Wenía 7
7
Enẽ txivãti ivo yoã
1Askávai txipo Yavepa Noé tanamakĩ, “mia, mĩ aĩ, mĩ vakerasĩ, atõ aĩvorasĩ aatii rãtxã weina. Mia westíse chinã meki yora ẽ oĩvaĩvaĩa. 2Askái yoini koĩ, anõ eséyatima ivoro#7.2 Yoini anõ eséyakĩma oĩa ivoro piá roase, maki aká roase aká 7 tanáti akĩ ãwẽ aĩnĩ ashõ ato weimatso. Askámaĩnõ yoini koĩma, anõ eséya ivoro#7.2 Yoini anõ eséya ivoro pitima, maki akáma aká vene ãwẽ aĩ aká ravé ashõ ato weimatso. 3Yoini peiyavorasĩ ato askásevi aotso, 7 tanátíisevi ãwẽ vene, ãwẽ aĩ aká ato weimaótso, keyói makimísivo. 4Nenosho 7 shavá nokókaĩmaĩnõ oi ẽ pakekatsa, 40 shavá tavái oi ikí, ii ii varikawãi, ii ii yamékawãi aká ikatsai. Naaivo mai shavapa ato ẽ shovimati ivo, chinã viayavorasĩ katseki ato ẽ keyokatsa”, akĩ.
5Yavepa aská akatõsho, Noepa ãwẽ yonoa keská akĩ katseki ashõki. 6Aatiã 600 vari aya, enẽ ato txivãtitiã. 7Aská akĩ enẽ ato txivãkatsa vevo, aa, ãwẽ aĩ, ãwẽ vakerasĩ, atõ aĩvorasĩ aatii rãtxã weivo. 8Atõ askámaĩnõ, yoini venepavo, yoini koĩ ivo, yoini koĩma ivo, maĩ noyõ ikiya, maĩ meshoya, peiyavo akárasĩ, 9atõ aĩyai rãtxã Noénĩ weivo, Yové Koĩni yonoa keská akĩ. 10Askávai txipo, 7 shavá tavákémaĩnõ, enẽ mai ivo ainakĩ.
11Aatiã Noé 600 vari nokóvaí, oshe westíkase tavákei, oshe wetsa nokóoi, 17 shavá aya. Aaivo shavapásevi, maĩsho ene kayarasĩ tovíkaĩi, naí shavapashõ ene kayarasĩ vepẽnaói akí veyánanãvakĩi. 12Askái oi askáseviói, 40 shavá oi ikí, ii ii varikawãi, ii ii yamékawãi aí.
13Aaivo shavapasevi Noé, ãwẽ aĩ, ãwẽ vakerasĩ, Sem, Cam, Jafé, atõ aĩvorasĩ aatii rãtxã weivo. 14Askámaĩnõ yoini õsi õsipavo, atõ aĩvorasĩnĩ ato õsíi weivo, niitero ivo, iná aká ivo, maĩ noyõ ikiyavo, maĩ meshoyavo, peiyavo, akárasĩ õsíi weivo. 15Atõ aĩnĩ rãtxã Noénĩ weii, wetsa ravévakĩ, wetsa ravévakĩ akávo. 16Katsése chinã viayavorasĩ atõ aĩvorasĩnĩ weivo, Noé ãwẽ tanamavai keskáki. Askámaĩnõ Yavepa ato kepoki.
17Askái 40 shavá ene ãtsa isi, nasháma. Rãtxa mai enenimashõ nonõki. 18Enẽ ãtsaki mai ãwẽ ivo ainámaĩnõ rãtxa nonóinái. 19Ene inóimaise ãtsa ãtsa isi. Askáki mató keyápavorasĩ ato ivo ainakĩ. 20Enẽ mató tokopamavorasĩ ivo tavaníki. 7 metros tanáti nokoki. 21Ãwẽ askámaĩnõ, naa mai shavapa shokoyavorasĩ, katsése chinã viayavorasĩ keyói, yoini peiyavorasĩ, iná atirasĩ, yoini rawemarasĩ, maĩ yoini potochtarasĩ, yorarasĩ aká õsiki ato keyoki. 22Mai mãkõne shokoyavo, chinã viayavorasĩ aká keyóti. 23Askái keyótivo, naaivo mai shavapa shokoyavorasĩ, yora, yoini, maĩ noyõ ikiya, maĩ meshoya, peiyavo, akárasĩ keyótivo. Askámaĩnõ Noénĩ rãtxã pashayavorasĩchtase teshékétivo.
24Askái ene inoi. 150 shavá tavái rakáti.
Выбрано:
Wenía 7: YKV
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Active: © Wycliffe Bible Translators, Inc. All rights reserved
