Luk 22
22
Jisas alkaia dukiara mapara buan ba
(Mt 26.1-5,14-16; Mk 14.1-2,10-11; Jn 11.45-53)
1Brit îs mangkras piaia piua tara ba pat baila kan, Insal luan Yua Liliaka wi ba.#Imp St 12.1-27; Kli S 16.1-8. 2Prîs wihta tara nani bara Lâ Smasmalkra nani sut pliki kan, nahki Jisas ba ikaia, kuna upla nani ra sibrin luki kata.
3Bamna Sitan ba Judas kupia ra diman, witinka ba apastil 12 ba wina kumi kata, ai nina ba Iskariot mâki banhwi kata. 4Bamna naha mita prîs wihta nani ra, bara tempel kiaptinka nani ra wih aisin, nahki Jisas ba baha nani mihta ra mangkaia. 5Witin nani lilia taki bara Judas ra lalah yaia sin pramis munan; 6Judas aitani lukan, bamna baha piua wina mahka sans pliki kan, nahki Jisas ba witin nani mihta ra mangkaia, upla wala nani nu apia kaka.
Jisas tutni pata pin ba
(Mt 26.17-29; Mk 14.12-25; Jn 13.21-30; 2 Ko 11.23-26)
7Brit îs âpu piaia piua tara ba balan, bahara sika Insal luan sîpka ba sakripais daukaia kata. 8Bamna Jisas mita Pita bara Jan wal blikan wan, bara naku win:
—Man nani was, Insal luan Yua Liliaka dukiara tutni pata ba ridi dauki bas.
9Witin nani makabi walan:
—¿Anira want sma yang nani ridi daukamna?
10Jisas pana win:
—Man nani tawan ra dimma ba ra, kaikma waitna kum lî watla twilki auya kabia. Witin nina blîks ani watla ra wih dimbia ba kat. 11Baha watla dawanka ra wis: ‘Smasmalkra ba mai wisa: ¿Ani rumka ra yang disaipilki nani aikuki Insal luan Yua Liliaka tutnika pata ba piaia?’ 12Bamna mamrikbia purara rum tara kum pat ridi daukan sa; bahara tutni pata ba ridi dauks.
13Witin nani wan ba ra, diara nani dukiara Jisas win ba sut wal prawan, bamna Insal luan Yua Liliaka tutnika pata ba ridi daukan.
14Awarka balan piua ra, Jisas ai disaipilka sut aikuki tibil ra iwan. 15Jisas mita wisata:
—¡Yang brin ai dauki pali kan naha Insal luan Yua Liliaka tutnika pata na man nani wal piaia, kau pruras sna ba ra! 16Bamna yang mai wisni, kli man nani wal nahmuna pata pimna apia, Gâd King aimaki lâka ba aimakbia ba kat.
17Baku bamna, Jisas ai mihta ra kâp kum brih, tingki wih, ningkara naku win:
—Naha na brih, man nani tilamra yui bris; 18kan yang mai wisni, wain kiwka mâ ba wina kli dimna apia, Gâd king aimaki lâka ba balbia kat.
19Baha ningkara, brit ba ai mihta ra brih, tingki wih, kriki, disaipil nani ra yabi, win:
—Naha sika wîni tara, man nani sut dukiamra yan kabia ba. Naha na yang ra luki, dauki bas.
20Kâp ba wal sin baku daukan plun pin ningkara, bara naku wisata:
—Naha kapka na sika lâ raya daukan ba#Jir 31.31-34. yang tâilia mita, bara sut dukiamra laiwi ba. 21Sakuna nanara waihli mihta ra ai mangkaia waitnika ba yang wal tibil ra nâra sa,#Law 41.9. 22bamna Upla Luhpia Waitna auya witin ra mairikan yabalka ba bâk. ¡Sakuna waihli mihta ra ai mangkuya waitnika ba mapara lika alai pali kabia!
23Bara disaipil nani ba pana pana ai walka ra tawi makabi walan, ya pali mita waihla mihta ra mangkuya sapa.
Ya kau tara kabia dukiara blahwanka ba
24Disaipil nani ai tilara blahwan kum bri kan, baha ba lika ya kau tara kulkan kabia dukiara.#Mt 18.1; Mk 9.34; Lk 9.46. 25Sakuna Jisas mita win: “Idan nani kingka nani ba lika dawan baku baha nani ba purara aimakisa,#Mt 20.25-27; Mk 10.42-44. bara witin nani wihtka ba yamni dadaukra nani mâkisa. 26Sakuna man nani lika baku kaia apia sma; ya man nani tilamra tara kulkan ba, witin lika kau wahma baku kaia sa; ya sin lal baku kulkan ba, witin ba upla wala dukia dadaukra takaia sa.#Mt 23.11; Mk 9.35; Ecl 3.18. 27Bamna, ¿ya ba kau tara kulkan sa ki, witinka tibil ra iwi plun piaia ba, apia kaka, plun tibil ra iwi ba? ¿Kasak apia witinka tibil ra iwi ba? Sakuna yang lika man nani tilamra sna, sim dukia dadaukra baku.#Mt 20.28; Mk 10.45; Jn 13.12-15.
28“Man nani sika piu bani yang wal ban sma ba, traiki kaikanka nani tilara. 29Baha mita, yang bui man nani ra king lâka kum maikaisna, Aisiki mita yang ra aikan ba baku. 30Man nani plun pima, diara sin dima yang tibilki ra king aimakaisna ba ra, bara king iwaika nani ra iwi, Israel kiamka 12 ba lâka sin daukma.”#Mt 19.28.
Jisas Pita witin ra kulkras wibia dahra sakisa
(Mt 26.31-35; Mk 14.27-31; Jn 13.36-38)
31Bara Dawan naha sin aisin:
—Saiman, Saiman, kaiks Sitan man nani ba makaban sa sim plawar mâ baku mai singbaia dukiara. 32Sakuna yang bui man dukiamra puri sunri, kasak lukankam ba tiwaia apia. Man kli tawi balma ba ra, muihkam nani tâ baiks.
33Saiman bila:
—Dawan, yang ridi sni man wal silak ra waia, bara pruaia sin.
34Bamna Jisas bila:
—Pita, yang mai wisna, man naiwa kau kalila wainhka aiwanras ba ra, aima yumhpa wima yang ai kaikras.
Pât wahwaia pat baila kan ba
35Jisas disaipil nani ra makabi walan:
—Yang bui man nani ra sakbat âpu, lalah watla âpu, sûs sin âpu mai blikri waram ba ra,#Mt 10.9-10; Mk 6.8-9; Lk 9.3; 10.4. ¿diara luha apia kapram ki?
Bara witin nani bila:
—Diara kumi sin apia.
36Bamna witin bila:
—Nanara lika, ya sakbat brisa kaka, baha brih waia sa, lalah watla bri kaka sin; ya sord âpu kaka, ai prâka tara ba wauhi atki, kum atki bribia. 37Kan man nani ra mai wisni Ulbanka nani naha aisi ba sut yang ra ban aimakaia sa: ‘Witin ba watawikira nani tilara kulkan sa.’#Ais 53.12. Bamna dîa dîa yang dukira ulban ba, aimakaia sa.
38Witin nani aisin:
—Dawan, sord wâl nâra sa.
Bamna Jisas pana win:
—Baha kat takasks.
Jisas Getsemani ra ai pura sunisa
(Mt 26.36-46; Mk 14.32-42)
39Jisas baha wina taki, ai natka kan ba baku, witin Olivet ilka ra wan; disaipil nani sin ai nina bliki wata. 40Baha pliska ra balan ba ra, witin bila:
—Man nani puram suns, traika kaikan ra kauhmara sîa.
41Ningkara, Jisas witin nani wina dakwi takan, sim walpa kum lulkan praiska ba baku, bara bahara witin ai lula krikan ai pura sunaia. 42Witin bila: “Aisa, man wilin sma kaka, pât wahwaia sna ba wina swaki ai sâks, sakuna yang kupi lâka kat lika kabiara, kuna man kupiam lâka kat mika.”
[ 43Bamna kasbrika pura ba wina insal kum balan, witin ra tâ baikaia. 44Bara baku mika witin uya pali pât wahwi kan ba tilara, kau ai tâ baiki ai pura suni kata, bara ai laptika ba tala tahwan tara baku tasba ra tahwi kata.]
45Witin ai pura suni kan ba wina bûi, disaipil nani ra wan, bara baha nani yapi kan sakan, sari mita pura luan kan bamna. 46Bara witin bila:
—¿Dîa kan man nani yapisma ki? Man nani bus, puram sin suns, traika kaikan ra kauhmara sîa.
Jisas alki silak ra brih auya
(Mt 26.47-56; Mk 14.43-50; Jn 18.2-11)
47Jisas kau aisi kan ba ra, upla ailal pali balan. Disaipil 12 ba wina kumi nina Judas mâki kan ba sika baha uplika nani tâ brih aula kan, bamna witin Jisas lamara balan kiawalaia. 48Baku mika, Jisas bila:
—Judas, ¿kiawalanka kumi ni Upla Luhpia Waitna na waihla mihta ra mangkisma ki?
49Baha nani Jisas wal kan ba, diara nani taki kan ba kaikan, makabi walan:
—Dawan, ¿yang nani sord ni mapara aiklabamna ki?
50Witin nani wina kum mita prîs nani wihtka albika kum ra klaki, kiama aihkika ba taih dakban. 51Sakuna Jisas bila:
—Ban swis; pat aitani daukram sa.
Bamna Jisas mita albika ba kiama ra kangbi, rakan. 52Ningkara, Jisas prîs tara nani ra, tempel kiaptinka nani ra bara wihta almuk nani ra, witinka nani witin ra alkaia balan ba ra win:
—¿Man nani bal takram sord nani bara dus nani kira, yang na âimplikra kapri kan baku? 53Yang yu bani man nani wal tempel ra katna piua ra,#Lk 19.47; 21.37. wiria sin ai kangbras kapram; sakuna naha na man nani awarkam sika, tihmia mita pura lui ba.
Pita Jisas kaikras wisa
(Mt 26.57-58,69-75; Mk 14.53-54,66-72; Jn 18.12-18,25-27)
54Bamna witin nani mita Jisas ba priski brih wan prîs tara watla ra; Pita lika laih wina nina bliki kan. 55Utla lamara pauta kum mukan, bara baha kir iwan. Pita sin baha nani tilara iwan. 56Bamna dukia dadaukra mairka kum Pita pauta mukan ba tnaya un ra iwi kan kaiki, witin kat aman pali kaiki si, naku wisata:
—Naha waitnika sin witin wal kata.
57Sakuna Pita apia wisi, naku win:
—Mairin, witin ba yang kaikras.
58Wiria ningkara, wala kum bal kaiki, wisata:
—Man sin baha nani wina kum sma.
Sakuna Pita bila:
—Apia, yang baha apia sni.
59Awar kum luan prais ba ra, kli wala kum bal karna aisi, wisata:
—Kasak, naha waitnika sin witin ba wal kata, kan witin na sin Galili wina sa.
60Sakuna Pita bila:
—Waitna, dîa dukiara pali aisaram sapa yang tânka briras.
Baha sim piua ra, kau Pita aisi kan ba ra, kalila wainhka kum aiwanan. 61Dawan tawi Pita kat kaikan, bara Pita ai kupia krawan, Dawan bui witin ra dîa wisata ba dukiara: “Naiwa kau kalila wainhka aiwanras ba ra, pat aima yumhpa ai kaikras wima.” 62Bamna Pita latara taki, sarikira ai nakra laya sakan.
Jisas lawaska kiki banhwisa
(Mt 26.67-68; Mk 14.65)
63Waitna nani Jisas main kaiki bri kan ba ai lawaska kiki, witin ra sin pruki, latwan yaban. 64Nakra nani sin praki, makabi walan:
—¡Ai wis ya mita mai prukan!
65Bara diara wala uya witin mapara aisi, swira dauki kata.
Jisas lâ wihtka tara nani mawanra
(Mt 26.59-66; Mk 14.55-64; Jn 18.19-24)
66Bamna yu baiwan kan, Ju almukka nani, prîs tara nani bara Lâ Smasmalkra nani sut asla aidruban, bara Jisas ba lâ wihta tara nani mawanra brih wan. Bahara witin ra makabi walan:
67—Wan wis, ¿man ba Misaya ki?
Witin bila:
—Yang âu mai wimna kaka sin, man nani kasak ai kulkma apia. 68Bara diara makabi walamna kaka, man nani pana ai wima apia. 69Sakuna naha piua wina, Upla Luhpia Waitna ba, Gâd karnika sut bri ba mihta aihkika ra iwi kabia.
70Bamna sut mita makabi walan:
—Ban kaka, ¿man na Gâd Luhpia?
Jisas pana wisata:
—Âu, yang sna, man nani aisaram ba baku.
71Baku bamna, witin nani bila:
—¿Dîa kan yawan witnis nani kau briaia sa ki? Witin bîla wina yawan walan sa.
Выбрано:
Luk 22: MSKTU
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2010 Bible Society in Nicaragua