgormago.
36Tamattomingale oᴋauseᴋartilugit, Jêsusib nangminek akornganut pivlune oᴋautivait: Ulapirsauteᴋaritse!
37ᴋoaksângalerpulle erᴋsililarmiglo, anernênak takonasugilugo.
38Oᴋautivaillo: Sôk ᴋoaksângavisê? Sôklo taimaitunik issumaᴋarᴋisê ômatipsingnê?
39Aggakka itigakkalo takulersigik, uvangauvunga nangminek; aktorlungalo takunârsinga: Anernek uvineᴋangilak sauneᴋaranelo, sorlo uvanga takogapsinga peᴋartunga.
40Taimaglo oᴋarame, aggane itiganelo ᴋemergojauᴋolerpait tâpkonunga.
41ᴋuviasungnermulle sulle okpingimatta, tataminiarmattalo, oᴋautivait: Ovane nerᴋiksaᴋarᴋisê?
42Mingeriablo jarrasimajub ilanganik igupsaujârtullo orᴋsuanik manijivut tâpsomunga.
43Tiguvaillo, nerrilarmelo takoane.
44Oᴋautivaillo: Tamadja oᴋausikka, oᴋauserilauktakka ilipsingnut, sulle najulaurapse; pivlunga aglaksimajut ilûnamatsiatik nalautsijuksaungmatta, Môsesib nelautaijullo aglangine, Dâvidiblo imgerutingine.
45Tagva nalojungnaitipait, aglangnik tukkisilerᴋovlugit.
46Oᴋautivaillo: Taimâk aglaksimavok, taimaglo Kristûse âniatitaksaulaukpok, makituksauvlunelo toᴋungajunit uvluk pingajuangne.
47Oᴋâlaᴋojilunelo atermine ᴋaᴋialernermik issumagijaujungnainermiglo ajornernit inuᴋatigênut tamainut, Jerusalemiut pigiarᴋârlugit.
48Ilipsele tamakkoninga tamainik kigligiutsijôvose.
49Ahâglo, atâtama oᴋautigilauktanga ilipsingnut tilijomavara. Ilipsele iglugasaksoarne Jerusalemêtuksauvose, pângat pitsartunermik tunitsivioᴋârase.
50Tagvangalle Betânianmut aitipait, agganelo ᴋolangiutitidlugit saimartipait.
51Taimâglo saimartiᴋamigit ᴋemakpait, ᴋilangmullo ᴋongmuarpok.
52Tâpkoale tuksiarvigivât, Jerusalemullo ᴋuviasuvaksoadlarlutik uterivut;
53Katimavingmêtsainarlutiglo Gûde nakoridlarpât ᴋujagidlarlâllo.
Выбрано:
Lukase 24: LIHB08
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Labrador Inuttitut Heritage Bible © Canadian Bible Society, 2008.
