Éxodo 25
25
Cana Coaunera belaihuruhane jaa rori santoario
(Ex 35.4-9)
1Nii jana jetaote, Moisesa rai:
2“Isaraelitaauru rai aitoote, satiin suujua caje coaauneein tenaa jereraauru caje, teeuruhane jeeonijianaain, nii canu belaihuruhane jaa raauruhine. 3Chaaen oro, coata jataain coretiin nenaa, oro rijijieein lanajaain nenaa coata, 4cajione beraurisihojoai, cajione lanaajiojoain, cajione lanajain, enuha lenoneein nenaa caje ichanohi cajione caohacha, carenero bene ujuhi, 5lanajai que lomonojoineein nenaa carenero ujuhi, jacari caohacha, acasia, 6erene raafariin noinuque, canu rai mocohichene juujijiaain nedaane coina erene jujueraanu, 7ajeri cornalinaneein nenaa, jataain leeochaauru amurijiriin ajeri caohacha, chaaen saseredotecuru curuanaacuru curuaanaa cajione buri acaauru larijiaque nenaa, naaonjoainuri raauche. 8Chaaen canu rai loanari santoario jaauche, ecu nihanune coina. 9Nii ichei coaaraterichaaunine rijijieein, jerichanejeein satiin nii nihanune jaanu rorihuru ichaau”, nae jetao, Cana Coaunera.
Acaauru rai Cana Coaunera aitoonjoan, niicha tei rucuhecuruhane jaa camela
(Ex 37.1-9)
10Niritiin jetaote: “Acasia caje, leinjiin camela jaau, le metoro coroata coarataain careteein, jena coarata cataaun uujeein jarana, jena coarata cataaun uujeein rai nucuuno, naaonjoaain teein ichaau. 11Chaaen oro que rai nauhacuru mucuerateein, cuhanai, nichoajai, naaonjoainuri carihacu oro nejesina que. 12Jenai oro que mucueratihacoaain ichaau; nii jenai tijiaauru nainetiin coroatajaananaain le jeraque teein mucuerateeu. 13Chaaen acasia caje rai cobairichane jaain, oro que carihaquine, 14nii camela auha mucuerateein ichaaine jaa rai jachu cuhane enohaaun, que mucuhin tijichana nainecuruhane coina. 15Jioanriha, nii baiha jelai caje rocohine, ecu neeine, 16nii inara ichao rai rauhi tonoraain ichaohichene coina, ichei quiicha tei, teeu nii camela cuhane”, naain jetaote:
17“Le metoro coroata coarataain rai care, jena coarata cataaun uujueein jarana, naaonjoaain oro nejesina caje rai fueranu jaau. 18Nii oro caje, mariticho nejesina que coroatajaain, cacha rijijieein ichaain teeu, ita jeraniha lucuniha. 19Nii fuera aina, nii cacha rijijieein nenaate nainere, itaachaque mucueraain nihane caohachae. Ita jeraniha, nii fuera lucuniha neeuruhine; 20norijia norijiaain nii fuera coarajeein, jana nii fuera ichoae carijiatomiin acaauru itaro. 21Nii baiha, nii fuera que nii camela fuhin, nii inara ichao rai rauhi tonoraain ichaohichene coina, ichei quiicha tei, teeu nii camela cuhane. 22Ecune nereeuni ii aina, nii camela fuera ichoae, nii neeuruha cacha rijiinanaain coroatajaain itarohin nenacaaurune jaaune nereeuni; ecu neeine, inara aina quiicha ichanenu caitoonjoan rijijieein neeuruha isaraelitaaurune coina, ichei aitoreeuni.
Cana Coaunera notaracae, que banijiaain nenaa faan teeuruhane jaa rori mesa
(Ex 37.10-16)
23Chaaen acasia caje leinjiin mesa jaau, jena coarataain rai care, coroata coarata cataaun uujeein rai jarana, jena coarata cataaun uujemiin rai nucuuno naaonjoaain ichaau. 24Oro que nauhacuru mucueratihacoaain ichaain, oro nejesinaque carihacu. 25Chaaen le jeme ucuuno neein rai nauhacuru corihateein, oro que mucueratihacoaain ichaau. 26Chaaen jenaa nii tijiane nainecojoain, oro que mucuerateeu, 27nii nauhacuru coriha fautaerihanaain nihane, cuhane cobairichane enohaain, nii mesa amanaa nainecuruhane coina. 28Chaaen acasia caje, nii mesa mucuhin amanaanaja ichaain rai cobairichane carihacu oro que. 29Chaaen oro nejesina caje rai corujeleeuru que, ojoaichu, jecoro, baje, erauru, naaonjoainuri ichacuche, canu rai inaraacha teeni acau curunuque. 30Canu notaracae, nii caque banijiaain nenaa faan teeuche, nii rori mesa ichoae.
Oro caje ichanohineein nenaa usi nujuan
(Ex 37.17-24)
31Chaaen mariticho nejesina que, leinjiin usi nujuanu jaau, oro nejesina caje. Temura, nujuan, erene curu, nocone naaonjoain le turijieein, ita mucuhin nihane coina, ita que temuratihacoaain ichaau. 32Rai nujuan uurihuru que nihane coina saotaneein nune jaau, nichatajaanana nichatajaananaain niha le jeracuru quene coina. 33Nii usi nujuan que saotaneein nenaa nunecuru, le unecuru que te nichatajaananaain nereein rai nocone, aiha almendara nocone tocohaneein. 34Nii rai nujuaacha quete nainere jenaain niha noconecurune, jerichanejeein aiha almendara noconene rijijieein. 35Nii usi nujuan unecuru nichatajaananaain nenaa temura naineeinte, nainere niha rai neconecurune. 36Nii usi nujuaachaque, le turijieeincha ita mucuhin ichanohineein niha, nii nocone curu, rai nunecuru, naaonjoainurine coina, mariticho nejesina que oro caje ichaau. 37Chaaen caainsineein raafariin jaain ecu teeute, rai roaichucuru conaaine. 38Nii ojoaichu aina, rai mucuerate naine oro nejesina caje ichanoinihane. 39Satiin rai corujeleeuru aina curuaaequiin ichanohiniha, nii usi nujuane coina nichata choonca nichata quilohin oro nejesina tijichaain coaraain ichaau. 40Nii ichatane ucuuno, ichei coaaratihanulune rijijieein, jerichanejeein tocohaneein ichaau.
Выбрано:
Éxodo 25: URA
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2005, 2024, Wycliffe Bible Translators, Inc.