Wenía 9
9
Yové Koini nawã vai ato ashõti ivo yoã
1Askái Yové Koĩni Noé, ãwẽ vakerasĩnĩ ashõ vana roapa ato netãi vanai neskái. “Revosho, maitioi peás itsoma. 2Maĩ yoinavo, peiyavo, maĩ noyõ ikiya, maĩ meshoya, enẽ yoini akárasĩ mato rakéshoi shokokatsavo. Katsése mato ẽ kashma ashõai. 3Katsé yoinavorasĩ mã piá roase. Vevõ, piti vaná mato ẽ kashma ashõti keskásevi akĩ, katseki mato ẽ kashma ashõóai. 4Askámaĩnõ, nami imiyakĩ pitsomaroa. Ãwẽ imiro ãwẽ chinãvere. 5Askámaĩnõ yora avé yora imi ichná akãya ivo, yoini yora yamamaiya aká ivoro eã ato ẽ kopishokatsai. 6Yora avé yora yamamakĩ imi ichná akãya ivo, aaivo yora kopiki avé yorãsevi yamamaókatsa. Awesáma, ẽ yora vimaki, ea keská akĩ ẽ shovimatisho ã ikí. 7Askásho, revosho, maitioi peás itsoma, mai anõ atsoma”, ato akĩ.
8Aská txipo ato tanamaóki. 9“Ramaro mato tekísma ivo vana ẽ eneshokatsai, matomẽsho revokatsa ivorasĩ askásevi aká. 10Askávaíse matonĩ shokoarasĩ askásevi, yoini peiyavorasĩ, yoini iná ati ivorasĩ, niitero ivorasĩ, ashkã rãtxã shokosho matonĩ poshókõvai ivorasĩ aká, yoinavorasĩ katsése ato ẽ ashõókatsa. 11Tekísma ivo vana mato ẽ eneshoavere. Txipokiri chinã viayavorasĩ enẽ txivãmakĩ ea ato makimaotĩpá. Naaivo mai enẽ txivãmakĩ ea keyootĩpá”, akĩ.
12Askávai vanaói. “Tekísma ivo vana mato, matomẽsho revokatsa ivorasĩ, katsése chinã viayavorasĩ aká ẽ eneshoa. Askáinã mato ẽ neská ashõkatsa, anõsho mã onãtakĩ oĩti. 13Naí oshõ nawã vai ená ivo ẽ rakãkatsa, tekísma ivo vana anõsho onãtakĩ oĩnõvo iinã. 14Askái naí osho mai matxi ẽ ronõkémaĩnõ, anõsho nawã vai rakákekatsa. 15Askávai anõsho, yoinavorasĩnĩ ashõ mato, vana ẽ eneshoa ivo ẽ chinãkatsa. Txipokiríchta yoinavorasĩ enẽ ea keyootĩpá. 16Nawã vai naí oshõ rakákémaĩnõ oĩki tekísma ivo vana mai shavapa chinã viayavorasĩ ato ẽ eneshoa ivo ẽ chinãkatsa”, akĩ.
17Askái vanai mashtékaĩkatsiinã ato tanamaóki. “Naaivo nawã vai ẽ netãro anõsho tekísma ivo vana nõ chinãti”, akĩ Yové Koĩni.
Camne ãwẽ papa ati ati ivo yoã
18Noepa vakerasĩ, rãtxãsho poshokõyavorasĩro Sem, Cam, Jafé aatíi. Camro Canaãne papa. 19Naa 3 venevakerasĩro, anõsho yorarasĩ naaivo mai shavátioi shokotivo.
20Askámaĩnõ Noéro piti merámayashõ ãatõpari txitáki wai avaikĩ uva vanati. 21Askái shavá wetsã, ã ene tanashoma avaí vetsakawãsho ãwẽ peshé naki pakésho, txĩto rakái. 22Ãwẽ askámaĩnõ, Camne, txĩtopakésho ãwẽ rakáa oĩvaíki, kashõ ãwẽ takevo ato yoãshoi kakĩ.#9.22 Neno Hebraicõ vana “ãwẽ papa txĩto oĩa” ikí ivo, wetsã chinãro txĩtose, wetsã chinãro ãwẽ aĩ oĩkãa aká 23Aská nĩkãinã Sem, Jafé aatiisho õpo kevika ivo atõ peshõ poẽnivai voshõ, ãwẽ txĩto rakákiri oĩtanamasmẽkĩ txichtikiri ikõvaĩi voshõ, atõ papa õpõ iwapakévo.
24Atõ askámaĩnõ vetsa tãti avaí vesokaĩsho, ãwẽ vake txipoketõ avai ivo tanainã, vanainái. 25“Canaã askaĩkõtikĩ ẽ iki ãwẽ takevõ ati akĩ isĩpa akĩ mee imaki. 26Askámaĩnõ Yavé, Sem anõ txipoa ivo Yovéro roapa. Semro Canaã yonoa ave ninõ. 27Askámaĩnõ Jaféro Yové Koĩni revomaa ave peás inõ. Semnĩ ave ninõ. Askái Canaã ati akĩ mee ima ave ninõ”, ikí Noé.
28Askávai, enẽ txivãvai txipo, Noé 350 vari tavái nióti. 29Askái katsékasero 950 vari tavái nishõ vopiti.
Выбрано:
Wenía 9: YKV
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Active: © Wycliffe Bible Translators, Inc. All rights reserved
