Lukase 21
21
Uigarniub tunergutiksârsuanik. Katimaviksub serᴋomitaujomârninganik.
1Takonâramele, akluitut tautukpait tunergutimingnik ilijijut Gûdib iklervinganut.
2Uigarnermik aklujomik takogivok, kênaujârsungnik maggûngnik ilijingmijomik.
3Oᴋarporlo: Âhamarik oᴋaupapse: Uigarnek una aklujok ununersanik ilijivok tâpkonangat tamainit.
4Tâpkoa ilûnatik pimingnik atorniangitamingnik ilijivut, Gûdemut tunergutiksautidlugit; unale aklujok perᴋutituaminik ilijivok.
5Katimaviksoarmiglo ilangit oᴋarmatta, ujarᴋanut maniktunut ivlernartunullo ânanausijaungmat, oᴋarpok:
6Naliutijomârpok tamakkoa tamaita takojapse ᴋallerêktoᴋarungnaiviksangat ujarangnik maggûngniglônêt serᴋomitaujomângitungnik.
7Apersorpâlle oᴋarlutik: Ajoᴋertuijok, ᴋanga pijuksat tamakkoa pijomârᴋât? Sunauniarᴋâlo taimaitsomârviub nalunaikutaksangâ?
8Oᴋarporle: Kamatitse, uivêrijauᴋonase. Unuktut tikitsomârmatta atera aterivlugo, oᴋarlutiglo: Kristûseovunga, naliusimajomiglo (oᴋarmilutik). Taipkoa malingniarasigik.
9Unatadlartunigle akkerartortoksoarniglo tussarupse, erᴋsiniarase: taimailiortoᴋariaᴋarmat; naggatiksarle naliutingilak sulle.
10Tagva oᴋautivait; Inuᴋatigêt inuᴋatigênut assimingnut sorsugomârput, ataniovingmiullo ataniovingmiunut assimingnut.
11Nunallo sunatuinarne angijomik sajukpilugomârput, Kângnartoksoaᴋarlarmelo nusilingnartoᴋaromârpok; erᴋsinartuniglo nalunaikutaksoarnik sakᴋertoᴋaromârpok ᴋilangmit.
12Tamakkoale tamaita perᴋârtinagitk tiguluse unangmijomârpâse, ilinniarvingmingnullo parngnanairsimavingmingnullo pititsomârpâse, ataniojunullo angajoksoarnullo âtsomârpâse, atera pivlugo.
13Taimailiorviojomârposele kigligiutjutiksamut (nalojungnairutiksamut).
14Omamiuteᴋaritse, siaklerniarase sivorngagut, sumik kigusiksaᴋarniarmangâpse.
15Uvanga ᴋanermik ilisimanermiglo tunitjivigijomavapse, ômigijise ilûnaita kionermik akkerartornermiglo ilipsingnut sapilertilugit.
16Angajoᴋâpse aglât, ᴋâtangutipselo, ilapselo ilannârijipselo pititsomârpâse, ilapselo ilangit toᴋotsomârpait.
17Inuillo ilûnatik ômigidlaromârpâse atera pivlugo.
18Nujarlo atauserlônêt niaᴋupsingnit asserortauniatsangilak.
19Soᴋoserlugase tarnise piulisigik.
20Jerusalemible avatâ sorsuktuksarsoarnik illumajok takogupsiuk, tagva ᴋaujimaniarpose asserortauniarvia naliutilermat.
21Taimaipat, Jûdêamêtok ᴋemâlerle ᴋakᴋanut, tagvanêtorlo ᴋerᴋane aulalerle, assinêtorlo perorsêvingme iterniarane.
22Tamakkoa kiglungniub uvloringmagit, aglaksimajut tamaita nalautserᴋovlugit.
23Kappianamêgle singaijut amâmaktitsijullo, tamanna naliutikpat; angijomik kappianartoᴋaromârmat nuname, inuᴋatigêllo ukkua ningarijaudlaromârput.
24Saviksoarnut ipiktunut toᴋotauniarput, nunalingnullo ilûnainut âtauniarput; Jerusalemelo asserortauniarpok nalojunut, nalojut naliuningat nâmakserᴋartinago.
25Seᴋinerlo, takᴋerlo, uvloritjallo nelunaikutaᴋaromârput; inuillo nunamêtut erᴋsinermut sivôradlaromârput; imarbiksoarlo malliksuavaksuillo iktulijâromârput.
26Inuillo erᴋsinermut utaᴋinermullo nukkingerutijomârput, nunamut pijomârtuksat pivlugit; ᴋilaub pitsartuningit aulataujomârmatta.
27Taimaipallo Inûb Erninga tagva takoniarpât nuvujatigut ᴋaijok, pitsartudlarlune ânanaudlartok.
28Tamakkoale pilerpatta, ârloritse takosarluselo, piulijauviksase ᴋaglilermat.
29Adsiujomiglo oᴋautivait: Napârtok paungatannaktaliksak, napârtullo tamaita takonârsigik.
30Siggilerangata, tukkisitigivase ᴋaujimalerluselo aujajaraklilermat.
31Taimâktauk ilipse, makkoa tamaita pigiartut takogupsigik, Gûdib nâlegauvinga ᴋaglilermat, ᴋaujimaniarpase.
32Âhamarik oᴋaupapse: Kinguvângoᴋatigêt ukkua nunguniatsangilat, makkoa ilûnatik nâmakserᴋârtinagit.
33ᴋilaglo nunalo nungujomârpuk, oᴋausikkale nungujomângilat.
34Ilipsele udjertoritse, ômatise oᴋumailerᴋonagit nerritunermut imertunermullo, nunab pinginik pinasuarnermullônêt, uvlormut taipsomunga opingartaukonase.
35Taipsoma nunamêtut tamaita tikitsomârmagit nigaktut.
36Taimâk pivlugo pigâtsainaritse tuksiarluselo, ᴋemâjuksauᴋovluse tamakkoninga pijomârtunik ilûnainik, Inûblo Erningata sângane nangerungnarᴋovluse.
37Uvlôjarangallo, ajoᴋertuivok katimaviksoarme; unnugangalle aularpok ᴋakᴋamut orᴋsoktalingmut, tagvanêlerdlunelo.
38Uvlâkullo inuit illûnatik tikipât, katimavingme nâlegiarlugo.
Выбрано:
Lukase 21: LIHB08
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Labrador Inuttitut Heritage Bible © Canadian Bible Society, 2008.
