Éxodo 30
30
Enuha sacari jujui mocooruhane jaa rori
(Ex 37.25-28)
1Chaaen canu rai enuha sacari jujui mocohine jaa rorinu que, acasia caje leinjiin rori jaau. 2Care aina, ita caanijiha jaratonone coina, nichata coarata amuritoherihanaain jerane coujunacateein ichaain, saota coarataain nucuuno teein ichaau, nii roriicha que, nii rori jichooru temurateein ichaau. 3Jerane, jenaa nii nauhane nainecojoain, oro nejesina que, nii nauhacuru carihacu, rai jichoorune maajeein. Chaaen nauha tinonoritiin, oro que mucuera tihacoaau. 4Nii mucueracuru fautaeriin, le jeracuru que, cobairichane enonajaanu que, coroatajaain le jeracuru que, jachuujianaain oro teeu, cuhane cobairichane enohaain, chunijihun amanaanainequichene coina mucueranuque. 5Acasia caje, nii cobairichanacuru ichaain, oro que carihanajaaun. 6Nii baiha, nii ii aina neein ererichaaunine jaa camela fuera bujua acatiha, nii rori teeu. 7Itolere bana, janonecuru naineein, nii raafariincuru rucuhequichene naineei, nii rori ichoae teein, enuha sacari jujui mocohine Aaroon. 8Jerichanejeein raafariichuru mocohichene naineei, sonaina mocohine. Niite, chariji bana satonoelanaala, fasha jaanacaneein canotaracae ichaaurureein. 9Jioanriha, caa caitoonjoaneei, nii rori ichoae leeocha enuha sacarichuru, nii iniho niha natiin mocohin, nii enuha inaacuru niha natiin nichoae teein, nii bino niha natiin nichoae chorohin benatequichene. 10Nii rorite altarte, esinae rauhijiriin, canu que banijiaaineein niha cureein, aihane jaun, le jaanacaauru naineei, nii canu rai iicha soi coichanaauru que, nii rori jichooru rujuaaine Aaroon, inara osa que casuujua acatichaaunne coina. Nii le jaanacuru naineein, ajaanaacuru naineein, nii rori ichoae iicha teeite, inara osa que casuujua acatichaaunne coreniha ichariquicheein”, nae jetao, Moisesa rai Cana Coaunera.
Nichao coretecurumiin
11Niritiin jetaote:
12“Isaraelitaauru curuaacuru janiiquine, canu rai coretecurumiin le cachaauru, nabana, nii acaauru janiiquine aina cuaain, charijieeiniji ooruhane coataa. 13Aihane jaun, acaauru janiiquine coreniha, saoqui cramoneei coata plata teeuruhine canu rai, nii santoario que nihane anaai cataaun fautaeriin leruhin. 14Coroata choonca jaanacani caje coaauneein, nii iicha janiichurite, canu rai teeurureein, 15saoqui qramo amurijiriin coata plata tenaa nainihei nii coriquihona, nii cairichai niha natiinchu, saoqui qramo fautaeriin tenaa nainihei, le cachaauru nichao coreniha. 16Aihane jaun, nii nichao coreniha isaraelitaauruhacha teei, coata plata raain, nii inara aina canu turunajaaunu loanari asae teeu. Nitohaneeite, carai nichao coretecuruha isaraelitaaurune coitucuhin, caje coaaucaaune coina ichariquiin”, nae jetao, Moisesa rai Cana Coaunera.
Bronce caje ojoaichu
(Ex 38.8)
17Niritiin jetaote:
18“Leinjiin bronce caje ojoaichu jaau, jelai bronce caje nelaurianaja ichaain, nii inara aina canu turuna jaanu, loanari airichai rori jeraniha teeu, cuhane acau curujuaain, que nuculejeeichene coina. 19Calaohichuru aina Aaroon te, jelai caje acau raain que tijiaauru culejeein, bijine maajeein culeecurureein. 20Inaen nii inara aina, canu turunaja loanari asae enohin, saseredoteneeuruhane amihaneeon, canu belaihuruhane jaa mocoha cuuruha rori ichoae teeine, nabana ooruhane coataa, que tijiaauru culejeein enoha cuuruhane coina. 21Nitohaneein nabana ooruhane coataa bijihuru culeecuruhine. Caa inara rai caitoonjoante chariji bana satonohe lanaala, fasha jaanaca amurijiriin tonoraain neeurureein, Aaroon calaohichuru nefoerateeuru, nichoalacuru naaonjoainuri”, nae jetao, Moisesa rai Cana Coaunera.
Canuque banijiaain neeninu couluuquichene jaa erene
(Ex 37.29)
22Niritiin jetaote:
23“Saota quiloneein, enuha sacari esine mirra jujuai, nichata quilohin canela, nichata quilohin jiaranojoin tocohaneein jujuaain nenaa, 24saota quiloneein acasia, naaonjoainuri janiichu ii raajenihane, nii santoario que nihane anaaineein, chaaen nichata litoro amuritoheriin, cataaun uujeein oliba coerene, naaonjoaain. 25Jerichanejeein, rai jujihuru jasiiteein, ichaa ichana inaerane rijijieein, nii canuque banijiaain neenihuru coluuquine jaanu, erene jasiiteein ichaau, jitariin niichuruque. Acate nii canuque banijiaain 26inara aina canu turunajaun loanari, nii inara ichao rai rauhi tonoraain ichaohichene coina quiicha teei rucuhequichene jaa camela, 27corujeleeuru aina mesa, corujeleeuru aina usi nujuan, enuha sacari jujui mocohine jaa rori, 28corujeleeuru aina inihocuru mocohine jaa rori, nelaurianaja aina ojoaichu, naaonjoainuri ichoae, nii erene chorohin couloonajariquiin. 29Nitohaneeinte, nii jelai teein, canu turunajaanuque banijiaaineein neenihuuru coluuriquiin, corujeleeuru aina, aihane jaun, chunocoha rucuhele ecu turuanojointe, canuque banijiaaineein niha cureein.
30Jerichanejeein rai calaohichuru, Aaroon, naaonjoainuri ichoae, nii erene chorohin couluunajaaun, jelai teein canuque banijiaain saseredoteneein neeuruhane coina. 31Chaaen isaraelitaauru rai: ‘Caa erene canuque banijiaain nenaate, fasha jaanaca nereetiaain, jelai teein canuque banijiaain nenacaauru, ichoae chorohin coluunajaainchene coina nelatiha cureein. 32Aihane jaun, jioanriha joaereen cacha ichoae, caa erene chorohin neeichene, Nieichu charijieein leeocha erene ichaain nenaa nainiheeiche jaun. Esinae rauhijiriin, coujuriu canu que banijiaain, erene neeinteein, nii joaereen dadaelanaala rucuhecuche. 33Chunocoha caa erene rijijieein, erene ichaain, chunocoha ichoae choroera, inara caje cachate, itajenojoiniha cureein’, naaun isaraelitaauru rai”, naain jetao, Moisesa suujuate Cana Coaunera.
Enuha sacari
(Ex 37.29)
34Niritiin jetaote:
“Jerichanejeein, ita tabaainijiana tabaainijianaain, enuha sacari, jujuaain nenaa usi ichoae, sacari nejesina jujuai, chaaen calbano jujuai, 35naaonjoainuri que jasiiteeu caohatiin, nii cana que banijiaain nenaa enuha sacari nejesina jujuai que, rai jujuai jasiiteein ichaa, ichana inaerane rijijieein teein. 36Caohachajeein, naonajeritiin, le turijieein tutuhin, nii inara aina canu turunajaanu, ii aina ererichaaunine jaa loanari asae teeuche, nii inara ichao rai rauhi tonoraain ichaohichene coina, quiicha teei rucuhequichene jaa camela cuhane teein. Nii enuha sacari jujuaite, jataain inararai nelateein, inaraque banijiaain nenaa nereein, 37aihane jaun, jioanriha nechu jataain joaereein inararai nelateein nihane coina, caa ichaquichene rijijieein, nii enuha sacari jujuai ichana coaauquichene. Acate, canuque banijiaain nenaane, chaaen techu, jataain inararai nelateine. 38Rai nujuuno jeriha, jerichanejeein nii enuha sacari caje jujui ichara, inara caje cachate, itajenojoiniha cureein”, nae jetao, Moisesa rai Cana Coaunera.
Выбрано:
Éxodo 30: URA
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2005, 2024, Wycliffe Bible Translators, Inc.