Gen 1
1
Ukudalwa komhlaba lomuntu
1Ekuqaleni uNkulunkulu wadala izulu lomhlaba. 2Umhlaba wawungelasimo, wawungelalutho; kwakukhona umnyama phezu kwamanzi, kodwa umoya kaNkulunkulu wayehambahamba phezu kwamanzi.
3UNkulunkulu wasesithi: Kakube khona ukukhanya; kwaba khona ukukhanya.#2 Kor 4:6 4UNkulunkulu wabona ukuthi ukukhanya kuhle; wahlukanisa ukukhanya lomnyama. 5UNkulunkulu wakubiza ukukhanya ngokuthi yimini, lomnyama wawubiza ngokuthi yibusuku. Kwaba khona ukuhlwa lokusa, kwaba lusuku lokuqala.
6UNkulunkulu wasesithi: Kakube khona umkhathi phakathi kwamanzi, wahlukanise amanzi lamanzi.#2 Pet 3:5 7UNkulunkulu wenza umkhathi, wahlukanisa amanzi angaphansi komkhathi lamanzi aphezu komkhathi; kwaba njalo. 8UNkulunkulu wasebiza umkhathi ngokuthi lizulu. Kwaba khona ukuhlwa lokusa, kwaba lusuku lwesibili.
9UNkulunkulu wasesithi: Amanzi angaphansi kwezulu kawaqoqeke ndawonye, kubonakale umhlabathi owomileyo; kwaba njalo. 10Umhlabathi owomileyo uNkulunkulu wawubiza ngokuthi ngumhlaba, lamanzi aqoqeke ndawonye wawabiza ngokuthi lulwandle. UNkulunkulu wabona ukuthi kuhle. 11UNkulunkulu wasesithi: Umhlaba kawuveze utshani, lemibhida ethela inhlanyelo, lezihlahla ezithela izithelo ezilenhlanyelo yazo, ngezinhlobo zazo. Kwaba njalo. 12Umhlaba wasuveza utshani, lemibhida ethela inhlanyelo ngezinhlobo zayo, lezihlahla ezithela izithelo ezilenhlanyelo yazo, ngezinhlobo zazo. UNkulunkulu wabona ukuthi kuhle. 13Kwaba khona ukuhlwa lokusa, kwaba lusuku lwesithathu.
14UNkulunkulu wasesithi: Kakube khona emkhathini wezulu izikhanyiso ezahlukanisa imini lobusuku, zibe yizibonakaliso zezibanga, lezensuku lezeminyaka, 15zibe yizikhanyiso emkhathini wezulu ukuba zikhanyise emhlabeni; kwaba njalo. 16UNkulunkulu wenza izikhanyiso ezimbili ezinkulu, isikhanyiso esikhulu ukuba sibuse imini, lesikhanyiso esincinyane ukuba sibuse ubusuku; wenza lezinkanyezi. 17UNkulunkulu wazimisa emkhathini wezulu ukuba zikhanyise emhlabeni, 18lokuba zibuse imini lobusuku, zahlukanise ukukhanya lomnyama. UNkulunkulu wabona ukuthi kulungile. 19Kwaba khona ukuhlwa lokusa, kwaba lusuku lwesine.
20UNkulunkulu wasesithi: Amanzi kawagcwale izidalwa ezinengi eziphilayo, kuphaphe izinyoni ngaphezu komhlaba emkhathini wezulu. 21UNkulunkulu wadala izinsikabayitshiye, lenhlobo zonke zezidalwa eziphilayo lezihambayo, amanzi agcwala zona, lenhlobo zonke zenyoni eziphaphayo. UNkulunkulu wabona ukuthi kulungile. 22UNkulunkulu wazibusisa, wathi: Zalani, lande, ligcwalise amanzi olwandle, lenyoni zande emhlabeni. 23Kwaba khona ukuhlwa lokusa, kwaba lusuku lwesihlanu.
24UNkulunkulu wasesithi: Umhlaba kawuveze inhlobo zonke zezidalwa eziphilayo, izifuyo, lokuhuquzelayo, lezinyamazana zomhlaba ngenhlobo zazo; kwaba njalo.
25UNkulunkulu wenza inyamazana zomhlaba ngenhlobo zazo, lezifuyo ngenhlobo zazo, lakho konke okuhuquzela emhlabeni ngenhlobo zakho. UNkulunkulu wabona ukuthi kuhle.
26UNkulunkulu wasesithi: Asenze abantu ngomfanekiso wethu, basifuze, babuse phezu kwenhlanzi zolwandle, laphezu kwenyoni zaphezulu, lezifuyo, lenyamazana zonke zomhlaba, lakho konke okuhuquzela emhlabeni.#1 Kor 11:7
27UNkulunkulu wasemdala umuntu ngomfanekiso wakhe; wamdala ngomfanekiso kaNkulunkulu, owesilisa lowesifazana.#Gen 5:1, 2 #Mat 19:4; Mark 10:6 28UNkulunkulu wababusisa, wathi kibo: Zalani lande, ligcwalise umhlaba liwunqobe, libuse phezu kwenhlanzi zolwandle, lenyoni zaphezulu, lakho konke okuphilayo okuhamba emhlabeni. 29UNkulunkulu wasesithi: Khangelani, ngilinika yonke imibhida ethela inhlanyelo esemhlabeni wonke, lezihlahla zonke ezilezithelo eziveza inhlanyelo, ukuba kube yikudla kwenu. 30Zonke inyamazana zomhlaba lenyoni zonke zaphezulu lakho konke okuhuquzela emhlabeni okuphilayo, nginika zona yonke imibhida eluhlaza ukuba ibe yikudla; kwaba njalo. 31UNkulunkulu wasebona konke akwenzileyo; khangela, kwakukuhle kakhulu. Kwaba khona ukuhlwa lokusa, kwaba lusuku lwesithupha.
Выбрано:
Gen 1: BE1978
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Bible Society of Zimbabwe 1978
