मत्ती 10

यीशु का बारह चेला

(मर 3:13-19; लूका 6:12-16)

1अर यीशु न अपणा बारह चेलों तैं अपणा पास बुलै अर ऊंतैं मनखियों मा बटि खबेसों तैं निकळण को, अर सब किसमे बिमारियों तैं अर हरेक कमजोरियों तैं दूर करण को अधिकार दिनी।

2अर यीशु का खास चेलों का नौ इन छिन,

शमौन, जैकू पतरस भि बुले जान्दु,

अर वेकू भै अन्द्रियास,

जबदी का दुई नौना याकूब अर वेको भै यूहन्‍ना,

3फिलिप्पुस,

बरतुल्मै,

थोमा,

चुंगी लेण वळु मत्ती

हलफई को नौनु याकूब अर तद्‍दै,

4शमौन कनानी#10:4 शमौन कनानी जैकू शमौन जेलोतेस भि बुले जान्दु अर वेका नौ को मतलब एक देसभक्‍त अर उत्साही च।

अर यहूदा इस्करियोती जैन बाद मा यीशु तैं धोखा देके पकड़वै दिनी।

बारह चेलों को सेवा को काम करण

(मर 6:7-13; लूका 9:1-6)

5अर यीशु न यों बारह चेलों तैं इन आज्ञा देके भेजि कि, “ऊं लोगु का बीच मा नि जयां जु यहूदी जाति का नि छिन, अर ना ही सामरी लोगु का नगर मा जयां। 6पर इस्राएली कुटुम्ब का लोगु का पास ही जयां जु कि हरचि भेड़ों का जन छिन। 7अर जब तुम ये सफर तैं करिल्या त इन परचार कर्यां कि, ‘परमेस्वर राज करण वळु च अर उ नजदीक ही च।’ 8अर बिमारों तैं खूब कैरा, मुरयां लोगु तैं ज्यून्द कैरा, अर कोड़ियों तैं शुद्ध कैरा, अर खबेसों तैं मनखियों मा बटि निकाळा। अर जन यू अधिकार तुमतै मुफत मा मिली, ठिक उन्‍नि तुम भि लोगु तैं यू मुफत मा द्‍या।

9“अर अपणा बटुवा मा नऽ त सोना लियां अर ना चान्दी, अर ना ही तांबा#10:9 वे बगत मा सोना, चांदी, तांबा का सिक्‍का चलदा छा। इख मा यीशु को बोन्‍न को मतलब यू च कि अपणा बटुवा मा रुपया नि रखा। रख्यां। 10अर यात्रा खुणि नऽ त झोळा रख्यां अर ना ही दुई कुरता, नऽ त जुता अर ना लाठु रख्यां, किलैकि इन बुले जान्दु कि काम करण वळो तैं ऊंकी ध्याड़ि जरुर मिलण चयेणी।

11“अर जै भि नगर या गौं मा तुम जैल्या, त पता लग्यां कि उख काबिल मनखि कु च अर जब तक वे नगर या गौं बटि नि निकळिल्या, तब तक वेका इख ही रयां। 12अर जै घौर मा तुम जैल्या त सबसे पैलि ऊं लोगु कू बुलयां, ‘तुम लोगु तैं शान्ति मिलु।’ 13अर अगर उख कुई ये लैख होलु त शान्ति को जु आसिरबाद तुमुन ऊंतैं देई वु ऊं पर ठैरि जालु, अर अगर वु काबिल नि होलु त शान्ति को वु आसिरबाद तुमरा पास वापस ऐ जालु। 14अर अगर कुई तुमतै स्वीकार नि करलु, अर ना ही तुमरि बातों तैं सुणलु, त वे घौर या वे नगर बटि निकळद दौं अपणा खुटों पर लगीं धूळ तैं झाड़ि#10:14 खुटों पर लगीं धूळ तैं झाड़ि देण को मतलब इन च, कि लोगु का खिलाप मा गवै हो। द्‍या। 15अर मि तुमतै सच्‍चि मा बतै देन्दु, कि जन हालत #उत्पति 18:16; 19:29सदोम अर अमोरा की खराब ह्‍वे छै, वे नगर की हालत वेसे भि खतरनाक खराब होलि।”

औण वळा सतौ का बारा मा बतौण

(मर 13:9-13; लूका 21:12-17)

16अर यीशु न खास चेलों कू इन भि बोलि, “सुणा, जन भेड़ खतरनाक भेड़ियों का बीच मा जान्दी, ठिक उन्‍नि मि भि तुमतै बुरा लोगु का बीच मा भेजणु छौं। इलै गुरौ की तरौं चालाक अर कबूतर की तरौं सीदा बणा। 17अर लोगु से चौकस रा, किलैकि उ तुमतै न्याय खुणि पंचैत का हवाला कैरी द्‍याला, अर अपणा प्रार्थना भवनों मा तुम पर कोड़ा मरवाला। 18अर मेरी वजै से वु तुमतै सासन करण वळो अर राजाओं का समणि लि जाला, अर यू वु अवसर होलु जब तुम यों का अर ऊं लोगु का समणि मेरा गवा ह्‍वा जु यहूदी जाति का नि छिन। 19अर जब ऊ तुमतै पकड़वाला, त तुम इन चिन्ता नि कर्यां कि क्या बुलण अर कनकै बुलण, किलैकि जु कुछ भि तुमतै बोन्‍न होलु वु उबरि तुमतै बतये जालु। 20अर याद रखा कि बोन्‍न वळा तुम नि छाँ, बल्किन मा तुमरा भितर पिता परमेस्वर को पवित्र आत्मा च जु कि तुमरा द्‍वारा बोललु।

21“अर भै अपणा ही भै तैं जान से मरवौणु खुणि सौंपी द्‍यालु, अर ठिक उन्‍नि बुबा अपणा नौना तैं मरवौणु खुणि सौंपी द्‍यालु, इख तक की बाल-बच्‍चा अपणा ही ब्वे-बबों का खिलाप मा होला अर ऊंतैं मरवौणु खुणि सौंपी द्‍याला। 22अर वु तुम से इलै नफरत करला, किलैकि तुम मेरा नौ पर बिस्वास करद्‍यां, पर जु मनखि आखिरी तक सबर रखलु वेतैं ही बचयै जालु। 23अर जब वु लोग तुमतै ये नगर मा सताला तब तुम दुसरा नगर मा भागी जयां। अर मि तुम बटि सच्‍च बोन्‍नु छौं कि तुम इस्राएल देस का सब नगरों मा परचार पूरु भि नि कैरी सकिल्या कि तबरि तक मनखि को पुत्र ऐ जालु।

24“अर एक चेला अपणा गुरु से बड़ु नि होन्दु, अर ना ही एक नौकर अपणा मालिक से बड़ु होन्दु। 25अगर एक चेला अपणा गुरु का जन अर एक नौकर अपणा मालिक का जन ह्‍वे जौ, त वे खुणि इथगा भि काफी च। अर जब ऊं लोग न घौर का मालिक खुणि ही बालजबूल#10:25 शैतान को एक नौ बालजबूल भि च। बोलियालि, त वेका घौर का लोगु खुणि क्या कुछ नि बुलला?”

परमेस्वर पर अपणी पूरि सरदा रखा

(लूका 12:2-7)

26“इलै मि तुमतै बतै देन्दु कि, लोगु बटि नि डऽरयां किलैकि इन्दरि कुई भि बात नि च ज्वा की छिपी हो, अर वेको खुलासा नि किये जौ, अर ना ही कुई इन्द्रयो गुप्‍त राज छिप्यूं च जैको पता नि चलो। 27अर राज कि जु बात मि राति तुमतै बतौन्दु, तुम दिन का उज्याळा मा वु लोगु तैं बता, अर जु कुछ भि मिन तुमरा कन्दूड़ मा बोलि, तुम खुलाआम जैके लोगु मा वेको परचार कैरा। 28अर ऊं लोगु बटि नि डौऽरा जु तुमरि जान त ले सकदिन, मगर तुमरि आत्मा को नास नि कैरी सकदिन। पर मि तुमतै चितै देन्दु कि तुमतै परमेस्वर पर अपणी पूरि सरदा रखण चयेणी, अर वेसे डऽरण भि चयेणु, किलैकि उ तुमरा सरील अर आत्मा दुईयों तैं नरकलोक मा डालि के नास करण की ताकत रखदु।

29“अरे सुणा, क्या दुई घिंडुडि भौत कम कीमत मा नि बिकदिन? फिर भि तुमरा पिता परमेस्वर की इच्छा का बगैर ऊंमा बटि एक भि भ्वीं मा नि पोड़दिन। 30तुमरा मुण्ड़ का सब बाळ#10:30 “मुण्ड़ का सब बाळ” को मतलब यू च, कि पिता परमेस्वर तुमरि सब बातों की परवाह करदु। भि गिणयां छिन। 31इलै डौऽरा ना, किलैकि तुमरि कीमत भौत घिंडुडियों से भि जादा च।”

लोगु का समणि यीशु तैं स्वीकार करण

(लूका 12:8-9)

32अर यीशु न अपणा खास चेलों कू इन भि बोलि, “जु मनखि लोगु का समणि मितैं स्वीकार करलु, #दिब्य दरस 3:5मि भि वे मनखि तैं स्वर्ग मा रौण वळा पिता का समणि स्वीकार करलु। 33पर जु मनखि लोगु का समणि मितैं नकारी दयालु, त मि भि वेतैं स्वर्ग मा रौण वळा पिता का समणि नकारी द्‍यूलु।”

यीशु का पिछनै चलण से दुख-तकलीफ को मिलण

(लूका 12:51-53; 14:26,27; मर 9:41)

34“अर इन नि समझा कि मेरी वजै से लोगु का बीच मा शान्ति राली, मगर मि तुमतै बतै देन्दु कि मेरी वजै से त लोगु का बीच मा फूट पोड़ि जालि।

35 # मीका 7:6 “‘अर मेरी वजै से एक नौनु अपणा बुबा का खिलाप मा ह्‍वे जालु,

अर एक नौनि अपणा ब्वे का खिलाप मा, अर ठिक इन्‍नि एक ब्वारि अपणा सासु का खिलाप मा ह्‍वे जालि।

36अर मनखि का दुसमन वेका घौर का लोग ही होला।’

37“अगर कुई मनखि अपणा ब्वे-बाब तैं मिसे जादा प्यार करदु, त वु मेरु चेला होण का लैख नि च। अर ठिक उन्‍नि अगर कुई अपणा नौना या नौनि तैं मिसे जादा प्यार करदु, त उ भि मेरु चेला होण का लैख नि च। 38अर जु कुई अपणी क्रूस#10:38 इख मा यीशु को बोन्‍न को मतलब इन च कि, जु कुई वेको चेला बणण चान्दु वेतैं दुख अर मौत झिलण कू तयार रौण चयेणु। तैं लेके मेरा पिछनै नि चलदु उ भि मेरु चेला होण का लैख नि ह्‍वे सकदु। 39किलैकि जु कुई अपणा पराण तैं बचौण चालु, उ वेतैं ख्वे द्‍यालु। मगर जु कुई मेरा खातिर अपणा पराण तैं ख्वे द्‍यालु, उई मनखि सदनि को जीवन पालु।”

40अर यीशु न ऊंकू इन भि बोलि, “जु तुमतै स्वीकार करदु उ मितैं स्वीकार करदु। अर जु मितैं स्वीकार करदु उ वेतैं स्वीकार करदु जै पिता परमेस्वर न मितैं भेजि च। 41अर अगर कुई परमेस्वर का रैबर्या तैं रैबर्या समझि के स्वीकार करदु, त वे मनखि तैं उई इनाम मिललु जु की एक रैबर्या तैं मिलदु। अर अगर कुई एक धरमी मनखि तैं धरमी समझि के स्वीकार करदु, त वे मनखि तैं उई इनाम मिललु जु की एक धरमी तैं मिलदु। 42मि तुम बटि सच्‍च बोन्‍नु छौं कि, अगर कुई भि मनखि यों दीन चेलों मा बटि कै एक तैं भि मेरु चेला समझि के एक गिलास ठण्डु पाणि पिलालु, त वेतैं जरुर इनाम मिललु।”

Выбрано:

मत्ती 10: GBM

Выделить

Копировать