Matiyew 26

A ŋgəlam mawa ka Yezu

(Mk 14.1-2; Lk 22.1-2; Zŋ 11.47-49, 53)

1Arka andza Yezu ka ndəvada me tetəkey ŋga neney hay ba na, ŋga ma ləvatar a gawla ŋga hay: «Sərafama da meney tsew na magurlam ma Pak. 2A da mbəkafama har ka Bəzey ma Ndaw, a da daradama ka 'ar ma tuwaw ma gazləlaha.» 3Arka baba ɗuhwa na ma kam kuley ana hay, ta ndaw ma səka na hay ma səkway ma kusam a hwaɗ me mezləŋgərey ma ’ay Baba ɗuhwa na a zəlamar Kayif 4Taya ma dazlama mey ta, ma da zəga Yezu ta wewer, ma da kəɗa ba vagay aha. 5Ama taya ma ləvam: «Ka da key da wuzlah ma magurlam zlay zləna, a da zlawara səkway ba»

Ŋgwas ana daha a mbəɗafa wurdey ka 'ar ma Yezu

(Mk 14.3-9; Zŋ 12.1-8)

6Andza Yezu ŋga da Betani da 'ay Simoŋ ndaw malawa na na, 7ŋgwas ana daha ma gurafa ka tsakay ŋga, ta kwalaba ma wurdey aha ma sumkwo haɗadzidzay ana da har, ma mbəɗafa ka 'ar ma Yezu ma ndza ha a zəmam aha tek. 8Andza gawla ŋga hay ma nəkadama na, a ndalatar, ma ləvam: «Neney na, masaka ha mey, ma ŋgəsada andza neney na? 9Akwa hana ma haɗəkada sumkwo haɗadzidzay na, ma vəladatara sumkwo ana a ndaw mbarga na hay.» 10Yezu ma sərafa na, ma ləvatar: «Ɗagay ka pəslamar ’ar a ŋgwas a neney na ka mey? Mber ’aŋga na ma ndaslada hərway ɗaw ana na hayaha. 11Akwa ndaw mbarga na hay na, daha ka tsakay kwar ka pas ka pas aha; ama yah na, ka da ndzafəmaya ha, ma səlekw dakay. 12Ma mbəɗafaya wurdey ŋga neney ka vaw ɗaw ana na, a key na a ləmey vagay ɗaw. 13I ɓadakwar dərka na, ka slam ma da taləkadama mey ta Mey Wayna ka waray ka waray ka bəla tabiyaha na, a da təkərama tiyatsa ka sərafama ka ŋgwas ana, ka tek aŋga ma kawa na.»

Zudas a haɗəkada Yezu

(Mk 14.10-11; Lk 22.3-6)

14Arka ndaw asləta da walaŋ ma gawla ŋga kurow kava tsew ana hay, a zəlamar Zudas Iskariyot, ma daw 'ay baba ɗuhwa na me key kuley ana hay. 15Ŋga ma ləvatar: «ka wuɗam ka vələmaya na mey, aza i ka da vəladakwar na?» Taya ma kama tsekeley ana sulay kokurow makar. 16Zla ta pas ana ŋga na na, ŋga me səpey wewer ma da vəladatara.

Ɗaf ma magurlam ma Pak

(Mk 14.12-16; Lk 22.7-13)

17Pas tsəfəmey ana ma peŋ mandzar is ana na, gawla ŋga hay ma səmawa ma tsəhafama ka Yezu: «Ka wuɗey la ka tadəmaka tek me zəmey ma magurlam ma Pak ana na ka waray?» 18Ŋga ma ləvatar: «Dam a wuraw 'ay ma məna na, ləvamar: ‹Bay a ləvandərawa na: har a ɗaw ka gurawa ba, i da kama magurlam ma Pak andza gawla ɗaw hay na, da 'ay ɗek.›» 19Gawla ŋga hay ma kama andza ma Yezu ma ləvatərawa na; ma ləmadama tek ma magurlam ma Pak ana tok.

Ma ɓadama ndaw ma da haɗəkada Yezu

(Mk 14.17-21; Lk 22.14; Zŋ 13.21-30)

20Andza hakwaɗ me key ba na, Taya ka slam me zəmey tek, andza gawla ŋga kurow kava tsew ana hay. 21Andza a zəmam aha tek na, ŋga ma ləvatar: «I ɓadakwar dərka na, ndaw asləta da walaŋ a kwar a da haɗəkadaya.» 22A ndalatar a gawla ŋga hay na, andza ha dakay. Taya ma zlamar ma tsəhafama: «Yah ɗaw, Bay’ərlam a ɗaw? Yah ɗaw, Bay’ərlam ɗaw?» 23Ŋga me mbəɗey kava: «Ndaw ma da haɗəkadaya na na, i ka dzəmam har ba a gandaf tsetsuwe. 24Ma da daw ma Bəzey ma Ndaw na, andza na ma Mewindey Kokwoɗ ana hay ma tsafəmərawa na; ama ndaw ma da haɗəkada Bəzey ma ndaw ana tey na, ka tuway vaw ŋga! Ŋgama hana na na, ka yəmərawa ndaw ana ŋga na na zlay tabiyaha!» 25Zudas, ndaw ma haɗəkada na, ma ləvar: «Akwatay na yah ɗaw Rabi?» Yezu ma mbəɗar kava: «Kah ana me ləvey seŋgey.»

Ɗaf ma kuley ma Yezu

(Mk 14.22-25; Lk 22.15-20; 1Kor 11.23-26)

26Andza a zəmam aha tek na, Yezu me zəgey peŋ, a dəba ma ma pəsafa mey ba na, ma tsada, arka ma vəladatara a gawla ŋga hay, me ləvey: «Təɓama, zəmama, neney na vaw ɗaw.» 27Arka me zəgey vəley ma zom, a dəba ma ma mada sise na, ma vəladatara, ta me ləvey aha kava: «Dzaɓadama tobiya kwar aha, 28hərway neney na mambaz a ɗaw, mambaz ma Me dzəmey Vaw, ma da mbəɗawa hərway ma ndaw hay haɗadzidzay, ma ma sey yam ka meŋgəsey hay. 29I ɓadakwar, mezley zla ekəɗey ana na, i da sey aha zom ma bəzey ma viŋe a neney sakay, ha aza ka pas i ma da sey na wayna, ta kuray da Slala ma Baba ɗaw.»

Yezu a ləvey waya Piyer a da mbəɗadaya

(Mk 14.26-31; Lk 22.33-34, 39; Zŋ 13.37-38)

30A dəba andza taya ma kəmata walay ma Pəsom hay ba na, taya ma bəmawa ma dam a mamba ma Tetəɗez. 31Arka Yezu ma ləvatar: «Teseɗey ma dəvaɗ na, kuray tobiya kwar aha ka da təɗam hərway ɗaw. Hərway ma winda ha akwa na: I da kəɗa ndaw me tsukurey ana ba na, təɓaŋ ma welde na a da zlaɗam 'ar. 32Ama a dəba ma ma da mbəlawa ɗaw tey na, i da lahafakwar ba ka mey a Galiley.» 33Piyer na, me mbəɗey kava me ləvey: «Kendzey ndaw hay tabiyaha ka təɗam ba hərway ɗek na, yah na ɗaɗa i da təɗey aha tikay.» 34Yezu ma ləvar: «I ɓadaka dərka na, ta dəvaɗ ma teseɗey a neney na, maga dzagulok a da zlehey na kah ka mbəɗey mey tsoy dey makar» 35Piyer na ma ləvar: «Kwa andza a dafa i da mətsama ta kah na, i da mbəɗey aha mey kakay» Arka sa ma gawla ŋga hay ma ləvam tabiyaha andza ha atsa.

Yezu a ɗuley mey da Zetsamani

(Mk 14.32-42; Lk 22.40-46)

36Arka Yezu ma dawam dzaya a 'ay dzerne na daha, a zəlamar Zetsemani. Arka ŋga ma ləvatar a gawla ŋga hay: «Ndzam aha ka sləna, i daw i da ɗulawa mey ka taɗay.» 37Ŋga me ŋgəley ka bəzay na, Piyer ka zəgawa bəzey ma Zebedey hay tsew. A kar tossa me dzəmey ka vaw. 38Arka ŋga ma ləvatar: «Mezek a ɗaw ma ndza ha magwam aha a memətsey; ndzam ka sləna, ndzakwama ta dey.» 39Ŋga ma daw dəreŋ nekəɗey, me gertey ’ərdey dots ka dala, me ɗuley mey me ləvey: «Baba ɗaw, kendzey a key vaw na, vəley ma tsetseh a neney ka daw ba dəreŋ ta yah! Amana, andza na ŋga ɗaw me wuɗey ana kakay, ama na andza na kah me wuɗey ana! 40Arka ŋga ma mawa ka tsakay ma gawla ŋga hay. A da ndzafata na, a naram hiya. Arka ma ləvar a Piyer: «Kəɗey na kuray ka ndzafam gədaŋ me ndzey ta dey ndzemdey pal andza yah kakay ɗaw? 41Ndzam ta dey, ɗulam mey, ma aza kuray ka da təɗam a gendeɗ ma ndaw me pey wuiya zlay. Mesəfrey na ma həla vaw aha, ama slaw vaw na bəle ha.» 42Ŋga me mey dey ma tsetsew ana sa, ŋga ma gurey nekəɗey me ɗuley mey, me ləvey: «Baba ɗaw, banay a neney i ma da sa na na, a key vaw i ka sa zlay sakay sana, ka key na andza na ŋgeɗek me wuɗey ana.» 43Andza ŋga ma mawa sa na, a da ndzafata na, a naram hiya sa, hərway taya tsoy ma rəzla hiya. 44Ŋga ma mbəkadata, ma gurey sa, me ɗuley mey dey ma makar ana, ma mada guma na hay andza ha sa. 45Arka ŋga ma mawa ka slam ma gawla ŋga hay, ma ləvatar: «Ekəɗey na tsoy tok, naram tek a kwar hay, sasəkam vaw kwar! Nəkafama har ana ka gurawa tsoy, Bəzey ma Ndaw ma mbəka har a tsoy a har ma ndaw ma ŋgəsa na hay. 46Lətsam, nakwam ba! Nəkafama, ndaw ma da haɗəkadaya na ka husawa tsoy bəse.»

Me zəgey ma Yezu

(Mk 14.43-52; Lk 22.47-53; Zŋ 18.2-11)

47Andza a tsey aha guma mba na, Zudas, ndaw asləta da walaŋ ma gawla ma Yezu kurow kava tsew ana hay, me husey ta ndaw hay haɗadzidzay, ta sleɗ ma tsakay ahiya, ta tapay ahiya; ma sləradatərawa na baba ɗuhwa na me key kuley ana hay, ta ndaw ma səka na hay ma səkway. 48Ndaw ma haɗəkadatara na na, ɓa ka ɓatar zeheɗ ba: «Ndaw i ma da surma na na, ŋga tok, zəgama!» 49Arka tsana ŋga ma gurafa ka Yezu, me ləvey: «I ka tsadaka guma Rabi!» Arka ŋga ma surma. 50Yezu ma ləvar: «Dzam a ɗaw, key mber eɗek!» Arka taya ma gurafama; ma pafama har ka Yezu, ma zəgama. 51Arka ndaw asləta da walaŋ ma gawla ma Yezu hay, ma kuɗawa sleɗ ma tsakay ŋga, ma tsuwa gawla ma 'ay bay ma Baba ɗuhwa na me key kuley ana, ha sləmay fakwatok ba ka dala. 52Arka Yezu na, ma ləvar: «Mada sleɗ ma tsakay ɗek a 'ay ŋga, hərway ndaw me zəgey sleɗ ma tsakay na hay tabiya ha na, a da zəɗam na ta sleɗ ma tsakay ana tiyatsa. 53Kah ma dzala akwatay i wuɗey na, i tsəraɓa guma a Baba ɗaw na, a sləriyawa madurlam hay gabal kurow kava tsew, kakay ɗaw? 54Ɗagay mewindey Kokwoɗ ana hay a da ndaslam na, teŋgey? Haya a dafa ka kam na ka kam andza neney ana 55Da har aŋga na na na, Yezu ma ləvatar a ndaw ma kusa hiya na hay: «Kuray ma səmawa ta sleɗ ma tsakay, ta tapay ahiya, andza ma da zəgaɓa katsala. Ka pas ka pas i ma ndza ha da 'Ay me key Kuley, i tatəkadataha ndaw hay na, kuray ka zəgəmaya kakay seŋgey. 56Ama tek a neney hay a da kam andza neney na, hərway aza ka da ndaslam, andza ma ndaw sek hay ma windəmərawa na.» Arka na gawla ŋga hay ma mbəkadama tabiya ta ha, ma hwam tek ata.

Yezu ka slam ma sariya ma zuif hay

(Mk 14.53-65; Lk 22.54-55, 63-71; Zŋ 18.12-18)

57Ndaw ma zəgama Yezu ana hay ma dadama 'ay Kayif baba ɗuhwa na, me key kuley ana. Ndaw me sesəkey Mewey hay, ta ndaw ma səka na hay ma kusa hiya da huɗa. 58Piyer na, ma səpa da dəba da dəba da dəreŋ kasl ka mezləŋgəre a 'ay ma Baba ɗuhwa na me key kuley ana; ŋga me fuləkwey, me ndzey ka slam ma gawla ma 'ay hay, ma aza ka nəkada a da ndəvey na teŋgey. 59Azlakwa tok na, baba ɗuhwa na me key kuley ana hay, ta Sanedreŋ tabiyaha, a səpafama ha seydewe maləwaɗay ana, ma da dzuwada Yezu a memətsey. 60Amana taya ka ndzafam kakay. Kwa andza ndaw seydewe maləwaɗay ana hay haɗadzydzay ma lətsam na. A dəba na ndaw hay tsew ma lətsam, 61ma ləvam: «Ndaw a neney a ləvey na: ‹i slafa ma mbəzlada 'Ay me key Kuley ma Bay ma Bəla, ama i slafa ma zlada da meney makar.›» 62Baba ɗuhwa na me key kuley ana, me lətsey, ma ləvar: «Guma ɗek me mbəɗey kava dakay ɗaw? Ndaw a neney hay a kafəmaka na, seydewe waray?» 63Ama Yezu na, tete təŋga. Baba ɗuhwa na me key kuley ana, ma ləvar: «I mbəɗaka ta Bay ma bəla ta dey ana, aŋga ɓadandar ɗagay, haɗaw kah na Ndaw ma vahara 'ar ana, Bəzey ma Bay ma bəla na» 64Yezu ma mbəɗar kava: «Kah ana me ləvey, ama ekəɗey i ɓadakwar tsana, ka da nəkadama Bəzey ma Ndaw ma ndza ha ta har zəmay ma Ndaw ma slafa tabiyaha na, a sawa ha da dey ma pazlay da 'ərlam.» 65Arka Baba ɗuhwa na me key kuley ana ma ŋgwarɗada zana ŋga hay, me ləvey: «Ŋga ka tsaɗa Bay'ərlam ba sana, ka wuɗakwa ndaw seydewe sa na ka mey sa mey? I ley kuray ana ka tsənadama me tseɗey ana ba? 66Kuray ekəɗey ka dzalafama kava na teŋgey?» Taya ma mbəɗam kava: «Təɗe me kəɗey ŋga na vagay aha.» 67Arka taya ma təfafama sleslem ka mey dey, ma kəɗama, sa na hay ma kəlamar marawa. 68Taya ma ləvamar: «Key ndaw sek, Ndaw ma vahara 'ar ana, ɓadandar, ma kəɗaka na way?»

Me mbəɗey mey ma Piyer

(Mk 14.66-72; Lk 22.56-62; Zŋ 18.17, 25-27)

69Azlakwa Piyer na ma ndza ha da hwoɗ a 'ay. Arka dem ma 'ay ana ma gurafa, ma ləvar: «Kah ana na kete kuray ta Yezu ma Galiley ana tiyatsa seŋgey!» 70Ama Piyer na, me mbəɗey mey ka slam dey ma ndaw hay tabiyaha, me ləvey: «I sərada guma ɗek eɗey me wuɗey me tsey ana tikay.» 71Andza a daway aha təŋga ’ar a mey mambaw na, dem ana daha mekelehe ma nəkada na, ma ləvatar a ndaw na ka slam ana hay: «Ndaw a neney na, kete taya ta Yezu ma Nazaret ana.» 72Arka satsa na, ŋga na me mbəɗey mey ta me mbəɗey aha: «I sərada ndaw a neney kakay!» 73Arka mendzey nekəɗey a dəba na na, ndaw na ka slam aŋga na hay ma gurafama ka Piyer, ma ləvamar: «Dey ta kava kah ana tiyatsa na, kah da walaŋ ata, satsa na vəɗe ma ɗay ɗek ana na a həlafaka mey» 74Arka tsoy ŋga me mbəɗey mey ta ma tsaɗata ha: «I sərada ndaw a neney ana tikay!.» Arka tsa na, dzagulok me zlehey. 75Arka Piyer ma sərafa ka guma ma Yezu ma tsar andza neney ana tok: «Maga dzagulok a da zlehey na, kah ka mbəɗey mey tsoy dey makar ka səradaya kakay.» Arka ŋga ma bawa ma tuway ha da mey ŋga dakay.

Выбрано:

Matiyew 26: MOF

Выделить

Копировать