Éxodo 23
23
Chatoanai ichaa cachane, rucuhena nainihane coina rauhi
1Jiaonriha tonaain nohaneein chamute cacha cairichanaa coaauquine, Nieichu nainihei jataain necha aansaineein ichaonaa cacha ere tonoraain, chuni cairichaain neeine.
2Jioanriha satiin baaso ichana jereein neeuruhane nihanatiin, acaauru rijijieein neeine. Chatoanai rucuheca neeine jana, naaonjoaainte caohachae, naauruha ichei nihanatiin, coa acaauru ere tonoraain baaso ichaa. 3Nieichu nainihei cairicheineein nihanatiin, esinae rauhijiriin aitenihane, nere tonoraaine.
4Nejerateeine jaa rai nitajiha boey, chaelai cabario rijijieein nenaa asno nijine jana eruhine, rai jelaiha cainaaun. 5Ichei nererojoecaain niha cacha neniha natiin, jioanriha coroatajaneeine jianeeine, rai asno nijin, anajiin caaun comohane jana coaraaine, caje nii anajiin raaute nimichumiin.
6Jioanriha esinae rauhijiriin ichei aitoha cairicheinejeein nenaane jana, nere tonoraelanaala neeine.
7Nijiaonriha nohaneein ichei cacha coulurujueranihane, nii chatoanai ichaelanaala nenaa, cha ujuaihoneein teein sohin jaonaa coacuine, nitohanai ichaaine, nii ujuaihoneein nenaa casetecaanune caje nichoteriheeini.
8Jioanriha cairicheihuru cairichaaine coina, ii coreteein niha cacha nihanatiin jereein, nii cairicheihuru ere tonoraain neeine jianeein neeine.
9Jioanriha nejelau atane caje unacaauru cairichanaa coacuhin neeine, inara netonai nejelau atane caje turuhin neeichelu Egiptoone jaunte, inara raotojoeein nejelau atane que ichaonaa coitucuhiche.
Saota jaanaca nereen tiaajeein jelai atane que nocoanajaa cachane coina aitoha Cana Coaunera
10Niritiin jetaote: “Chaaen nocoanajaaine, saotajaanaca nereen tiaain, nii jelai ataneechaque nocoanajaaun. 11Caaunsi jaanacane cuhane nirijieein coetaelanaala, ecu jianeeunte, caje raain lenonecurumiin, nii chatane que cairicheinejeein nenacaauru cachaauru, aihate niha rai cautene, quihuruhine nunaanau nenacaauru lenonecuru. Jerichanejeeichu, nii ichei oba cocana aina, olibo cocana jianeeun.
12Itolereneein saota janonejeeincha iicha chana jerei chamijianeeo que amihaneein, caaunsi janone cuhane nebetacaaute, nebetacaauruhine ichei boey, asno, naaonjoainuri aina, ii cachaauru, chaaen nejelau atane caje unacaauru netonai nebetacaauruhine, nacoauneein nelararajiaain amihaneeuruhane coina.
13Caa inara rai caitoonjoan tonoraain, rijijieein neeuche. Jioanriha tonaain chosichuru ichanohichuru que ereein coroajeein nenaa coaauquichene.
Nichata saain le jaanaacauru naineein, beseta ichacuruhane coina aitoha Cana Coaunera ne
(Ex 34.18-26; Dt 16.1-17)
14Chaaen le jaanaacuru naineein, nichata saain carai beseta ichacuche. 15Caa ichei caitoonjoan rijijieein, jorerera colane ichanohin faan beseta ichaain, caaunsi janonihane reentihaain, jorerera colane ichanohin faan quihajeein bitohaauche. Nii jiateein ichei caitoonjoante, Abib batene banane, nii batene bana, Egipto caje mituhichelune jaun. Nainihei chuni, nii bana chaa colaain turuha carenene.
16Jerichanejeeinchu, temule jaaine jana, inaen tainaca que tihane, taojiaaine nunuheneein beseta jaau. Jerichanejeein ajaanaa satono que, inaen jitariin itemule taojiaa nainaaine beseta jaau.
17Le jaanacaauru naineein, nichata saain canu coacuhin, carene ecoocuruhine satiin cachaauru.
18Carai lenonecuru mocohine, jioanriha coichana aina jiniichaain ichaaine, Nieichu aina jiniichaain jorerera colane ichanohin faan moconaa nainihei. Nieichu cojoanoo ichaquichene coina, rai coerene rucuhena nainiheeiche.
19Jauriaanejeein ena temule inaa nunuhete nainereein, Canu ii Coaunera nichaaune rai, Teenforo asae amaain teeine. Jiaonrihachu rai neba itaari que, carenero calaohi jasiiteein enoalaichene”, naain jetao, Moisesa letohae Cana Coaunera, isaraelitaauru rai niritiin bihane coina.
Cana Coaunera letono anjera
20Niritiin jetaote: “Aonaaun, canune chajiniha bero cuhane cuhin ii beraain, nii ichei banihateein quiicha rucujihu, ii turuaa cuhane coina, canu letono anjera letoareeuni. 21Chaaen nere tonoraau, jioanriha nere tonoraelanaala neein caje nedaaine, acate jerichanejeein canuneein aihanune rijijieein, nii inara osa que nihanatiin suujua acatenereein. 22Nena laen esinae rauhijiriin, nere tonoraain, caa ichei aitocohaune rijijieein neeine, iniha nejeratenacaauru ainane, nejeratiha cureeuni ichoreniha. 23Canu letono anjera te, chajiniha cuhin Amoreo, Ititia, Fereseos, cananeo, Ebeo, Jeboseo, naaonjoaihuri atane que, ii turuaa cuhane janane, acaauru itajiha cureeuni canu. 24Jiaonrihachu, baasoneein ichaaoruha nii cachaaurune rijijieein, aihuruhane rijijieein ichaohine. Jioanriha, canu coroaequine tocohaneein, nii acaauru chosichuru acatiha neseeoriaain coroaenaaquine. Nitohanenaa coacuelanaala, raujiaaincha nii acaauru ecaantooru fejeein itajeeu, rai rorihuru aina curuaecaain. 25Raujiaaincha ii Coaunera nichaauneecha coroajeein neeute, ichei lanaeneeine, iicha coheni aina lenone. Chaenchu li mucuha cunaine nainatejerinaaini, 26coatihachu oriheeini, ii jiatihanulune jaaque turuhanereetiaain. Nieichu, nii chatane que nerinaain suri cuhane beree jitohera ene, Nieichu nerinaain bereeconaa inaelanaala nenaa.
27Chaenechu chunijihun leeocha atane situhine jaacuru naineein, ichoasiha cojiorichuruha coina ichaa cureeuni, ii rene uhin sorooruha, iniha nejeratenacaaurune coina. 28Chunijihun cuhine jaacuru naineeine, coasinacaain cuhine coina ichareeuni, ichoasiha sorooruha, Ebeocuru, ititiacuru, cananeeocuru, naaonjoainurine coina. 29Coatihachu, le jaanaca reentihaain, ichaje jaonajarinaauni, nabana joaereen nelanaaeca atanene coataa, chaaen arajiin nefaauruha nunaanau nenacaauru ataebinaecurune, chatohaneein baasoneein chetecuruhane coataa. 30Inaen arajiin calaojoin, ichei banijiaain atane siriine reentiaaine, jeraaen cuhaaje cuaajeein ichaje jaonajareeuni. 31Ichei atane lucuurune coujunacateein, cucuana lanajain caje coaauneein, filisteeocuru cucuana que tiaaojoaain, cajene cacha areroo caohacha curuaeconaa caje coaauneein, nucuhe Efarata tiaaojoae, caa ichei quiicha tei atane lucu. Canune jelai batane que ichaonacaauru cachaauru teeun ichoijihu, iite inaen acaauru jaoha curiquiin ii roaichu caje.
32Jioanriha acaauru aina chatoanai ichana coaauquine, Nieichu acaauru chosichuru aina nihanatiin, 33Nieichu nainihei ii rohan chatane que neeuruhane jereein neeine; nabana osa que ii saruuruhane coataa. Chaaen aihuruhane tocohaneein, nii acaauru chosichuru coroaena nainihei, nii te laen ijiabereeo itajeranunere ahine”, nae jetao, Moisesa rai Cana Coaunera.
Выбрано:
Éxodo 23: URA
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2005, 2024, Wycliffe Bible Translators, Inc.