Éxodo 33
33
Canaacha coinetei nichae cuujenaa coinate aite Cana Coaunera
1Niritiin jetaote, Moisesa rai:
“Chajaain ena caalai caje, nii Egipto caje iicha rocoori cachaauru amaain, Abaraaun, Isaca, Jacobo, naaonjoainuri inamacoorurai, tihanune coina, aitocohaunlune jaa ataneque cunihu. 2Canune, nii cuhichene jaa jelai coitucuhin, inara amaa canurai anjera coina, inara aina letoareeuni. Chaaen nechu, nii cuhichene jaa atane caje, cananeeocuru, amoreeocuru, ititiacuru, Fereseecuru, Ebeocuru, Jeboseeocuru, naaonjoainuri sitareeuni jelai caje. 3Chajaain, nii lanaeniha conacai aina, lenonene jaa ataneque cunichuche. Nena laen inara aina uhenereeuni, erenaa tonoraai cacha nequichene jaun, bero cuhane cuujeein, chatoanai ichaquichene, inara itajianune coataa”, naa Moisesa rai, Cana Coaunerane jaun jetaote, 4jataain inaderaaure, nii cachaauru, acaauruacha sirii, oro caje nenaa, acaauru rucuhele teeuruha jaberocoquene caohateein, acaauru cotaain aitohane aonajeeuruhane jaun. 5Niritiin jetaote, isaraelitaauru rai:
“Inarate, erenaa tonoraai cacha nequiche. Aihane jaun, nabana leratojoeeiniji, inara aina nihanune, inara itajianune coataa, chajaain ena, nii inara jaberoco que, inaraacha sirii, inara rucuhele oro caje nenaa rocooche. Aihane inara aina, quiicha ichanenu coitucue”, naain jetao, isaraelitaauru rai bee Moisesa, que beratiha Cana Coaunerane jaun.
6Nii jaun jetaote, Horeb bichatane neeuruhane caje coaauneein jetao, inae nii acaauruacha sirii, acaauru rucuhele oro teeuruha, jaberoco quene jianecure isaraelitaauru.
Cana Coaunera aina turunaanaja loanari
7Nitohaneein jetaote, nii leinjiin acaauru loanari raain acaauru caje icharajerii jelai nii loanari elonaain jetao, Cana Coaunera aina turunaanajaneein, nii loanari curuaate Moisesa. Chunocoha, Cana Coaunera aina erenaa jerihane jetaote, nii acaauru loanari caje jelai nenaa, Cana Coaunera turunaja loanari asae cue. 8Ne jetaote laen, Moisesa neein, nii loanari asae cuhane naineein jetao, satiin loanari bacuujuaniha nichaauraacoaain jetao, caaijie cuaajeein Moisesa coarajeeure cachaauru, nii loanari asae enohane reentihaain. 9Nitohaneein cuhin, nii loanari asae enoha cuha Moisesane naineein jetaote, nii Cana Coaunera turunaja loanari bacuujuaniha fauhin ne jetao, dede sacari, Moisesa aina iriha Cana Coaunerane tonohanau. 10Nitohaneein, nii Cana Coaunera turunaja loanari bacuujuaniha fauhin ecu niha dede sacarine coaracuruhane jaun jetaote, rai loanari bacuujuaniha le cachaauru neseeoriaacoaain jetao, esinae rauhijiriin coroaena esineneein jetao, Cana Coaunera coroaecure cachaauru.
11Nii jana jetaote, Moisesa aina ita acatihaneein jetao, ere Cana Coaunera, coujuriu ita belaichaneein nenaa rijijieein. Nitohaneein Cana Coaunera aina irihane baiha jelaiha rai loanari asae cauha cue jetao Moisesa. Nii jana, nii rai corianera Noon calaohi Josoe jetaote, nii Cana Coaunera turunaja loanari asae neinejesinane.
Necoareratiha Moisesa que Cana Coaunerane
12Nitohaneein Cana Coaunera aina ereein jetaote:
“Aonaaun, iite caalai caje, caa cachaauru amaain amuhanune coina carai aitohi. Nete nii cacorichaanu que, caniha iicha letoaeni beneei carai. Chaaen techu, ii suujua rijijieein nihanune jaun, canu raain neeine que aitohi. 13Aihane jaun, esinae rauhijiriin aitohine, canu que iicha ichanenu coitucuerateeune raotojoeein ne. Jioanriha, ii cachaneein neeuruhane baiteein neeine”, naa Moisesane jana jetaote:
14“Caraajenihane ii corihanereeuni, raotojoeein nebetacaain neeine coina”, naa rai Cana Coaunerane jaun jetaote:
15“Ii raajenihane, canacaanu corianenaa jereneeine, jioanriha caalai caje amuhacaanune jereeine. 16Ii raajenihane canacaanu corihaneneeine, chatohaneeina jana, ii cachaneein nihacaanune coroatajaneeine coitucuhin nereeun. Canacaanu aina neein, canacaanu coroatajaneeine banaachate, ii cachaneein nihacaanune coitucuhin neeurureein, satiin caa chauratane que nenacaauru cachaauru”, naa Moisesane jana jetaote:
17“Jataain casuujua rijijieein neein, satiin ichei aitocoaaunne jaa icharaneein neeine jaaune, nii carai aitohine rijijieein ichareeuni”, naa rai Cana Coaunerane jaun jetaote:
18“Aihane esinae rauhijiriin aitohine, canu que ii jaberoco coaarateeu”, naa Moisesane jana jetaote:
19“Inae canu jaberoconeein, ii acatiha situhin, canu curuaa coitucueraterichaauni ii que. Cairichaaojoaain quiicha coaracuriraine, acaauruacha latei tereeuni. Jerichanejeeinachu, cairichaaojoaain quiicha coaracuri belaain coroatajanereeunni. 20Nena laen ichei aitoon, nii chuni canu meri coaana nainenihane que niein chuni cacha cacoaraera, ichaonaa nainenihane jaun”, naain jetaote:
21“Aonaaun, caa canu rohate ne, neeine jaan, caa ajeri ichoae nichaauraau. 22Inae cajabereeoneeite ii rohan situhanune, leinjiin ajeri jachu cuhane ii teein, canu biji que ii fureeuni, situhanune reentiaain. 23Inae situhanune baihane, canu biji rareeuni, canu janoriicha coaraaine coina. Nete laen, naineneein canu meri coaraaine”, nae jetao, Moisesa rai Cana Coaunera.
Выбрано:
Éxodo 33: URA
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2005, 2024, Wycliffe Bible Translators, Inc.